Indaydayaw ni Job ti Nagan ni Jehova

“Ti nagan ni Jehova agtultuloy koma a mabendito.”​—JOB 1:21.

 1. Siasino ti posible a nangisurat iti libro a Job, ken kaano?

AGARUP 40 ti tawenen ni Moises idi nagtalaw sadi Egipto tapno maliklikanna ti pungtot ni Faraon sa nagnaed idiay Midian. (Ara. 7:23, 29) Bayat ti kaaddana sadiay, mabalin a nadamdamagna dagiti nakasuotan ni Job, nga agnanaed iti asideg nga Uz. Tawtawen kalpasanna, idi a ni Moises ken ti nasion ti Israel ket nakadanon iti asideg iti Uz idi dandanin agpatingga ti panagdaliasatda iti let-ang, mabalin a naammuan ni Moises ti maipapan kadagiti maudi a tawen ni Job. Sigun iti pakasaritaan dagiti Judio, insurat ni Moises ti libro a Job sumagmamano a tiempo kalpasan ti ipapatay ni Job.

 2. Kadagiti ania a wagas a ti libro a Job ket makapabileg kadagiti adipen ni Jehova ita?

² Ti libro a Job pabilgenna ti pammati dagiti adipen ti Dios ita. Kadagiti ania a wagas? Ipakaammona kadatayo dagiti napasamak idiay langit ken ti agkakapateg a kaipapanan dagita. Ipaganetgetna kadatayo ti kapatgan nga isyu ti sapasap a kinasoberano ti Dios. Paunegenna ti pannakaawattayo no ania ti nairaman iti panagtalinaed a natarnaw ken tulongannatayo a mangtarus no apay a no dadduma, ipalpalubos ni Jehova nga agsagaba dagiti adipenna. Iyam-ammona met ni Satanas a Diablo kas ti kangrunaan a Kabusor ni Jehova ken ti sangatauan. Kanayonanna, ipakitana a kabaelan dagiti imperpekto a tattao a kas ken Job ti agtalinaed a nasungdo ken Jehova uray no agsagabada iti nakaro a suot. Usigentayo ti dadduma kadagiti pasamak a naisalaysay iti libro a Job.

Ni Satanas Sinubokna ni Job

 3. Ania ti ammotayo maipapan ken Job, ken apay a dinidigra ni Satanas?

³ Ni Job ket nabaknang, nalatak ken mapagwadan nga ulo ti pamilia. Isu ket pagaammo kas mararaem a mamalbalakad a tumultulong kadagiti marigrigat. Kangrunaan iti amin, isu ket managbuteng iti Dios. Nadeskribir ni Job kas tao nga “awan pakababalawanna ken nalinteg, ken agbuteng iti Dios ken sumiasi iti dakes.” Isu ket dinidigra ni Satanas a Diablo gapu iti nadiosan a debosionna, saan a gapu iti kinabaknang ken kinalatakna.​—Job 1:1; 29:7-16; 31:1.

 4. Ania ti kaipapanan ti kinatarnaw?

⁴ Ti damo a salaysayen ti libro a Job ket ti naangay idiay langit a panagtataripnong dagiti anghel iti sanguanan ni Jehova. Dimmar-ay met ni Satanas ket pinadpadakesna ni Job. (Basaen ti Job 1:6-11.) Nupay nadakamat ni Satanas ti sansanikua ni Job, impangpangrunana ti panangkaritna iti kinatarnaw ni Job. Ti termino a “kinatarnaw” kaipapananna ti kinapalungdo, kinalinteg, kinaawan pakababalawan, ken kinaawan pakapilawan. Kas iti nausar iti Biblia, ti kinatarnaw ti tao ipasimudaagna ti naan-anay a debosion ken Jehova.

