Maabrasakayo iti Kasayaatan a Wagas ti Panagbiag!

“Agpadpada a no agbiagtayo, agbiagtayo a maipaay ken Jehova.”​—ROMA 14:8.

 1. Ania ti insuro ni Jesus maipapan iti kasayaatan a wagas ti panagbiag?

KAYAT ni Jehova a tagiragsakentayo ti kasayaatan a wagas ti panagbiag. Mabalin a nagduduma ti wagas ti panagbiag dagiti tattao, ngem maysa laeng ti kasayaatan. Awanen ti nasaysayaat pay ngem iti panagbiag maitunos iti Sao ti Dios ken panagsursuro manipud iti Anakna, ni Jesu-Kristo. Insuro ni Jesus dagiti pasurotna nga agdayawda iti Dios buyogen ti espiritu ken kinapudno, ken binilinna ida a mangaramidda kadagiti adalan. (Mat. 28:19, 20; Juan 4:24) No agbiagtayo a maitunos kadagiti bilin ni Jesus, maay-ayotayo ni Jehova ken matagiragsaktayo ti pamendisionna.

 2. Ania ti inaramid ti adu a tattao idi umuna a siglo mainaig iti mensahe ti Pagarian, ken ania ti kayat a sawen ti panagbalin a kameng “Ti Dalan”?

² No agbalin a manamati ken agpabautisar dagidiay “siuumiso nga agannayas iti agnanayon a biag,” adda rasontayo a mangikuna kadakuada, “Maabrasakayo iti kasayaatan a wagas ti panagbiag!” (Ara. 13:48) Idi umuna a siglo ti Kadawyan a Panawentayo, rinibu a tattao manipud iti nagduduma a nasion ti nangakseptar iti kinapudno ken publiko a pinaneknekanda ti debosionda iti Dios babaen ti panagpabautisarda. (Ara. 2:41) Dagidi a nagkauna nga adalan ket kameng “Ti Dalan.” (Ara. 9:2; 19:23) Maitutop dayta nga awag gapu ta dagidiay nagbalin a pasurot ni Kristo sinalimetmetanda ti wagas ti panagbiag a naisentro iti pammati ken ni Jesu-Kristo ken iti panangtulad iti ulidanna.​—1 Ped. 2:21.

 3. Apay nga agpabautisar dagiti adipen ni Jehova, ken mano ti nabautisaran kadagiti naglabas a sangapulo a tawen?

³ Pimmartak ti trabaho a panagaramid kadagiti adalan bayat daytoy maudi nga al-aldaw ken maar-aramid dayta itan iti nasurok a 230 a dagdaga. Kadagiti naglabas a sangapulo a tawen, nasurok a 2,700,000 a tattao ti nangikeddeng nga agserbi ken ni Jehova ken nagpabautisar kas simbolo ti dedikasionda kenkuana. Nasurok a 5,000 nga indibidual ti nabautisaran iti kada lawas! Ti pangngeddengda nga agpabautisar ket naibatay iti panagayat iti Dios, pannakaammo manipud iti Kasuratan, ken panamati iti isursuroda. Ti bautismo ket napateg a pasamak iti biagtayo, ta rugi dayta ti nasinged a relasiontayo ken Jehova. Pammaneknek met dayta nga agtalektayo iti Dios a tulongannatayo nga agserbi a simamatalek kenkuana, no kasano a tinulonganna dagiti nagkauna nga adipenna a magna iti dalanna.​—Isa. 30:21.

Apay nga Agpabautisar?

4, 5. Mangdakamat iti sumagmamano a bendision ken gunggona nga itden ti panagpabautisar.

⁴ Nalabit nga addaankan iti pannakaammo maipapan iti Dios, nangaramidkan kadagiti panagbalbaliw iti biagmo, ken maysakan a di bautisado nga agibumbunannag. Makomendaran ti kasta a panagrang-aymo. Ngem nagdedikarka kadin iti Dios babaen ti kararag, ken agpamplanokan nga agpabautisar? Manipud iti panagadalmo iti Biblia, nalabit nga ammomon a masapul a naipamaysa ti biagmo iti panangidayaw ken Jehova, imbes a kadagiti bukodmo a pagsayaatan wenno pananggun-od iti material a bambanag. (Basaen ti Salmo 148:11-13; Luc. 12:15) Ania ngarud ti dadduma a bendision ken gunggona nga itden ti panagpabautisar?

