Sarangtenyo Dagiti Propaganda ni Satanas

‘DIKAY paallilaw. Saannakayo a tulongan ti Diosyo. Sumukokayon ta no saan, agsagabakayo!’ Kasta ti kababagas ti mensahe ni Rabsaque, ti mensahero ti ari ti Asiria a ni Senaquerib, nga indanonna kadagiti agnanaed iti Jerusalem. Ti buyot ti ari sinakupda ti daga ti Juda. Dagiti sasao ti mensahero ket nairanta a mangpakapuy iti pakinakem dagiti umili ti Jerusalem ken mangbutbuteng kadakuada tapno sumukoda.​—2 Ar. 18:28-35.

Agdindinamag ti kinaranggas ken kinaulpit dagiti Asirio. Butbutngenda dagiti kabusorda babaen ti panangidetalyeda iti nakaam-ames a panangparigatda kadagiti kautiboda. Sigun iti historiador a ni Philip Taylor, kaugalianda a “butbutngen dagiti tattao ken agiwarasda iti di umiso a damag a nairanta a mangpakapuy iti pakinakem dagiti kautiboda ken butbutngenda dagiti posible a kabusorda babaen ti panangipadamagda iti naulpit a panangtratoda kadagiti sabsabali ken panangmanipular iti isipda.” Nabileg nga igam dagiti propaganda. “Pakapuyenda ti pakinakem,” kuna ni Taylor.

Dagiti pudno a Kristiano ‘addaanda iti pannakigubal, saan a maibusor iti dara ken lasag, no di ket maibusor kadagiti nadangkes nga espiritu a puersa,’ dagiti espiritu a parsua a nagrebelde iti Dios. (Efe. 6:12) Ti kangrunaan kadakuada ket ni Satanas a Diablo. Us-usarenna met ti pammutbuteng a nabuyogan iti propaganda.

Ibagbaga ni Satanas a kabaelanna a dadaelen ti kinatarnaw ti tunggal maysa kadatayo. Idi kaaldawan ni patriarka a Job, kinuna ni Satanas ken ni Jehova a Dios: “Isuamin nga adda iti maysa a tao itednanto maigapu iti kararuana.” Arigna nga ibagbaga ni Satanas a no maipasango ti tao iti nakaro a rigat, tallikudannanto ti kinatarnawna iti Dios. (Job 2:4) Umiso kadi dayta? Adda laeng kadi dagiti kabaelantayo nga ibturan​—a no dumteng ti nakarkaro ngem kadagita ket tallikudantayon dagiti nadiosan a prinsipio tapno mataginayon ti biagtayo? Kasta ti kayat ni Satanas a panunotentayo. Gapuna, agus-usar kadagiti makadangran ken di mapupuotan a propaganda tapno maimulana dayta a kapanunotan iti isiptayo. Usigentayo ti sumagmamano a pamay-an ni Satanas a mangaramid iti dayta ken no kasanotayo a masaranget dagita.

“Ti Pamuonda Adda iti Tapok”

Ni Satanas inusarna ni Elifaz, maysa kadagiti tallo a bimmisita a gagayyem ni Job, tapno pagparangenna nga awanan gaway dagiti tattao. Iti panangtukoyna kadagiti tattao a kas dagidiay “agnanaed iti balbalay a pila,” kinunana ken Job: “Ti pamuonda adda iti tapok! Ti maysa rumekenna ida a nadardaras pay ngem iti maysa a sanga. Manipud iti bigat agingga iti rabii marumekrumekda; iti agnanayon mapukawda nga awan ti asinoman a mangipapuso iti dayta.”​—Job 4:19, 20.

Iti Kasuratan, nayarigtayo iti “damili a basehas”​—narasi a damili. (2 Cor. 4:7) Nakapuytayo gapu iti natawid a basol ken kinaimperpekto. (Roma 5:12) Saantayo a kabaelan dagiti panangraut ni Satanas no iti kabukbukodantayo laeng. Ngem kas Kristiano, adda magun-odtayo a tulong. Iti laksid dagiti pagkapuyantayo, napategtayo iti imatang ti Dios. (Isa. 43:4) Maysa pay, mangipaay ni Jehova iti nasantuan nga espirituna kadagidiay agdawat kenkuana. (Luc. 11:13) Ti espirituna maipaayannatayo iti “pannakabalin a nalablabes ngem ti gagangay,” a tumulong kadatayo a mangdaer iti aniaman a panangparigat ni Satanas. (2 Cor. 4:7; Fil. 4:13) No busorentayo ti Diablo buyogen ti ‘natibker a pammati,’ patibkeren ken papigsaennatayo ti Dios. (1 Ped. 5:8-10) Gapuna, ditay rumbeng a pagbutngan ni Satanas a Diablo.

