“Matalek a Saksi Idiay Langit”

ADDAN a sumilsilnag a nakaranraniag ti bulan iti nasipnget a langit nabayag sakbay a nagparang ti immuna a tao ditoy daga. Adu idi ti nagrukbab iti dayta kas diosa. Kinuna ti mannurat a Griego a ni Plutarch a ti bulan ti papanan dagiti nadalus a kararua kalpasan ti ipapatay. Iti mitolohia ti Baltic, ti bulan ket maysa a lalaki, asawa ti init. Nagririda kano nga agassawa, ket pinanawan ti bulan ti asawana, a mammanon nga agparang a kaduana idiay langit!

Itatta, no kumita dagiti agtutubo ken dagiti agkabanuag nga agayan-ayat iti bulan, agay-ayam iti panunotda dagiti romantiko a bambanag. Idi 1960’s dakkel a kuarta ti nabusbos dagiti sientista a nangibaon iti tao idiay bulan ken nagpaala ti sumagmamano a bato para iti panagsukisok. Maysa a banag maipapan iti bulan ti masinunuo. Tunggal aldaw, lumgak ken lumnek ti bulan iti naikeddeng nga iskediolna. Kasta unay ti kinamatalekna iti naikeddeng a rotana ta mapattapattatayo dagiti porma ken eklipse-na iti napalabas a rinibo a tawen.

No kumita idi dagiti Israelitas iti bulan, adda nagpateg a maipalagip kadakuada. Inkari ti Dios a mataginayon ti naarian a dinastia ni Ari David. Kinunana: “Sipapasdekto nga agnanayon [ti bin-i ni David] a kas iti bulan, ken kas iti matalek a saksi idiay langit.” (Salmo 89:35-37) Natungpal daytoy a kari ken ni Jesus, ti “Anak ni David.” (Lucas 18:38) Kalpasan ti ipapatayna napagungar ni Jesus iti imortal nga espiritu ket immuli sadi langit. (Aramid 2:34-36) Idi agangay isut’ naisaad a kas Ari ti nailangitan a Pagarian ti Dios. (Apocalipsis 12:10) Agturturayen dayta a Pagarian ket “agtalinaedto iti agnanayon.” (Daniel 2:44) Iti kastoy a pamay-an, ni Jesus, ti imortal a pannakabagi ti naarian a dinastia ni David, agtalinaedto nga agnanayon a kas iti bulan, ti “matalek a saksi idiay langit.”

Gapuna, tunggal makitayo a sumilsilnag a nakaranraniag ti bulan iti nasipnget a langit, lagipenyo ti kari ti Dios ken ni David ket agyamankayo ta agturturayen ti Pagarian ti Dios ken agturayto iti agnanayon, a maipaay iti pakaidayawan ti Dios ken iti agnanayon a bendision ti matalek a sangatauan.​—Apocalipsis 11:15.

[Picture Credit Line iti panid 32]

Frank Zullo