Aod​—Maysa a Tao nga Addaan Pammati ken Tured

ADU a tawenen ti naglabas nanipud idi damo a simrek dagiti Israelita iti Naikari a Daga. Nabayagen a natay ni Moises ken ti kasunona, ni Josue. Iti kaawan ti kakasta a lallaki nga addaan pammati, napartak a kimmapuy ti panangipateg iti nasin-aw a panagdayaw. Rinugian pay ketdin dagiti Israelita ti agserbi kadagiti Baal ken kadagiti sagrado a munmon.a Kas resultana, binaybay-an ni Jehova ti ilina a matnag iti ima dagiti Sirio iti las-ud ti walo a tawen. Iti kasta immasug dagiti Israelita iti Dios. Siaasi nga impangagna ida. Namangon ni Jehova iti maysa nga ukom a ni Otoniel, a mangisalakan iti ilina.​—Oc-ocom 3:7-11.

Rumbeng a nakasursuro koma dagiti Israelita iti napateg a kinapudno kadagitoy a pasamak​—ti panagtulnog ken Jehova mangyeg kadagiti bendision, idinto ta ti panagsukir agresulta kadagiti lunod. (Deuteronomio 11:26-28) Nupay kasta, saan a nakaadal iti daytoy a leksion ti nasion ti Israel. Kalpasan ti 40 a tawen a kaadda ti talna, binaybay-anda manen ti nasin-aw a panagdayaw.​—Oc-ocom 3:12.

Pinarmek ti Moab

Iti daytoy a gundaway pinalubosan ni Jehova a matnag ti ilina iti ima ni Ari Eglon ti Moab. Iladawan ti Biblia kas “maysa a tao a nalukmeg unay.” Iti tulong dagiti Ammonita ken Amalekita, rinaut ni Eglon ti Israel, ket impasdekna ti palasiona iti Jerico, “ti ili dagiti kaykayo a palma.” Rabakenyo ti immuna a Canaanita a siudad a pinarmek ti Israel ket pagnanaedan itan ti maysa nga agdaydayaw iti didiosen a ni Cemos!b​—Oc-ocom 3:12, 13, 17.

Inrurumen ni Eglon dagiti Israelita iti las-ud ti simmaganad a 18 a tawen, a sibabatad nagkalikagum iti makapadagsen a buis kadakuada. Iti sagpaminsan ngem regular a panagkalikagumna iti buis, naparang-ay ti Moab ti ekonomiana bayat a maib-ibus ti pagsanikuaan ti Israel. Kaawatan, immasug a dimmawat iti tulong ti ili ti Dios, ket nangipangag manen ni Jehova. Namangon kadakuada iti maysa pay a mangisalakan​—iti daytoy a gundaway maysa a Benjamita nga agnagan Aod. Tapno aggibus ti kinadangkok ni Eglon iti Israel, implano ni Aod ti agtignay iti aldaw ti sumaganad a panagbayad iti buis.​—Oc-ocom 3:14, 15.

Kas panagsagana iti maingel a panagtignayna, nangaramid ni Aod iti maysa nga igam nga addaan dua a tadem a maysa a siko ti kaatiddogna. No maysa daytoy nga ababa a siko, agarup 15 pulgada ti kaatiddog ti igam. Mabalin nga ibilang dayta ti dadduma a maysa a punial. Nabatad awan namagbeddeng a landok iti nagbaetan ti tadem ken ti putan. Gapuna, mailemmeng ni Aod ti bassit nga igamna iti uneg ti kawesna. Mainayon pay, yantangay kattigid ni Aod, maisalikadna ti igamna iti makannawan a bakrangna​—saan a gagangay a pangikabilan iti armas.​—Oc-ocom 3:15, 16.

Napeggad ti estratehia ni Aod. Kas pagarigan, kasanon no dagiti pasurot ti ari kapkapanda ni Aod? Uray dida aramiden dayta, sigurado a dida panawan nga agmaymaysa ti arida a kadua ti Israelita! Ngem no aramidenda dayta, ket mapapatay ni Eglon, kasanot’ panaglibas ni Aod? Kasanot’ kaadayo ti matarayna sakbay a matakuatan dagiti pasurot ni Eglon ti napasamak?

