SEMAIAS

[kaipapananna ti “Dimngeg (Nagimdeng) ni Jehova”].

1. Maysa a Simeonita a ti maysa nga adayo a kaputotanna ket nakikadua a nangala iti teritoria a pagpaaraban manipud kadagiti Canaanita idi kaaldawan ni Ezekias.​—1Cr 4:24, 37-41.

2. Anak ni Joel a kameng ti tribu ni Ruben.​—1Cr 5:3, 4.

3. Panguluen ti Levita a pamilia ni Elizafan. Ni Semaias ken ti 200 kadagiti kakabsatna, a nangsantipikar iti bagbagida, ket paset ti martsa a nangipan iti lakasa ti tulag idiay Jerusalem.​—1Cr 15:4, 8, 11-16.

4. Sekretario dagiti Levita a nangilanad iti 24 a benneg ti papadi a naorganisar maitunos iti pammilin ni David; anak ni Netanel.​—1Cr 24:6.

5. Inauna nga anak ni Obed-edom, maysa a Levita. Ni Semaias ken ti annakna ket naipasalista kas agay-aywan iti ruangan a naituding kadagiti kamalig ti santuario.​—1Cr 26:1, 4, 6, 7, 12, 13, 15.

6. Maysa a mammadto ni Jehova bayat ti panagturay ni Rehoboam nga anak ni Solomon. Kalpasan ti iyaalsa ti sangapulo a makin-amianan a tribu idi 997 K.K.P., insawang ni Semaias ti sasao ni Jehova a mangiparparit iti gandat ni Rehoboam a mangsakup manen kadakuada. (1Ar 12:21-24; 2Cr 11:1-4) Bayat ti maikalima a tawen ni Rehoboam (993 K.K.P.), ti Egipcio nga Ari Sisac rimmaut iti Juda, ket ni Semaias impakaammona ken Rehoboam ken dagiti prinsipena a binaybay-an idan ni Jehova agsipud ta Isu binaybay-anda. Nupay kasta, gapu ta nagpakumbaba ni Rehoboam ken dagiti prinsipe, saan a pinakaro ni Jehova ti epekto dayta nga iraraut. (2Cr 12:1-12) Inlanad met ni Semaias ti maysa kadagiti naisurat a rekord mainaig iti panagturay ni Rehoboam.​—2Cr 12:15.

7. Maysa kadagiti Levita nga imbaon ni Ari Jehosafat bayat ti maikatlo a tawen ti panagturayna (934 K.K.P.) tapno isuroda ti Linteg kadagiti siudad ti Juda.​—2Cr 17:7-9.

8. Maysa a Levita a kaputotan ni Jedutun a pinarebbengan ni Ezekias idi umuna a tawen ti panagturayna (745 K.K.P.) tapno tumulong a mangdalus iti templo. Ni Semaias ken ti dadduma pay a Levita ti nangisalog iti narugit a bambanag idiay Ginget Kidron. (2Cr 29:12, 14-16) Mabalin nga isu met laeng ti Num. 9.

9. Maysa kadagiti Levita a nangibunong kadagiti apagkapullo ken sabsabali pay a kontribusion agpaay kadagiti siudad ti papadi bayat ti panagturay ni Ezekias. (2Cr 31:6, 12, 14, 15) Mabalin nga isu met laeng ti Num. 8.

10. Maysa kadagiti Levita a panguluen a sipaparabur a nangikontribusion iti maparti nga an-animal agpaay iti naindaklan a rambak ti Paskua idi tiempo ni Josias.​—2Cr 35:1, 9.

11. Ama ni Uria a mammadto a kapanawenan ni Jeremias; taga Kiriat-jearim.​—Jer 26:20.

12. Ama ni Delaias a prinsipe ti Juda bayat ti panagturay ni Jehoiaquim.​—Jer 36:12.

13. Ulbod a mammadto iti ili ti Nehelam ken kabusor ni Jeremias, nakautibo idiay Babilonia a kadua ni Jehoiaquin idi 617 K.K.P. Manipud sadiay, sinubalitanna ti surat ni padi Sofonias ken ti kakaduana a papadi idiay Jerusalem, a konkondenarenna ni Jeremias gapu iti panangipadtona iti napaut a pannakaidestiero ken gapu iti panangidagadagna kadagiti destiero nga agtaengda idiay Babilonia. Impapilit ni Semaias a rumbeng a maitul-ong ni Jeremias. Nupay kasta, impadto ni Jehova nga agsipud ta ginutugot ni Semaias nga agtalek dagiti Judio iti kinaulbod ken nagsao iti nabatad nga iyaalsa, isu wenno ti kaputotanna saandanto a karaman kadagiti agsubli a destiero.​—Jer 29:24-32.

