Tarigagayanyo Kadi ti Agserbi Pay a Naan-anay?

“MARURODAK ken Jehova,” kuna ni Laura. “Kanayonak idi nga agkarkararag a tulongannakami a mangrisut kadagiti parikutmi iti pinansial tapno maitultuloyko ti agpayunir​—ngem awan latta. Kamaudiananna masapul nga agikkatak a payunir. Aminek met nga umapalak kadagidiay makapagtultuloy.”

Usigenyo met ti napasamak ken Michael, maysa a ministerial nga adipen iti kongregasion dagiti Saksi ni Jehova. Nabayagen nga ikagkagumaanna a ragpaten ti saad a manangaywan. (1 Timoteo 3:1) Idi saan a napatgan ti tarigagayna iti sumagmamano a tawen, nagsakit ti nakemna a dina pay ket tinarigagayanen ti mairekomenda iti kasta a pribilehio. “Diak la ngamin maibturan ti saem ti pannakapaay manen,” kunana.

Naaddaankayo kadin iti umasping a kapadasan? Kinasapulanyo kadi nga ibbatan ti maysa nga il-ilalaen a teokratiko a pribilehio? Kas pagarigan, kinasapulan kadi nga agsardengkayo iti panagserbi kas payunir, maysa nga amin-tiempo a manangiwaragawag iti Pagarian? Wenno tartarigagayanyo kadi ti maysa a rebbengen iti kongregasion a naitalek iti sabali? Mabalin a pagaayatyo pay ti agserbi iti Bethel wenno kas maysa a misionero, ngem saan nga ipalubos ti kasasaadyo.

“Ti inanama a maitantantan pagsakitenna ti puso,” kuna ti libro a Proverbio. (Proverbio 13:12) Nangnangruna a pudno daytoy no maikkan dagiti sabsabali kadagiti mismo a pribilehio a ninamnamayo. Mangipaay kadi ti Sao ti Dios iti nauneg a pannakaawat, liwliwa, ken namnama iti siasinoman a nakapasar iti kakasta a pannakaupay? Wen, mangipaay. Kinapudnona, ti maika-84 a Salmo iyebkasna ti rikrikna ti adipen ni Jehova a naaddaan met kadagiti umasping a di natungpal a tarigagay mainaig iti panagserbi ken Jehova.

Panangapresiar ti Maysa a Levita

Dagiti nangputar iti maika-84 a Salmo ket dagiti annak ni Core, dagiti Levita a nagserbi iti templo ni Jehova ken nangipateg unay iti pribilehioda iti panagserbi. “Nagimnasdan dagiti tabernakulom, O Jehova dagiti buybuyot!” kinuna ti maysa kadakuada. “Toy kararuak siiliw, wen, sisesegga kadagiti paraangan ni Jehova; ti pusok ken lasagko um-umkisda iti Dios a sibibiag.”​—Salmo 84:1, 2.

Naaddaan iti kasta a tarigagay daytoy a Levita nga agserbi iti templo ni Jehova ta uray ti gagangay a buya a mapagnaan nga agturong idiay Jerusalem agparang a makaawis kenkuana. “Idinto nga aglasatda idiay lobong ti Sangsangit,” kunana, “pagbalinenda a yan dagiti burayok.” (Salmo 84:6) Wen, ti gagangay a namaga a lugar ket kas iti aduan danum a rehion.

Gapu ta ti salmista ket saan a padi a Levita, makalawas laeng a makapagserbi iti templo iti kada innem a bulan. (1 Cronicas 24:1-19; 2 Cronicas 23:8; Lucas 1:5, 8, 9) Binusbosna ti nabati a panawenna iti pagtaengan iti maysa kadagiti siudad dagiti Levita. Ngarud inkantana: “Uray ti pay billit nakasapul iti balayna, ket ti sallapingaw, maysa a pagumokan a maipaay kenkuana met laeng a pangikabilanna kadagiti annakna, isu met laeng dagiti altarmo, O Jehova dagiti buybuyot, Arik ket Diosko!” (Salmo 84:3) Ania ket ngatan a ragsak ti Levita no isu ket kas kadagiti billit nga ad-adda a permanente ti panagnaedda iti templo!

Naglaka koma nga agsakit ti nakem ti Levita gapu ta saan a makapagserbi a masansan iti templo. Nupay kasta, naragsakan nga agserbi aginggat’ kabaelanna, ket sigurado a nautobna a maikari iti panagbannog ti naimpusuan a debosion ken Jehova. Aniat’ timmulong iti daytoy matalek a Levita nga agtalinaed a kontento kadagiti pribilehiona iti panagserbi?

Sursuruen ti Agkontento

“Ti maysa nga aldaw kadagiti paraanganmo nasaysayaat ngem sangaribu,” kuna ti Levita. “Kaykayatko laengen ti agbantay iti ruangan ti balay ti Diosko, ngem ti panagnaed kadagiti kalapaw ti kinadangkes.” (Salmo 84:10) Nautobna nga uray ti maysa nga aldaw a kaaddana iti balay ni Jehova ket maysa a nagpateg a pribilehio. Ket saan laeng a maymaysa nga aldaw a makapagserbi ti Levita iti templo. Ti pannakakontentona kadagiti pribilehiona ti nangtignay kenkuana nga agkanta iti rag-o.