⁵ Kas maysa a dedikado a Kristiano, maaddaan ti biagmo iti kasayaatan a panggep. Agbalinka a naragsak gapu ta ar-aramidem ti pagayatan ti Dios. (Roma 12:1, 2) Babaen ti nasantuan nga espiritu ni Jehova, mapatanormo dagiti nadiosan a galad a kas iti talna ken pammati. (Gal. 5:22, 23) Sungbatan ti Dios dagiti kararagmo ken bendisionanna dagiti panagreggetmo a mangitunos iti biagmo iti Saona. Agbalin a naragsak ti ministeriom, ken agbalin a nataltalged ti namnamam nga agbiag nga agnanayon gapu ta agbibiagka a maitunos iti wagas nga anamongan ti Dios. Kanayonanna, ipakpakitam a talaga a kayatmo ti agbalin a Saksi ni Jehova no agdedikar ken agpabautisarka.​—Isa. 43:10-12.

 6. Ania ti paneknekan ti bautismotayo?

⁶ No idedikartayo ti biagtayo iti Dios ken agpabautisartayo, ipakpakaammotayo a kukuanatayo ni Jehova. “Kinapudnona, awan kadatayo ti agbiag a maipaay iti bagina laeng, ket awan ti matay a maipaay iti bagina laeng,” insurat ni apostol Pablo, “ta agpadpada a no agbiagtayo, agbiagtayo a maipaay ken Jehova, ket no mataytayo, mataytayo a maipaay ken Jehova. Gapuna agpadpada a no agbiagtayo ken no mataytayo, kukuanatay ni Jehova.” (Roma 14:7, 8) Ti Dios inikkannatayo iti dignidad babaen iti panangipaayna kadatayo iti wayawaya nga agpili. No sititibker nga ikeddengtayo a suroten daytoy a wagas ti panagbiag gapu ta ay-ayatentayo ti Dios, maparagsaktayo ti pusona. (Prov. 27:11) Ti bautismotayo ket agpadpada a simbolo ti dedikasiontayo iti Dios ken ti publiko a panangipakaammotayo a ni Jehova ti Agturay kadatayo. Ipakitana nga addatayo iti dasigna mainaig iti isyu ti sapasap a kinasoberano. (Ara. 5:29, 32) Iti kasta, adda ni Jehova iti dasigtayo. (Basaen ti Salmo 118:6.) Ti bautismo luktanna met kadatayo ti adu a naespirituan a bendision ita ken iti masanguanan.

Naparaburan iti Naayat a Panagkakabsat

7-9. (a) Ania ti impanamnama ni Jesus kadagidiay nangpanaw iti amin a bambanag ken simmurot kenkuana? (b) Kasano a natungpal ti inkari ni Jesus a nailanad iti Marcos 10:29, 30?

⁷ Kinuna ni apostol Pedro ken ni Jesus: “Adtoy! Pinanawanmi ti amin a bambanag ket sinurotdaka; ania nga agpayso ti addanto a maipaay kadakami?” (Mat. 19:27) Kayat a maammuan ni Pedro no ania ti agur-uray kenkuana iti masanguanan, agraman kadagiti dadduma nga adalan ni Jesus. Nangaramidda kadagiti dakkel a panagsakripisio tapno naan-anay a maipamaysada ti biagda iti panangikasaba iti Pagarian. (Mat. 4:18-22) Ania ti impanamnama kadakuada ni Jesus?

⁸ Sigun iti umasping a salaysay ni Marcos, impasimudaag ni Jesus a dagiti adalanna ket agbalin a kameng ti naespirituan a panagkakabsat. Kinunana: “Awan [ti] asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken maigapu iti naimbag a damag a saanto nga umawat iti maminsangagasut ita iti daytoy a las-ud ti tiempo, kadagiti balay ken kakabsat a lallaki ken kakabsat a babbai ken inna ken annak ken taltalon, agraman kadagiti pannakaidadanes, ket iti um-umay a sistema ti bambanag agnanayon a biag.” (Mar. 10:29, 30) Dagiti Kristiano idi umuna a siglo, kas kada Lidia, Aquila, Priscila, ken Gayo, nangipaayda “kadagiti balay” ken nagbalinda a “kakabsat a lallaki ken kakabsat a babbai ken inna” kadagiti kapammatianda, kas inkari ni Jesus.​—Ara. 16:14, 15; 18:2-4; 3 Juan 1, 5-8.

