PANGIKAPPIA A KALUB

Ti kalub ti lakasa ti tulag, nga iti sanguanan dayta ti pangiparsiakan ti nangato a padi iti dara dagiti daton gapu iti basol, iti Aldaw ti panangabbong.

Dagiti patarus ti Biblia nagduduma ti panangipatarusda iti Hebreo a termino a kap·poʹreth kas “tugaw ti kaasi” (KJ, PBS, RS, Yg), “pangikappia” (AT, Dy), “kalub” (Le), “kalub ti lakasa” (JP), wenno “kalub,” “pangikappia a kalub” (NW). Ti Hebreo a termino ket nagtaud iti berbo a kaipapananna ti “kaluban,” “abbongan (ti basol).”

Kas imbilin ni Jehova ken Moises, ti nasigo a tumatrabaho a ni Bezalel nangaramid iti kalub a puro a balitok maipaay iti sagrado a baul wenno lakasa ti tulag, a 2.5 kasiko (111 cm; 44 pul.) ti kaatiddogna ken 1.5 kasiko (67 cm; 26 pul.) ti kaakabana. Adda iti rabawna ti dua a kerubin a balitok, maysa iti tunggal pungto ti kalub, a siuukrad nga agpangato dagiti payakda a mangsalsalinged iti kalub. Ti ruprupa dagiti kerubin ket situturong wenno nakasango iti kalub. Ti Lakasa naikabil iti Kasasantuan a benneg ti tabernakulo.​—Ex 25:17-21; 37:1, 6-9.

Iti Aldaw ti Panangabbong (yohm hak·kip·pu·rimʹ, kaipapananna ti “aldaw dagiti panangabbong wenno panangikappia” [Le 23:27, 28]), ti nangato a padi simrek iti Kasasantuan ket imparsiakna ti dadduma a dara ti toro iti sanguanan ti kalub (iti masungad wenno makindaya a sikiganna) ket kalpasanna kasta met laeng ti inaramidna iti dara ti kalding. (Le 16:14, 15) Ngarud ti balitok a kalub ti Lakasa adda naisangsangayan a pagpaayanna iti mangisimbolo a panangikappia (panangabbong) iti basbasol.

Agsao idi ti Dios manipud nagbaetan dagiti kerubin iti rabaw ti pangikappia a kalub no kayatna ti makisao ken Moises wenno iti nangato a padi. (Ex 25:22; Nu 7:89; idiligyo ti Le 10:8-10; Nu 27:18-21.) Kinuna ni Jehova nga isu agparang iti ulep iti ngatuen ti kalub ti Lakasa. Nalawag nga agan-anaraar wenno agsilsilnag idi daytoy nga ulep, a nanglawag iti Kasasantuan a benneg.​—Le 16:2; idiligyo ti Sal 80:1.

Iti 1 Cronicas 28:11 natukoy ti Kasasantuan, ti kaunggan a benneg ti templo, kas “ti balay ti kap·poʹreth.” Iti daytoy a gundaway nabatad a ti Hebreo a sao ket saan a nausar a pangawag laeng iti takkab, wenno kalub, maipaay iti maysa a baul, no di ket naaramat mainaig iti naisangsangayan nga usar ti kalub iti panangikappia kadagiti basol. Gapuna, ti sasao ket naipatarus a “ti balay ti panangabbong” (Yg), “ti balay ti panangikappia” (AT), “ti balay ti pangikappia nga abbong [wenno, kalub]” (NW).

Simboliko. Iti Hebreo 9:5, ti Griego a sao a hi·la·steʹri·on, “pangikappia,” ket naaramat a tumukoy iti kalub ti Lakasa. Iti daydiay literal, wenno modelo a lakasa, ti kaadda ti Dios ket nailadawan nga adda iti nagbaetan ti dua a kerubin iti ngatuen ti pangikappia a kalub. (Le 16:2; Ex 25:22) Ti napaltiingan a mannurat ti libro ti Hebreo ipatuldona a simboliko dagitoy a banag. Kas ti inaramid ti nangato a padi iti Aldaw ti Panangabbong nga isu simrek iti Kasasantuan a siaawit iti sakripisio a dara, kasta met nga impan ni Kristo ti pateg ti sakripisiona, saan nga iti sanguanan ti literal a pangikappia a kalub, no di ket iti mismo a sanguanan ni Jehova a Dios sadi langit.​—Le 16:15; Heb 9:11-14, 24-28.