Ti Panangsagap Itoy “Angin” ti Lubong ket Makapapatay!

“Ket pinagbiagnakayo ti Dios idinto a nataykayon gapu kadagiti panagsalungasing ken basbasol, a nagnaanyo idi naminsan . . . kas maiyannurot iti panguluen ti pannakabalin ti angin.”​—EFESO 2:1, 2.

 1. Kasano a ti pannakarugit ti angin agbalin a makapapatay kadagiti tattao?

PANANGSAGAP iti presko nga angin! Anian a makabang-ar dayta kalpasan ti kaadda ti maysa iti uneg ti maysa a kuarto a saan a nasayaat ti bentilasionna! Ngem uray pay iti nakalawlawa a silulukat a lugar, ti polusion ket maysa a kangrunaan a parikut itatta. Dagiti sabidong a maipugso iti atmospera nakaam-amak ti kaaduna kadagiti adu a pagpagilian. Dagiti makasabidong nga asuk, ti tapuk a radioaktibo, dagiti makapataud ti sakit a mikrobio, ken dagiti dadduma a virus agdaliasatda amin babaen iti angin. Ti makaited-biag nga angin, a sipaparabur nga impaay ti managayat a Namarsuatayo, agbalbalinen nga ad-adda a makapapatay gapu iti kinabuklis ti tao ken ti awan a panagar-arnasna.

 2. Ania a narugitan nga “angin” ti napegpeggad pay ngem ti narugitan nga angin a mabalin a masagaptayo?

² Ti pumada ti kapeggadna a kas iti kapeggad iti pannakarugit ti angin, nupay kasta, isu ti ad-adda pay a makapapatay a porma iti narugitan nga “angin.” Dayta ket saan a narugitan nga angin manipud iti nuklear nga aksidente idiay Chernobyl (U.S.S.R.) wenno ti napno ti asuk nga angin iti Los Angeles, California (E.U.A.). Saan, agpegpeggadtayo a makasagap iti ad-adda pay a makapapatay nga “angin.” Dinakamat ni apostol Pablo dayta idi imbagana kadagiti padana a Kristiano: “Ket pinagbiagnakayo ti Dios idinto a nataykayon gapu kadagiti panagsalungasing ken basbasol, a nagnaanyo idi naminsan a kas iti ugali daytoy a lubong, kas mayannurot iti panguluen ti pannakabalin ti angin, ti espiritu nga ita agaramid kadagiti annak ti kinasukir.”​—Efeso 2:1, 2.

3, 4. (a) Asino “ti agturay iti pannakabalin ti angin”? (b) Apay a ti “angin” iti Efeso 2:1, 2 saan nga isu ti pagtaengan dagiti demonio?

³ Ania daytoy nga “angin”? Ipakita ni Pablo a dayta addaan iti “autoridad,” wenno pannakabalin, ket adda “agturay” kenkuana. Awan duadua no siasino daytoy nga agturay. Isu ni Satanas a Diablo, ti inawagan ni Jesu-Kristo a “ti agturay daytoy a lubong.” (Juan 12:31) Babaen iti pannakabigbig iti daytoy, dadduma nga eskolar iti Biblia mariknada a bimmulod ni Pablo ditoy manipud kadagiti Judio wenno pagano a gubuayan ket nagsarita maipapan iti angin a kas ti pagtaengan dagiti demonio isu a tengtenglen ti Diablo. Adu a patarus ti Biblia ti mangiparangarang iti daytoy a panangmatmat. Ngem daytoy nga “angin” saan a kapada ti angin “kadagiti nainlangitan a disso” isu a pagtaengan “dagiti dakes nga espiritu a puersa.”​—Efeso 6:11, 12.

⁴ Idi nagsurat ni Pablo kadagiti Kristiano idiay Efeso, ni Satanas ken dagiti demoniona addada pay laeng idiay langit, nupay addadan iti ruar iti pabor ti Dios. Dagitoy ti maitappuakto pay laeng iti kaparanget ti daga. (Apocalipsis 12:7-10) Kasta met, ti angin ad-adda a mainaig kadagiti tattao ngem kadagiti naespirituan a parparsua. Maitunos iti daytoy, ti natauan a sosiedad mariknadanto dagiti epekto no ti maudi a malukong iti pungtot ti Dios ti maibukbok “iti angin.”​—Apocalipsis 16:17-21.

