Ti panagadal iti Biblia ket kas iti naragsak a panagbiahe. Ngem saan a kanayon a nalaka dayta. No dadduma, mabalin a mapanunotmo no maitultuloymo met laeng ti agadal iti Biblia. Apay a sulit no agporsegika a mangitultuloy? Ania ti makatulong kenka a mangitultuloy uray narigat?

1. Apay a napateg ti panagadal iti Biblia?

“Ti sao ti Dios ket nabiag ken nabileg.” (Hebreo 4:12) Napateg ti Biblia ta ipakitana ti pampanunoten ken marikrikna ti Dios para kenka. Maikkannaka saan laeng nga iti pannakaammo no di ket iti pudpudno a sirib ken namnama. Kapatgan iti amin, matulongannaka ti Biblia nga agbalin a gayyem ni Jehova. No adalem ti Biblia, ipalpalubosmo a pasayaatenna ti biagmo.

2. Apay nga importante a makitam ti pateg ti kinapudno iti Biblia?

Dagiti kinapudno iti Biblia ket kas kadagiti napateg a gameng. Isu nga aw-awisennatayo ti Biblia a ‘gatangentayo ti kinapudno ket ditay ilaklako.’ (Proverbio 23:23) No sipapanunottayo iti pateg ti kinapudno iti Biblia, agporsegitayo nga agtultuloy nga agadal uray adda dagiti pakarigatan.​—Basaen ti Proverbio 2:4, 5.

3. Kasano a matulongannaka ni Jehova tapno maitultuloymo ti agadal?

Kas mannakabalin-amin a Namarsua ken Gayyemmo, kayatnaka a tulongan ni Jehova a makasursuro maipapan kenkuana. Maikkannaka iti ‘tarigagay ken iti pannakabalin a mangaramid iti amin a banag.’ (Basaen ti Filipos 2:13.) Isu a no kasla marigatanka nga agadal wenno mangyaplikar iti maad-adalmo, matulongannaka. No kasapulam ti kanayonan pay a pigsa wenno bileg tapno kayam a sanguen dagiti pakarigatan wenno ibubusor, maikkannaka. Regular nga ikararagmo ken Jehova a tulongannaka tapno maitultuloymo ti agadal iti Biblia.​—1 Tesalonica 5:17.

AMMUEM TI AD-ADU PAY

4. Iprioridadmo ti panagadalmo iti Biblia

No dadduma, kasla nakaad-adu ti ar-aramidem isu nga awanen ti orasmo nga agadal iti Biblia. Ania ti makatulong? Basaen ti Filipos 1:10, sa pagsaritaan dagitoy a saludsod:

• Para kenka, ania dagiti “napatpateg a bambanag” iti biag?

• Kasanom a pagbalinen a prioridad ti panagadal iti Biblia?

1. No ikabilmo nga umuna ti darat iti pagkargaan, sa ikabilmo dagiti bato, saanmo a maikabil ti amin a bato

2. No ikargam nga umuna dagiti bato, maikabilmo ti dandani amin a darat. Kasta met, no iyun-unam iti biagmo dagiti “napatpateg a bambanag,” maaramidmonto dagita ken addanto pay panawenmo para iti dadduma a banag

No agadaltayo iti Biblia, mapennek ti naespirituan a kasapulantayo​—ti panagkasapulantayo a mangam-ammo ken mangidaydayaw iti Dios. Basaen ti Mateo 5:3, sa pagsaritaan daytoy a saludsod:

• Ania ti pagsayaatanna no iprioridadtayo ti agadal iti Biblia?

5. Itultuloymo ti agadal uray adda ibubusor

VIDEO: Nabendisionan ti Panagan-anusna (5:22)

• Iti video, ania ti reaksion dagiti gagayyem ken kapamilia ni Francesco idi imbagana kadakuada ti maad-adalna?

• Ania ti resulta ti panagan-anusna?

Basaen ti 2 Timoteo 2:24, 25, sa pagsaritaan dagitoy a saludsod:

• Ania ti reaksion dagiti kapamiliam ken gagayyemmo iti maad-adalmo?

• Sigun kadagitoy a bersikulo, ania koma ti reaksionmo no adda saan a maragsakan iti panagadalmo iti Biblia? Apay?

6. Agtalekka a tulongannaka ni Jehova

VIDEO: Tulongannatayo ni Jehova nga Agbalbaliw (3:56)

• Iti video, ania dagiti panagbalbaliw nga inaramid ni Jim tapno maparagsakna ni Jehova?

• Ania ti magusgustuam iti ulidanna?

Basaen ti Hebreo 11:6, sa pagsaritaan dagitoy a saludsod:

• Ania ti aramiden ni Jehova para kadagidiay “napasnek a mangsapsapul kenkuana”​—dagidiay agporporsegi a mangam-ammo ken mangparagsak kenkuana?

