PANNAKAISAAD

Ti panangdutok iti maysa tapno agakem a padi. Ti Hebreo a sao maipaay iti “pannakaisaad” (mil·lu·ʼimʹ) literal a kaipapananna ti “panangpunno,” kayatna a sawen, panangpunno iti ima iti pannakabalin, panangted iti pannakabalin. (Ex 29:22, Rbi8 ftn; idiligyo ti Eze 43:26, Rbi8 ftn; kitaenyo ti PUNNUEN TI IMA ITI PANNAKABALIN.) Daytoy a termino ket naaramat met maipaay iti “panangitampok” kadagiti alahas.​—1Cr 29:2.

Ni Aaron ken ti annakna ket naala manipud Cohatita a pamilia iti tribu ni Levi tapno agserbida kas papadi maipaay iti Israel. (Ex 6:16, 18, 20; 28:1) Ti pannakaisaadda ket naangay iti pito nga aldaw, nalawag a naibatog idi Nisan 1-7, 1512 K.K.P., bayat ti panagpakarso ti Israel iti sakaanan ti Bantay Sinai iti Peninsula ti Arabia. (Ex 40:2, 12, 17) Kalkalpas idi a nakompleto ti tolda ti gimong ken naipasdek iti umuna nga aldaw ti bulan; napilin ni Jehova ti pamilia nga agserbi kas papadi; ket ita, kas manangibabaet iti Linteg ti tulag, nabilin ni Moises a kabsat ni Aaron nga angayenna ti seremonia ti pannakasantipikar ken pannakaisaadda. Nailanad iti Exodo kapitulo 29 dagiti naibilin a pamay-an, ket nairekord iti Levitico kapitulo 8 no kasano nga intungpal ni Moises ti seremonia.

Iti dayta nga umuna nga aldaw, bayat ti kaadda ni Jehova nga inladawan ti munmon nga ulep iti ngatuen ti tabernakulo (Ex 40:33-38), inurnong ni Moises amin a bambanag a maisakripisio: ti toro, ti dua a kalakian a karnero, ti labba dagiti di pinaalsa a tinapay, ti pangpulot a lana, ken dagiti kawes ti papadi. Kas naibilin, inayabanna ti kongregasion ti Israel, a nalabit tumukoy iti lallakay kas pannakabagi ti intero a kongregasion, nga aguummongda iti pagserkan ti tolda ti gimong, iti ruar ti kortina a naipalikmut iti paraangan. Yantangay awan duadua a makitkitada ti mapaspasamak iti paraangan, nalabit naikkat ti tabing iti pagserkan, a 20 kasiko (8.9 m; 29 pie) ti kaakabana.​—Le 8:1-5; Ex 27:16.

Ni Moises binugguanna ni Aaron ken ti annak ni Aaron a da Nadab, Abihu, Eleazar, ken Itamar (wenno, binilinna ida a bugguanda ti bagbagida) iti palanggana a gambang iti paraangan sana kinawesan ni Aaron kadagiti nadayag a kawes ti nangato a padi. (Nu 3:2, 3) Gapu ta sikakawesen ni Aaron iti napintas a pagan-anay, nayaruat kenkuanan dagiti pagan-anay a mangiladladawan kadagiti kualidad ken rebbengen ti akemna. Idin sinapsapuan ni Moises ti tabernakulo, amin nga alikamen ken aruaten dayta, ken ti altar ti daton a mapuoran, kasta met ti palanggana ken dagiti aruaten a naaramat mainaig kadagita. Daytoy ti nangsantipikar kadagita, nangilasin kadagita maipaay iti naipamaysa nga usar ken panagserbi iti Dios nga isu itan ti pagpaayanda. Kamaudiananna, ni Moises pinulotanna ni Aaron babaen ti panangibukbokna iti lana iti ulo daytoy.​—Le 8:6-12; Ex 30:22-33; Sal 133:2.