⁹ Adda dakdakkel ita a kaitungpalan ti kinuna ni Jesus. Ti “taltalon” a panawan dagiti pasurotna tuktukoyenna dagiti pagtaudan ti pagbiag a situtulok a pinanawan ti adu, a pakairamanan dagiti misionero, Bethelite, international servant, ken dadduma pay, tapno mayadelantarda dagiti interes ti Pagarian iti nagduduma a pagilian. Adu a kakabsat ti nangpanaw iti pagtaenganda tapno mapasimple ti biagda, ken makapagragsak a mangngeg no kasano nga inaywanan ida ni Jehova ken no kasano a nangyeg kadakuada iti ragsak ti panagserbida kenkuana. (Ara. 20:35) Maysa pay, amin a bautisado nga adipen ni Jehova matagiragsakda ti bendision nga itden ti ‘panangsapul nga umuna iti pagarian ken iti kinalinteg ti Dios’ kas paset ti sangalubongan a Nakristianuan a panagkakabsat.​—Mat. 6:33.

Natalged iti “Nalimed a Lugar”

10, 11. Ania ti “nalimed a lugar ti Kangatuan,” ken kasanotayo a makastrek iti dayta?

¹⁰ Adda sabali pay a nabaknang a bendision nga itden ti panagdedikar ken panagpabautisar​—ti pribilehio a makapagnaed iti “nalimed a lugar ti Kangatuan.” (Basaen ti Salmo 91:1.) Maysa dayta a piguratibo a lugar ti kinatalged ken seguridad​—maysa a kasasaad a protektado manipud iti naespirituan a pannakadangran. ‘Nalimed dayta a lugar’ gapu ta saan a makita dagiti tattao a bulsek iti naespirituan ken awanan panagtalek iti Dios. No agbiagtayo a maitunos iti dedikasiontayo ken naan-anay nga agtalektayo ken Jehova, arigna nga ibagbagatayo kenkuana: “Sika ti kamangko ken salindegko, Diosko, a pagtalkakto.” (Sal. 91:2) Ni Jehova a Dios ket agbalin a natalged a pagkamangantayo. (Sal. 91:9) Adda pay kadi nataltalged a pagkamangantayo?

¹¹ Gapu ta mabalintayo ti sumrek iti “nalimed a lugar” ni Jehova, ipakitana a naparaburantayo iti pribilehio a mangtagiragsak iti personal a relasion kenkuana. Mangrugi dayta no agdedikar ken agpabautisartayo. Kalpasanna, mapatibkertayo ti relasiontayo iti Dios babaen ti panagbalin a nasinged kenkuana. Maaramidtayo dayta babaen ti panagadal iti Biblia, naimpusuan a panagkararag, ken naan-anay a panagtulnog. (Sant. 4:8) Awan ti nasingsinged ken Jehova no di ni Jesus, a saan a pulos a kimmapuy ti panagtalekna iti Namarsua. (Juan 8:29) Gapuna, ditay koma pulos pagduaduaan ni Jehova wenno ti tarigagay ken abilidadna a tumulong kadatayo a mangitungpal iti karitayo idi nagdedikartayo. (Ecl. 5:4) Dagiti naespirituan a probision nga inted ti Dios iti ilina ket nabileg a pammaneknek a pudno nga ay-ayatennatayo ken kayatna nga agballigitayo nga agserbi kenkuana.

Ipategtayo ti Naespirituan a Paraiso

12, 13. (a) Ania ti naespirituan a paraiso? (b) Kasanotayo a matulongan dagiti kabbaro?

¹² Ti dedikasion ken bautismo luktanna met kadatayo ti gundaway nga agnaed iti nagsayaat a naespirituan a paraiso. Maysa daytoy a naisangsangayan a naespirituan a kasasaad a tagtagiragsakentayo a kadua dagiti kapammatiantayo nga addaan iti natalna a relasion ken ni Jehova a Dios ken iti maysa ken maysa. (Sal. 29:11; Isa. 54:13) Awan ti aniaman ditoy lubong a pumada iti naespirituan a paraiso a tagtagiragsakentayo. Nangruna a nabatad daytoy kadagiti internasional a kombension, a sadiay ket agtataripnong dagiti kakabsattayo iti pammati manipud iti adu a nasion, pagsasao, ken puli buyogen ti talna, panagkaykaysa, ken nainkabsatan nga ayat.