• Base iti nabasa, ania ti marikna ni Jehova no makitana nga agporporsegika nga agadal iti Biblia?

SUMARIO

Uray saan a kanayon a nalaka, matulongannaka ti panagadal iti Biblia tapno agbiagka a naragsak iti agnanayon. Itultuloymo ti agtalek ken Jehova, ket bendisionannakanto.

Rebiu

• Apay a napateg kenka dagiti kinapudno iti Biblia?

• Kasanom a ‘masigurado ti napatpateg a bambanag’?

• Apay nga agpatulongka ken Jehova tapno maitultuloymo ti agadal iti Biblia?

AGDISKOBREKA PAY

Kitaem ti uppat a pamay-an a nakatulong iti adu tapno mausarda a naimbag ti tiempoda.

“No Kasano ti Kasayaatan a Panangusarmo iti Tiempom” (Agriingkayo!, Pebrero 2014)

Kitaem no kasano a tinulongan ni Jehova ti maysa a babai a saan a naawatan ni lakayna ti ar-aramidenna a mangparagsak iti Dios.

Papigsaennatayo ni Jehova a Mangbagkat iti Awittayo (5:05)

Kitaem ti epekto iti maysa a lalaki ti panagan-anus ni baketna.

Sinubokko ti Kinapudno (6:30)

Adda dagiti mangibaga a pagsisinaen kano dagiti Saksi ni Jehova dagiti pamilia. Ngem agpayso kadi dayta?

“Pagsisinaen Kadi Wenno Pabilgen Dagiti Saksi ni Jehova Dagiti Pamilia?” (Artikulo iti website)

Agdesdesisiontayo amin. Adu kadagitoy a desision ti dakkel ti epektona kadatayo ken iti pannakigayyemtayo ken Jehova. Mabalin a masapul nga agdesisiontayo no sadino ti pagyanantayo, no pangalaantayo iti pagbiagtayo, wenno no agasawatayo wenno saan. No umiso dagiti desisiontayo, naragsaktayo ken maparagsaktayo ni Jehova.

1. Kasanom nga usaren ti Biblia tapno makaaramidka kadagiti umiso a desision?

Sakbay a desisionam ti maysa a banag, ikararagmo ken Jehova a tulongannaka ken adalem ti Biblia tapno maammuam no ania ti panangmatmatna iti dayta. (Basaen ti Proverbio 2:3-6.) No dadduma, adda nalawag a bilin ni Jehova maipapan iti dayta. No kasta, ti panangsurot iti dayta a bilin ti kasayaatan nga aramidem.

Ngem kasanon no saan a direkta nga ibaga ti Biblia ti masapul nga aramidem? Iturongnaka latta ni Jehova ‘iti dalan a rumbeng a pagnaam.’ (Isaias 48:17) Kasano? Mabalin nga adda dagiti prinsipio a makatulong kenka. Dagiti prinsipio ti Biblia ket napapateg a kinapudno a mangipakaammo iti pampanunot ken rikrikna ti Dios. Kaaduanna a maammuantayo ti rikrikna ti Dios maipapan iti maysa a banag no mabasatayo ti maysa a salaysay iti Biblia. No maawatantayo ti rikrikna ni Jehova, makaaramidtayo iti desision a mangparagsak kenkuana.

2. Ania dagiti masapul a panunotem sakbayka nga agdesision?

Kuna ti Biblia: “Panunoten ti masirib ti tunggal addangna.” (Proverbio 14:15) Kayatna a sawen a sakbay nga agdesisiontayo, masapul nga iwayaantayo a panunoten dagiti pagpiliantayo. Bayat a pampanunotem dagiti pagpiliam, isaludsodmo iti bagim: ‘Ania dagiti makatulong a prinsipio ti Biblia? Ania kadagitoy ti mangted kaniak iti talna ti panunot? Anianto ti epekto ti desisionko iti dadduma? Kapatgan iti amin, maragsakanto ngata ni Jehova iti desisionko?’​—Deuteronomio 32:29.

Adda karbengan ni Jehova a mangibaga kadatayo no ania ti naimbag ken dakes. No maawatantayo a naimbag dagiti linteg ken prinsipiona ken determinadotayo a mangsurot kadagita, sansanayentayo ti konsiensiatayo. Ti konsiensiatayo ti mangibaga kadatayo no husto wenno saan ti maysa a banag. (Roma 2:14, 15) Makatulong ti nasanay a konsiensia tapno makaaramidtayo iti umiso a desision.

AMMUEM TI AD-ADU PAY

3. Agpaidalanka iti Biblia

VIDEO: Agpaidalanka Kadagiti Prinsipio ti Biblia (5:54)

• Ania ti wayawaya nga agpili?

