BAAL-HERMON

[Makinkukua iti Hermon].

Agparang daytoy a nagan iti Uk-ukom 3:3 ken 1 Cronicas 5:23. Deskribiren ti umuna a panagparangna ti maysa a disso iti rehion a nagnaedan dagiti Sidonio ken dagiti Heveo a saan a naparmek dagiti Israelita, ket natukoy ditoy kas “Bantay Baal-hermon.” Kadawyan a maikunkuna nga isu dayta ti Bantay Hermon a mismo ngem mabalin a tumukoy dayta iti intero a Kabambantayan ti Anti-Libano wenno iti sumagmamano a pasetna. Iti 1 Cronicas 5:23 nausar ti “Baal-hermon” a kadua ti Senir ken Bantay Hermon ken ti rehion ti Basan tapno mailadawan ti teritoria a nagnaedan ti kagudua a tribu ni Manases. Nupay mabalin a tumukoy iti maysa nga ili wenno lugar iti asideg ti Bantay Hermon, mabalin met nga awag dayta iti bambantay a rehion ti Hermon.​—Kitaenyo ti HERMON.