Maysa a Lalaki nga “Umin-inum iti Kinakillo”

“Ania ti mortal a tao tapno nadalus koma, wenno tapno ti asinoman a nayanak manipud maysa a babai adda koma iti umiso?” insaludsod ni Elifaz. Kalpasanna, kinunana: “Adtoy! [Ti Dios] awanan panamati kadagidiay sasantona, ket dagiti met laeng langit pudno a saanda a nadalus kadagiti matana. Anian nga ad-adda pay a kasta no ti maysa nakarimrimon ken rinuker, maysa a lalaki nga umin-inum iti kinakillo a kasla danum!” (Job 15:14-16) Ibagbaga ni Elifaz nga awan ti asinoman a tao nga ibilang ti Dios a nalinteg. Us-usaren met ti Diablo ti negatibo a panagpampanunot. Kayatna a makumikomtayo kadagiti napalabas a nagkamaliantayo, napalalo a babalawentayo ti bagitayo, ken panunotentayo a saanen a mapakawan dagiti basoltayo. Kayatna pay a panunotentayo a nalabes ti kalikaguman kadatayo ni Jehova ken saan nga umdas ti asi, pammakawan, ken tulongna.

Siempre, amintayo ket “nagbasol ken agkurang iti dayag ti Dios.” Awan ti imperpekto a tao a naan-anay a makaannurot kadagiti pagalagadan ni Jehova. (Roma 3:23; 7:21-23) Ngem dina kayat a sawen a saantayo a napateg kenkuana. Ammo ni Jehova a ti “kadaanan a serpiente, daydiay naawagan iti Diablo ken Satanas,” ti manggunggundaway iti kinaimperpektotayo. (Apoc. 12:9, 10) Gapu ta ammo ti Dios a “tapoktayo,” maawatanna ti kasasaadtayo ken saan a ‘kanayon nga agsapsapul iti bidduttayo.’​—Sal. 103:8, 9, 14.

No tallikudantayo ti dakes nga aramid ken umadanitayo ken ni Jehova buyogen ti naimpusuan a panagbabawi, “dakkelto ti pammakawanna.” (Isa. 55:7; Sal. 51:17) Uray no dagiti basoltayo ket “kasla koma eskarlata, mapapudawdanto a kasla niebe,” kuna ti Biblia. (Isa. 1:18) Determinadotayo ngarud koma a di sumuko a mangaramid iti pagayatan ti Dios.

Gapu ta managbasoltayo, saantayo a mateggedan ti nalinteg a takder iti imatang ti Dios. Napukaw da Adan ken Eva ti kinaperpekto ken ti biag nga agnanayon nga agpaay koma kadakuada ken kadatayo amin. (Roma 6:23) Ngem gapu iti dakkel a panagayat ni Jehova iti sangatauan, nangaramid iti probision tapno mapakawan dagiti basoltayo no paneknekantayo ti pammatitayo iti pangsubbot a daton ti Anakna a ni Jesu-Kristo. (Mat. 20:28; Juan 3:16) Anian a nagsayaat nga ebkas ti “di kaikarian a kinamanangngaasi ti Dios”! (Tito 2:11) Posible a mapakawan ti basoltayo! Ditay koma ngarud ipalubos nga imula ni Satanas iti isiptayo a saantayo a magun-od ti pammakawan ti Dios.

“Sagidem Agingga iti Tulangna ken Lasagna”

Ibagbaga ni Satanas nga isuko ni Job ti pammatina no agsagaba ti salun-atna. Kas panangkarit ken Jehova, kinuna ti Diablo: “Sagidem agingga iti tulangna ken lasagna ket kitaem no saannakanto nga ilunod ita mismo a rupam.” (Job 2:5) Sigurado a maragsakan ti Kabusor ti Dios no maipariknana kadatayo nga awan serserbitayo gapu kadagiti sagsagabaentayo a sakit.