• Apay nga inikkannatayo ni Jehova iti wayawaya nga agpili?

• Ania ti intedna a makatulong kadatayo tapno umiso dagiti desisiontayo?

Tapno makitam ti maysa a prinsipio ti Biblia, basaen ti Efeso 5:15, 16. Kalpasanna, pagsaritaan no kasanom nga ‘usaren ti tiempom iti kasayaatan a pamay-an’ tapno . . .

• regular a mabasam ti Biblia.

• agbalinka a nasaysayaat nga asawa, nagannak, wenno anak.

• makaatenderka kadagiti gimong ti kongregasion.

4. Sanayem ti konsiensiam tapno umiso dagiti maaramidmo a desision

VIDEO: “Salimetmetanyo ti Naimbag a Konsiensia” (5:13)

• Iti video, ania dagiti inaramid ti sister tapno masanayna ti konsiensiana ket makaaramid kadagiti desision a mangparagsak ken Jehova?

Apay a saantayo koma nga agpaidesision iti dadduma? Basaen ti Hebreo 5:14, sa pagsaritaan dagitoy a saludsod:

• Uray no kasla nalaklaka nga idesisionandatayo ti dadduma, ania ti masapul a mailasintayo?

• Ania ti makatulong kenka tapno masanaymo ti konsiensiam ket makaaramidka kadagiti umiso a desision?

5. Respetuem ti konsiensia ti dadduma

Saan nga agpapada dagiti desisiontayo. Kasanotayo a maipakita a resrespetuentayo ti konsiensia ti dadduma? Kitaem ti dua a situasion:

Situasion 1: Adda maysa a sister a mahilig nga ag-make up nga immakar iti maysa a kongregasion. Adu kadagiti sister sadiay ti saan a sanay a makakita iti naka-make up.

Basaen ti Roma 15:1 ken 1 Corinto 10:23, 24, sa pagsaritaan dagitoy a saludsod:

• Base kadagita a teksto, ania ti mabalin nga aramiden ti sister? Ania ti aramidem no saan nga awaten ti konsiensia ti kaduam ti maysa a banag a kaya ti konsiensiam?

Situasion 2: Ammo ti maysa a brother a saan nga iparparit ti Biblia ti kalkalainganna a panaginum iti arak, ngem nagdesision a saan a pulos nga uminum. Naawis iti maysa a gathering nga adda dagiti kakabsat nga umin-inum iti arak.

Basaen ti Eclesiastes 7:16 ken Roma 14:1, 10, sa pagsaritaan dagitoy a saludsod:

• Base kadagitoy a teksto, ania ti mabalin nga aramiden ti brother? Ania ti aramidem no makakitaka iti kabsat a mangar-aramid iti maysa a banag a saan nga ipalubos ti konsiensiam?

Ania dagiti makatulong tapno umiso dagiti maaramidmo a desision?

1. Agpatulongka ken Jehova tapno ammom ti aramidem.​—Santiago 1:5.

2. Ag-research-ka iti Biblia ken kadagiti publikasion a naibatay iti Biblia tapno maammuam dagiti makatulong a prinsipio. Mabalinmo met ti makisarita kadagiti eksperiensiado a Kristiano.

3. Panunotem ti epekto ti desisionmo iti konsiensiam ken iti konsiensia ti dadduma.

SUMARIO

Makaaramidtayo iti umiso a desision no ammotayo ti rikrikna ni Jehova maipapan iti maysa a banag ken no panunotentayo no dagiti ar-aramidentayo ket pagsayaatan wenno pagdaksan ti dadduma.

Rebiu

• Kasanoka a makaaramid kadagiti desision a mangparagsak ken Jehova?

• Kasanom a masanay ti konsiensiam?

• Kasanom a maipakita a resrespetuem ti konsiensia ti dadduma?

AGDISKOBREKA PAY

Kasanoka a makaaramid iti desision a mangpalagda iti pannakigayyemmo iti Dios?

“Agaramid Kadagiti Desision a Pakaidayawan ti Dios” (Ti Pagwanawanan, Abril 15, 2011)

Ammuem ti ad-adu pay no kasanonatayo a balbalakadan ni Jehova.

Idaldalan ni Jehova ti Ilina (9:50)

Ammuem ti nakatulong iti maysa a lalaki a mangsango iti maysa a narigat a desision.

Sigurado ti Amin no Iyun-unam ni Jehova (5:46)

Ammuem no kasanom a maparagsak ni Jehova uray no awan ti espesipiko a bilinna iti maysa a banag.

“Masapul Kadi a Kanayon nga Adda Bilin ti Biblia?” (Ti Pagwanawanan, Disiembre 1, 2003)