 5. Ania ti “angin” ditoy a pagsasaritaan, ken ania ti epektona kadagiti tattao?

⁵ Gapuna, agparang nga inusar ni Pablo ti literal nga angin, wenno ti atmospera, a mangiyilustrar ti pangkaaduan nga espiritu, wenno ti kangrunaan a kababalin iti kinaagum ken ti kinasukir, nga iparangarang dagiti tattao a naisina manipud iti Dios. Dayta ti kapada met laeng “ti espitiru nga ita agaramid kadagiti annak ti kinasukir” ken “ti espiritu iti lubong.” (Efeso 2:2; 1 Corinto 2:12) No kasano a ti literal nga angin ket adda iti isuamin a lugar, a sisasagana a sagapentayo wenno lang-abentayo, kasta met “ti espiritu iti lubong” kanayon met nga adda. Manipud iti kinamaladaga agingga iti tanem, dayta ti agsaknap, mangimpluensia, ken mangsukog iti dalan iti panagpampanunot ken panagtigtignay dagiti tattao bayat ti panangsapulda a mangtungpal kadagiti tarigagayda, inanamada, ken ambisionda.

 6. (a) Kasano a mapakaro ti kinabileg ti “angin” daytoy a lubong, ket kasano ti panangibanagna iti “pannakabalinna”? (b) Kasano a ti panangsagap itoy nga “angin” gargarienna ti maysa a mangtulad iti managalsa a kurso ti Diablo?

⁶ Daytoy espiritu iti kinamanagbasol ken iyaalsa ti nangnangruna a mangiturturay iti imperpekto a natauan a sosiedad. Bayat a daytoy nga “angin” ket masagap, ti kabaelanna a mangpapatay ket kumarkaro babaen iti panangpilit ti kapatadan ken ti umad-adu a panagtarigagay iti panagragragsak. Gapuna, dayta ti nalawag nga addaan iti “autoridad” kadagiti tattao. (Idiligyo iti Roma 6:12-14.) Ti Diablo, siempre, isu ti namunganay kadagiti amin a dakes. (Juan 8:44) Gapuna impluensiaanna dagiti tattao a mangtulad iti bukodna a managalsa a dalan ket iti kasta tignayenna, sukogenna, ken tenglenna daytoy nga espiritu iti komunidad, wenno “angin.” Kas ti “agturay” daytoy dakes a pannakabalin, wenno “autoridad,” ni Satanas usarenna dayta a mangtengngel iti panagpampanunot dagiti tattao. Dagiti elementona ket maaramidda a mamagbalin nga okupado unay kadagiti tattao kadagiti mangpennek iti linalasag a tartarigagay ken ti panangitultuloy kadagiti nainlubongan a pagayatan ta awanandan iti tiempo wenno pagannayasan a mangammo iti Dios ken agpaituray iti nasantuan nga espiritu, “ti espiritu a makaited-biag.” (Juan 6:63) Iti naespirituan a panagsao, dagitoy natayda.

 7. (a) Iti ania a pamay-an a dagiti Kristiano “annak ida iti pungtot” idi naminsan? (b) Apaman a nagbalintayon a Kristiano, ania a panagbalbaliw ti napasamak?

⁷ Dagiti met Kristiano addada iti sidong ti “autoridad,” wenno panangtengngel, daytoy narugitan nga “angin” sakbay a naammuanda ti kinapudno iti Sao ti Dios ket nakitunosda kadagiti nalinteg a pagalagadanna. “Wen, iti tengnga dagitoy [dagiti nainlubongan a tattao] datay met amin idi naminsan nagbiagtay kadagiti derderrep iti lasagtayo, a tungpalentay dagiti tarigagay ti lasag ken dagiti panunot, ket iti nakayanakan annaknatayo idi ti pungtot a kas kadagiti sabsabali.” Ngem idi nagbalintayon a Kristiano, simmardengtayon a mangsagsagap iti makapapatay nga “angin” daytoy a lubong. ‘Inuksubtayon ti daan a personalidad nga agruprupsa a maitunos kadagiti derderrep a mangallilaw ket inkawestayo ti baro a personalidad a naparsua a maitunos iti pagayatan ti Dios iti kinalinteg ken iti kinasanto ti kinapudno.’​—Efeso 2:3; 4:22-24.

