Ni Jehova ti Bingayko

“Siak ti binglaymo ken tawidmo iti tengnga ti annak ti Israel.”​—NUM. 18:20.

1, 2. (a) Ania ti kasasaad dagiti Levita no maipapan iti tawid a daga? (b) Ania ti impanamnama ni Jehova kadagiti Levita?

KALPASAN a nasakup dagiti Israelita ti adu a paset ti Naikari a Daga, biningbingay ni Josue ti daga babaen ti binnunot. Kaduana ti Nangato a Padi a ni Eleazar ken dagiti panguluen ti tribu a nangaramid iti dayta. (Num. 34:13-29) Ngem saan a naikkan dagiti Levita iti tawid a daga a kas iti dadduma a tribu. (Jos. 14:1-5) Apay nga awan ti tawid, wenno bingayda, iti Naikari a Daga? Nabaybay-anda kadi?

² Masarakantayo ti sungbat iti imbaga ni Jehova kadagiti Levita. Impasiguradona a dina ida baybay-an idi kinunana: “Siak ti binglaymo ken tawidmo iti tengnga ti annak ti Israel.” (Num. 18:20) Anian a nagdakkel a pammatalged: “Siak ti binglaymo”! Ania ti mariknam no imbaga a mismo kenka dayta ni Jehova? Mabalin a ti damo a reaksionmo ket, ‘Maikariak ngata iti kasta a pammatalged manipud iti Mannakabalin-amin?’ Mabalin a mapanunotmo met, ‘Posible kadi nga agbalin ni Jehova a bingay ti asinoman nga imperpekto a Kristiano ita?’ Dagita a saludsod ket napateg kenka ken kadagiti ay-ayatem. Gapuna, kitaentayo no ania ti kaipapanan dagita a sasao ni Jehova tapno matarusantayo no kasano nga Isu ti bingay dagiti Kristiano ita ken no kasano nga Isu ti bingaymo, idiay man langit wenno iti paraiso a daga ti namnamam.

Ipaay ni Jehova ti Kasapulan Dagiti Levita

 3. Ania ti makagapu a pinili ti Dios dagiti Levita nga agserbi kenkuana?

³ Sakbay nga inted ni Jehova ti Linteg kadagiti Israelita, dagiti ulo ti pamilia ti agserbi kas papadi kadakuada. Idi naiteden ti Linteg, inyurnos ti Dios a dagiti agserbi a papadi ken dagiti katulonganda ket agtaud iti tribu ni Levi. Kasano a napasamak dayta? Idi pinapatay ti Dios dagiti inauna nga annak ti Egipto, sinantipikarna dagiti inauna nga annak ti Israel, nga insinana ida kas kukuana. Kalpasanna, nangaramid iti dakkel a panagbalbaliw: “Alaek dagiti Levita . . . a sandi ti isuamin nga inauna iti annak ti Israel.” Gapu ta ad-adu ti bilang dagiti inauna nga annak ti Israel ngem kadagiti Levita, masapul nga adda maibayad a kasukat ti sobra a bilang. (Num. 3:11-13, 41, 46, 47) Iti kasta, mabalinen nga itungpal dagiti Levita ti annongenda nga agserbi iti Dios ti Israel.

4, 5. (a) Ania ti kaipapananna kadagiti Levita ti panagbalin ni Jehova a bingayda? (b) Kasano nga ipaay ti Dios ti kasapulanda?

⁴ Ania ti kaipapanan dayta nga annongen para kadagiti Levita? Kuna ni Jehova nga imbes nga umawatda iti tawid a daga, isu ti bingayda gapu ta naitalek kadakuada ti nakapatpateg a pribilehio. Ti tawidda ket “ti kinapadi ken Jehova.” (Jos. 18:7) Ipakita ti konteksto ti Numeros 18:20 a saanda met a pumanglaw. (Basaen ti Numeros 18:19, 21, 24.) Maikkan dagiti Levita iti “tunggal apagkapullo iti Israel kas tawid a supapak ti panagserbida.” Umawatda iti 10 a porsiento iti amin nga apit ti Israel ken kadagiti immaduan dagiti dinguenda. Ngem mangted met dagiti Levita iti apagkapullo ti inawatda, ti “kasayaatan iti dayta,” kas pangsuporta iti kinapadi.a (Num. 18:25-29) Maited met kadagiti papadi ti “amin dagiti nasantuan a kontribusion” nga ited dagiti annak ti Israel iti Dios iti lugar a pagdaydayawan. Makapagtalek ngarud dagiti papadi nga ipaay ni Jehova ti kasapulanda.

