Itultuloy nga Ipakita ti Nadungngo a Panagayat

 1. Ania dagiti mangipakita a dagiti tattao ita ket awanan iti nainkasigudan a panagayat?

IMPADTO ti Biblia nga iti maudi nga al-aldaw, dagiti tattao ket “awanan iti ayat iti padada a tao” wenno awanan iti nainkasigudan a panagayat. (2 Tim. 3:1, 3) Makitkitatayo a matungtungpalen dayta. Kas pagarigan, minilion a pamilia ti nasinasina gapu iti diborsio, isu nga aggingginnura dagiti agassawa ken marikna dagiti annak a saanda a maipatpateg. Mabalin a kasla saan nga agaammo uray dagiti pamilia nga agkakabbalay. “Saan nga agtutungtong ti ina, ama, ken dagiti annak ta ti la computer, tablet, smartphone, wenno video game console ti sangsanguenda,” kuna ti maysa a mamalbalakad maipapan iti pamilia. “Uray agkakabbalay dagitoy nga agkakapamilia, bassit ti panawenda iti maysa ken maysa.”

2-3. (a) Sigun iti Roma 12:10, siasino ti masapul a pangipakitaantayo iti nadungngo a panagayat? (b) Ania ti usigentayo iti daytoy nga artikulo?

² Ditay kayat ti agpaimpluensia iti awanan ayat nga espiritu daytoy a lubong. (Roma 12:2) Imbes ketdi, masapul nga ipakitatayo ti nadungngo a panagayat saan laeng a kadagiti kapamiliatayo no di pay ket kadagiti kapammatiantayo. (Basaen ti Roma 12:10.) Ania ti nadungngo a panagayat? Dayta a termino ket tumukoy iti nasinged a relasion dagiti agkakapamilia. Dayta a kita ti ayat ti masapul nga ipakitatayo iti naespirituan a pamiliatayo—dagiti kapammatiantayo. No ipakitatayo ti nadungngo a panagayat, tumultulongtayo a mamagtalinaed iti panagkaykaysa a nakapatpateg a paset ti pudno a panagdaydayaw.—Mik. 2:12.

³ Tapno maaddaan ken maipakitatayo ti nadungngo a panagayat, kitaentayo dagiti masursurotayo kadagiti ulidan iti Biblia.

 4. Kasano a matulongannatayo ti Santiago 5:11 a mangapresiar iti kauneg ti ayat ni Jehova?

⁴ Ibaga ti Biblia dagiti nagsasayaat a kualidad ni Jehova. Kas pagarigan, ibagana a “ti Dios ket ayat.” (1 Juan 4:8) Uray iti dayta laengen a pannakailadawan ti Dios, matignaytayon nga umasideg kenkuana. Ngem ibaga met ti Biblia a ni Jehova “ket nadungngo unay.” (Basaen ti Santiago 5:11.) Anian a nagsayaat a panangiladawan iti kauneg ti ayat ni Jehova kadatayo!

 5. Kasano nga ipakpakita ni Jehova ti asina, ken kasano a matuladtayo?

⁵ Paliiwenyo ta inkonektar ti Santiago 5:11 ti nadungngo a panagayat ni Jehova iti sabali pay a kualidad a mangtignay kadatayo nga umasideg kenkuana—ti asina. (Ex. 34:6) Ti maysa a pamay-an nga ipakpakita ni Jehova ti asina kadatayo ket ti panangpakawanna kadagiti kamalitayo. (Sal. 51:1) Iti Biblia, ti asi ket saan la a basta panangpakawan. Rikna dayta nga agtaud iti kaunggan ti maysa a tao no makitana nga agladladingit ti sabali ket matignay a tumulong iti dayta a tao. Imbaga ni Jehova a nadungdungngo ti tarigagayna a tumulong kadatayo ngem iti maysa nga ina iti anakna. (Isa. 49:15) No marigrigatantayo, ti asi ni Jehova ti mangtignay kenkuana a tumulong kadatayo. (Sal. 37:39; 1 Cor. 10:13) Maipakitatayo ti asi kadagiti kakabsat no pakawanentayo ida ken saantayo nga agipempen iti sakit ti nakem no masaktandatayo. (Efe. 4:32) Ngem ti kangrunaan a pamay-an a maipakitatayo ti asi ket ti panangsuportatayo kadagiti kakabsat a maipaspasango kadagiti pakarigatan. No tignayennatayo ti ayat nga agbalin a naasi iti sabsabali, matuladtayo ni Jehova, ti kasayaatan nga ulidan iti nadungngo a panagayat.—Efe. 5:1.