 5. Ania ti inkarit ni Satanas maipapan ken Job?

⁵ Inkarit ni Satanas nga agserserbi ni Job iti Dios gapu laeng iti bukodna a pagimbagan, saan a gapu iti kinatarnawna. Kinuna ni Satanas a nasungdo laeng ni Job ken Jehova gapu iti agtultuloy a bendision ken pannalaknib ti Dios kenkuana. Tapno masungbatan ti karit ni Satanas, impalubos ni Jehova a didigraen ni Satanas dayta a matalek a tao. Isu nga iti maysa laeng nga aldaw, naammuan ni Job a natakaw wenno natay dagiti dinguenna, napapatay ti kaaduan kadagiti adipenna, ken natay ti sangapulo nga annakna. (Job 1:13-19) Napukaw aya ti kinatarnaw ni Job gapu kadagita? Ti naipaltiing a surat deskribirenna ti reaksion ni Job iti nakalkaldaang a napagtengna: “Ni Jehova a mismo ti nangted, ket ni Jehova a mismo ti nangala. Ti nagan ni Jehova agtultuloy koma a mabendito.”​—Job 1:21.

 6. (a) Ania ti napasamak iti maysa manen a taripnong idiay langit? (b) Siasino ti pampanunoten ni Satanas idi kinaritna ti kinatarnaw ni Job ken Jehova?

⁶ Kalpasanna, adda manen naangay a taripnong idiay langit. Adda manen dagiti pammadakes ni Satanas ken Job. Kinunana: “Kudil maigapu iti kudil, ken isuamin nga adda iti maysa a tao itednanto maigapu iti kararuana. Kas pamaliwan, iyunnatmo ta imam, pangngaasim, ket sagidem agingga iti tulangna ken lasagna ket kitaem no saannakanto nga ilunod ita mismo a rupam.” Imutektekanyo ta addan dagiti inraman ni Satanas kadagiti pammadakesna. Babaen ti panangibagana nga “Isuamin nga adda iti maysa a tao itednanto maigapu iti kararuana,” saan laeng a ti kinatarnaw ni Job ti karkariten idin ti Diablo no di ket ti kinatarnaw ti asinoman a “tao” nga agdaydayaw ken Jehova. Kalpasan dayta, ti Dios pinalubosanna ni Satanas a mangdidigra ken Job iti naut-ot a sakit. (Job 2:1-8) Ngem saan la a dayta dagiti nakasuotan ni Job.

Dagiti Masursurotayo iti Reaksion ni Job

 7. Kadagiti ania a wagas a ni Job ket riniribuk ni baketna ken ti tallo a simmarungkar a gagayyemna?

⁷ Idi nangrugi dagiti pakasuotan ni Job, nagsagaba met ni baketna a kas kenkuana. Sigurado a nariknana a kas man la nagtupak ti langit gapu iti ipapatay ti annakna ken ti pannakapukaw ti sanikua ti pamiliada. Nasaem la ketdi ti riknana idi makitanan nga agsagsagaba ni lakayna iti naut-ot a sakit. Insangitna ken Job: “Salsalimetmetam pay laeng kadi a sititibker ti kinatarnawmo? Ilunodmo ti Dios ket matayka!” Kalpasan dayta, dimteng ti tallo a lallaki a da Elifaz, Bildad, ken Zofar a mangliwliwa koma ken Job. Ngem imbes a kasta, nagusarda iti makaallilaw a panagrasrason ken napaneknekan a ‘makariribukda a manangliwliwa.’ Kas pagarigan, imparipirip ni Bildad nga adda dakes nga inaramid dagiti annak ni Job isu a kasdiay ti napasamak kadakuada. Impasagid met ni Elifaz nga agsagsagaba ni Job gapu kadagiti napalabas a basolna. Pinagduaduaanna pay ketdi no ipatpateg met la ni Jehova dagiti natarnaw! (Job 2:9, 11; 4:8; 8:4; 16:2; 22:2, 3) Kadagita a makariribuk a kasasaad, nagtalinaed ni Job a natarnaw. Pudno a nagkamali met idi ‘indeklarana a nalinteg ti bukodna a kararua imbes a ti Dios.’ (Job 32:2) Ngem nagtalinaed latta a matalek iti laksid amin dagita.

