Mabalinyo ti Maaddaan iti ‘Puso a Kas ti Leon’

NO DADDUMA ar-aramaten ti Biblia ti leon kas simbolo ti kinatured ken panagtalek. Nailadawan dagiti maingel wenno natured a lallaki kas addaan ‘puso a kas ti leon,’ ket dagiti nalinteg naikuna nga “umasping iti urbon a leon nga addaan panagtalek.” (2 Samuel 17:10; Proverbio 28:1, NW) Nangnangruna no makarit, ipakita ti leon a maikari iti reputasionna kas ti “kapigsaan kadagiti an-animal.”​—Proverbio 30:30.

Inyasping ni Jehova a Dios ti determinasionna a mangsalaknib iti ilina iti kinatured ti leon. Kuna ti Isaias 31:4, 5: “Kas ti leon ken urbon ti leon agngerngerngerda iti rabaw ti matiliwda, no ti kinaadu dagiti agpapaarab maayabanda a maibusor kenkuana, saanto nga agkullayaw ti timekda, ket dinto tumakrot iti dalagudogda; kastanto ti iyuulog ni Jehova dagiti buybuyot a manggubat iti bantay Sion . . . Isu ti igagananto ken isalakanna, lumabasto iti ngatona ken salaknibannanto.” Iti kasta ipasigurado ni Jehova kadagiti adipenna ti aktibo a panangaywanna, nangnangruna iti sidong ti pakarigatan.

Iyasping ti Biblia ti kadakkelan a kabusor ti sangatauan, ni Satanas a Diablo, iti ngumerngernger, narawet a leon. Tapno maliklikan ti panagbalin a biktimana, kuna kadatayo ti Kasuratan: “Agtalinaedkayo a sipupuot, managbantaykayo koma.” (1 Pedro 5:8) Ti maysa a pamay-an a panangaramid iti daytoy isut’ panangliklik iti makapapatay a naespirituan a panagtuglep. Maipanggep iti daytoy kinuna ni Jesus: “Asikasuenyo ti bagbagiyo tapno dagiti pusoyo dida pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag.” (Lucas 21:34-36) Wen, ti panagbalin a siririing iti naespirituan kadagitoy “maudi nga al-aldaw” ikkannatayo ti ‘puso a kas ti leon,’ daydiay ‘natibker, manginanama ken Jehova.’​—2 Timoteo 3:1; Salmo 112:7, 8.