 8. Kasano a ti kasasaadtayo ita ket umasping iti kasasaad iti nasion ti Israel idiay let-ang?

⁸ Ti peggad ita ket kalpasan ti pannakalisitayo iti daytoy narugitan nga atmospera iti lubong mabalin a mallukoytayo nga agsubli iti dayta. Ket itan, addatayon a nakaun-uneg “iti tiempo iti panungpalan” ket addatayon iti ruangan a mismo iti baro a lubong. (Daniel 12:4) Sigurado, ditay kayat ti maikulbo gapu iti pannakatinnag iti isu met laeng a silo a nangsilo kadagiti Israelitas. Kalpasan ti simimilagro a pannakaisalakanda manipud Egipto ken idi nakadanondan iti pagbeddengan iti Naikari a Daga, rinibo “ti naikulbo iti let-ang.” Apay? Agsipud ta dadduma ti nagbalin a managdaydayaw kadagiti didiosen, dadduma ti nakiabig, ken dadduma pay ti nangsubok ken ni Jehova babaen kadagiti panagdaydayamudomda ken panagrekreklamoda. Nangaramid ni Pablo iti nabileg a punto idi kunaenna: “Ket dagitoy a bambanag naaramidda kadakuada a pagulidanan ket naisuratda tapno pakabagbagaantayo a dimtengan dagiti panungpalan dagiti aldaw.”​—1 Corinto 10:1-11.

 9. (a) Kasano nga addatayo iti lubong ket kaskasdi a saantayo a paset dayta? (b) Ania ti masapul a pagbalinantayo tapno saantayo a masusop nga agsubli iti makapapatay nga atmospera iti lubong?

⁹ No maipapan kadagiti ad-adalanna, nagkararag ni Jesus: “Saanda a taga lubong, a kas kaniak a saanak a taga lubong. Diak dawaten nga ikkatem ida ditoy lubong, no di ket igagam koma ida iti dakes.” (Juan 17:14, 15) Salaknibannatayonto ni Jehova, ngem isu saan a mangikabil iti “linged” iti aglawlawtayo, wenno simimilagro a salaknibannatayo manipud iti “angin” daytoy a lubong. (Job 1:9, 10) Gapuna ti karittayo isu ti kaaddatayo iti lubong ni Satanas, ngem saantayo nga agbalin a paset dayta, ti pannakalikmuttayo iti narugitan nga “angin[na],” ngem saantayo a sagapen dayta. No agbasatayo kadagiti sekular a pagbasaan wenno pagbasaan iti lubong, agbuya iti telebision, wenno mapan kadagiti luglugar a paglinglingayan, mabalin a maisarangtayo iti “angin” daytoy a lubong. Nupay no dadduma a pannakilangen kadagiti tattao ditoy lubong ket di maliklikan​—idiay pagtrabahuan, idiay eskuelaan, ken dadduma pay​—masapul a sisisiputtayo tapno maliklikantayo ti pannakasusop nga agsubli iti makapapatay nga atmospera daytoy a lubong.​—1 Corinto 15:33, 34.

10, 11. (a) Kasano a ti kaaddatayo iti naespirituan a paraiso ni Jehova mabalin a maidilig iti kaaddatayo iti maysa a lugar a “saan a pagsigarilioan”? (b) Ania nga addang ti masapul nga alaen no madlawtayo ti pul-oy iti “angin” daytoy a lubong?

¹⁰ Mabalin nga idiligtayo ti kasasaadtayo iti panagtugaw iti maysa a restaurant nga addaan kadagiti luglugar a “pagsigarilioan” ken luglugar a “saan a pagsigarilioan.” Kas Kristiano iti naespirituan a paraiso ni Jehova, siuumiso nga addatayo iti lugar a “saan a pagsigarilioan,” nga adayu manipud iti espiritu daytoy a lubong. Sigurado, a saantayo a gaggagaraen ti agtugaw iti lugar a “pagsigarilioan.” Dayta ket kinamaag. Ngem ania ti masansan a mapaspasamak no addatayo iti lugar a “saan a pagsigarilioan” iti maysa a restaurant? Siempre, ti napunnon iti asuk, narugit nga angin agturong kadatayo, ket mapul-oyannatayo dayta! No mapasamak daytoy, masarakantayo kadi a makaawis ti narugitan nga angin? Wenno saan kadi a dagdagus a pumanawtayo iti dayta?

