UMAP-APUY NGA ULEG

Ti pangadu a porma ti Hebreo a nombre a sa·raphʹ ket naipatarus a “dagiti serafin” iti Isaias 6:2, 6 ken literal a kaipapananna ti “daydiay umap-apuy,” wenno “daydiay sumsumged.” Maar-aramat met daytoy mainaig iti kadawyan a Hebreo a termino maipaay iti serpiente (na·chashʹ) ken naipatarus a “nagita,” nalabit tumukoy iti naapges ken mamagletteg nga epekto ti gita. (De 8:15) Damo a nadakamat dayta idi dinusa ti Dios dagiti rebelioso nga Israelita babaen ti panangibaonna kadagiti “nagita a serpiente [han·necha·shimʹ has·sera·phimʹ]” iti tengngada. Kalpasan ti ibaballaet ni Moises, binilin ni Jehova a mangaramid iti “umap-apuy nga uleg” ket ikabilna dayta iti maysa a pagilasinan a teddek. No kumita iti dayta dagiti nakagat, umimbag ken agbiagda. Ni Moises ti nangaramid iti dayta nga uleg a gambang. (Nu 21:6-9; 1Co 10:9) Imbaga ni Jesus ti naimpadtuan a kaipapanan daytoy idi kinunana: “No kasano nga imbayog ni Moises ti serpiente idiay let-ang, kasta met a masapul a maibayog ti Anak ti tao, tapno tunggal maysa a mamati kenkuana maaddaan iti agnanayon a biag.”​—Jn 3:14, 15.

Iti Isaias 14:29 ken 30:6, adda “umap-apuy nga uleg a sumsumiag” a nadakamat iti panangukom ti Dios iti Filistia ken iti pannakailadawan ti let-ang iti abagatan ti Juda. Ti sao a “sumsumiag” ket imbilang ti dadduma a tumukoy iti nakaparpartak a panagtukkaw dagiti nagita nga uleg no dumarupda.