Di pagduaduaan nga inutob a naimbag ni Aod ti kakasta a detalye, a nalabit pinattapattana ti sumagmamano a napeggad a resulta. Nupay kasta, intuloyna ti planona, a nangipakita iti tured ken pammati ken Jehova.

Sinango ni Aod ni Eglon

Dimteng ti aldaw a panangyeg iti sumaganad a buis. Simrek da Aod ken dagiti tattaona iti palasio ti ari. Di nagbayag, addadan a sitatakder iti sanguanan ni Ari Eglon. Ngem di pay dimteng ti oras nga iduduklos ni Aod. Idi nayawaten ti buis, pinagawid ni Aod dagiti nangyeg iti buis.​—Oc-ocom 3:17, 18.

Apay nga intantan ni Aod ti panangpapatayna ken ni Eglon? Nalapunos kadi iti buteng? Saan! Tapno maibanagna ti planona, kinasapulan ni Aod ti makisarita iti ari nga isuda laeng a dua​—banag a di napatgan kenkuana iti daytoy damo a pannakisango. Maysa pay, kasapulan a makalibas a dagus ni Aod. Nalaklaka nga amang ti panaglibas ti maysa a tao ngem no kaduana amin dagiti nangyeg iti buis. Gapuna, naguray ni Aod iti tumutop a gundaway. Ti apagbiit nga isasarungkar ken ni Eglon ti timmulong kenkuana tapno makabesadona ti urnos ti palasio ken masinunuona no kasanot’ kinatalged ti ari.

Idi nakadanon iti “pagtiktikapan ti bato nga adda idiay Gilgal,” imbati ni Aod dagiti tattaona sa nagsubli iti palasio ni Eglon. Ti pannagnana iti agarup dua a kilometro ti nangiwaya bassit ken ni Aod nga agpanunot maipapan iti misionna ken agkararag a dumawat iti pammendision ni Jehova.​—Oc-ocom 3:19.

Nagsubli ni Aod

Agparang a napasangbay manen ni Aod iti palasio. Nalabit naragsakan ni Eglon iti kawadwad ti buis nga immun-una nga inyegna. Nupay apagbiit laeng ti damo nga isasarungkar, mabalin a nangipaay dayta iti umdas a panawen ken ni Aod tapno makaipasdek iti nasayaat a relasion iti ari. Aniaman ti kasasaad, nakasubli ni Aod iti sanguanan ni Eglon.

“O ari, addaanak iti maysa a nalimed a sao nga agpaay kenka,” kinuna ni Aod. Ti banag a nakagteng iti daytoy a punto mangipasimudaag a ni Jehova ti mangidaldalan kenkuana. Kaskasdi, adda parikut. Ti “nalimed a sao” nga inyeg ni Aod di mabalin nga ibaga iti imatang dagiti adipen ti ari. No bumallaet ni Jehova, kasapulan unayen ni Aod dayta a tulong. “Agulimekka!” imbilin ti ari. Yantangay di kayat ni Eglon nga adda makaallingag iti daytoy “nalimed a sao,” pinaruarna dagiti adipenna. Anian a pannakabang-ar ni Aod!​—Oc-ocom 3:19.

Agtugtugaw idi ni Eglon iti siledna a nangatngato a pagpariiran idi immay kenkuana ni Aod sa kinunana: “Addaanak iti maysa a paibaga nga imbaon ti Dios kenka.” Iti panangdakamatna iti “Dios,” ni kadi Cemos ti tuktukoyen ni Aod? Mabalin nga impagarup ni Eglon a kasta. Gapu ta interesado, timmakder iti tronona ket sigagagar a naguray. Immasideg ni Aod, a nalabit siaannad a naggunay tapno saan nga agsuspetsa ti ari nga isu ket maduklos. Kalpasanna, buyogen ti napartak a panaggunay, “ni Aod inkarawana ti imana a katigid, ket innalana ti igamna nga adda idi padingpadingna a kanawan, ket isu ti inwekwekna iti bagi [ni Eglon]. Ket ti putan simrek met a simmaruno iti tadem, ket ti kinalukmeg tininepna ti tadem, nga isu dina naala ti igam idi bagina; ket ti murdongna simmalput iti bukotna.”​—Oc-ocom 3:20-22.