14. Maysa a padi, ken nalabit ti nagtaudan ti maysa a pamilia ti papadi, a nagsubli a kadua ni Zorobabel idiay Jerusalem idi 537 K.K.P. Iti simmaruno a kaputotan, indauluan ni Jehonatan ti sangakabbalayan ni Semaias iti dasig ti amana. (Ne 12:1, 6, 7, 12, 18) Ti pannakabagida, wenno ti maysa a sabali pay a padi a kasta met laeng ti naganna, pinatalgedanna ti tulag ti nasion bayat ti kinagobernador ni Nehemias.​—Ne 10:1, 8.

15. Maysa a Levita a nagtaud ken Jedutun. Ti anakna wenno kaputotanna a ni Abdias ket nagnaed idiay Jerusalem kalpasan ti pannakaidestiero.​—1Cr 9:16, 34.

16. Maysa kadagiti Levita a kaputotan ni Merari a nagyan met idiay Jerusalem kalpasan ti pannakaidestiero idiay Babilonia; anak ni Hassub.​—1Cr 9:14, 34; Ne 11:15.

17. Maysa a panguluen iti annak ni Adonicam a kimmuyog ken Esdras a napan idiay Jerusalem idi 468 K.K.P. Mabalin a maysa isuna kadagidiay imbaon ni Esdras nga agkiddaw iti tattao nga agserbi iti santuario, a nagbanag iti pannakaurnong ti sumagmamano a Levita ken Netineo maipaay iti panagdaliasat.​—Esd 8:1, 13, 16-20.

18. Maysa kadagiti papadi a ginutugot ni Esdras idi simmangpet idiay Jerusalem tapno pagtalawenda ti ganggannaet nga assawa a babai nga innalada; anak ni Harim.​—Esd 10:10, 11, 21, 44.

19. Anak ti sabali pay nga agnagan Harim. Maysa kadagiti Israelita a nangala met iti ganggannaet nga assawa a babai ngem pinagtalawda dagita.​—Esd 10:25, 31, 44.

20. Maysa kadagidiay timmulong a nangtarimaan iti pader ti Jerusalem; anak ni Secanias, ken agay-aywan iti ruangan, mabalin ngarud a maysa a Levita.​—Ne 3:29.

21. Ti ulbod a mammadto a tinangdanan da Tobias ken Sanballat a mangibaga ken Nehemias iti parparbo a pangta iti biagna tapno laeng agbuteng, iti kasta agbasol iti panaglemmengna idiay templo agsipud ta saan a padi. Anak ni Delaias.​—Ne 6:10-13.

22. Maysa a karaman iti martsa ti inagurasion nga inyurnos ni Nehemias kalpasan a nabangon manen ti pader ti Jerusalem.​—Ne 12:31-34.

23. Maysa a padi iti pamilia ni Asaf a makinkaputotan iti nakipaset iti isu met laeng a martsa, nalawag a kas tumutrumpeta.​—Ne 12:31, 35.

24. Maysa a musikero a padi iti isu met laeng a martsa; nabatad a kabagian ti Num. 23.​—Ne 12:31, 36.

25. Maysa a padi a nangpuyot iti trumpeta idi nagsabet iti balay ni Jehova ti dua a koro ti panagyaman idi mainaguraran ti pader.​—Ne 12:40-42.

26. Maysa nga adayo a kaputotan ni David. (1Cr 3:9, 10, 22) Pagarupen ti sumagmamano nga eskolar a ti sasao a “ket ti annak ni Semaias” iti tengnga ti bersikulo 22 (a sinaruno ti lima laeng a nagan) ket rebbeng a maikkat kas biddut ti eskriba, iti kasta matukoy nga addaan ni Secanias iti innem nga annak. Nupay kasta, kunaen ti dadduma nga eskolar a ni Semaias ken ti lima nga annakna ket naibilang kas dagiti innem a kaputotan ni Secanias.