SHIBBOLETH

Ti baliksen a sao nga inaramat dagiti lallaki ti Galaad a pangbigbigan kadagiti Efraimita a nangpadas nga agtalaw a bumallasiw iti Jordan. Kaipapananna ti “dawa ti binukel” wenno “agay-ayus a waig.” Dagiti agtaltalaw nga Efraimita, bayat ti pannakidangadangda ken Jefte, impadlawda ti bagbagida kadagiti Galaadita a guardia kadagiti pagballasiwan ti Jordan babaen iti di umiso a panangibalikasda iti pangrugian nga “sh” nga uni daytoy a pagilasinan a sao. “Sibboleth” ti sinaoda. (Uk 12:4-6) Gapuna, nabatad a kadagiti tribu adda idi panagduduma iti panagibalikas, kas met laeng kadagiti naud-udi a tiempo addaan dagiti taga Galilea iti pamay-an ti panagsao a naiduma kadagiti Judeano.​—Idiligyo ti Mt 26:73; Lu 22:59.