Toro a Maipaay iti Daton Gapu iti Basol. Simmaruno iti daytoy, kinawesan ni Moises ti annak ni Aaron, a kalpasan dayta binilinna da Aaron ken ti annakna nga ipatayda ti im-imada iti ulo ti toro maipaay iti daton gapu iti basol, a dayta a tignay ti mangipamatmat a bigbigenda a ti daton ket agpaay kadakuada, ti balay ti papadi. Kalpasan ti panangparti ni Moises iti toro, inkabilna ti dadduma iti dara iti altar ket ti natedda imparukpokna iti puon ti altar, a dayta ti mangisimbolo iti pannakadalus manipud iti tulaw nga inyeg ti managbasol a kasasaad ti papadi a nagannong iti altar. Ti pannakaikabil ti dara kadagiti sara ti altar nabatad nga ipamatmatna a ti bileg ti urnos ti sakripisio agpannuray iti naiparukpok a dara ti sakripisio. (Heb 9:22) Nakalikaguman met ti panangwarsi iti altar iti dara ti dadduma pay a daton. (Le 1:5, 11; 3:2; 4:6; 16:18) Nupay kasta, paliiwenyo ta ti dara ti toro saan a naiserrek iti Kasasantuan gapu ta daytoy ket ‘aldaw a pannakadutok’ maipaay iti kinapadi, saan a ti aldaw ti panangabbong ti intero a nasion maipaay iti basbasol. (Kitaenyo ti Le 16:14.) No maipapan iti dadduma pay a daton gapu iti basol, ti taba iti rabaw dagiti bagis, ti kulanit ti dalem, ken ti dua a bekkel agraman ti tabada naikabil iti rabaw ti altar. (Le 4:8-10, 20, 26, 31) Ti natedda iti toro, agraman ti lalat ken iblengna, naipan iti ruar ti pakarso tapno mapuoran.​—Le 8:13-17.

Dagiti Sakripisio a Kalakian a Karnero. Sumaganad, impatay da Aaron ken ti annakna ti im-imada iti kalakian a karnero a maaramat kas daton a mapuoran, ket naparti dayta, a ti dadduma iti darana naiwarsi iti rabaw ti altar. Kalpasanna narangrangkay ti kalakian a karnero, nabugguan, ken napuoran iti altar; ngem saan a karaman ti ibleng ken ti lalat. (Le 7:8) Gapu ta naidaton a naan-anay daytoy a kalakian a karnero kas daton a mapuoran, nga awan ti naibati a kanen ti asinoman a tao, ngarud naan-anay met a nasantipikar dagitoy a papadi agpaay iti nasantuan, napadian a panagserbi ken Jehova.​—Le 8:18-21; idiligyo ti Le 1:3-9.

Naparti ti sabali pay a kalakian a karnero, “ti kalakian a karnero ti pannakaisaad,” kalpasan nga impatay dagiti papadi ti im-imada iti dayta. Ditoy naiduma ti pannakaaramat ti dara. Ti dadduma iti dayta ket naikabil iti makannawan a piditpidit, makannawan a tangan ti ima, ken makannawan a tangan ti saka ni Aaron ken ti annakna; gapuna dagiti abilidad nga iladladawan dagitoy a kamkameng ti bagi ket rumbeng a maaramat a naan-anay iti annongenda a panagisakripisio a paset ti ministerioda. Ti natedda iti dara inwarsi ni Moises iti rabaw ti altar.​—Le 8:22-24.

Sakbay a maaramid ti gagangay a panangidaton iti taba nga adda iti aglikmut dagiti paspaset ti kalakian a karnero, naiparabaw dagita iti makannawan a luppo ti kalakian a karnero agraman ti saggaysa iti tunggal klase ti tallo a kita ti di pinaalsa a tinapay a naala iti labba. Ita, maikabil amin dagitoy kadagiti dakulap ni Aaron ken ti annakna ket inlili ni Moises dagitoy iti sanguanan ni Jehova, a nabatad nga inaramid ni Moises ti kasta bayat a taptapayaenna ti im-ima dagiti papadi. Daytoy ti mangipakita a ‘napunno ti im-imada iti pannakabalin,’ kayatna a sawen, napunno iti sakripisio a sagsagut ken naan-anay a nakabalan ken naipaayan iti pannakabalin nga agannong iti panagisakripisio. Naipakita a saanda laeng nga autorisado a mangidaton iti nataba a paspaset iti rabaw ti altar no di ket autorisadoda met nga umawat iti sagsagut a naipaay a pagtaraonda, a dayta ti naruay nga urnos ni Jehova maipaay iti papadina. Gagangay a maited koma iti agan-annong a padi kas bingayna ti nailili a paset ti kalakian a karnero, ti makannawan a luppo. (Le 7:32-34; Nu 18:18) Ngem iti daytoy a gundaway, napuoran amin dagita iti rabaw ti altar. Ngarud agpadpada a naidatag (nailili) dagita iti sanguanan ni Jehova ken aktual a naidaton kas panangbigbig a sagut amin dayta ni Jehova iti kinapadi.​—Le 8:25-28.

