MARIGATANKA kadi nga agtalek iti sabsabali? Makapaladingit ta agbibiagtayo iti lubong nga adu ti di mapagtalkan. No sinairnaka ti maysa a pagtaltalkam​—nalabit gapu iti panagulbod wenno dina panangtungpal iti karina​—mabalin a napukawen ti panagtalekmo. Nupay kasta, adda maysa a mabalinmo a pagtalkan a dinto pulos mangpaay kenka. “Agtalekka ken Jehova buyogen ti isuamin a pusom,” idagadag ti Proverbio 3:5. Apay a maikari ni Jehova iti kasta a panagtalek? Tapno masungbatan dayta, usigentayo ti nailanad iti Josue 23:14 a sasao ni Josue​—maysa a lalaki a naan-anay a nagtalek ken Jehova.

Usigem ti pasamak. Dandanin agtawen iti 110 ni Josue, daydiay simmukat ken Moises kas lider ti Israel. Bayat ti napaut a panagbiagna, nasaksianna a mismo ti adu a naindaklan nga ar-aramid ni Jehova maipaay iti Israel, agraman ti milagro a pannakaispalda iti Nalabaga a Baybay agarup 60 a tawen ti napalabasen. Ita, bayat a pinampanunot ni Josue ti napalabasna, inayabanna ‘dagiti lallakay ken dagiti pannakaulo ken dagiti ukom ken dagiti opisial’ ti Israel. (Josue 23:2) Ti sawenna ita ipalgakna saan laeng a ti sirib ti maysa a nataengan no di ket ti sirib a resulta ti napnuan pammati a panagut-utobna.

“Mapanak ita nga aldaw iti dalan ti intero a daga,” inlawlawag ni Josue. Ti sasao a “dalan ti intero a daga” ket maysa a pagsasao para iti ipapatay. Arigna nga ibagbaga ni Josue, “dandaniakon matay.” Gapu iti dayta, adu la ketdi nga oras ti binusbos ni Josue a nangut-utob iti biagna. Ania a mensahe ti intedna kadagiti padana nga agdaydayaw sakbay ti ipapatayna?

Intuloy ni Josue: “Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.” Dayta ti sasao ti maysa a tao a naan-anay ti panagtalekna iti Dios. Ti rason? Maigapu iti amin a nasaksianna, ammo ni Josue a kanayon a tungpalen ni Jehova dagiti karina.a Nabatad ti panggep ti mensahe ni Josue: Kayatna a maaddaan dagiti padana nga Israelita iti naan-anay a pammati a matungpalto ti amin a kari ni Jehova maipaay kadakuada.

Maipapan iti Josue 23:14, kastoy ti inkomento ti maysa a reperensia: “Dakamatem ti tunggal kari ti Biblia; sa sukimatem ti pakasaritaan ti lubong; ken agsaludsodka maipapan iti tunggal parsua iti dayta, tapno makasarakka iti maysa a pagarigan ti pananglipat wenno di panangtungpal ti Dios iti karina.” No posible man ti mangaramid iti kasta a panagsukimat, maaddaantayo met iti konklusion nga umasping iti konklusion ni Josue​—kanayon a matungpal dagiti kari ni Jehova.​—1 Ar-ari 8:56; Isaias 55:10, 11.