BETA

Ili a nadakamat a kadua ti Berotai mainaig iti panangparmek ni David ken Hadadezer, ari ti Zoba. (2Sm 8:8) Saan nga ammo ti ayan daytoy a disso, nupay ti Aramaeano a pagarian ti Zoba ket maibilang nga adda iti amianan ti Damasco. Iti maysa a pumadpada a salaysay maipapan iti panagballigi ni David, ti 1 Cronicas 18:8 tukoyenna ti “Tibat,” ket ti sumagmamano a leksikograpo ibilangda ti Tibat kas ti ad-adda nga umiso a patarus. Iti Syriac a Peshitta mabasa ti “Teba” imbes a Beta iti 2 Samuel 8:8. Mapaliiw a babaen laeng iti panamagsinnukat iti umuna a dua a Hebreo a konsonante, ti Beta agbalin a Teba. Yantangay ti Beta (wenno Tibat) maysa a siudad dagiti Aramaeano, ti sumagmamano nga eskolar inaigda dayta ken Teba, ti anak ni Nacor.​—Ge 22:24; kitaenyo ti TIBAT.