 6. Kasano nga impakita da Jonatan ken David ti nadungngo a panagayatda iti maysa ken maysa?

⁶ Naglaon ti Biblia kadagiti salaysay maipapan iti imperpekto a tattao a nangipakita iti nadungngo a panagayat. Alaentayo a pagarigan da Jonatan ken David. Kuna ti Biblia: “Nagbalin a nadekket nga aggayyem da Jonatan ken David, ket impateg ni Jonatan ni David a kas iti bagina.” (1 Sam. 18:1) Ni David ti napili a mangsukat ken Saul kas ari. Kalpasan dayta, napalalo ti imon ni Saul ken ni David isu a pinadasna a patayen. Ngem saan a sinuportaran ni Jonatan nga anak ni Saul dayta a plano a panangpapatay ken David. Nagkinnari da Jonatan ken David nga agtalinaedda nga aggayyem ken kanayon nga agtinnulongda.—1 Sam. 20:42.

 7. Ania koma ti maysa a nakalapped iti panagbalin da Jonatan ken David nga aggayyem?

⁷ Nakaskasdaaw ti nadungngo a panagayat da Jonatan ken David iti maysa ken maysa no usigentayo ti dadduma a nakalapped koma iti panaggayyemda. Kas pagarigan, laklakay ni Jonatan iti 30 a tawen ngem ni David. Mabalin koma nga imbaga ni Jonatan nga awan ti pagpadaanda iti ub-ubing ken basbassit ti kapadasanna a ni David. Ngem saan a kasta ti panangmatmat ni Jonatan ken David isu a rinespetona.

 8. Panagkunam, apay a ni Jonatan ket nasayaat a gayyem ni David?

⁸ Mabalin koma a nagimon ni Jonatan ken ni David. Kas anak ni Ari Saul, mabalin koma nga impilitna ti kalinteganna nga agtawid iti trono. (1 Sam. 20:31) Ngem napakumbaba ni Jonatan, ken matalek ken Jehova. Isu a naan-anay a sinuportaranna ti panangpili ni Jehova ken ni David kas sumaruno nga ari. Matalek ni Jonatan ken ni David, uray kinagura dayta ni Saul.—1 Sam. 20:32-34.

 9. Imbilang kadi ni Jonatan ni David kas karibalna? Ilawlawag.

⁹ Adda nadungngo a panagayat ni Jonatan ken David, isu a saanna nga imbilang isuna kas karibal. Nalaing a pumapana ni Jonatan ken natured a mannakigubat. Isu ken ni amana a Saul ket pagaammo a ‘naparpartak ngem kadagiti agila’ ken ‘nabilbileg no idilig kadagiti leon.’ (2 Sam. 1:22, 23) Isu a mabalin koma nga impannakkel ni Jonatan dagiti nakaskasdaaw a naaramidanna. Ngem saan a mannakikompetensia ken saan a naimon. Imbes ketdi, nagbilib ni Jonatan iti kinatured ken panagtalek ni David ken Jehova. Kinapudnona, nangrugi nga inayat ni Jonatan ni David a kas iti bagina kalpasan a napapatay ni David ni Goliat. Kasano a maipakitatayo ti kasta a nadungngo a panagayat kadagiti kakabsattayo?