¹³ Naiduma unay ti naespirituan a paraiso a tagtagiragsakentayo no idilig iti nakaay-ay-ay a kasasaad ti lubong ita. (Basaen ti Isaias 65:13, 14.) Babaen ti panangiwaragawag iti mensahe ti Pagarian, pribilehiotayo nga awisen dagiti sabsabali a sumrekda iti naespirituan a paraiso. Maysa met a bendision a tulongan dagidiay nabiit pay a naitimpuyog iti kongregasion babaen ti panangsanay kadakuada iti ministerio. Gapuna, maysa a pribilehio no kiddawen dagiti panglakayen a tulongantayo dagiti kabbaro, no kasano a da Aquila ken Priscila “ad-adda a siuumiso nga imbinsabinsada [ken Apolos] ti dalan ti Dios.”​—Ara. 18:24-26.

Agtultuloy nga Agsursuro ken Jesus

14, 15. Ania dagiti nasayaat a rason nga itultuloytayo ti agsursuro ken Jesus?

¹⁴ Adda nasayaat a rasontayo nga agtultuloy nga agsursuro ken Jesus. Sakbay ti panagbiagna kas tao, binusbos ni Jesus ti di mabilang a milenio a nakipagtrabaho ken Amana. (Prov. 8:22, 30) Ammona a ti kasayaatan a wagas ti panagbiag ket naisentro iti panagserbi iti Dios ken panangikasaba iti kinapudno. (Juan 18:37) Nalawag ken Jesus a ti aniaman a sabali pay a wagas ti panagbiag ket managimbubukodan ken temporario. Ammona pay nga isu ket maipasango iti nakaro a suot ken mapapatay. (Mat. 20:18, 19; Heb. 4:15) Kas ti Ulidantayo, insurona no kasano a masalimetmetantayo ti kinatarnawtayo.

¹⁵ Kalpasan unay ti bautismo ni Jesus, pinadas a sulisogen ni Satanas tapno tallikudanna ti kasayaatan a wagas ti panagbiag​—ngem saan a nagballigi. (Mat. 4:1-11) Ipakita daytoy kadatayo nga aniaman ti aramiden ni Satanas, mabalintayo a salimetmetan ti kinatarnawtayo. Kaykayatna a puntiriaen dagidiay asidegen nga agpabautisar agraman dagiti kabbaro a nabautisaran. (1 Ped. 5:8) Ti ibubusor ket mabalin nga agtaud kadagiti kapamiliatayo a nasayaat met ti motiboda ngem di umiso ti pannakaammoda maipapan kadagiti Saksi ni Jehova. Ngem dagita a pakasuotan mangtedda kadatayo iti gundaway a mangiparangarang kadagiti Nakristianuan a galad, kas iti panagbalin a nadayaw ken naannad, no sungbatantayo dagiti saludsod ken no mangasabatayo. (1 Ped. 3:15) Iti kasta, mangyeg dayta iti positibo nga epekto kadagidiay dumngeg kadatayo.​—1 Tim. 4:16.

Agtalinaed iti Kasayaatan a Wagas ti Panagbiag!

16, 17. (a) Sigun iti Deuteronomio 30:19, 20, ania ti tallo a kangrunaan a makalikaguman tapno magun-od ti biag? (b) Kasano a ni Jesus, Juan, ken Pablo sinuportaranda ti insurat ni Moises?

¹⁶ Agarup 1,500 a tawen sakbay a nagbiag ni Jesus ditoy daga, indagadag ni Moises kadagiti Israelita a pilienda ti kasayaatan a wagas ti panagbiag a posible idi. Kinunana: “Aramatek ti langlangit ken ti daga kas saksi maibusor kadakayo ita nga aldaw, nga inkabilko ti biag ken patay iti sangom, ti bendision ken ti lunod; ket masapul a piliem ti biag tapno makapagtalinaedka a sibibiag, sika ken ti putotmo, babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana.” (Deut. 30:19, 20) Nupay di nagtalinaed a matalek ti Israel iti Dios, saan a nagbalbaliw ti tallo a kangrunaan a makalikaguman tapno magun-od ti biag kas dinakamat ni Moises. Ni Jesus ken ti dadduma inulitda dagita a sasao.

