Dagiti Agtutubo a Mangipatpateg iti Kinapudno

“KASANONTO ti panangdalus ti maysa nga agtutubo a lalaki iti danana?” Insaludsod dayta ti maysa a Hebreo a salmista nasurok a 2,400 a tawenen ti napalabas. (Salmo 119:9) Maitutop pay laeng ita daytoy a saludsod agsipud ta maipaspasango dagiti agtutubo iti adu a parikut ditoy lubong. Gapu iti seksual nga imoralidad, adu nga agtutubo ti nakaptan iti AIDS. Agarup kagudua kadagidiay naakaran iti daytoy nakabutbuteng a sakit ti agtawen iti nagbaetan ti 15 ken 24. Adu met a problema ti patauden ti panagdroga, a nakaigapuan ti nasapa nga ipapatay dagiti dadduma nga agtutubo. Nakaam-amak ti epektona kadagiti agtutubo ti naalas a musika; dagiti naranggas ken imoral a pelikula, pabuya iti TV, ken dagiti video; ken pornograpia iti Internet. Gapuna, pakaseknan unay ita dagiti adu a nagannak ken agtutubo ti saludsod nga inyimtuod ti salmista.

Sinungbatan ti isu met laeng a salmista ti bukodna a saludsod: “Babaen ti panagaluadna maitunos iti saom.” Wen, naglaon ti Sao ti Dios, ti Biblia, kadagiti naimbag a pammagbaga para kadagiti agtutubo, ket adu dagiti agtutubo a naballigi ti biagda gapu iti panagpaidalanda iti dayta. (Salmo 119:105) Kitaentayo ti sumagmamano a mapagwadan nga agtutubo a mangay-ayat iti Dios ken mangikagkagumaan nga agtalinaed a natibker iti naespirituan iti daytoy lubong a managayat iti ragragsak ken materialistiko.

Apresiarenda ti Pannarabay Dagiti Nagannak

Maysa ni Jacob Emmanuel nga amin-tiempo a payunir a ministro iti sumagmamano a tawen sakbay a nagserbi iti sanga nga opisina dagiti Saksi ni Jehova idiay Mexico. Malaglagipna buyogen ti panangapresiar no kasano a nasursurona nga ipateg ti panagserbina iti Dios: “Dagiti dadakkelko ti kangrunaan a nangimpluensia kaniak, nupay dakkel met ti naitulong dagiti dadduma nga aduan kapadasan a kakabsat a nagbalin a gagayyemko. Ginutugotdak a mangipateg iti trabaho a panangasaba. Sidudungngo nga inturongdak iti nalinteg a dana; pulos a diak narikna a pinilitdak.”

Adu a tawenen nga adda ni David iti amin-tiempo a ministerio. Malaglagipna a natukay ti riknana idi rinugian dagiti dadakkelna ti agserbi kas special pioneer idi ubbingda pay laeng iti kabsatna. Idi natay ni tatangna, intuloy ni nanangna ti nagserbi kas special pioneer. Inaywananna ida, malaksid pay iti panangikasabana iti naimbag a damag. “Pulos a saandak a pinilit nga agpayunir,” kuna ni David, “ngem gapu ta kaay-ayomi unay ti agpayunir a sangapamiliaan, ti panagkakadua ken kasasaadmi ti nanggutugot kaniak nga agpayunir met.” Maipapan iti kinapateg ti umiso a panangidalan ken panangasikaso dagiti nagannak, kuna ni David: “Rinabii nga ibasaannakami ni Nanang kadagiti estoria iti libro a Manipud Paraiso a Napucaw Agingga iti Paraiso a Naisubli.a Ti wagas ti panangestoriana ket nakatulong kadakami a mangipateg iti panagsursuro kadagiti naespirituan a banag.”