10. Ania ti kaipapanan ti ‘sipapasnek ken naimpusuan a panagiinnayat’?

¹⁰ Ibaga kadatayo ti Biblia a “sipapasnek ken naimpusuan nga agiinnayat[tayo].” (1 Ped. 1:22) Nangipaay ni Jehova iti ulidan a surotentayo. Sipapasnek nga ay-ayatennatayo ta awan a pulos ti makaisina kadatayo iti ayatna no matalektayo kenkuana. (Roma 8:38, 39) Ti Griego a sao a naipatarus a “sipapasnek” kaipapananna ti panagregget wenno panangikagumaan. No dadduma, mabalin a kasapulan nga ‘agreggettayo’ ken ‘ikagumaantayo’ ti maaddaan iti nadungngo a panagayat iti kapammatiantayo. No masaktandatayo, masapul nga itultuloytayo ti ‘agpipinnasensia gapu iti ayat, agkakappiatayo, ken ikagumaantayo a taginayonen ti panagkaykaysa a nagun-odantayo babaen ti nasantuan nga espiritu.’ (Efe. 4:1-3) No ikagumaantayo a manteneren ti ‘panagkakappia,’ palabsentayo ti pagkamkamalian dagiti kakabsattayo. Aramidentayo ti amin a kabaelantayo a matmatan ida kas iti panangmatmat kadakuada ni Jehova.—1 Sam. 16:7; Sal. 130:3.

11. Apay a narigat no dadduma nga ipakita ti nadungngo a panagayat?

¹¹ Narigat no dadduma nga ipakita ti nadungngo a panagayat kadagiti kakabsat, nangnangruna no ammotayo ti pagkamkamalianda. Nalawag a dayta idi ti problema ti dadduma a Kristiano idi umuna a siglo. Kas pagarigan, mabalin nga awan ti problema da Euodia ken Sintique a “timmulong [ken Pablo] iti pannakaisaknap ti naimbag a damag.” Ngem adda rason a marigatanda nga agkatunosan. Isu a pinaregta ida ni Pablo nga “agkapanunotanda koma kas pasurot ti Apo.”—Fil. 4:2, 3.

12. Kasanotayo a maaddaan iti nadungngo a panagayat kadagiti kakabsat?

¹² Kasanotayo a maaddaan iti nadungngo a panagayat kadagiti kakabsat? No maam-ammotayo a naimbag dagiti kapammatiantayo, mabalin a nalaklaka a maawatantayo ida ken maipakitatayo kadakuada ti nadungngo a panagayat. Saan a lapped ti edad ken nalikudan. Laglagipentayo a laklakay ni Jonatan iti agarup 30 a tawen ngem ni David. Ngem nagbalinda latta a nasinged nga aggayyem. Mabalinmo met kadi ti makigayyem iti maysa nga in-inauna—wenno ub-ubing—ngem sika? No aramidem dayta, ipakpakitam nga ‘ay-ayatem ti amin a kakabsat.’—1 Ped. 2:17.

13. Apay a nasingsingedtayo iti dadduma a kakabsat iti kongregasion?

¹³ No adda nadungngo a panagayattayo kadagiti kapammatiantayo, kaipapananna kadi nga agpapada ti kinasingedtayo iti tunggal maysa iti kongregasion? Saan, saan a realistiko dayta. Natural laeng a nasingsingedtayo iti dadduma gapu ta kapadatayo ida iti paginteresan. Tinukoy ni Jesus ti amin nga apostolna kas “gagayyem,” ngem nasingsinged ken Juan. (Juan 13:23; 15:15; 20:2) Nupay kasta, saan a nangipakita ni Jesus iti paboritismo ken Juan. Kas pagarigan, idi kiniddaw ni Juan ken ti kabsatna a ni Santiago ti natan-ok a saad iti Pagarian ti Dios, imbaga ni Jesus: “Saan a siak ti mangpili no siasino ti agtugaw iti makannawan wenno makannigidko.” (Mar. 10:35-40) Kas panangtulad ken Jesus, saantay koma a mangipakita iti paboritismo kadagiti nasinged a gagayyemtayo. (Sant. 2:3, 4) No mangipakitatayo iti paboritismo, mangpatpataudtayo iti panagsisina—banag a saan a maipalubos iti kongregasion Kristiano.—Jud. 17-19.