 8. Ania ti nagsayaat nga inyulidan ni Eliu kadagiti mangipapaay iti balakad ita?

⁸ Sumaganad, mabasatayo ti maipapan ken Eliu a simmarungkar met ken Job. Umuna, dimngeg ni Eliu kadagiti argumento ni Job ken ti tallo a gagayyemna. Nupay ub-ubing ngem kadagita nga uppat, impakita ni Eliu nga isu ket nasirsirib. Siraraem a kinasaritana ni Job. Kinomendaranna ni Job gapu iti kinapalungdona. Ngem imbagana met a nalabes ti panangikalintegan ni Job iti bagina nga awan ti pakapilawanna. Kalpasan dayta, impasigurado ni Eliu ken Job a kanayon a makagunggona ti simamatalek a panagserbi iti Dios. (Basaen ti Job 36:1, 11.) Anian a nagsayaat nga ulidan kadagidiay mangipapaay iti balakad ita! Nagan-anus ni Eliu, dimngeg a naimbag, nangted iti mayanatup a komendasion, ken nangipaay iti makapabileg a balakad.​—Job 32:6; 33:32.

 9. Kasano ti panangtulong ni Jehova ken Job?

⁹ Kamaudiananna, adda makapaamanga unay a simmarungkar ken Job! Kuna ti salaysay: “Ni Jehova sinungbatanna ni Job manipud iti allawig.” Babaen ti agsasaruno a saludsod, siaasi ngem sibibileg a tinulongan ni Jehova ti adipenna a ni Job a mangatur iti panagpampanunotna. Sidadaan nga inawat ni Job ti pannubngar ken binigbigna: “Nagbalinak a bassit ti pategna . . . agbabawiak iti tapok ken dapdapo.” Kalpasan ti pannakisaritana ken Job, tinubngar ni Jehova ti tallo a kakadua ni Job agsipud ta saanda a “nagsao iti napudno.” Rumbeng nga ikararagan ida ni Job. Idin, “imbaw-ing ni Jehova a mismo ti kautibo a kasasaad ni Job idi nagkararag maigapu kadagiti kaduana, ket kas kanayonan rinugian ni Jehova nga ited ti isuamin a kukua idi ni Job, iti mamindua a kaadu.”​—Job 38:1; 40:4; 42:6-10.

Kasano Kauneg ti Panagayattayo ken Jehova?

10. Apay a di lattan pinalabas ni Jehova ti karit ni Satanas wenno apay a dina dinadael latta koman?

¹⁰ Ni Jehova ti Namarsua iti uniberso ken ti Soberano ti amin a parsua. Apay a dina latta koman pinalabas ti karit ti Diablo? Ammo ti Dios a ti di panangikankano ken Satanas wenno ti panangdadael kenkuana ket agpadpada a di mangrisut iti napataud nga isyu. Inkarit ti Diablo a ti natarnaw a ni Job ket saan nga agtalinaed a nasungdo ken Jehova no mapukaw ti kinabaknangna. Nagtalinaed a nasungdo ni Job iti laksid dagiti napasamak iti biagna. Kalpasanna, inkarit ni Satanas a tumallikud ken Jehova ti asinoman a tao no madadael ti salun-atna. Nagsakit ni Job ngem kaskasdi a natarnaw latta. Gapuna, napaneknekan nga ulbod ni Satanas no maipapan iti dayta a matalek nupay imperpekto a tao. Ti ngay dadduma nga agdaydayaw iti Dios?

11. Kasano a nakaipaay ni Jesus iti naan-anay a sungbat iti karit ni Satanas?

¹¹ No ar-arigen, ti tunggal adipen ti Dios nga agtalinaed a natarnaw iti laksid ti aniaman a pammarigat ni Satanas, ipakpakitana nga iti mismo a kasasaadna, bin-ig a kinaulbod dagiti karit dayta a naulpit a kabusor. Immay ni Jesus ditoy daga ken nangipaay iti naan-anay a sungbat iti karit ni Satanas. Perpekto idi a tao ni Jesus kas iti umuna nga amatayo a ni Adan. Ti kinamatalek ni Jesus agingga ken patay ti naan-anay a pammaneknek nga ulbod ni Satanas ken palso dagiti akusasionna.​—Apoc. 12:10.

