PIANGPIANG

Kadagidi tiempo ti Biblia, daytoy ket maysa a kita ti pagtokar a matimpag nga umasping kadagiti agdama a piangpiang, ken naaramat a pangdanggay iti arpa, trumpeta, ken dadduma pay a pagtokar. (2Sm 6:5; 1Cr 15:28; 2Cr 5:12, 13) Ti dua a Hebreo a sao maipaay kadagiti piangpiang (tsel·tselimʹ ken metsil·taʹyim) ket nagtaud iti sao a tsa·lalʹ, kaipapananna ti “sumgar; agtayegteg.” (1Sm 3:11; Hab 3:16) Sigun iti 1 Cronicas 15:19, dagiti piangpiang maipaay iti templo ni Jehova naaramidda iti gambang, ngem malaksid iti daytoy awanen ti kanayonan a pannakadeskribirda iti Kasuratan. Adda sangaparis a piangpiang a nasarakan iti maysa a kadaanan a tanem dagiti Egipcio a nalabit umarngi kadagiti piangpiang iti Biblia. Agarup 14 cm (5.5 pul.) ti diametroda nga addaan kadagiti pagiggaman iti tengnga, ket naaramidda iti gambang a nagamporan iti sangkabassit a pirak.

Ipatuldo ti Salmo 150:5 a nasurok a maysa a kita ti piangpiang ti mabalin a pagaammo idi idiay Israel. Ti umuna a panagparang dayta a termino iti daytoy a teksto deskribirenna “dagiti piangpiang a nasamiweng ti unina,” idinto ta ti maikadua a panangtukoy ket kadagiti “umaw-aweng a piangpiang.” Agsipud ta ti tunggal binatog ti bersikulo 3 ken 4 daytoy a kanta tumukoy iti maysa wenno ad-adu pay a nagduduma a pagtokar iti musika, ti dua a binatog ti bersikulo 5 mabalin nga awan panagbalbaliw a tuktukoyenna nga umuna dagiti babbabassit, agkilingkiling a piangpiang ken, maikadua, dagiti piangpiang a daddadakkel ti diametroda a mangpataud kadagiti napigpigsa, nabangbangag-tonona nga aweng, no sipipigsa a mapagtinnupa.

Ti ladawan ti “umaw-aweng a piangpiang” inaramat ni apostol Pablo a mangyilustrar iti kinaubbaw ti panagsao ti maysa kadagiti pagsasao, no awan motibona nga ayat. (1Co 13:1) Nupay kasta, ti dadduma pay a panangtukoy kadagiti piangpiang, mainayon kadagidiay nadakamaten, mainaigda iti panagdaydayaw ken Jehova. (1Cr 13:8; 16:5, 42; 25:1, 6; 2Cr 29:25; Esd 3:10; Ne 12:27) Kaanoman a nainaig ti panagserbi iti templo, dagiti nasanay a Levita isuda dagiti tumutokar. (1Cr 16:4, 5, 42) Nupay ti sumagmamano nga eskolar agannayasda a mamati a dagiti piangpiang ket pagtokar dagiti Levita laeng ken pagtokar pay ketdi ti papadi, mabalin nga ipatuldo ti Salmo 150:1, 5 ti ad-adda a pangkaaduan a pannakausar: “Idaydayawyo ni Jah! . . . Idaydayawyo buyogen dagiti piangpiang.”