¹⁷ Umuna, ‘masapul nga ayatentayo ni Jehova a Diostayo.’ Maipakitatayo nga ay-ayatentayo ti Dios no agtignaytayo maitunos kadagiti nalinteg a pagalagadanna. (Mat. 22:37) Maikadua, ‘masapul nga imdengantayo ti timek ni Jehova’ babaen ti panagadal iti Sao ti Dios ken panagtulnog kadagiti bilinna. (1 Juan 5:3) Agkalikagum dayta iti regular nga itatabuno kadagiti Nakristianuan a gimong, a sadiay ket mapagsasaritaan ti Biblia. (Heb. 10:23-25) Maikatlo, ‘masapul nga agtalinaedtayo ken Jehova.’ Aniaman ti pakaipasanguantayo, itultuloytayo koma nga ipakita ti pammatitayo iti Dios ken surotentayo ti Anakna.​—2 Cor. 4:16-18.

18. (a) Kasano ti panangdeskribir Ti Pagwanawanan iti kinapudno idi 1914? (b) Ania koma ti mariknatayo maipapan iti lawag ti kinapudno ita?

¹⁸ Anian a bendision ti itden ti panagbiag a maitunos iti kinapudno iti Biblia! Idi 1914, kastoy ti nagpateg a sasao a naipablaak iti Ti Pagwanawanan: ‘Saantayo kadi a naparaburan ken naragsak nga ili? Saan kadi a matalek ti Diostayo? No adda asinoman a makaammo iti aniaman a nasaysayaat a banag, gun-odenna koma dayta. No adda asinoman kadakayo a makasarak iti nasaysayaat a banag, sapay koma ta ibagayo kadakami. Awan ngamin ti ammomi a nasaysayaat wenno uray kagudua laeng ti kasayaatna ngem iti nasarakanmi iti Sao ti Dios. Saan a mailadawan ti talna, rag-o, ken bendision a natagiragsak ti puso ken biagmi gapu iti nalawag a pannakaammo iti pudno a Dios. Ti Pannakaammo Maipapan iti Sirib, Hustisia, Pannakabalin ken Ayat ti Dios naan-anay a penkenna ti kasapulan ti isip ken pusomi. Awanen ti aniaman a sapulen wenno tarigagayanmi no di ti rumang-ay iti daytoy a nagsayaat a Pannakaammo.’ (Ti Pagwanawanan, Disiembre 15, 1914, panid 377-378) Agtultuloy ti panagyamantayo gapu kadagiti naespirituan a lawag ken kinapudno. Addaantayo pay ketdi ita iti dakdakkel a rason nga agrag-o yantangay ‘magmagnatayo iti lawag ni Jehova.’​—Isa. 2:5; Sal. 43:3; Prov. 4:18.

19. Apay a di koma agpampamayan dagidiay kualipikadon nga agpabautisar?

¹⁹ No kayatyo ti ‘magna iti lawag ni Jehova’ ngem saankayo pay a dedikado ken bautisado a Kristiano, saankayo koma nga agpampamayan. Aramidenyo ti aniaman a kasapulan tapno maragpatyo dagiti kalikaguman ti Biblia agpaay iti bautismo​—ti naisangsangayan a pamay-an tapno maipakita ti panagyamantayo iti inaramid kadatayo ti Dios ken ni Kristo. Itedyo ken Jehova ti kapatgan a pisikal nga ik-ikutanyo​—ti mismo a biagyo. Ipakitayo a determinadokayo a mangaramid iti pagayatan ti Dios babaen ti panangtuladyo iti Anakna. (2 Cor. 5:14, 15) Awan duadua a dayta ti kasayaatan a wagas ti panagbiag!

Ania ti Sungbatyo?

• Ania ti isimbolo ti bautismotayo?

• Ania dagiti bendision nga itden ti panagdedikar iti Dios ken ti panagpabautisar?

• Apay a nagpateg ti panagsursuro ken Jesus?

• Ania ti tumulong kadatayo nga agtalinaed iti kasayaatan a wagas ti panagbiag?

[Ladawan iti panid 25]

Ipakpakitayo a piniliyo ti kasayaatan a wagas ti panagbiag no agpabautisarkayo

[Dagiti Ladawan iti panid 26]

Addakayo kadi iti “nalimed a lugar”?