⁵ Nadakamat iti Mosaiko a Linteg ti maikadua nga apagkapullo. Usaren dayta dagiti pamilia nga Israelita para iti taraon ken iti panangtagiragsakda kadagiti tinawen a nasantuan a kombension. (Deut. 14:22-27) Ngem iti ngudo ti tunggal maikatlo ken maikanem a tawen bayat ti pito a tawen, usaren dagiti Israelita daytoy nga apagkapullo para kadagiti napanglaw ken Levita. Apay a karaman dagiti Levita? Gapu ta ‘awan bingay wenno tawidda’ iti Israel.​—Deut. 14:28, 29.

 6. Gapu ta awan ti daga a tawid dagiti Levita, sadino ti pagyananda?

⁶ Mabalin a pampanunotem, ‘No awan ti naited a daga kadagiti Levita, sadino ti pagyananda?’ Impaayan ida ti Dios iti 48 a siudad nga addaan kadagiti pagpaaraban. Innem kadagita ket siudad a pagkamangan. (Num. 35:6-8) Gapuna, adda pagnaedan dagiti Levita no awanda iti santuario ti Dios. Ipaay ni Jehova ti amin a kasapulan dagidiay situtulok nga agserbi kenkuana. Maipakita ngarud dagiti Levita a ni Jehova ti bingayda no agtalekda a kayat ken kabaelanna nga ipaay ti kasapulanda.

 7. Ania ti maikalikagum kadagiti Levita tapno agbalin a bingayda ni Jehova?

⁷ Awan ti dakamaten ti Linteg a madusa dagiti Israelita no dida makaited iti apagkapullo. Ngem no saanda a mangted, maapektaran dagiti papadi ken Levita. Kasta ti napasamak idi kaaldawan ni Nehemias. Napilitan a nagtrabaho dagiti Levita iti talon isu a nabaybay-anda ti annongenda. (Basaen ti Nehemias 13:10.) Nalawag nga adda pakainaigan ti panangsustento iti tribu ni Levi iti espiritualidad ti nasion. Kanayonanna, dagiti papadi ken Levita masapul nga agtalekda ken Jehova ken iti pamay-anna a mangipaay iti kasapulanda.

Dagiti Indibidual a Namagbalin ken Jehova a Bingayda

 8. Ania ti nakariribukan ti Levita a ni Asaf?

⁸ Kas maysa a tribu, ni Jehova ti bingay dagiti Levita. Ngem makapainteres ta imbaga met dagiti indibidual a Levita: “Ni Jehova ti binglayko,” kas panangyebkasda iti debosion ken panagtalekda iti Dios. (Un. 3:24) Maysa kadakuada ti Levita a kumakanta ken kompositor. Awagantayo iti Asaf, nupay mabalin a maysa a kameng ti sangakabbalayan ni Asaf, ti Levita a nangidaulo kadagiti kumakanta idi kaaldawan ni Ari David. (1 Cron. 6:31-43) Mabasatayo iti Salmo 73 a ni Asaf (wenno maysa kadagiti kaputotanna) ket nariribukan. Immapal kadagiti nadangkes a nanam-ay ti biagda ken naibagana pay ketdi: “Sigurado a kinaubbaw ti panangdalusko iti pusok ken ti panangbuggok kadagiti imak iti mismo a kinaawan basol.” Agparang a dina naipateg ti naisangsangayan a pribilehiona ken nalipatanna ni Jehova kas bingayna. Nariribukan ‘agingga a simrek iti naindaklan a santuario ti Dios.’​—Sal. 73:2, 3, 12, 13, 17.

9, 10. Apay nga imbaga ni Asaf a ti Dios ti ‘bingayna agingga iti tiempo a di nakedngan’?

⁹ Iti santuario, nangrugi a matarusan ni Asaf dagiti bambanag a kas iti panangmatmat ti Dios. Mabalin a napasaram met dayta. Nalabit dimo maipateg no dadduma dagiti naespirituan a pribilehiom ket ipamaysam dagiti material a banag. Ngem gapu iti panagadal iti Sao ti Dios ken pannakigimong, matarusam manen dagiti bambanag kas iti panangmatmat ni Jehova. Nautob ni Asaf no ania ti pagbanagan dagiti nadangkes. Napanunotna ti kasasaadna ken naamirisna nga arigna ig-iggaman ni Jehova ti makannawan nga imana ken idaldalanna. Gapuna, naibagana ken Jehova: “Malaksid kenka awanen ti sabali pay a pakaragsakak iti daga.” (Sal. 73:23, 25) Kalpasanna, tinukoyna ti Dios kas bingayna. (Basaen ti Salmo 73:26.) Nupay ‘kumapuy ti bagi ken puso’ ti salmista, ti Dios ti ‘bingayna agingga iti tiempo a di nakedngan.’ Agtalek ti salmista nga isu ket laglagipen ni Jehova kas gayyemna. Dinto lipaten ti Dios ti matalek a panagserbina. (Ecl. 7:1) Anian a makaliwliwa dayta ken Asaf! Inkantana: “No maipapan kaniak, ti iyaadani iti Dios naimbag kaniak. Iti Soberano nga Apo Jehova insaadko ti kamangko.”​—Sal. 73:28.