Bayat a maang-angay ti pannakaisaad, ni Moises, nga agak-akem iti kapasidad kas padi, inawatna ita kas bukodna a bingay ti barukong a naala manipud iti kalakian a karnero a naaramat iti pannakaisaad, kalpasan ti panangidatagna iti dayta kas daton a mailili.​—Le 8:29; kitaenyo met ti Ex 29:26-28.

Ti dadduma iti dara ti kalakian a karnero agraman ti pangpulot a lana (nalawag a napaglaok) ket naiparsiak ken Aaron, iti annakna, ken kadagiti kawesda, tapno santipikaren ida. Daytoy met ti nangipakita nga isuda ti agakem iti panagisakripisio, kas inwanwan ti espiritu ti Dios. Awan ti nadakamat a napulotan ti annak ni Aaron babaen ti panangibukbok iti lana iti uloda, kas iti naaramid ken Aaron.​—Le 8:30.

Iti pagserkan ti tolda ti gimong, ilambong ni Aaron ken ti annakna ti paset ti lasag ti kalakian a karnero a saan a napuoran iti altar wenno naited ken Moises. Kanenda dayta, a karaman dagiti tinapay a nabati iti labba, ngem puoranda iti sumaruno a bigat ti aniaman a natedda iti daytoy a taraon. Daytoy ti mangipaganetget iti kinadalus ken kasta met a mangigunamgunam iti kinanaan-anay ti naaramid a panangsantipikar kadakuada ken ti panagserbida (agsipud ta awan ti aniaman a nabulok wenno nabangles a paset ti kinnanda, ken naan-anay a naipuor dagiti nabatbati). Makapainteres met nga awanan iti lebadura dagiti tinapay.​—Le 8:31, 32; Ex 29:31-34.

Panagleppas ti Pannakaisaad. Ti pannakaisaad ket nagpaut iti pito nga aldaw, ket saan a naan-anay a makapagannong dagiti papadi agingga a saan a nalpas dayta. Iti tunggal aldaw, naisakripisio ti maysa a toro kas daton gapu iti basol tapno panggugor iti altar. Iti intero a pito nga aldaw, dagiti kadutdutok a papadi kasapulan nga agsaadda iti pagserkan ti tolda ti gimong iti aldaw ken rabii, a salimetmetanda “ti inkapilitan a panagbantay ni Jehova,” tapno saanda a matay.​—Le 8:33-36; Ex 29:35-42.

Iti maikawalo nga aldaw, yantangay naan-anayen a nakabalan ken naisaad ti papadi iti akemda, nagannongda (nga awan panangtulong ni Moises) iti umuna a gundaway, nga inaramidda ti serbisio a panangabbong maipaay iti nasion ti Israel, nga agkasapulan unay iti pannakadalus saan laeng a gapu iti nainkasigudan a kinamanagbasolda no di ket gapu met iti nabiit pay a panagsukirda mainaig iti nabalitokan a kigaw a baka, a namagluksaw ken Jehova. (Le 9:1-7; Ex 32:1-10) Idi agleppasen daytoy umuna a panagserbi ti kaisasaad a kinapadi, imparangarang ni Jehova ti pananganamong ken panangpasingkedna iti akemda babaen ti panangibaonna iti namilagruan nga apuy nga awan duadua a nagtaud dayta iti munmon nga ulep iti ngatuen ti tabernakulo, a dayta ti nanglamut iti nabatbati iti sakripisio iti rabaw ti altar.​—Le 9:23, 24.

Awan ti nairekord iti Biblia nga adda naaramid a seremonia ti pannakaisaad maipaay kadagiti suno ni Aaron. Nabatad nga umanayen daydiay naaramid a serbisio ti pannakaisaad tapno mamimpinsanen a maisaad ti Aaroniko a sangakabbalayan ken iti amin a lallaki a putotna iti akemda kas papadi, nga agtultuloy dayta iti tiempo a di nakedngan, agingga a maisaad iti akem ti pudno ken agnanayon a nangato a padi a ni Jesu-Kristo.​—Heb 7:12, 17; 9:11, 12; kitaenyo ti NANGATO A PADI; PADI.