Pampaneknekam Kadi a ni Jehova ti Bingaymo?

“Itultuloyyo . . . a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—MAT. 6:33.

1, 2. (a) Siasino ti tuktukoyen ti Galacia 6:16 nga “Israel ti Dios”? (b) Siasino ti tuktukoyen ti Mateo 19:28 a “sangapulo ket dua a tribu ti Israel”?

ANIA ti mapanunotmo no mabasam ti nagan nga Israel iti Biblia? Ni kadi Jacob nga anak ni Isaac a napanaganan idi agangay iti Israel? Wenno dagiti kaputotanna, ti nagkauna a nasion ti Israel? Ti ngay naespirituan nga Israel? No madakamat ti Israel iti piguratibo a pamay-an, masansan a tumukoy dayta iti “Israel ti Dios,” dagiti 144,000 a napulotan iti nasantuan nga espiritu nga agbalin nga ar-ari ken papadi idiay langit. (Gal. 6:16; Apoc. 7:4; 21:12) Ngem adda sabali pay a tuktukoyen ti nagan nga Israel iti Mateo 19:28.

² Kinuna ni Jesus: “Iti pannakaparsua manen, inton ti Anak ti tao agtugaw iti nadayag a tronona, dakayo a simmurot kaniak agtugawkayto met iti sangapulo ket dua a trono, a manguk-ukom iti sangapulo ket dua a tribu ti Israel.” Ti “sangapulo ket dua a tribu ti Israel” ket dagidiay ukomento dagiti napulotan nga adalan ni Jesus ken umawatto iti agnanayon a biag iti Paraiso a daga. Magunggonaanda iti panagserbi ti 144,000 kas papadi.

3, 4. Ania a nagsayaat nga ulidan ti ipakpakita dagiti matalek a napulotan?

³ Kas kadagiti nagkauna a papadi ken Levita, ibilang met ita dagiti napulotan a maysa a pribilehio ti panagserbida iti Dios. (Num. 18:20) Saan a namnamaen dagiti napulotan a maikkanda iti tawid ditoy daga. Imbes ketdi, ipakita ti Apocalipsis 4:10, 11 nga agtultuloyda nga agserbi ken Jehova idiay langit kas ar-ari ken papadi a kadua ni Jesu-Kristo.​—Ezeq. 44:28.

⁴ Bayat nga addada ditoy daga, masapul a paneknekanda a ni Jehova ti bingayda. Ti pribilehio a panagserbi iti Dios ti kapatgan kadakuada. Ipakpakitada ti pammatida iti pangsubbot a daton ni Kristo ken agtultuloy a surotenda tapno masiguradoda ti ‘pannakaayab ken pannakapilida.’ (2 Ped. 1:10) Nagduduma ti kasasaad ken abilidadda. Ngem dida pagpambar dagiti limitasionda tapno bassit laeng ti aramidenda a panagserbi iti Dios. Imbes ketdi, ipangpangrunada ti agserbi iti Dios iti amin a kabaelanda. Ken nagsayaatda nga ulidan kadagidiay mangnamnama nga agbiag iti paraiso a daga.

 5. Kasano a maipakita ti amin a Kristiano a ni Jehova ti bingayda? Apay a mabalin a narigat dayta?

⁵ Nailangitan man wenno naindagaan ti namnamatayo, masapul a ‘paglikudantayo ti bagitayo ket bagkatentayo ti kayo a pagtutuokan ket agtultuloy a surotentayo ni Kristo.’ (Mat. 16:24) Minilion kadagidiay mangnamnama nga agbiag iti Paraiso a daga ti agdaydayaw iti Dios ken mangsursurot ken Kristo. Saanda a kontento a bassit laeng ti aramidenda no ammoda nga ad-adu pay ti kabaelanda. Adu ti nangpasimple iti biagda tapno makapagpayunirda. Dadduma ti nagpayunir iti sumagmamano a bulan iti kada tawen. Adda met dagidiay saan a makapagpayunir ngem ar-aramidenda ti amin a kabaelanda iti ministerio. Kasda la ken Maria a nangibukbok iti bangbanglo a lana ken Jesus. Kinunana: “Nangaramid kaniak iti nasayaat nga aramid. . . . Inaramidna ti nabalinanna.” (Mar. 14:6-8) Mabalin a narigat nga aramiden ti amin a kabaelantayo gapu ta agbibiagtayo iti lubong nga iturturayan ni Satanas. Ngem agbalintayo a naregta ken agtalektayo ken Jehova. Pagsasaritaantayo ti uppat a pamay-an no kasanotayo nga aramiden dayta.

Panangyun-una iti Pagarian ti Dios

 6. (a) Kasano nga ipakpakita dagiti tattao nga iti daytoy laeng a biag ti bingayda? (b) Apay a nasaysayaat a tuladen ni David?

