Us-usarem Kadi a Naimbag ti Imahinasionmo?

ANIA ti agdagsen laeng iti 1.4 a kilo ngem makuna a “kakomplikaduan pay laeng a banag a nadiskobretayo iti uniberso”? Ti utek ti tao. Talaga a makapaamanga dayta! Bayat nga ad-adalentayo dayta, umun-uneg met ti apresasiontayo kadagiti “nakaskasdaaw” nga aramid ni Jehova. (Sal. 139:14) Panunotem laengen ti maysa a banag a kabaelan nga aramiden ti utektayo​—ti imahinasion. Ania ti imahinasion? Depinaren dayta ti maysa a diksionario kas “abilidad ti panunot a mangiladawan wenno mangbukel iti ideya maipapan kadagiti baro ken makaparagsak a bambanag, wenno bambanag a saanmo pay a napadasan.” Iti dayta a depinasion, saan kadi a makunam a kanayon nga us-usarem ti imahinasionmo? Kas pagarigan, adda kadi nangngegmo wenno nabasam a maipapan iti maysa a lugar a saanmo pay a napanan? Saanmo kadin a mailadawan dayta a lugar gapu ta saanmo pay a napanan? Kinapudnona, no mapanunottayo dagiti banag a saantayo a makita, mangngeg, maramanan, marikna, wenno maangot, us-usarentayo ti imahinasiontayo. Tulongannatayo ti Biblia a mangtarus a naaramid ken naparsua ti tao iti ladawan ti Dios. (Gen. 1:26, 27) Ngarud, saan kadi nga ipakita dayta nga arigna addaan met ni Jehova iti imahinasion? Gapu ta nakita ti Dios a maikaritayo a maaddaan iti kasta nga abilidad, namnamaenna nga usarentayo dayta a mangtarus iti pagayatanna. (Ecl. 3:11) Kasanotayo a mausar a naimbag ti imahinasiontayo a mangtarus iti pagayatanna, ken ania dagiti di umiso a pakausaran ti imahinasion a masapul a liklikantayo?

(1) Panagar-arapaap iti saan a maitutop a tiempo wenno saan nga umiso a bambanag.

Saan a dakes ti agarapaap. Kinapudnona, adda pammaneknek a makagunggona pay ketdi ti panagarapaap. Nupay kasta, ibaga ti Eclesiastes 3:1 a ‘tunggal banag adda tiempona,’ isu a bigbigentayo a posible a makaaramidtayo kadagiti bambanag iti saan a maitutop a tiempo. Kas pagarigan, no ipalubostayo nga agtawataw ti panunottayo bayat ti gimong wenno bayat ti personal a panagadaltayo iti Biblia, makatulong kadi wenno makasinga ti imahinasiontayo? Namakdaar ni Jesus maipapan iti peggad ti panangpampanunot kadagiti di umiso a bambanag, kas iti panagarapaap kadagiti immoral a bambanag. (Mat. 5:28) Mabalin a dadduma a bambanag a pampanunotentayo ket saan a makaay-ayo ken Jehova. Ti panangpampanunot kadagiti immoral a banag ket mabalin a mangituggod iti panangaramid kadagita. Dimo koma ipalubos a ti imahinasionmo ti mangyadayo kenka ken Jehova!

(2) Panangpampanunot a makaipaay iti manayon a talged ti material a kinabaknang.

Kasapulantayo ken mausartayo dagiti material a bambanag. Ngem maupaytayo laeng no panunotentayo a dayta ti makaipaay iti pudpudno a kinatalged ken kinaragsak. Insurat ti masirib a lalaki a ni Solomon: “Ti napapateg a bambanag ti nabaknang isuda ti nabileg nga ilina, ket iti ar-arapaapna kaslada mangsalaknib a pader.” (Prov. 18:11) Kas pagarigan, usigentayo ti napasamak idi nalayus ti nasurok a 80 a porsiento ti Manila, Pilipinas gapu iti napigsa ken saan nga agsarsardeng a tudo idi Septiembre 2009. Nakalisi kadi dagiti addaan iti adu a sanikua? Kinuna ti maysa a baknang nga adu ti napukawna, “Gapu iti layus, patas ti kasasaad ti amin, ta agpada a narigatan ken nagsagaba dagiti nabaknang ken napanglaw.” Nalaka laeng a panunoten a makaipaay iti pudno a salaknib ken natalged a biag dagiti material a bambanag. Ngem saan nga agpayso dayta.

(3) Panagdanag kadagiti bambanag a mabalin a saan a mapasamak.

Imbalakad ni Jesus a saantayo unay “maringgoran.” (Mat. 6:34) Ti maysa a managdandanag ket adu unay ti pampanunotenna. Mabalin a nalaka laeng a masayang ti pigsatayo no pagdandanagantayo dagiti awan pay a problema wenno saan pay ketdi a mapasamak. Ibaga ti Biblia a ti kasta a panagdanag ket agresulta iti pannakaupay ken depresion pay ketdi. (Prov. 12:25) Nagpateg nga iyaplikartayo ti balakad ni Jesus babaen ti saan unay a panagdanag ken babaen ti panangasikaso laeng kadagiti dumteng a pakaseknan iti inaldaw.

(1) Panangkita a nasaksakbay kadagiti peggad ken panangliklik kadagita.