Panangapresiar Kadagiti Gimong

Adda dagiti agtutubo a marigatan a mangapresiar kadagiti Nakristianuan a gimong. Tumabunoda gapu ta ikuyog ida dagiti dadakkelda. Nupay kasta, no kanayonda a tumabuno, masursuroda nga ipateg dagiti gimong. Alaentay a pagarigan ni Alfredo, a nangrugi nga agserbi iti amin a tiempo idi 11 ti tawenna. Inaminna nga idi aglima ti tawenna, dina kayat ti makigimong agsipud ta makatuglep ngem di ipalubos dagiti dadakkelna a maturog kabayatan ti gimong. Malagipna: “Bayat a dumakdakkelak, in-inut a kaay-ayokon dagiti gimong, nangruna idi ammokon ti agbasa ken agsurat gapu ta makapagkomentoakon iti bukodko a sasao.”

Agtawen ni Cintia iti 17 ken agserserbi kas regular pioneer. Ti nasayaat a pannakitimpuyog ket nakatulong unay kenkuana a mangipateg iti panagserbi iti Dios. Kunana: “Gapu iti nasayaat a pannakilangenko kadagiti kakabsat ken regular a pannakigimongko, saanak a mailiw kadagiti gagayyemko a taga lubong ken kadagiti aktibidad a pagay-ayat dagiti agtutubo, kas ti panagdisko. Babaen ti panagimdeng kadagiti komento ken kapadasan kadagiti gimong, naaddaanak iti tarigagay a mangipaay ken Jehova iti amin nga adda kaniak, ket ti kasayaatan nga adda kaniak isu ti kinaagtutubok. Inkeddengko ngarud nga usaren dayta nga agserbi kenkuana.”

Nupay kasta, inaminna: “Sakbay a nabautisaranak, adda tiempo a limmanganak kadagiti gimong, a pinagpambarko dagiti leksionko wenno dadduma pay nga aktibidad iti eskuelaan. Adu dagiti gundaway a saanak a nakigimong, ket nakaapektar daytoy iti espiritualidadko. Rinugiak ti makikadua iti maysa a barito a saan nga agad-adal iti Biblia. Iti tulong ni Jehova, nailintegko dagiti bambanag idi agangay.”

Personal a Desision

Maysa met ni Pablo nga agtutubo nga agserserbi ken Jehova iti amin a tiempo. Idi napagsaludsodan no ania ti ibilangna a kapatgan tapno mapatanor ti panagayat iti kinapudno a masarakan iti Sao ti Dios, kinunana: “Panagkunak, adda dua a banag: regular a personal a panagadal ken naregta a mangasaba. Agyamanak kadagiti dadakkelko gapu ta insuroda kaniak ti kinapudno maipapan ken Jehova, ket panagkunak daytoy ti kasayaatan a maitedda kaniak. Nupay kasta, masapul a personal a kombinsidoak no apay nga ay-ayatek ni Jehova. Gapuna, nasken nga ammuek ‘ti kaakaba ken kauneg’ ti kinapudno a linaon ti Biblia. Babaen laeng iti daytoy a mariknatayo ti panagtarigagay iti Sao ni Jehova, a ‘mangpasged iti apuy’ kadatayo a mangisarsarita iti dayta kadagiti dadduma. Ti kasta a kinaregta a mangasaba pagtalinaedenna a nabiag ti panangipategtayo iti kinapudno.”​—Efeso 3:18; Jeremias 20:9.

Ni Jacob Emmanuel, a nadakamat nga immun-una, malagipna met ti kinapateg ti personal a panagdesision nga agserbi ken Jehova. Kunana a di pulos pinilit dagiti dadakkelna nga agpabautisar. “Ti kunak, nasayaat unay dayta agsipud ta makitak dagiti naimbag a resultana. Kas pagarigan, naggigiddan a nagpabautisar dagiti dadduma nga agtutubo a nakalkalangenko. Nupay nasayaat dayta, makitak a naisursurot laeng ti rikna dagiti dadduma isu a nagpabautisarda, ket di nagbayag, bimmaaw ti regtada maipaay kadagiti aktibidad a mainaig iti Pagarian. Iti biangko, saandak a pinilit dagiti dadakkelko a mangidedikar iti bagik ken Jehova. Personal a desision dayta.”