⁶ Insuro ni Jesus kadagiti pasurotna nga iyun-unada ti Pagarian ken ti kinalinteg ti Dios. Ngem masansan nga iyun-una dagiti tattao ti bukodda a pagimbagan. Nadakamatda kas “tattao daytoy a sistema ti bambanag, a ti binglayda adda iti daytoy a biag.” (Basaen ti Salmo 17:1, 13-15.) Adu ti saan a mangikabkabilangan iti Dios. Pakaseknanda laeng no kasanoda a maaddaan iti naman-ay a biag, mapadakkel dagiti annakda, ken dagiti ipatawiddanto kadakuada. Daytoy laeng a biag ti bingayda. Ngem naiduma ni David ta kayatna ti maaddaan iti naimbag a nagan iti imatang ni Jehova. Idi agangay, dayta met ti imbaga ti anakna a ni Solomon nga aramiden ti amin. (Ecl. 7:1) Kas ken Asaf, nakita ni David a napatpateg nga amang ti pannakigayyemna ken Jehova ngem iti bukodna a pagimbagan. Pagragsakanna ti nakipagna iti Dios. Adu a Kristiano ita ti nangyun-una kadagiti naespirituan nga aktibidad ngem iti sekular a trabahoda.

 7. Ania a bendision ti naawat ti maysa a kabsat gapu ta inyun-unana ti Pagarian?

⁷ Ni Jean-Claude, a taga-Central African Republic, ket maysa a panglakayen nga addaan iti tallo nga annak. Narigat ti agbirok ti trabaho iti pagilianda isu a dagidiay addaan trabaho, aramidenda ti amin tapno saanda a masesante. Maysa nga aldaw, imbaga ti manedyer ken ni Jean-Claude a mayakar iti pangrabii ti trabahona manipud 6:30 iti uneg ti pito nga aldaw. Inlawlawag ni Jean-Claude a malaksid iti material a kasapulan ti pamiliana, masapul nga ipaayanna pay ida iti naespirituan. Imbagana pay a responsabilidadna a tulongan ti kongregasion. Ania ti sungbat ti manedyer? “No naikkanka iti trabaho, masapul a lipatem ti amin agraman ti asawam, annakmo, ken problemam. Awanen ti sabali a panunotem no di ti trabahom. Agpilika: ti relihionmo wenno ti trabahom?” No sika, ania ti aramidem? Ammo ni Jean-Claude a no maikkat iti trabaho, saan a baybay-an ti Dios. Ad-adu ti tiempona nga agserbi iti Dios, ken tulongan ni Jehova tapno maipaayna ti kasapulan ti pamiliana. Isu a napan nakigimong. Kalpasanna, nagrubbuat a mapan agtrabaho uray dina sigurado no adda pay sangpetanna a trabaho. Apag-isu met nga adda immawag iti telepono. Nasesante gayam ti manedyer isu nga adda latta trabaho ti kabsat.

8, 9. Kas kadagiti papadi ken Levita, kasanotayo a maipakita a ni Jehova ti bingaytayo?

⁸ Mabalin a pampanunoten ti dadduma, ‘No masesanteak, kasanok a maipaay ti kasapulan ti pamiliak?’ (1 Tim. 5:8) Napasaram man dayta wenno saan, ammom a dinaka baybay-an ti Dios no isu ti bingaymo ken iyun-unam ti panagserbim kenkuana. Idi imbaga ni Jesus kadagiti adalanna nga itultuloyda a sapulen nga umuna ti pagarian, impanamnamana kadakuada: “Amin dagitoy sabali pay a bambanag”​—kas iti taraon wenno kawes​—“mainayonto kadakayo.”​—Mat. 6:33.

⁹ Panunotem dagiti Levita nga awan ti tawidda a daga. Gapu ta inyun-unada ti nasin-aw a panagdayaw, masapul nga agtalekda nga ipaay ni Jehova ti kasapulanda ta kinunana: “Siak ti binglaymo.” (Num. 18:20) Nupay ditay agserserbi iti literal a templo kas kadagiti papadi ken Levita, matuladtayo ti panagtalekda nga ipaay ni Jehova ti kasapulantayo. Bayat nga umas-asideg ti panungpalan, rumigrigat ti kasasaad isu a masapul nga ad-adda nga agtalektayo nga ipaay ti Dios ti kasapulantayo.​—Apoc. 13:17.

Panangyun-una iti Kinalinteg ti Dios

10, 11. Kasano nga impakita ti dadduma ti panagtalekda ken Jehova no maipapan iti panggedan? Mangted iti pagarigan.