¹¹ Ngem ania ti aramidenyo no ti pul-oy ti “angin” daytoy a lubong ti agturong kadakayo? Dagdagus kadi a pumanawkayo manipud iti daytoy dakes nga impluensia? No agtalinaedkayo sadiay ket sagapenyo dayta, masiguradoyonto a maapektaranto ti panagpampanunotyo. No napapaut ti panangsagapyo itoy nga “angin,” ad-adda met ti panangpalugodyo iti dayta. Kasta met, bayat ti panaglabas ti tiempo ti banglona saanton a makarimon no di ket makaawisen, pagragsakanen, makagargari iti lasag. Mabalin a pakaruenna ti nalimed a tarigagay a mabalin a pagtepteppelanyo.

12. Ania ti kasapulan tapno maliklikan ti pannakaapektartay kadagidiay paspaset iti “angin” daytoy a lubong a saan a nalaka a madlaw?

¹² Dagiti dadduma a makapapatay a makarugit a bambanag daytoy “angin” iti lubong ti saan a dagdagus a madlaw, a kas met kadagiti makarugit a bambanag iti literal nga angin a kas ti carbon monoxide nga awan ti banglona ken ramanna. Ti peggad, ngarud, ket mabalin a saantayo a madlaw dagiti ‘makapapatay nga asuk’ agingga a daytoy ti mangringbawen kadatayo. Gapuna, masapul nga alertotayo tapno saantayo koma a maiturong iti silo iti ipapatay babaen iti manangpalugod a kababalin daytoy a lubong wenno iti panagsalungasing kadagiti pagalagadan ti Dios iti kinalinteg. Pinaregta ni Pablo dagiti padana a Kristiano nga “agbibinnalakadda iti inaldaw . . . tapno saan a tumangken ti uray siasino kadakayo gapu iti panangallilaw ti basol.”​—Hebreo 3:13; Roma 12:2.

Ania ti Mangbukel iti “Angin” Daytoy a Lubong?

13. (a) Ania ti maysa kadagiti porma iti “angin” daytoy a lubong a masapul a pagannadantayo? (b) Kasano a nalawag a daytoy nga “angin” inapektaranna ti dadduma kadagiti tattao ni Jehova?

¹³ Ania a kadawyanen a kababalin ti mabalin nga aramidentayo, uray pay sakbay ti pannakabigbigtayo iti dayta, gapu iti nabileg nga impluensia daytoy “angin” iti lubong? Ti maysa isu ti pagannayasan a mangay-ayam kadagiti imoral a bambanag. Dagiti kapanunotan daytoy a lubong maipapan iti sekso ken moralidad adda amin iti aglawlawtayo. Adu ti agkuna: ‘Awan dakesna ti makiabig, maaddaan kadagiti annak iti ruar ti kasamiento, ken ti panangaramid iti homoseksualidad. Ar-aramidentayo laeng ti kadawyanen, ti gagangayen a banag.’ Daytoy kadi nga “angin,” wenno nainlubongan nga espiritu, inapektaranna ti ili ni Jehova? Nakalkaldaang, bayat iti 1986 a tawen serbisio, 37,426 ti nailaksid manipud iti kongregasion Kristiano, a ti kaaduan kadakuada ket nailaksid gapu iti seksual nga imoralidad. Ket daytoy dina iraman ti ad-adu pay a bilang dagiti nababalaw gapu iti imoralidad ngem saan a nailaksid gapu ta sipapasnek a nagbabawida.​—Proverbio 28:13.

14. Apay a dadduma a Kristiano naglabsingda no maipapan iti moral, a dida inawat ti Nainkasuratan a balakad?

¹⁴ Ania ti mapasamak iti kaso dagidiay a maikulbo iti seksual nga imoralidad? No naammuan dagiti kinapudno, masansan a masarakan nga intultuloyda ti nangsagap iti makapapatay nga “angin” daytoy a lubong. Pinalubosanda dagiti nainlubongan a kababalin a mangipababa kadagiti pagalagadanda. Kas pangarigan, mabalin a mangrugida a mangbuya kadagiti sine a mabalin a saanda a kayat a buyaen adu a tawtawen sakbayna. Ti dakdakes pay, kadagiti alikamen a video iti pagtaengan mabalin a buyaenda dagiti sine a nalawag a saan a maitutop iti maysa a Kristiano. Ti kasta a panangay-ayam kadagiti imoral a bambanag ket direkta a maibusor iti Nainkasuratan a pammalakad: “Ngem ti pannakikamalala ken ti amin a kita ti kinarugit wenno ti agum saan man la koma a madukit kadakayo, kas mayannugot kadagiti sasanto; ket uray dagiti naalas a sasao ken dagiti awan kapapay-anna ken dagiti panangsursuron.”​—Efeso 5:3, 4.