Ti Paset ti Kongregasion

Adda dagiti agtutubo a nakasursuro iti kinapudno a masarakan iti Sao ti Dios, nga awan ti tulong dagiti dadakkelda. Iti sidong dagiti kasta a kasasaad, pudno a maysa a karit ti panangaramid iti umiso ken panagtalinaed iti dayta.

Malagip ni Noé no kasano a nakatulong unay kenkuana ti kinapudno. Managpungpungtot ken naranggas sipud pay iti kinaubingna. Idi rinugianna ti nagadal iti Biblia idi agtawen iti 14, simmayaat ti kababalinna, ket dagiti dadakkelna, a saan nga interesado iti Biblia iti daydi a tiempo, ket nagyamanda unay. Bayat a rimmang-ay iti naespirituan, kayat ni Noé nga usaren a naan-anay ti biagna nga agserbi iti Dios. Adda itan iti amin-tiempo a ministerio.

Umasping iti dayta, ubing pay unay ni Alejandro idi naginteres iti Nakristianuan a kinapudno, nupay saan nga interesado dagiti dadakkelna. Kas panangyebkas iti panangipategna iti kinapudno, kunana: “Dimmakkelak a Katoliko. Ngem dimmegdeg ti panamatik kadagiti ateista a Komunista agsipud ta saan a nasungbatan ti relihionko dagiti saludsod a mangburburibor kaniak manipud idi ubingak pay unay. Tinulongannak ti organisasion ni Jehova a mangammo iti Dios. Literal nga inispalna ti biagko gapu ta no saanak a nagadal iti Biblia, mabalin a naigamerak iti imoralidad, alkoholismo, wenno droga. Baka nagbalinak pay ketdi a miembro ti rebolusionario a grupo, ket nasaem koma ti nagbanagak.”

Kasano a mabirokan ti maysa nga agtutubo ti kinapudno ken makapagtalinaed iti dayta nga awan ti suporta dagiti dadakkelna? Nalawag a napateg unay ti paset dagiti panglakayen ken dadduma pay iti kongregasion. Kinuna ni Noé: “Pulos a diak narikna nga agmaymaysaak, yantangay kanayon a nakasingsinged kaniak ni Jehova. Kasta met, an-andingayendak dagiti adu a naayat a kakabsat a nagbalin a naespirituan nga amma, inna, ken kakabsatko.” Agserserbi itan idiay Bethel ken us-usarenna ti panawenna iti panagserbina iti Dios. Kinuna met ni Alejandro: “Kanayonto latta a pagyamanak ti panagbalinko a kameng ti kongregasion nga addaan kadagiti panglakayen a nangipakita iti naayat a personal nga interes kaniak. Pagyamanak unay daytoy agsipud ta idi rinugiak ti agadal iti Biblia idi agtawenak iti 16, nariribuk met ti panunotko, a gagangay kadagiti agtutubo. Pulos a saandak a binaybay-an dagiti pamilia iti kongregasion a nakaitimpuyogak. Kanayon nga adda mangawat kaniak ken mangiranud saan laeng nga iti pagtaengan ken taraon no di pay ket ti pusona.” Nasuroken a 13 a tawen nga agserserbi ni Alejandro iti amin a tiempo.

Ipagarup ti dadduma a ti relihion ket para laeng kadagiti nataengan. Nupay kasta, adu dagiti agtutubo a nakaammo iti kinapudno a linaon ti Biblia idi ubingda pay ket nasursuroda nga ayaten ni Jehova ken nagtalinaedda a matalek kenkuana. Mayaplikar kadagitoy nga agtutubo ti sasao ni David a nailanad iti Salmo 110:3: “Dagiti tattaom situtulok nga idatondanto ti bagbagida iti aldaw ti puersa militarmo. Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.”

Maysa a karit kadagiti agtutubo ti panangammo iti kinapudno ken panangsalimetmet iti dayta. Anian a makaparagsak a makita nga adu ti agtaltalinaed a nasinged unay iti organisasion ni Jehova, regular a makigimong, ken naanep nga agadal iti Biblia. Iti panangaramidda iti kasta, napatanorda ti napudno a panagayat iti Sao ti Dios ken iti panagserbi kenkuana!​—Salmo 119:15, 16.

[Footnote]