Paregtaennatayo ti Biblia nga agbalin a masirib ken agpanunot a nasaksakbay. (Prov. 22:3) Babaen ti panangusartayo iti imahinasiontayo, mabalin a maammuantayo ti pagbanagan dagiti desisiontayo sakbay nga aramidentayo dagita. Kas pagarigan, no naawiska iti maysa nga okasion, kasano a makatulong ti imahinasionmo nga agaramid iti desision no mapanka wenno saan? Kalpasan a naammuam no siasino dagiti naawis, kaadu ti bisita, ken sadino ken kaano a maangay, panunotem: ‘Ania ngata ti mabalin a mapasamak sadiay?’ Mapanunotmo kadi a dayta nga okasion ket makagunggona ken maitunos kadagiti prinsipio ti Biblia? Gapu iti imahinasion, mabalin a mailadawanmo iti panunotmo dagiti mapasamak. Matulongannaka ti imahinasionmo nga agaramid kadagiti nainsiriban a desision tapno maliklikam dagiti kasasaad a makadangran iti espiritualidadmo.

(2) Panangpanunot no kasano a risuten dagiti narigat a problema.

Ramanen met ti imahinasion ti “abilidad a mangsango kadagiti problema.” Ipapanmo nga adda saanyo a nagkinnaawatan iti maysa a kakongregasionmo. Kasanom nga asitgan ti kabsatmo tapno agkappiakayo? Adu ti masapul nga ikabilangam. Ania ti pamay-anna a makisarita? Kaano ti kasayaatan a tiempo tapno pagsaritaanyo ti problema? Ania dagiti sasao ken tono ti timek nga usarem? No pagandarem ti imahinasionmo, mabalin a maensayom a nasaksakbay iti panunotmo ti nagduduma a pamay-an tapno marisut ti problemayo ket piliem ti ammom a kasayaatan a pamay-an ken ammom nga awatenna. (Prov. 15:28) Ti kasta a panangpanunot a nasaksakbay no kasano a risuten dagiti narigat a kasasaad ket makatulong tapno mataginayon ti talna iti kongregasion. Sigurado a nagsayaat dayta a pakausaran ti imahinasion.

(3) Panangpasayaat iti panagbasam ken panagadalmo iti Biblia.

Napateg ti inaldaw a panagbasa iti Biblia. Nupay kasta, saan laeng a ti kaadu ti mabasatayo iti inaldaw ti napateg. Masapul a makitatayo dagiti praktikal a leksion iti paset ti Biblia a basbasaentayo ken matignaytayo a mangyaplikar kadagita. Ad-adda a maawatantayo ti daldalan ni Jehova no basaentayo ti Biblia. Makatulong ti imahinasiontayo tapno maaramidtayo dayta. Kasano? Babaen ti panangadalmo iti libro a Tuladenyo ti Pammatida. No basaentayo dagiti salaysay iti dayta a libro, matignay ti imahinasiontayo a mangiladawan iti pakasaritaan ken kasasaad ti tunggal karakter ti Biblia. Arigna makitatayo dagiti pasamak, mangngegtayo dagiti uni, maangottayo dagiti nabanglo a sayamusom, ken matarusantayo ti rikna dagiti karakter ti Biblia. Kas resultana, masursurotayo dagiti napateg a leksion ken makapabileg a sasao manipud iti salaysay ti Biblia a mabalin a sigud nga ammotayon. No kasta ti panangusartayo iti imahinasiontayo bayat ti panagbasa ken panagadaltayo iti Biblia, agbalin a makagunggona dayta.

(4) Panangpatanor ken panangipakita iti pannakipagrikna.

Ti pannakipagrikna ket nagsayaat a kualidad a nadepinar kas pannakarikna iti pusotayo ti saem a marikrikna ti sabali a tao. Gapu ta ni Jehova ken ni Jesus impakitada ti pannakipagrikna, nagsayaat no tuladentayo ida. (Ex. 3:7; Sal. 72:13) Kasano a mapatanortayo dayta a kualidad? Maysa kadagiti kaepektibuan a pamay-an tapno mapatanortayo ti pannakipagrikna ket babaen ti panangusar iti imahinasiontayo. Mabalin a saantayo pay napadasan ti mapaspasaran ti maysa a kapammatiantayo. Ngem mabalinmo nga isaludsod iti bagim: ‘No siak ti adda iti kasta a kasasaad, ania ngata ti riknak? Ania ti kasapulak?’ No usarentayo ti imahinasiontayo a mangsungbat kadagitoy, ad-adda nga agbalintayo a mannakipagrikna. Talaga a sumayaat ti kasasaad ti panagbiagtayo kas Kristiano no ipakitatayo ti pannakipagrikna, iti man ministerio ken iti pannakilangentayo kadagiti kakabsat.

(5) Panangiladawan iti kasasaad ti biag iti baro a lubong.

Napno ti Biblia iti adu a detalye a mangiladawan iti kasasaad ti biag iti inkari ti Dios a baro a lubong. (Isa. 35:5-7; 65:21-25; Apoc. 21:3, 4) Naipakita dagita kadagiti publikasiontayo babaen kadagiti nagpipintas a ladawan. Apay? Gapu ta dagiti ladawan tignayenna ti imahinasiontayo ken makatulong kadatayo a mangiladawan iti bagitayo a mangtagtagiragsak kadagitoy a naikari a bendision. Awanen ti nasaysayaat pay a makaammo no kasano kabileg ti imahinasion ngem ni Jehova, ti Namarsua iti dayta. No usarentayo dayta a mangpanunot kadagiti kari ni Jehova, ad-adda nga agtalektayo a matungpal dagita ken makatulong kadatayo tapno agtalinaedtayo a matalek, bayat nga ibturantayo dagiti adu a pakasuotan ti biag.

Siaayat nga impaay ni Jehova kadatayo ti nakaskasdaaw nga abilidad, ti imahinasion. Makatulong daytoy kadatayo nga agserbi a naan-anay kenkuana iti inaldaw a panagbiagtayo. Ipakitatayo koma ti panagyamantayo iti Nangted iti daytoy nagsayaat a sagut babaen ti panangusar a naimbag iti inaldaw.