12. Ti tunggal adipen ni Jehova ket addaan iti ania a gundaway ken responsabilidad?

¹² Nupay kasta, kanayon latta a susuoten ni Satanas dagiti agdaydayaw ken Jehova. Adda gundaway ken responsabilidad ti tunggal maysa kadatayo a mangpaneknek babaen iti mismo a kinatarnawtayo nga agserserbitayo ken Jehova gapu iti panagayattayo kenkuana, saan ket a gapu kadagiti bukodtayo a pagimbagan. Kasano ti panangmatmattayo iti dayta a responsabilidad? Ibilangtayo a maysa a pribilehio ti agbalin a nasungdo ken Jehova. Maliwliwatayo met a makaammo a ni Jehova pabilgennatayo nga agibtur, ken kas iti napasamak ken Job, adda inkeddengna a pagpatinggaan dagiti suot a mapaspasarantayo.​—1 Cor. 10:13.

Ni Satanas​—Naingar a Kabusor ken Apostata

13. Ania dagiti indetalye ti libro a Job maipapan ken Satanas?

¹³ Iti Kristiano a Griego a Kasuratan, nagadu ti maammuantayo maipapan iti ibubusor ni Satanas ken Jehova, ket iti libro nga Apocalipsis, maammuantayo ti pannakaalangonto ti kinasoberano ni Jehova ken ti naan-anay a pannakadadael ni Satanas. Indetalye met ti Hebreo a Kasuratan ti nakababain nga aramid ni Satanas iti panangkaritna ken Jehova ken iti panangiwawana iti sangatauan. Ti libro a Job nayonanna ti pannakaammotayo maipapan iti kinarebelioso ni Satanas. Idi nakitaripnong ni Satanas idiay langit, saan a dimmar-ay tapno agdaydayaw ken Jehova. Dakes ti kababalinna ken makadangran ti panggepna. Kalpasan a pinadpadakesna ni Job ken napalubosan a mangsuot iti dayta a tao, “ni Satanas pimmanaw nga immadayo iti sango ni Jehova.”​—Job 1:12; 2:7.

14. Ania a kababalin ti impakita ni Satanas ken Job?

¹⁴ Gapuna, ti libro a Job iyam-ammona ni Satanas kas awanan asi a kabusor ti sangatauan. Di masinunuo ti kapaut ti tiempo iti nagbaetan dagiti taripnong idiay langit a nadakamat iti Job 1:6 ken ti nadeskribir iti Job 2:1. Iti dayta a tiempo a siuulpit a nasuot ni Job. Gapu iti kinamatalek ni Job, kastoy ti naibaga ni Jehova ken Satanas: “[Ni Job] kaskasdi a salsalimetmetanna pay laeng a sititibker ti kinatarnawna, nupay sika gargariennak maibusor kenkuana a mangalun-on kenkuana nga awan gapgapuna.” Ngem saan nga inadmitir ni Satanas a napaneknekanen a palso dagiti karitna. Imbes ketdi, imbagana a rumbeng a maipasidong manen ni Job iti nakaro a suot. Gapuna, ti Diablo sinuotna ni Job idi nabaknang pay ken idi nakurapayen. Nalawag nga awan asi ni Satanas kadagiti nakurapay wenno kadagiti biktima ti kalamidad. Kagurgurana dagiti natarnaw. (Job 2:3-5) Ngem ti kinamatalek ni Job pinaneknekanna nga ulbod ni Satanas.

15. Ania ti nagpapadaan dagiti apostata ita ken ni Satanas?

¹⁵ Ni Satanas ti kaunaan a parsua a nagapostata. Dagiti kababalin dagiti apostata ita umaspingda iti kababalin ti Diablo. Mabalin a natiritiren ti isipda gapu iti kinamanangkritikarda kadagiti indibidual iti kongregasion, kadagiti Kristiano a papanglakayen, wenno iti Bagi a Manarawidwid. Dadduma nga apostata busorenda ti pannakausar ti nagan ti Dios a Jehova. Saanda nga interesado nga agadal maipapan ken Jehova wenno dida interesado nga agserbi kenkuana. Dagiti natarnaw ti pumpuntiriaen dagiti apostata, kas iti amada a ni Satanas. (Juan 8:44) Dayta ti gapuna a dagiti adipen ni Jehova dida pulos makipulapol kadagiti apostata!​—2 Juan 10, 11.

