ANTIPATRIS

[Ken (Kukua ni) Antipater].

Siudad nga imbangon manen ni Herodes a Dakkel idi 9 K.K.P. ken naawagan iti nagan ni amana nga Antipater (II). Maikunkuna nga isu ti Ras el-ʽAin (Tel Afeq) iti maysa a nadam-eg ken naruay ti danumna a lugar iti Tanap ti Saron. Maipagarup a ti Antipatris ti ayan ti nagkauna a siudad ti Afek, a nadakamat iti 1 Samuel 4:1. Agparang a patalgedan daytoy dagiti panagkabakab a naaramid sadiay idi 1946, 1961, ken 1974.​—Kitaenyo ti AFEK Num. 3.

Ditoy a naipan ni Pablo babaen ti maysa a buyot ti Roma a naibaon a mangbayabay kenkuana, a nagdaliasatda iti rabii iti agarup 50 km (30 mi) a simmalogda iti bambantay manipud Jerusalem. (Ara 23:31) Adda daytoy a disso iti nagsapalan dagiti dalan ti militar ti Roma, a ti maysa manipud Jerusalem ken ti sabali manipud Lidda, nga agturongda iti Cesarea a kabesera ti Roma. Manipud Antipatris, 70 a kabaliero ti nangkuyog ken Pablo iti nabatbati pay a distansia nga agarup 40 km (25 mi) a bumallasiw iti tanap nga agturong idiay Cesarea.