15. Kasano a ti pannakagargari nga agay-ayam iti seksual nga imoralidad kadawyan a mangrugi?

¹⁵ Pudno, mabalin a dagdagus a dikay awaten ti direkta a panangisingasing iti pannakiabig. Ngem kasano ti panagtignayyo no ti maysa nga adda iti trabahoyo wenno idiay eskuelaan ti mangpadas a manggargari kadakayo, a padasenna ti nalabes a kinapalimiar iti pisikal a pamay-an, wenno awisennakayo a rummuar iti maysa a date? Dagiti pul-oy iti “angin” daytoy a lubong ti nagturongen kadakayo. Palubosanyo kadi ti bagiyo a mangtagiragsak iti atension, ket paregtaenyo dayta? Sigun kadagiti report a naawat manipud kadagiti panglakayen, ti biddut ti masansan a mangrugi iti kasta a gagangay a pamay-an. Maysa a nainlubongan a lalaki ti mabalin a mangikuna iti maysa a Kristiano a babai: “Anian a nagpintaska ita nga aldaw!” Mabalin a makaay-ayo a denggen dayta, nangnangruna no ti babai mariknana a kasla naliday. Ket ti nakarkaro pay, dadduma saanda a nagtignay a nainsiriban kadagiti panangikagumaan iti di umiso a panangsagid. Nangipaayda iti kasla panagkedked ngem saan a naimpusuan ta ti nainlubongan a lalaki ket naparegta a mangitultuloy iti ar-aramidenna. Ania ngay no ti kasta nga imoral a singasing iti maysa a Kristiano a babai ket agtultuloy, a kasla nabileg a pul-oy iti narugitan nga angin a nagturong kenkuana? Iti natibker a pamay-an, masapul nga ibagana kenkuana a dina kayat ken dinanto awaten dagiti atensionna. No itultuloyna ti mangsagap itoy nga “angin,” mabalin a madadaelto ti panagkedkedna. Mabalin nga isut’ maiturongto iti imoralidad, no saan nga iti di nainsiriban a pannakiasawa.​—Idiligyo iti Proverbio 5:3-14; 1 Corinto 7:39.

16. Ania ti kasapulan tapno agbalin a “nasam-it a banglo ni Kristo”?

¹⁶ Nasiglatkayo koma, ngarud, nga agkedked iti imoral, makapapatay nga “angin” daytoy a lubong. Imbes nga agpaituray iti makaawis a banglona ket mangiyeg iti pannakalais iti nagan ni Jehova ken iti organisasionna, agbalin a makaay-ayo a banglo iti Dios babaen iti nadiosan a kababalin ken ugali. Kastoy ti panangibaga ni Pablo iti daytoy: “Ta iti Dios dakami ti maysa a makaay-ayo a banglo ni Kristo kadagiti maisalakan ken kadagiti mapukaw; kadagiti dadduma dakami ti angot ni patay a maipaay iti patay, ket kadagiti sabsabali dakami ti banglo ti biag a maipaay iti biag.” (2 Corinto 2:15, 16) Ania ngay ti pategna no adu ti tumallikud iti Nakristianuan a dalan? (1 Pedro 4:1-5) Bay-anyo ti lubong a mapan iti dalanna, nga apitenna ti dakes a bungbungana iti porma iti nasinasina a pagtaengan, bastardo nga annak, saksakit a maiyakar babaen iti sekso, a kas iti AIDS, ken ti adu pay nga emosional ken pisikal nga an-anayen. Saan laeng a mailisikay kadagiti adu a rigat no di ket maaddaankayo met iti anamong ti Dios. Kasta met, mabalin a dadduma ti maawis babaen iti naimbag a kababalinyo ken ti mensahe ti Pagarian nga ikasabayo, ket iti kasta maawisda babaen iti “banglo ti biag a maipaay iti biag.”

Ti “Angin” iti Nainlubongan nga Estilo

17. Kasano a mabalin a ti estilo ti panagkawkawes ken panagay-ayus ipalgakna a ti maysa ket naimpluensiaanen iti espiritu daytoy a lubong?