¹⁰ Para ken Asaf, napatpateg ni Jehova a bingayna ngem kadagiti material a maaw-awatna kas maysa a Levita. Ti kangrunaan a tuktukoyenna ket ti pribilehiona a panagserbi ken ti relasionna ken Jehova, ti pannakigayyemna iti Kangatuan. (Sant. 2:21-23) Tapno maaramidna dayta, masapul a taginayonenna ti pammati ken panagtalekna ken Jehova. Kombinsido ni Asaf a nasayaat ti pagbanaganna no agbiag a maitunos iti pagalagadan ti Dios. Mabalinmo met ti maaddaan iti kasta a panagtalek iti Kangatuan.

11. Ania ti insaludsod ni Jeremias, ken kasano a nasungbatan?

¹¹ Ni propeta Jeremias ti sabali pay a Levita a nangibilang ken Jehova kas bingayna. Usigentayo no ania ti kayatna a sawen idi inyebkasna dagita a sasao. Nagnaed ni Jeremias idiay Anatot, maysa a siudad dagiti Levita iti asideg ti Jerusalem. (Jer. 1:1) Adda idi gundaway a nariribukan ni Jeremias: Apay a sumaysayaat ti biag dagiti nadangkes idinto ta agsagsagaba dagiti nalinteg? (Jer. 12:1) ‘Nagreklamo’ idi napaliiwna ti mapaspasamak idiay Jerusalem ken Juda. Ammo ni Jeremias a nalinteg ni Jehova. Ti impaipadto ni Jehova ken Jeremias ken ti pannakatungpal dagita ti nangted iti natibker a sungbat iti saludsod ti propeta. Kas naipadto, dagidiay agtulnog iti bilin ni Jehova ‘awatendanto ti kararuada kas samsam,’ ngem dagidiay nadangkes a di mangikankano iti pakdaar mapapataydanto.​—Jer. 21:9.

12, 13. (a) Apay a naibaga ni Jeremias: “Ni Jehova ti binglayko,” ken ania a kababalin ti impakitana? (b) Apay a masapul a maaddaan ti amin a tribu ti Israel iti kababalin nga aguray?

¹² Idi agangay, nakita ni Jeremias ti nadadael nga ilida ket nariknana a kasla magmagna iti kasipngetan. Kas man la isu ket pinagtugaw ni Jehova “kas kadagiti tattao a nabayagen a natay.” (Un. 1:1, 16; 3:6) Imbaga ni Jeremias iti nasubeg a nasion nga agsublida iti nailangitan nga Amada, ngem kimmaro ti kinadakesda agingga nga impalubos ti Dios a madadael ti Jerusalem ken Juda. Naladingitan ni Jeremias nupay saan nga isu ti makimbasol. Bayat nga agladladingit, nalagipna ti kinaasi ti Dios ket naikunana: “Saantayo a nagpatingga.” Wen, inaldaw a mapabpabaro ti kinaasi ni Jehova! Iti dayta a tiempo a naikunana: “Ni Jehova ti binglayko.” Intultuloyna ti pribilehiona nga agserbi ken Jehova kas propeta.​—Basaen ti Un-unnoy 3:22-24.

¹³ Iti uneg ti 70 a tawen, mabaybay-an ken saan a mapagnaedan ti daga dagiti Israelita. (Jer. 25:11) Ngem dagiti sasao ni Jeremias a “ni Jehova ti binglayko” ipakitana ti panagtalekna iti kinaasi ti Dios ken adda rasonna nga ‘aguray.’ Napukaw ti amin a tribu ti Israel ti tawidda isu a masapul a maaddaanda iti kababalin a kas iti propeta. Ni laeng Jehova ti namnamada. Kalpasan ti 70 a tawen, nakasublida iti dagada ken naaddaanda manen iti pribilehio nga agserbi kenkuana.​—2 Cron. 36:20-23.

