PANANGUBOR

Iti sidong ti Linteg, ti maysa a managdakdakes a maikari iti kadagsenan a dusa ket kadawyanna a maubor iti bato agingga a matay. (Le 20:2) Daytoy ti pamay-an a ‘panangikkatda iti dakes iti tengngada.’ Madamag ti intero nga Israel ti dusa, iti kasta mayukuok iti puspusoda ti panagbuteng nga agaramid iti dakes. (De 13:5, 10, 11; 22:22-24) No uborenda ti managaramid iti dakes, ipakpakitada a nasungdoda iti pudno a panagdaydayaw, a maseknanda nga awan koma ti pakaumsian ti nagan ti Dios, ken kayatda a pagtalinaeden a nadalus ti kongregasion.

Sakbay a maubor ti maysa a managdakdakes, di nakurkurang ngem dua a saksi ti masapul a mangipaay iti agtunos a pammaneknek maibusor kenkuana, ket kalpasanna isuda ti umuna a mangbarsak. (Le 24:14; De 17:6, 7) Gapu ta posible a ti maysa tao isunto met laeng ti agbalin a manangdusa, kasapulan nga utobenna a nalaing ti ipaayna a pammaneknek, ken awan duadua a daytoy ti manglapped iti panangipaay iti ulbod a pammaneknek, ta no maduktalan a kasta ti inaramid ti ulbod a saksi, mapapatayto met a mismo.​—De 19:18-20.

Awan duadua nga iti ruar ti siudad ti nangar-aramidanda iti panangubor. (Nu 15:35, 36; 1Ar 21:13; igidiatyo iti De 22:21.) Kalpasanna, ti bangkay mabalin a mailansa iti maysa a poste tapno agserbi kas pammakdaar, ngem saan a mabalin a malnekan iti init. Maitabon iti dayta met laeng nga aldaw.​—De 21:21-23.

Dinakamat ni Jesus ti Jerusalem kas “mammapatay kadagiti mammadto ken manangubor kadagidiay naibaon kenkuana.” (Mt 23:37; idiligyo ti Heb 11:37.) Ni Kristo a mismo ket kayatda idi nga uboren. (Jn 8:59; 10:31-39; 11:8) Napapatay ni Esteban babaen ti pannakaubor. (Ara 7:58-60) Idiay Listra, dagiti panatiko a Judio “inuborda ni Pablo ken inulodda iti ruar ti siudad, nga impagarupda a natayen.”​—Ara 14:19; idiligyo ti 2Co 11:25.

No maipapan kadagiti basol a madusa iti pannakaubor, kitaenyo ti KRIMEN KEN DUSA.