¹⁷ Ti sabali pay a paset daytoy “angin” iti lubong ket mainaig iti estilo ti panagkawkawes ken panagay-ayus. Adu kadagiti adda iti lubong ti agkawes tapno pagbalinenda ti bagbagida a makaawis iti sekso. Uray pay dagiti saan pay a tin-edyer tarigagayanda a pagparangen dagiti bagbagida a kas nataenganen, nga ipaganetgetda ti sekso. Maapektarankayo kadi iti daytoy nasaknap nga “angin,” wenno kababalin? Agkaweskayo kadi tapno paragsaken, sutilen, di umiso a gargarien ti interes dagiti kasungani a sekso? No kasta, agar-aramidkayo iti narisgo a banag. Ti panangsagap itoy nga “angin” ti manglemmes iti espiritu ti kinaemmayo, ti panagtarigagayyo nga agbalin a nadalus. (Mikias 6:8) Dagidiay addaan iti espiritu daytoy a lubong ti maawisto kadakayo. Manipud kadagiti tigtignayyo, maawatandanto a sisasaganakayo a makikadua kadakuada iti imoralidad. Ngem apay a rugianyo ti agturong iti daytoy a direksion babaen ti panangipalubosyo iti kasta nga “angin” a mangsilo kadakayo nga agaramid iti dakes iti imatang ti Dios?

18. Kasano a ti kankanayon a pananglaglagip nga ibagbagitayo ni Jehova tulongannatayo iti panagpili iti estilo iti panagkawes ken panagay-ayus?

¹⁸ Tapno agbalin a naemma, saan a masapul a kawesantayo ti bagbagitayo a saan a nadalus wenno saan a makaay-ayo. Usigenyo ti pamay-an ti panagkawkawes ken panagay-ayus ti kaaduan kadagiti Saksi ni Jehova iti bagbagida. Liklikanda dagiti nalabes nga estilo daytoy a lubong ngem iparangda ti bagbagida a makaawis, a laglagipenda nga isuda dagiti ministro a mangibagbagi iti Soberano iti uniberso, ni Jehova. Bay-anyo ti lubong a mangbabalaw iti naemma nga estiloda. Saanda a palubosan dagiti kababalin daytoy a lubong a mangipababa iti Nakristianuan a pagalagadanda. “Daytoy, ngarud, ibagak ken saksiak iti Apo,” insurat ni apostol Pablo, “a dikay koma magmagnan a kas iti pannagna dagiti Gentil iti kinapalangguad ti isipda . . . Nga idinto a napukaw ti amin a riknada inyawatda ti bagida iti kinaderrep tapno aramidenda a siaagum ti amin a kinarugit.” (Efeso 4:17-19) Ti nataengan a Kristiano agkawes a sieemma, a saan a magna a kas iti pannagna dagiti nasnasion.​—1 Timoteo 2:9, 10.

19. Gaput’ nausigtayo dagiti dua a kangrunaan a paset iti “angin” daytoy a lubong, ania ti nalawagen no maipapan iti peggad iti panangsagap iti dayta?

¹⁹ Agingga itoy, nausigtayo ti dua laeng a paset iti “angin” daytoy a lubong. Ngem nakitatayon a daytoy nga “angin” ket makadangran unay iti naespirituan a salun-at. Iti sumaganad nga artikulo, saklawentayto dagiti dadduma pay a paset daytoy makapapatay nga “angin” a kankanayon nga ipulpul-oy ti Diablo ken ti sistemana kadagiti Kristiano, a manginanama a maikulboda iti dayta. Anian a nagpateg ngarud ti panangliklik iti kasta nga “angin,” ta ti panangagsep iti espiritu daytoy a lubong ket kas iti panangsagap iti makapapatay a sengngaw iti ipapatay!

Kasano ti Isusungbatyo?

◻ Ania ti “angin” daytoy a lubong, ken siasino ti mangituray iti dayta?

◻ Ti “angin” daytoy a lubong addaan iti ania a “pannakabalin” kadagiti tattao?

◻ Apay a mabalin a maikuna a dagiti Kristiano addada iti lugar a “saan a pagsigarilioan”?

◻ No maipapan iti panangay-ayam kadagiti imoral a bambanag, kasano a ti “angin” daytoy a lubong apektaranna ti ili ni Jehova?

◻ Kasano a ti kinaemma tulongannatayo a mangliklik iti impluensia ti “angin” daytoy a lubong no maipapan iti panagkawkawes ken panagay-ayus?

[Ladawan iti panid 10]

Agkedkedkedkayo kadi a mangsagap iti makapapatay nga “angin” daytoy a lubong?

[Ladawan iti panid 13]

Ania ti aramidenyo no ti pul-oy iti “angin” daytoy a lubong ti agturong kadakayo?