NEFTOA

Ti nagan a nainaig iti maysa nga ubbog nga adda iti nagbaetan ti Juda ken Benjamin. (Jos 15:1, 9; 18:11, 15) Kadawyan a maikunkuna nga isu daytoy ti ubbog idiay Lifta (ʽEn Neftoah), iti daya ti Kiriat-jearim ken agarup 4 km (2.5 mi) iti laud nga amianan-a-laud ti nagsaadan ti templo idiay Jerusalem. Nupay daytoy a pagarup ket tumunos iti Josue 15:9, ipamatmat ti Josue 18:15, 16 a ti “ubbog ti dandanum ti Neftoa” ket adda iti laud ti Kiriat-jearim. Dagiti managipatarus iti Biblia ket nagduduma ti pamay-anda a panangrisut iti daytoy kasla panagduma. Maibatay iti patarus ti Griego a Septuagint, ti sao nga “agpalaud” ket sinuktan ti The Jerusalem Bible iti “tumurong iti Gasin.” Iti Revised Standard Version, ti teksto ket nabaliwan tapno tumunos iti Josue 15:9, iti kasta mabasa ti “agturong iti Efron” imbes nga “agpalaud.” Impatarus ni Ronald A. Knox ti Hebreo a sao a yamʹmah (agpalaud) sigun iti literal a kaipapananna nga “agpabaybay,” ket ilawlawagna iti maysa a footnote: “Kaipapananna daytoy ti agpalaud, tumurong iti Mediteraneo; ngem kasla nalawag nga iti daytoy a lugar, ti beddeng ti Benjamin ket agpadaya, ket mabalin a ti baybay isu ti Natay a Baybay, ti pagpatinggaanna iti daya.”