TEKKA

[Heb., ʼana·qahʹ; sema·mithʹ].

Maysa a bassit ken kadawyan a nalukmeg a kita dagiti alutiit, nga addaan babassit a siksik iti bagina. Dakkel dagiti matana a kas iti pusa ken pukek dagiti ramayna. Dagiti tekka ket masarakan kadagiti nabara a klima ken agnanaedda kadagiti kabakiran, kabatuan, iti kaykayo, ket no dadduma iti balbalay ti tattao. Idiay Palestina ti pakasarakan iti innem a kita dagitoy nga alibut nga aktibo iti rabii.

Ti “dapanan a tekka” (Hemidactylus turcicus) iti Levitico 11:29, 30 ket nailanad kas “narugit” kadagiti Israelita. Iti Proverbio 30:28, “ti tekka” (Heb., sema·mithʹ) ket nadakamat a “kumpet babaen kadagiti bukodna nga ima” ken agturong iti palasio ti ari. Maipapan iti ramramay ti tekka, kuna ti The International Wildlife Encyclopedia: “Aduan dagitoy iti mikroskopiko a kawit a kumpet uray iti babassit a likkaong, uray pay iti rabaw ti sarming, isu a makakapet ti tekka iti dandani amin a banag malaksid kadagiti napalalo ti kinagalisna a bumaddekanna. Ti direksion dagiti kawitna ket agpalikud ken agpababa, ket tapno makaibbet dagitoy, masapul nga ingatona ti ramayna manipud iti murdong. Gapu itoy, no ti maysa a tekka ket umul-uli iti maysa a kayo wenno maysa a diding wenno adda iti bobida, masapul a napartak ti panangikabbengna ken panangyukradna kadagiti ramayna iti tunggal panagaddangna a naparpartak pay ngem iti panangsurot ti mata. Nupay ti dadduma kadagiti kawitna ket nagbabassit ta kasapulan ti nangato ti gradona a lente ti mikroskopio tapno makita dagitoy. Nupay kasta, ti maysa a ramay a nakabalan kadagitoy nakaskasdaaw ti kabassitna a kawit ket kabaelanna nga awiten ti nadagdagsen nga amang a bagi ti tekka.”​—Inurnos da M. ken R. Burton, 1969, Tomo 7, p. 856, 857.