Datayo met ngay? Ipatpategtayo kadi dagiti bendision nga inawattayo, wenno agannayastayo a manglipat iti addan kadatayo iti panagserbi ken Jehova? Gapu iti debosionda kenkuana, intalek ni Jehova kadagiti tattaona ti adu a pribilehio ken rebbengen. Dagitoy ramanenna dagiti nadagsen a rebbengen iti panangaywan, panangipastor, panangisuro, ken nadumaduma a paset ti amin-tiempo a serbisio. Ngem karaman met kadagitoy ti dadduma pay a napapateg a banag a mainaig iti panagdayaw ken Jehova.

Kas pagarigan, usigenyo ti Nakristianuan a ministerio. Inyasping ni apostol Pablo ti pribilehiotayo a mangikasaba iti naimbag a damag iti pannakaadda kadatayo ti maysa a “gameng kadagiti dinamili a basehas.” (2 Corinto 4:7) Ibilangyo kadi ti kasta a serbisio kas napateg unay a gameng? Kasta ti panangibilang ni Jesu-Kristo, a nangidaulo iti trabaho a panangikasaba iti Pagarian, a nangipasdek iti pagwadan. (Mateo 4:17) “Yantangay adda kadakami daytoy a ministerio . . . , saankami a sumuko,” kinuna ni Pablo.​—2 Corinto 4:1.

Dagiti Nakristianuan a gimong ket sagrado met a probision a saan koma a tagtagibassiten. Kadagiti gimongtayo, umawattayo iti napateg nga instruksion ken tagiragsaken ti nasken a panaglalangen. Kadagiti gimong mayebkastayo met iti publiko ti pammati ken namnamatayo babaen ti regular a panagkomento ken pannakipaset iti programa iti dadduma pay a pamay-an. (Hebreo 10:23-25) Wen, dagiti gimongtayo ket probision a rumbeng a tagipatgen!

Ni Michael, a nadakamat itay, impategna unay dagitoy a bendision ken sipapasnek nga inapresiarna dagitoy. Ngem ti pannakaupayna iti dina pannakabael nga agserbi kas panglakayen ti temporario a nangkissay iti apresasionna. Babaen ti panangipamaysana manen kadagitoy, napasublina ti kinatimbengna ken siaanus a naguray ken Jehova.

Imbes a di makontento gapu ta awan kadatayo ti maysa a pribilehio, nasayaat no utobentay a naimbag dagiti pamay-an a panangbembendision ni Jehova kadatayo, kas iti inaramid ti salmista.a No bassit laeng ti makitatayo, kasapulan a kitaentay manen, a kiddawentayo ken Jehova a luktanna dagiti matatayo tapno makitatayo dagiti pribilehiotayo ken no kasano a bembendisionan ken us-usarennatayo iti pakaidayawanna.​—Proverbio 10:22.

Napateg met a matarusan a dagiti naisangsangayan a pribilehio, kas ti saad a manangaywan, kalikagumanna dagiti espesipiko a kualipikasion. (1 Timoteo 3:1-7; Tito 1:5-9) Gapuna masapul a sukimatentay ti bagitayo, a kitaen no ania ti kasapulan a parang-ayen ket kalpasanna ikagumaantay ti rumang-ay.​—1 Timoteo 4:12-15.

Dikay Koma Maupay

No ditay umawat iti maysa a pribilehio iti panagserbi, ditay koma panunoten a ni Jehova ad-adda nga ipatpategna dagidiay mangtagtagiragsak iti dayta wenno ipaidamna ti naimbag kadatayo. Wen, di rumbeng nga ipapantayo buyogen ti apal a nagun-od dagiti sabsabali dagitoy a pribilehio a saanda a pakaikarian gapu iti paboritismo ti tao imbes a babaen ti teokratiko a pannakadutok. Ti panangpanemnem iti kakasta a kapanunotan mabalin a mangiturong iti panagimon, panagsususik, ken uray iti isusukon a mamimpinsan.​—1 Corinto 3:3; Santiago 3:14-16.

Ni Laura, a nadakamat iti pangrugian, saan a simmuko. Naparmekna ti pungtot ken imon a nariknana idi agangay. Maulit-ulit a nagkararag ni Laura iti Dios maipaay iti tulong tapno maparmekna ti negatibo a reaksionna iti dina pannakabael nga agpayunir. Nagpatulong met kadagiti kualipikado a lallaki iti kongregasion ket naipatalged kenkuana ti ayat ti Dios. “Inikkannak ni Jehova iti talna ti panunot,” kinunana. “Nupay dikami makapagpayunir ita ken ni lakayko, il-iliwenmi daydi tiempo a nakapagpayunirkami ket mapabpabilegkami kadagidi a kapadasanmi. Tultulonganmi met ti baromi iti panagpayunirna.” Gapu ta kontenton, kabaelan itan ni Laura ti ‘makipagrag-o kadagiti tattao nga agrag-o’ iti serbisioda kas payunir.​—Roma 12:15.