14. Sigun iti Filipos 2:3, ania ti makatulong tapno maliklikantayo ti agkikinnompetensia?

¹⁴ No ipakitatayo ti nadungngo a panagayat iti maysa ken maysa, maprotektarantayo ti kongregasion iti panagkikinnompetensia. Laglagipentayo a saan a pinadas ni Jonatan ti makikompetensia ken David, ta dina imbilang kas karibal iti trono. Matuladtayo amin ti ulidan ni Jonatan. Diyo ibilang dagiti kakabsat kas karibal gapu kadagiti abilidadda, “no di ket agpakumbabakayo, nga ibilangyo a nangatngato ti sabsabali ngem dakayo.” (Basaen ti Filipos 2:3.) Laglagipentayo nga adda maitulong ti tunggal maysa iti kongregasion. No agtalinaedtayo a napakumbaba, makitatayo dagiti nasayaat a kualidad dagiti kakabsattayo ket makasursurotayo kadakuada.—1 Cor. 12:21-25.

15. Ania ti masursurom iti kapadasan ni Tanya ken ti pamiliana?

¹⁵ No maipasangotayo iti ditay ninamnama a pakasuotan, liwliwaennatayo ni Jehova babaen ti nadungngo a panagayat ken praktikal a tulong dagiti kakabsattayo. Alaentayo a pagarigan ti napasamak ken Tanya ken ti tallo nga annakna nga immatender iti “Ti Ayat Saan a Pulos Agpatingga!” nga Internasional a Kombension idi 2019 iti United States. Idi nagawidda kalpasan ti programa iti Sabado, inyestoria ni Tanya: “Agaw-awidkam idin iti hotel a nagdagusanmi idi adda lugan a naawanan iti preno a dimmungpar iti luganmi. Awan ti nasaktan, ngem permi ti nerbiosmi a rimmuar iti lugan sa nagtakderkami iti kalsada. Adda nagpayapay iti igid ti kalsada tapno mapankami iti luganna. Maysa isuna kadagiti kakabsat a kapampanawna iti kombension. Ngem saan laeng nga isuna ti nagsardeng. Nagsardeng met ti lima a delegado a taga-Sweden. Inarakupdakami dagiti kakabsat, a kasapulanmi unay iti daydi a kanito! Impasiguradok nga okeykamin, ngem saandakami a pinanawan. Kinaduadakami uray idi simmangpeten dagiti paramedic, ket siniguradoda nga adda ti amin a kasapulanmi. Iti dayta a napasamak, kanayon a nariknami ti ayat ni Jehova. Lalo nga immuneg ti ayatmi kadagiti kakabsat ken ti ayat ken apresasionmi ken Jehova.” Adda kadi tiempo a malagipmo nga agkasapulanka iti tulong ket impakitaannaka ti maysa a kapammatiam iti nadungngo a panagayat?

16. Ania dagiti rasontayo a mangipakita iti nadungngo a panagayat iti maysa ken maysa?

¹⁶ Panunotentayo dagiti resulta no ipakitatayo ti nadungngo a panagayat iti maysa ken maysa. Maliwliwatayo dagiti kakabsattayo iti tiempo a kasapulanda dayta. Mapabilegtayo ti panagkaykaysa ti ili ti Dios. Mapaneknekantayo a datayo dagiti adalan ni Jesus, ket daytoy ti mangallukoy kadagiti nasingpet a tattao nga agdayaw ken Jehova. Kangrunaanna, maidaydayawtayo ni Jehova, ti “Ama a napnuan iti asi ken Dios ti amin a liwliwa.” (2 Cor. 1:3) Sapay koma ta itultuloytayo amin a patanoren ken ipakita ti nadungngo a panagayat!