Indaydayaw ni Job ti Nagan ni Jehova

16. Ania a kababalin ti impakita ni Job ken Jehova?

¹⁶ Inusar ken indaydayaw ni Job ti nagan ni Jehova. Uray no kasla nagtupak ti langit kenkuana idi nadamagna a natay dagiti annakna, awan a pulos ti nasaona a maibusor iti Dios. Nupay di umiso ti panangipagarup ni Job a ti Dios ti makinggapuanan kadagiti napagtengna, kaskasdi nga indaydayawna ti nagan ni Jehova. Iti maysa kadagiti proverbiona idi agangay, kinunana: “Adtoy! Ti panagbuteng ken Jehova​—dayta ti sirib, ket ti iyaadayo iti dakes isu ti pannakaawat.”​—Job 28:28.

17. Ania ti nakatulong ken Job nga agtalinaed a natarnaw?

¹⁷ Ania ti nakatulong ken Job nga agtalinaed a natarnaw? Nalawag a sakbay pay a dimteng dagiti didigra iti biagna, nakasingsingeden ti relasionna ken Jehova. Nupay awan ebidensiatayo nga ammo ni Job ti panangkarit ni Satanas ken Jehova, isu ket determinado nga agtalinaed a nasungdo. Kinunana: “Agingga a mauyos ti biagko saankonto nga ikkaten kaniak ti kinatarnawko!” (Job 27:5) Kasano a napatanor ni Job ti kasta a nakasingsinged a relasion? Awan duadua nga impategna dagiti nangnangngegna maipapan iti pannakilangen ti Dios kada Abraham, Isaac, ken Jacob, nga adayo a kakabagianna. Naawatan met ni Job ti adu a galad ni Jehova babaen ti panangpaliiwna iti nakaparsuaan.​—Basaen ti Job 12:7-9, 13, 16.

18. (a) Kasano nga impakita ni Job ti debosionna ken Jehova? (b) Kadagiti ania a wagas a matuladtayo ti nagsayaat nga ulidan ni Job?

¹⁸ Dagiti nasursuro ni Job ti nanggutugot kenkuana a mangparagsak ken Jehova. No bilang ta nakaaramid dagiti kapamiliana iti aniaman a di makaay-ayo iti Dios wenno di la ket ta “nailunodda ti Dios iti pusoda,” kanayon a nagidaton kadagiti mapuoran a sakripisio. (Job 1:5) Uray idi napasaranna ti kakaruan a suot, kaskasdi nga agkakaimbag dagiti nasao ni Job maipapan ken Jehova. (Job 10:12) Nagsayaat ketdin a pagwadan! Masapul a kanayon met a gumun-odtayo iti umiso a pannakaammo maipapan ken Jehova agraman kadagiti panggepna. Iyugalitayo a pabilgen ti relasiontayo iti Dios babaen iti panagadal, pannakigimong, panagkararag, ken panangikasaba iti naimbag a damag. Aramidentayo met ti amin a kabaelantayo a mangipakaammo iti nagan ni Jehova. No kasano a nagrag-o ti puso ni Jehova gapu iti kinatarnaw ni Job, agrag-o met gapu iti kinatarnaw dagiti agdaydayaw kenkuana ita. Dayta a suheto ti mausig iti sumaganad nga artikulo.

Malagipyo Kadi?

• Apay a ni Job ti puntiria ti panangdidigra ni Satanas a Diablo?

• Aniada a suot ti inibturan ni Job, ken ania ti reaksionna?

• Ania ti makatulong kadatayo nga agtalinaed a natarnaw a kas ken Job?

• Iti libro a Job, ania ti maammuantayo maipapan ken Satanas?

[Ladawan iti panid 4]

Ti pakasaritaan ni Job ipalagipna kadatayo ti kapatgan nga isyu ti sapasap a kinasoberano ti Dios

[Ladawan iti panid 6]

Kadagiti ania a kasasaad a nalabit masubok ti kinatarnawmo?