LEKSION 57
Kasano No Makaaramidka iti Serioso a Basol?
Uray no ay-ayatem unay ni Jehova ken ikagkagumaam ti saan nga agaramid iti pakasaktanna, agkamalika latta no dadduma. Ngem adda dagiti mas serioso a basol. (1 Corinto 6:9, 10) No makaaramidka iti serioso a basol, laglagipem a saan a simmardeng ni Jehova a mangayat kenka. Nakasagana a mangpakawan ken tumulong kenka.
1. Ania ti masapul nga aramidentayo tapno mapakawannatayo ni Jehova?
No makaaramid iti serioso a basol dagidiay mangay-ayat ken Jehova, makariknada iti kasta unay a liday. Ngem maliwliwada iti inkari ni Jehova kadagiti agdaydayaw kenkuana: “Uray no nakalablabbaga dagiti basolyo, mapapurawdanto a kas iti niebe.” (Isaias 1:18) No talaga nga agbabawitayo, naan-anay a pakawanennatayo ni Jehova. Kasanotayo a maipakita nga agbabbabawitayo? Pagladingitantayo ti naaramidtayo, isardengtayo dayta, ken dawatentayo ti pammakawan ni Jehova. Agreggettayo met a mangbalbaliw iti di umiso a kapanunotan ken ar-aramidtayo a nakaigapuan ti panagbasoltayo. Kasta met, ikagumaantayo a suroten dagiti nadalus nga estandarte ni Jehova.—Basaen ti Isaias 55:6, 7.
2. Kasano nga us-usaren ni Jehova dagiti panglakayen a tumulong kadatayo no nakabasoltayo?
No makaaramidtayo iti serioso a basol, ibagbaga ni Jehova nga ‘ayabantayo dagiti panglakayen iti kongregasion.’ (Basaen ti Santiago 5:14, 15.) Ay-ayaten dagitoy a panglakayen ni Jehova ken dagiti agserserbi kenkuana. Nasanayda a tumulong kadatayo tapno maisublitayo ti nasayaat a relasiontayo ken Jehova.—Galacia 6:1.
Kasanodatayo a tulongan dagiti panglakayen no makaaramidtayo iti serioso a basol? Adda dua wenno tallo a panglakayen a mangilinteg kadatayo nga usarenda dagiti balakad ken prinsipio ti Biblia. Mangtedda met kadagiti makatulong a suhestion ken pammaregta tapno saantayon a maulit ti basoltayo. Tapno maprotektaran ti kongregasion iti saan a nasaayat nga impluensia ti di agbabbabawi a nakaaramid iti serioso a basol, ikkaten dagiti panglakayen iti kongregasion.
AMMUEM TI AD-ADU PAY
Kitaem no kasanom a mas maawatan ken maapresiar ti ar-aramiden ni Jehova a tumulong kadatayo no makaaramidtayo iti serioso a basol.
3. Pagimbagantayo no ipudnotayo dagiti basoltayo
Masaktan ni Jehova no makaaramidtayo iti serioso a basol, isu a husto laeng nga ipudnotayo dayta kenkuana. Basaen ti Salmo 32:1-5, sa pagsaritaan daytoy a saludsod:
Apay a pagimbagantayo no ipudnotayo dagiti basoltayo ken Jehova imbes nga ilimedtayo dagita?
No agpatulongtayo kadagiti panglakayen kalpasan nga impudnotayo dagiti basoltayo ken Jehova, lumag-an ti riknatayo. I-play ti VIDEO, sa pagsaritaan ti sumaruno a saludsod.
Iti video, kasano a tinulongan dagiti panglakayen ni Canon tapno makasubli ken Jehova?
Masapul nga ipudnotayo ti amin kadagiti panglakayen. Nakasaganada a tumulong kadatayo. Basaen ti Santiago 5:16, sa pagsaritaan daytoy a saludsod:
Apay a nalaklakadatayo a matulongan dagiti panglakayen no awan ti ilimedtayo kadakuada?
Ipudnom ti basolmo, ibagam ti amin kadagiti panglakayen, ken awatem ti naayat a tulong ni Jehova
4. Ipakita ni Jehova ti asina kadagiti managbasol
No saan a kayat a suroten ti maysa a nakaaramid iti serioso a basol dagiti estandarte ni Jehova, maikkat iti kongregasion ken saantayon a makilangen wenno makikadua kenkuana. Basaen ti 1 Corinto 5:6, 11, sa pagsaritaan daytoy a saludsod:
No kasano a ti lebadura paalsaenna ti tinapay, kasano a ti pannakikadua iti saan nga agbabbabawi a nagbasol apektaranna ti kongregasion?
Kas panangtulad iti asi ni Jehova kadagiti imperpekto a managbasol, masapul a biroken ken tulongan dagiti panglakayen dagiti naikkat iti kongregasion. Adu ti nagsubli iti kongregasion gapu ta uray no nasakit ti disiplina, nakatulong dayta tapno mabigbigda a kamali ti naaramidda.—Salmo 141:5.
Kasano a ti panangtrato ni Jehova kadagiti managbasol ipakitana nga isu ket rasonable, naasi, ken naayat?
5. Pakawanennatayo ni Jehova no agbabawitayo
Nangusar ni Jesus iti maysa nga ilustrasion tapno maawatantayo ti rikna ni Jehova no agbabawi ti maysa. Basaen ti Lucas 15:1-7, sa pagsaritaan daytoy a saludsod:
Ania ti isuro daytoy kenka maipapan ken Jehova?
Basaen ti Ezekiel 33:11, sa pagsaritaan daytoy a saludsod:
Ania ti napateg nga aramidentayo tapno maipakitatayo a talaga nga agbabbabawitayo?
Kas iti maysa a pastor, ipatpateg unay ni Jehova dagiti karnerona
KUNA TI DADDUMA: “Mabutengak a mangibaga kadagiti panglakayen iti basolko ta baka maikkatak iti kongregasion.”
Ania ti ibagam iti maysa no kasta ti marikriknana?
SUMARIO
No makaaramidtayo iti serioso a basol, pakawanennatayo ni Jehova no talaga nga agbabawitayo ken determinadotayo a mangisardeng iti dayta.
Rebiu
Apay a pagsayaatantayo no ipudnotayo dagiti basoltayo ken Jehova?
Ania ti masapul nga aramidentayo tapno mapakawan dagiti basoltayo?
No makaaramidtayo iti serioso a basol, apay a masapul nga agpatulongtayo kadagiti panglakayen?
AGDISKOBREKA PAY
Kitaem no kasano a narikna ti maysa a lalaki ti asi ni Jehova a kas iti iladladawan ti Isaias 1:18.
Kasano a matulongan dagiti panglakayen dagiti nakaaramid iti serioso a basol?
“No Kasano a Maipakita ti Ayat ken Asi Kadagiti Nakabasol” (Ti Pagwanawanan, Agosto 2024)
Kitaem no kasano a maipakita ti ayat ken asi kadagiti di agbabbabawi a nakabasol.
“No Kasano a Matulongan Dagiti Naikkat iti Kongregasion” (Ti Pagwanawanan, Agosto 2024)
Iti artikulo a “Kasapulan nga Agsubliak ken Jehova,” ammuem no apay a narikna ti maysa a lalaki nga immadayo iti kinapudno a tinulongan isuna ni Jehova nga agsubli kenkuana.
“Ti Biblia Balbaliwanna ti Biag” (Ti Pagwanawanan, Abril 1, 2012)