ATHALIA

1. Reyna ti Juda, anak ni Ari Acab ti Israel ken ti asawana a ni Jezebel; apoko ni Omri. (2Ar 8:18, 26) Kabsat ni Ari Jehoram ti Israel, ken kabsat wenno kabsat-iti-ama ti sabsabali pay a 70 nga annak ni Acab, nga imbilin ni Jehu a mapapatayda amin. (2Ar 3:1, 2; 10:1-9) Maipaay iti napolitikaan a pagimbagan, ni Athalia ket nayasawa ken Jehoram, ti inaunaan nga anak ni Jehosafat ti Juda. (2Ar 8:25-27; 2Cr 18:1) Isu ti ina ni Ocozias, a nagbalin nga ari ti Juda idi agangay.

Kas ken inana a Jezebel, sinugsogan ni Athalia ti asawana a ni Jehoram nga aramidenna no ania ti dakes kadagiti mata ni Jehova bayat ti walo-tawen a panagturayna. (1Ar 21:25; 2Cr 21:4-6) Ket kas ken inana, siuulpit nga imbukbok ni Athalia ti dara dagiti awanan basol. Idi natay ti nadangkes nga anakna a ni Ocozias kalpasan ti makatawen a panagturayna, pinapatayna amin a sabsabali pay a kameng ti naarian a linia, malaksid iti maladaga a ni Jehoas, nga inlemmeng ti nangato a padi ken ti asawana, nga ikit ni Jehoas. Kalpasanna, insaad ni Athalia ti bagina kas reyna iti innem a tawen, a. 905-899 K.K.P. (2Cr 22:11, 12) Tinakaw ti annakna dagiti nasantuan a bambanag iti templo ni Jehova ket indatonda ken Baal.​—2Cr 24:7.

Idi agedaden ni Jehoas iti pito a tawen, ti managbuteng-Dios a Nangato a Padi a ni Jehoiada inruarnan ti ubing iti panangilemmengna ket kinoronaanna kas nainkalintegan nga agtawid iti trono. Idi nangngegna ti arimbangaw, nagdardaras ni Athalia a napan iti templo ket idi nakitana ti mapaspasamak, inyikkisna, “Kumplot! Kumplot!” Imbilin ni Nangato a Padi a Jehoiada a maipan ni Athalia iti ruar ti paraangan ti templo tapno mapapatay idiay ruangan ti kabalio ti palasio; nalabit isu ti kaudianen a kameng ti nakarimrimon a balay ni Acab. (2Ar 11:1-20; 2Cr 22:1–23:21) Anian a pimmudno ti sasao nga: “Awan iti sao ni Jehova ti agtinnagto a di natungpal iti daga a sinao ni Jehova maibusor iti balay ni Acab”!​—2Ar 10:10, 11; 1Ar 21:20-24.

2. Benjamita iti balay ni Jehoram a nagnaed idiay Jerusalem.​—1Cr 8:26-28.

3. Ama ti maysa a nagsubli idiay Jerusalem a naikuyog ken Esdras idi 468 K.K.P.; iti pamilia ni Elam.​—Esd 8:1, 7.