Agbalin Met ni Jehova a Bingay ti Sabsabali

14, 15. Malaksid kadagiti Levita, asino ti nangibilang ken Jehova kas bingayna ken apay?

¹⁴ Agpada a Levita da Asaf ken Jeremias, ngem dagiti laeng kadi Levita ti addaan pribilehio nga agserbi ken Jehova? Saan! Ti agtutubo a ni David, a nagbalin nga ari ti Israel idi agangay, tinukoyna ti Dios kas ‘bingayna iti daga dagidiay sibibiag.’ (Basaen ti Salmo 142:1, 5.) Idi pinutar ni David dayta a salmo, awan iti palasio wenno iti balay. Adda iti kueba nga aglemlemmeng gapu kadagiti kabusorna. Namindua a nagkamang ni David iti kueba​—iti asideg ti Adullam ken iti let-ang ti En-gedi. Mabalin a pinutarna ti Salmo 142 iti maysa kadagita a kueba.

¹⁵ Ti kaaddana iti kueba ket maigapu ken Ari Saul a mangbirbirok kenkuana tapno papatayenna. Naglemmeng ni David iti kueba a narigat a madanon. (1 Sam. 22:1, 4) Iti daytoy nasulinek a lugar, nalabit nariknana nga awan ti gayyemna a mangsalaknib kenkuana. (Sal. 142:4) Iti dayta a gundaway a nagpatulong iti Dios.

16, 17. (a) Apay a narikna ni David nga isu ket agmaymaysa? (b) Asino ti nagpatulongan ni David?

¹⁶ Idi pinutar ni David ti Salmo 142, nalabit nadamagna ti napasamak iti Nangato a Padi a ni Ahimelec, a timmulong kenkuana nupay dina ammo a ni David liblibasanna ni Saul. Nakapungtot ni Ari Saul isu nga imbilinna a mapapatay ni Ahimelec ken ti pamiliana. (1 Sam. 22:11, 18, 19) Panagrikna ni David, isu ti makimbasol iti ipapatayda. Kasla isu ti nangpapatay iti padi a timmulong kenkuana. No sika ti adda iti kasasaad ni David, kasta kadi met ti mariknam? Kimmaro pay ti pannakariribuk ni David gapu ta agtultuloy a kamkamaten ni Saul isu a saan a makainana.

¹⁷ Di nagbayag, natay ni propeta Samuel a nangpulot ken David nga agbalinto nga ari. (1 Sam. 25:1) Mabalin a dayta pay ti makagapu a mariknana nga isu ket agmaymaysa. Ngem ammo ni David no asino ti pagpatulonganna​—ni Jehova. Ti pribilehio ni David ket naiduma kadagiti Levita, ngem napulotanen para iti sabali a panagserbi, ti panagbalinnanto nga ari iti ili ti Dios. (1 Sam. 16:1, 13) Gapuna, imparukpok ni David ti linaon ti pusona ken Jehova ken intultuloyna ti nagpaiwanwan kenkuana. Mabalinmo met nga ibilang ni Jehova kas bingaymo ken pagkamangam bayat nga ikagkagumaam ti agserbi kenkuana.

18. Kasano nga impakita dagiti nausigtayo iti daytoy nga artikulo a ni Jehova ti bingayda?

¹⁸ Dagidiay nangibilang ken Jehova kas bingayda immawatda iti annongen nga agserbi kenkuana. Agtalekda nga ipaay ti Dios ti kasapulanda bayat nga agserserbida. Kas ken David, dagiti Levita ken ti dadduma pay a tribu ti Israel mabalinda nga ibilang ti Dios kas bingayda. Kasanom met a maibilang ni Jehova kas bingaymo? Usigentayo dayta iti sumaganad nga artikulo.

[Footnote]

Ania ti Sungbatyo?

• Kasano a ni Jehova ti bingay dagiti Levita?

• Kasano nga impakita da Asaf, Jeremias, ken David a ni Jehova ti bingayda?

• Ania a kababalin ti kasapulam tapno agbalin ti Dios kas bingaymo?

[Blurb iti panid 8]

Awan ti daga a tawid dagiti Levita ngem ni Jehova ti bingayda ta naaddaanda iti dakkel a pribilehio nga agserbi kenkuana

[Ladawan iti panid 7]

Kasano a ni Jehova ti bingay dagiti papadi ken Levita?

[Ladawan iti panid 9]

Ania ti nakatulong ken Asaf nga agtultuloy a mangibilang ken Jehova kas bingayna?