Nupay adda la iti asideg dagiti adipen ti ari, saanda a nagkir-in. Ngem agpegpeggad pay laeng ni Aod. Iti aniaman a kanito mabalin a sumrek dagiti adipen ni Eglon ket matakuatanda ti bangkay ti naidasay nga arida. Kasapulan a makalibas a dagus ni Eglon! Kalpasan ti panangikandadona kadagiti ruangan, naglibas babaen iti abut a sumrekan ti angin iti siled a nangatngato a pagpariiran.​—Oc-ocom 3:23, 24a.

Pannakaduktal ken Pannakaparmek

Di nagbayag matektekanen dagiti adipen ni Eglon. Ngem, maamakda a mangsinga iti pribado a pannakisaritana. Kalpasanna nadlawda a naikandado dagiti ruangan ti siled a nangatngato a pagpariiran. “Pudno nga abbonganna ti saksakana iti siled a nangatngato,” inkalinteganda. Nupay kasta, bayat ti panaglabas ti oras, saanda laeng a matektekan no di ket madanaganda unayen. Din makauray dagiti adipen ni Eglon. “Gapuna innalada ti tulbek ket linuktanda [dagiti ruangan ti siled a nangatngato a pagpariiran], ket, adtoy! ni apoda napasag iti dissaar a natay!”​—Oc-ocom 3:24b, 25.

Kabayatanna, nakalibasen ni Aod. Nalabsanna dagiti pagtiktikapan ti bato idiay Gilgal ket kamaudiananna nakagteng idiay Seirat, maysa a lugar iti katurturodan ti Efraim. Inummong ni Aod dagiti lallaki ti Israel ket indauluanna ida iti nagkaykaysa a panangraut kadagiti Moabita. Kuna ti salaysay a “nangkabilda kadagiti taga Moab iti daydi a tiempo kadagiti agsangapuloribu a tattao, tunggal tao a napigsa, ken tunggal tao a natured; awan nakatalaw a lalaki.” Gapu ta naparukma ti Moab, saanen a nariribuk pay iti daga ti Israel iti 80 a tawen.​—Oc-ocom 3:26-30.

Ti Maadal iti Ulidan ni Aod

Ti pammati iti Dios ti nangtignay ken ni Aod. Isu ket saan nga espesipiko a dinakamat ti Hebreo kapitulo 11 kas maysa a ‘babaen iti pammati inabakda dagiti pagarian iti panaglalaban, . . . nagbalin a maingel iti gubat, pinagtarayda dagiti buyot dagiti ganggannaet.’ (Hebreo 11:33, 34) Nupay kasta, tinulongan ni Jehova ni Aod tangay nagtignay buyogen ti pammati ken insalakanna ti Israel manipud iti nadangkok a panagturay ni Ari Eglon.

Kinatured ti maysa kadagiti galad ni Aod. Kinasapulan nga agbalin a natured a mangaramat a sisisikap iti literal a kampilan. Kas agdama-aldaw nga ad-adipen ti Dios, saantay nga agiggem iti kasta a kampilan. (Isaias 2:4; Mateo 26:52) Kaskasdi, ar-aramatentayo ti “kampilan ti espiritu,” ti Sao ti Dios. (Efeso 6:17) Nalaing ni Aod a nangaramat iti igamna. Kasapulantay met ti agbalin a nalaing iti panangaramat iti Sao ti Dios bayat nga ikasabatayo ti naimbag a damag ti Pagarian. (Mateo 24:14) Ti personal a panagadal iti Biblia, regular a kaadda kadagiti Nakristianuan a gimong, naregta a pannakiraman iti ministerio, ken nainkararagan a panagpannuray iti nailangitan nga Amatayo tulongannatayo a mangtulad kadagiti galad nga impakita ni Aod, a pudno a maysa a tao nga addaan pammati ken tured.

[Dagiti Footnote]

[Ladawan iti panid 31]

Nangyeg da Aod ken dagiti kakaduana iti buis ken ni Ari Eglon

[Credit Line]

Kopia manipud iti Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s