¹⁰ Imbaga met ni Jesus kadagiti adalanna nga ‘itultuloyda a sapulen nga umuna ti kinalinteg ti Dios.’ (Mat. 6:33) Kaipapanan dayta a tuladentayo ti panangmatmat ni Jehova maipapan iti umiso ken di umiso imbes a ti kapanunotan dagiti tattao. (Basaen ti Isaias 55:8, 9.) Mabalin a malagipmo a dadduma idi ti agmulmula ken aglaklako iti tabako, agsansanay a makigubat, wenno agar-aramid ken aglaklako kadagiti armas. Ngem idi naammuanda ti kinapudno, kaaduan kadakuada ti nangbaliw iti trabahoda ket nakualipikarda nga agpabautisar.​—Isa. 2:4; 2 Cor. 7:1; Gal. 5:14.

¹¹ Ni Andrew ti maysa a pagarigan. Idi naammuanda ken baketna ti maipapan ken Jehova, inkeddengda ti agserbi kenkuana. Kaay-ayo ni Andrew ti trabahona ngem nagikkat. Apay? Agtartrabaho ngamin iti organisasion nga adda pakainaiganna iti gubat ngem kayatna nga iyun-una ti kinalinteg ti Dios. Idi nagikkat ni Andrew, dua ti anakna, awan pamastrekanna, ken agpaut laeng iti sumagmamano a bulan ti naurnongna. Iti panangmatmat ti tao, kasla awan ‘tawidna.’ Nagbirok iti trabaho ken nagtalek iti Dios. Iti panaglabas ti tiempo, napaneknekanda a sangapamiliaan a saan nga ababa ti ima ni Jehova. (Isa. 59:1) Nakapagpayunirda pay ken baketna gapu ta tinaginayonda a simple ti biagda. “No dadduma, pakadanaganmi ti kuarta, balay, salun-at, panaglakay, ken panagbaket,” kunana. “Ngem dinakam binaybay-an ni Jehova. . . . Awan panagduadua a maibagami a ti panagserbi ken Jehova ti kasayaatan ken makagunggona nga aramiden ti tao.”a​—Ecl. 12:13.

12. Ania ti kasapulan tapno mayun-unatayo ti kinalinteg ti Dios? Mangted iti lokal a kapadasan.

¹² Kinuna ni Jesus kadagiti adalanna: “No addaankayo iti pammati a kas iti kabassit ti bukel ti mustasa, kunaenyonto iti daytoy a bantay, ‘Umaliska manipud ditoy nga agturong sadiay,’ ket umalisto dayta, ket awanto ti di mabalin kadakayo.” (Mat. 17:20) Mayun-unam kadi dagiti pagalagadan ti Dios uray no mangyeg dayta iti pakarigatam? No agduaduaka a maaramidmo dayta, kasaritam dagiti kakongregasionmo. Sigurado a mapabilegka no mangngegmo dagiti kapadasanda.

Ipategmo Dagiti Naespirituan a Probision ni Jehova

13. No aramidentayo ti amin a kabaelantayo nga agserbi ken Jehova, ania ti manamnamatayo?

¹³ No ipategmo ti pribilehiom nga agserbi ken Jehova, masiguradom nga ipaayna dagiti material ken naespirituan a kasapulam, kas iti inaramidna kadagiti Levita. Panunotem ni David. Nupay adda iti kueba, manamnamana ti tulong ti Dios. Makapagtalektayo met ken Jehova uray no panagriknatayo ket awanen ti namnamatayo. Laglagipem nga idi simrek ni Asaf “iti naindaklan a santuario ti Dios,” ad-adda a natarusanna no ania ti pakariribukanna. (Sal. 73:17) Umasping iti dayta, masapul nga agtalektayo ken Jehova nga ipaayna ti naespirituan a kasapulantayo. Iti kasta, maipakitatayo nga ipatpategtayo ti pribilehiotayo nga agserbi iti Dios aniaman ti kasasaadtayo ken mapaneknekantayo a ni Jehova ti bingaytayo.

14, 15. Ania ti reaksiontayo no adda panagbalbaliw iti pannakaawattayo iti kinapudno, ken apay?

¹⁴ Ania ti reaksionmo no tulongannaka ni Jehova a mangtarus kadagiti “nauneg a bambanag ti Dios” nga adda iti Biblia? (1 Cor. 2:10-13) Nagsayaat a pagarigan ni apostol Pedro idi kinuna ni Jesus kadagiti Judio: “Malaksid no kanenyo ti lasag ti Anak ti tao ken inumenyo ti darana, awanankayo ti biag iti bagbagiyo.” Gapu ta literal ti panangmatmat ti adu nga adalan, kinunada: “Makapakigtot daytoy a sasao; siasino ti makapagimdeng iti dayta?” Gapuna, ‘napanda iti bambanag a nalikudan.’ Ngem kinuna ni Pedro: “Apo, iti siasino ti papananminto? Addaanka iti sasao ti agnanayon a biag.”​—Juan 6:53, 60, 66, 68.