Saannatayo nga ilaksid ni Jehova no ditayon kabaelan nga aramiden ti dati a magapgapuanantayo a panagserbi. Ania ti aramidentayo no adda nangdangran ken nangkabil iti nasinged a gayyemtayo? Maksayan kadin ti panangipategtayo kenkuana gapu ta saannan a maipapaay kadatayo ti dati a maar-aramidanna? Siempre, saan! Ayaten ken aywanantayo latta​—nangruna no ti pannakadangranna ket maigapu kadatayo. Saan kadi a kasta met ti namnamaentayo ken Jehova? “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna,” kuna ti Biblia.​—Heb. 6:10.

Dakamaten ti Kasuratan ti “maysa a marigrigat a balo a babai” a nalabit nga adun a tawen a supsuportaranna ti panagdayaw iti Dios. Idi napaliiw ni Jesus a nangipisok iti “dua a babassit a sinsilio a bassit unay ti pategna” iti baul ti gameng iti templo, imbilangna kadi nga awan pategna ti balo ken ti kontribusionna? Saan, pinadayawanna ketdi gapu ta inaramid ti balo ti amin a kabaelanna a mangsuporta iti pudno a panagdayaw.​—Luc. 21:1-4.

No taginayonentayo ti kinatarnawtayo, masiguradotayo nga agtalinaed a nalagda ti relasiontayo ken Jehova kasanoman kakaro ti sagsagabaentayo gapu iti edad wenno sakit a bunga ti kinaimperpektotayo. Pulos a di baybay-an ti Dios dagiti matalek kenkuana uray malimitaran ti panagserbida gapu iti rigat.​—Sal. 71:9, 17, 18.

Isuotyo “ti Kabal ti Ulo ti Pannakaisalakan”

Kasanotayo a masalakniban ti bagitayo manipud kadagiti propaganda ni Satanas? Insurat ni apostol Pablo: “Itultuloyyo a gun-oden ti pannakabalin iti Apo ken iti kinabileg ti pigsana. Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo.” Ti maysa a paset dayta a naespirituan a kabal ket “ti kabal ti ulo [wenno, helmet] ti pannakaisalakan.” (Efe. 6:10, 11, 17) No maipapan kadagiti propaganda ni Satanas, masapul a siguraduentayo a kanayon a nakasuot kadatayo dayta a helmet. Ti helmet ti maysa a soldado salaknibanna ti ulona. Ti “namnama ti pannakaisalakan”​—ti panagtalektayo iti pannakatungpal dagiti kari ti Dios maipapan iti nadayag a baro a lubong​—salaknibanna ti isiptayo manipud kadagiti kinaulbod ni Satanas. (1 Tes. 5:8) Masapul a pagtalinaedentayo a naraniag ken natibker dayta a namnama babaen ti naanep a personal a panagadal iti Kasuratan.

Inibturan ni Job ti naulpit ken nasaem a panangparigat ni Satanas. Kasta unay ti pammati ni Job iti panagungar ta saan a naupay uray iti pangta ni patay. Imbes ketdi, kinunana ken Jehova: “Umawagkanto, ket siak sungbatankanto. Kailiwmonto ti aramid dagita imam.” (Job 14:15) Uray no matay ni Job gapu iti panangsalimetmetna iti kinatarnawna, nagtalek a ti panagayat ti Dios kadagiti nasungdo nga adipenna ti mangtignay Kenkuana a mangpagungar kadakuada.

Sapay koma ta maaddaantayo iti kasta a panagtalek iti pudno a Dios. Kabaelan ni Jehova nga ikkaten ti aniaman nga ipaay ni Satanas ken dagiti ahentena a maibusor kadatayo. Laglagipentayo met nga ipanamnama kadatayo ni Pablo: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”​—1 Cor. 10:13.

[Ladawan iti panid 20]

Ipatpateg ni Jehova ti matalek a panagserbitayo

[Ladawan iti panid 21]

Kanayon nga isuotyo ti kabal ti ulo ti pannakaisalakan