ASAF

[Isu [Ti Dios] ket Nangummong].

1. Anak ni Levi babaen ken Gersom. (1Cr 6:39, 43) Bayat ti panagturay ni Ari David (1077-1038 K.K.P.), ni Asaf dinutokan dagiti Levita kas maysa a panguluen a kumakanta ken tumutokar kadagiti piangpiang, a mangkuykuyog iti Lakasa bayat ti pannakaisang-at dayta manipud pagtaengan ni Obed-edom agingga “iti Siudad ni David.” (1Cr 15:17, 19, 25-29) Kalpasan dayta, nagserbi ni Asaf, agraman da Heman ken Etan, iti sanguanan ti tabernakulo kas mangiwanwanwan iti musika ken panagkanta. (1Cr 6:31-44) Kas kada Heman ken Jedutun (nabatad nga isu met laeng ni Etan), maawagan ni Asaf iti “managsirmata,” a ‘nagipadpadto nga addaan iti arpa.’​—1Cr 25:1-6; 2Cr 29:30; 35:15.

Nagtultuloy dagiti annak ni Asaf a mangbukel iti naisangsangayan a grupo kadagiti urnos ti panagtokar ken panagkanta, a naaddaanda iti nalatak a paset idi tiempo ti inagurasion ti templo ken ti pannakaisang-at ti Lakasa manipud Sion agingga iti disso ti templo (2Cr 5:12); idi tiempo dagiti panagpasayaat nga insayangkat ni Ari Ezekias (2Cr 29:13-15); ken idi tiempo a narambakan ti naindaklan a Paskua bayat ti panagturay ni Ari Josias. (2Cr 35:15, 16) Ti dadduma kadagiti kaputotanna ket karaman met iti immuna a grupo a nagsubli idiay Jerusalem manipud pannakaidestiero idiay Babilonia.​—Esd 2:1, 41; Ne 7:44.

Kas makita kadagiti paulo maipaay iti Salmo 50 ken 73 agingga iti 83, ni Asaf ti maikuna a nangputar kadagitoy a kanta. Nupay kasta, nalablabit a daytoy a nagan ket nausar kadagita a kas pangtukoy iti balay dagiti amma nga iti dayta isu ti pannakaulo, yantangay ti dadduma kadagiti salmo (Sal 79, 80) nalawag a deskribirenda dagiti pasamak iti labes ti kaaldawan ni Asaf.

2. Kaputotan ni Cohat nga anak ni Levi. Dagiti kaputotanna ket agay-aywan iti ruangan iti panagserbi iti tabernakulo idi tiempo ni Ari David.​—1Cr 26:1; Nu 16:1.

3. Karaman kadagiti opisial ni Ari Ezekias (745-717 K.K.P.), nadakamat “ni Joa nga anak ni Asaf nga agilislista.” (2Ar 18:18, 37; Isa 36:3, 22) Nupay ti Cyclopædia of Biblical Literature (1880, Tomo I, p. 233) ni John Kitto iyaplikarna ken Asaf ti termino nga “agilislista,” matmatan dayta ti kaaduan nga eskolar kas agaplikar ken Joa (no kasta, ni Joa ben Asaf, ti agilislista). Yantangay ti termino nga “anak” masansan a maus-usar a ti anagna ket “kaputotan,” isingasing ti dadduma a daytoy nga Asaf isu met laeng ti Num. 1.

4. Ti “agay-aywan iti parke” maipaay ken Ari Artaxerxes idi tiempo a nagsubli ni Nehemias idiay Jerusalem (455 K.K.P.). (Ne 2:8) Ti parke ket kakaykaywan a lugar, nalabit idiay Libano, nga adda met iti sidong ti panangituray ti Persia. Ti Hebreo a nagan ti agay-aywan iti parke mabalin nga ipasimudaagna nga isu ket Judio nga agtaktakem iti daytoy a saad ti opisial, kas met laeng ken Nehemias a nagserbi iti relatibo ti kinapategna a saad ti agaw-awit iti kopa ti ari.​—Ne 1:11.