¹⁵ Saan a naan-anay a natarusan ni Pedro ti imbaga ni Jesus a pannangan iti lasagna ken iyiinum iti darana. Ngem ti apostol agtalek nga ipaay ti Dios ti naespirituan a lawag. No adda baro a lawag iti kinapudno, ikagkagumaam kadi a tarusan dagiti makagapu iti dayta? (Prov. 4:18) Dagiti taga-Berea inawatda ti sao “buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw.” (Ara. 17:11) No tuladentayo ida, maibilangtayo ni Jehova a bingaytayo ken ad-adda a maipategtayo ti panagserbitayo kenkuana.

Makiasawa Laeng iti Apo

16. Kasano a ti Dios ti bingaytayo no tungpalentayo ti bilinna iti 1 Corinto 7:39?

¹⁶ Ti sabali pay a pamay-an a sipapanunottayo kadagiti panggep ti Dios ket ti panangyaplikar iti bilin ti Biblia a makiasawa ‘laeng iti Apo.’ (1 Cor. 7:39) Adu ti nagtalinaed nga awanan asawa imbes a salungasingenda dayta a bilin. Sidudungngo nga inaywanan ida ti Dios. Ania ti inaramid ni David idi nariknana a kasla agmaymaysa ken awan ti tumulong kenkuana? Kinunana: ‘Iti sanguanan ti Dios imbukbukbokko dagiti pakaseknak; iti sanguananna intultuloyko nga imbaga dagiti pakarigatak, idi a ti espirituk natalipungaw iti unegko.’ (Sal. 142:1-3) Mabalin a kasta met ti narikna ni propeta Jeremias, a simamatalek a nagserbi iti Dios iti dinekdekada kas awanan asawa. Mabalinmo nga adalen ti ulidanna iti kapitulo 8 ti libro a Ti Mensahe ti Dios Kadatayo Babaen ken Jeremias.

17. Kasano a napagballigian ti maysa a kabsat ti kinalidayna?

¹⁷ “Diak pulos inarapaap ti agtalinaed a balasang,” kuna ti maysa a kabsat a babai idiay United States. “Kayatko ti makiasawa no makabirokak iti maitutop a lalaki. Ni nanangko a saan a Saksi komkombinsirennak a makiasawa lattan iti uray asino. Imbagak nga isu ti makimbasol no saan a nasayaat ti pagbanagan ti pannakiasawak. Ngem idi nakitana a natalged ti trabahok, maaywanak ti bagik, ken naragsakak, dinakon sugsugsogan a makiasawa.” Ngem no dadduma, malidliday met daytoy a kabsat. Kunana: “Ni Jehova ti pagtalkak. Dinak baybay-an.” Ania ti nakatulong kenkuana nga agtalek ken Jehova? “Gapu iti kararag, mariknak a pudpudno a Persona ni Jehova ken diak agmaymaysa. Dumdumngeg ti Kangatuan iti uniberso isu nga awan ti rason a maupay ken malidayanak. Gapu ta ammona nga “ad-adu ti kinaragsak iti panangted ngem iti panangawat,” kinunana: “Ikagumaak a tulongan ti sabsabali, a diak mangnamnama iti kasukatna. Maragragsakanak a mangpampanunot, ‘Ania ngata ti maitulongko iti daytoy a tao?’” (Ara. 20:35) Wen, ni Jehova ti bingayna, ken tagtagiragsakenna ti pribilehio nga agserbi kenkuana.

18. Kasano nga agbalinka a bingay ni Jehova?

¹⁸ Aniaman ti kasasaadmo, mapaneknekam a ti Dios ti bingaymo. No aramidem dayta, karamanka iti naragsak nga ilina. (2 Cor. 6:16, 17) Iti kasta, agbalin ni Jehova a bingaymo, kas iti inaramid dagiti nagkauna nga adipenna. (Basaen ti Deuteronomio 32:9, 10.) No kasano a ti Israel ti bingay ti Dios kadagiti nasion, mabalinnaka met a pilien kas bingayna ken sidudungngo nga aywanannaka.​—Sal. 17:8.

[Footnote]

Ania ti Sungbatyo?

Kasanom a mapaneknekan a ni Jehova ti bingaymo

• no iyun-unam ti Pagarian ti Dios ken ti kinalintegna?

• no ipategmo dagiti naespirituan a taraon?

• no tungpalem ti bilin ti Dios a makiasawa laeng iti Apo?

[Blurb iti panid 13]

Ni Jehova ti bingaytayo no iyun-unatayo ti panagserbitayo kenkuana

[Ladawan iti panid 15]

Makaparegta ti ulidan ni Jeremias