Mangikeddeng Kadagiti Maragpat a Kalat

Ti pannakakontentomi kadagiti agdama a pribilehio iti serbisio dina kayat a sawen nga isardengtayon ti mangipasdek kadagiti kanayonan a teokratiko a kalat. Idi salsalaysayenna ti nailangitan a panagungar, dinakamat ni Pablo ti maipapan iti “panangkamakam a panangragpat kadagiti bambanag iti masanguanan.” Kinunana pay: “Aniaman ti nagtengantayon a panagrang-ay, itultuloytayo koma ti magna a siuurnos iti daytoy met laeng a rutina.” (Filipos 3:13-16) Matulongannatayo dagiti teokratiko a kalat a mangragpat kadagiti adda iti masanguanan. Nupay kasta, ti karit isu ti panamagtalinaed kadagitoy a realistiko.

Nainkalintegan ken maragpat dagiti realistiko a kalat. (Filipos 4:5) Di kayat a sawen daytoy a ti maysa a kalat nga agkalikagum iti sumagmamano a tawen ti napinget a panagtrabaho ket di realistiko. Ti kakasta a kalat a mabayag a maragpat ket matun-oy nga in-inut babaen ti panangipasdek iti agsasaruno a babassit a kalat, wenno addang. Agserbi dagitoy a pagilasinan iti naespirituan nga irarang-ay. Ti naballigi a pannakaibanag ti tunggal addang mangipaay iti pannakapnek kabayatan ti panagtultuloytayo imbes a pannakapaay.

Nasayaat a Panangmatmat

Nupay kasta, nasken a bigbigentayo, a gapu kadagiti kasasaad ken limitasiontayo, mabalin a di maragpat ti dadduma a pribilehio. Ti panangipasdek kadagitoy kas kalat agbanag laeng iti pannakaupay ken pannakapaay. Maitantan koma ti kakasta a kalat, uray iti agdama laeng. Saan a narigat ti panangaramid iti daytoy no ikararagtayo ti nadiosan a pannakapnek ken ipangpangrunatayo ti panangaramid iti pagayatan ni Jehova. No agkalikagumtayo kadagiti pribilehio, ti pakaidayawan ni Jehova​—saan a ti pannakabigbig dagiti personal a gapuanantayo​—ti napateg. (Salmo 16:5, 6; Mateo 6:33) Maitutop nga ibaga ti Biblia kadatayo: “Ikumitmo dagiti ar-aramidmo ken ni Jehova ket dagiti pangpanggepmo mapasingkedandanto.”​—Proverbio 16:3.

Iti panangusigtayo iti maika-84 a Salmo, makitatayo a nangipakita ti salmista iti kasta a kababalin kadagiti pribilehio iti serbisio, ket sibabaknang a binendisionan ni Jehova. Mainayon pay, agtultuloy daytoy a salmo a pakagunggonaan ti ili ni Jehova agingga ita.

Buyogen ti nainkararagan a panagpannuray ken Jehova, kabaelanyo a timbengen ti tarigagayyo kadagiti kanayonan a pribilehio nga addaan pannakapnek kadagiti banag a madama a tagtagiragsakenyo. Diyo pulos ipalubos a pukawen ti tarigagayyo a mangaramid iti ad-adu pay iti apresasionyo kadagiti banag nga adda kadakayo itan ken ti rag-o iti panagserbi ken Jehova iti agnanayon. Agtalekkayo ken Jehova, ta daytoy agresulta iti kinaragsak, kas naipakita iti sasao ti Levita: “O Jehova dagiti buybuyot, nagasat ti tao nga agkammatalek kenka.”​—Salmo 84:12.

[Footnote]

[Kahon iti panid 11]

Dagiti Kalat A Mabalintay Nga Ipasdek

Panangbasa iti Biblia iti inaldaw.​—Josue 1:8; Mateo 4:4

Panangparang-ay iti pannakabalin ti pannakaawattayo babaen ti Nainkasuratan a panagsanay.​—Hebreo 5:14

Panangpatanor iti nadekdekket a relasion iti Dios.​—Salmo 73:28

Panangsukay iti tunggal bunga ti espiritu.​—Galacia 5:22, 23

Panangparang-ay iti kalidad dagiti kararagtayo.​—Filipos 4:6, 7

Panagbalin nga ad-adda nga epektibo iti panangasaba ken panangisuro.​—1 Timoteo 4:15, 16

Panangbasa ken panangmennamenna iti tunggal ruar ti magasin a Pagwanawanan ken Agriingkayo!​—Salmo 49:3

[Dagiti Ladawan iti panid 9]

Iti panangipasdek kadagiti personal a kalat, ipangpangrunayo ti panangaramid iti pagayatan ti Dios