Ti Maadal iti Kayo a Palma

“NADAEG ken naisangsangayan ti kinapintasna.” Kasta ti panangiladawan ti maysa nga ensiklopedia ti Biblia iti palma a datiles. Idi panawen ti Biblia ken iti tiempotayo, paimnasen dagiti palma a datiles ti Tanap ti Nilo idiay Egipto ken mangipaayda iti makapagin-awa a linong kadagiti ubbog ti Desierto ti Negeb.

Kas iti kaaduan a kita ti kayo a palma, diretso ti kayo ti palma a datiles. Agtayag iti 30 metro ti dadduma ken agtultuloy nga agbunga iti unos ti 150 a tawen. Wen, makaay-ayo a kitaen ken nakaskasdaaw ti kinabunga ti palma a datiles. Tinawen nga agbunga iti sumagmamano a raay ti datiles. Mabalin nga adda nasurok a 1,000 a datiles iti maysa laeng a raay. Maipapan iti datiles, insurat ti maysa nga autor: “Dagidiay . . . a nakaraman iti nakapakete a datiles a magatang kadagiti pagtagilakuan, dida ammo no kasano kaimas daytoy no kappuros.”

Maikanatad a ti Biblia iyaspingna dagiti tattao kadagiti kayo a palma. Tapno makaay-ayo iti imatang ti Dios, kas iti nabunga a kayo a palma, ti maysa a tao ket masapul a nalinteg iti moral ken agtultuloy nga agpataud iti nasayaat nga ar-aramid. (Mateo 7:17-20) Gapu iti daytoy, naaramat a dekorasion dagiti naikitikit a ladawan ti kayo a palma agpadpada iti templo ni Solomon ken iti templo iti sirmata ni Ezequiel. (1 Ar-ari 6:2, 9, 32, 35; Ezequiel 40:14-16, 20, 22) Tapno ngarud awaten ti Dios ti panagdayaw ti maysa a tao, masapul nga adda kenkuana dagiti matarigagayan a kualidad ti palma a datiles. Ilawlawag ti Sao ti Dios: “Ti met laeng nalinteg rumangpayanto kas iti panagrangpaya ti maysa a kayo a palma.”​—Salmo 92:12.