Malagipyo Pay Kadi?

Inut-utobyo kadin a naimbag dagiti nabiit pay a ruar Ti Pagwanawanan? No kasta, masarakanyo a makapainteres a lagipen dagiti sumaganad:

◻ Kasano a sinurot ti adu a pagassawaan ita ti nasayaat nga ulidan da Aquila ken Priscila?

Nagserbi da Aquila ken Priscila iti sumagmamano a nadumaduma a kongregasion. Kas kadakuada, adu a moderno-aldaw a Kristiano ti nagboluntario nga umakar iti lugar a dakdakkel ti pakasapulan. Napasaranda met ti rag-o ken pannakapnek iti pannakakitada a rumangrang-ay ti interes ti Pagarian ken masukayda ti napateg a Nakristianuan a panaggagayyem.​—12/15, panid 24.

◻ Ania ti panangmatmat ti Biblia kadagiti inumen a de alkohol?

Natimbeng ti panangmatmat ti Biblia kadagiti inumen a de alkohol. Iti sabali a bangir, kuna ti Biblia a ti arak ket sagut manipud iti Dios. (Salmo 104:1, 15) Iti sabali a bangir, kondenarenna ti kinamanaglablabes. (Lucas 21:34; 1 Timoteo 3:8; Tito 2:3; 1 Pedro 4:3)​—12/15, panid 27.

◻ Ania ti maysa a napateg a paset ti libro ti Biblia a Haggeo?

Nupay ti libro a Haggeo ket buklen laeng ti 38 a bersikulo, 35 a daras a naaramat ti nagan ti Dios. Kasla di nabiag ti kasta a padto no ti nagan a Jehova ket nasuktan iti titulo nga “Apo.”​—1/1, panid 6.

◻ Ania a leksion ti maadal kadagiti basol da David ken Manases?

Iti laksid ti panangpakawan ni Jehova kada David ken Manases, dagitoy a lallaki​—ken kasta met ti Israel​—masapul idi a sanguenda dagiti bunga ti basolda. (2 Samuel 12:11, 12; Jeremias 15:3-5) Iti umasping a pamay-an, nupay pakawanen ita ni Jehova dagiti agbabbabawi a managbasol, mabalin nga adda dagiti bunga ti aramidda a di maliklikan.​—1/1, panid 27.

◻ Iti ania a pamay-an a “naglibnos” ti ‘saksaka dagidiay mangideklara iti naimbag a damag’ ti Pagarian ti Dios? (Isaias 52:7)

Dagiti saka ti gagangay a mangtignay iti maysa a tao no rummuar a mangasaba kadagiti sabsabali. Ti tao ti talaga nga ireprepresentar ti kakasta a saka. Gapuna para iti adu a makangngeg ken mangipangag iti naimbag a damag ti Pagarian, pudno a makaay-ayo a buya dagiti saka ti kakasta a mensahero.​—1/15, panid 13.

◻ Ania a trabaho nga addaan nagkadua a paset ti nairaman iti ‘panangideklara iti naimbag a damag’? (1 Corinto 9:16)

Umuna, masapul nga iwaragawagtayo ti naimbag a damag ti Pagarian. Ti maikadua nga aspeto daytoy a trabaho ramanenna ti panangisuro kadagidiay mangipangag iti pannakaiwaragawag ti Pagarian.​—1/15, panid 23.

◻ Ania dagiti personal a magunggona iti panagkanta iti kanta ti Pagarian kadagiti Nakristianuan a panaggigimong?

Ti panagkanta ikkannatayo iti gundaway a mangyebkas iti rikriknatayo iti Namarsua kadatayo. (Salmo 149:1, 3) No agkantatayo a naimpusuan iti kongregasion, ikkannatayo iti umiso a kondision ti isip ken puso maipaay iti programa a sumaganad. Tignayennatayo a makiraman nga ad-adda pay iti panagdaydayaw ken Jehova.​—2/1, panid 28.

◻ Kaano a maikuna a naim-imbag ti aldaw ti ipapatay ngem ti aldaw ti pannakayanak? (Eclesiastes 7:1)

Agbalin a naim-imbag ti aldaw ti ipapatay ngem ti aldaw a pannakayanak ti maysa no nakaaramiden ti maysa a tao iti naimbag a nagan ken Jehova, a makabael a mangpagungar kadagiti matalek a natay. (Juan 11:25)​—2/15, panid 12.

◻ Apay a personal a matulongannatayo ti libro nga Eclesiastes?

Tumulong daytoy iti tunggal maysa kadatayo a mangilinteg iti panangmatmattayo iti biag ken no ania ti ipangpangrunatayo. (Eclesiastes 7:2; 2 Timoteo 3:16, 17)​—2/15, panid 16.

◻ Pundamentalista kadi dagiti Saksi ni Jehova?

Saan. Nupay natibker ti narelihiosuan a pammatida, saanda a pundamentalista iti anag a pannakaaramat ti sao. Saanda a makiramraman kadagiti demonstrasion ken kinaranggas maibusor kadagidiay dida anamongan. Tultuladenda ti Panguloda, ni Jesu-Kristo.​—3/1, panid 6.

◻ Ti saan a pannakaammo iti eksakto nga oras ti iyaay ni Jesus a mangiwayat iti panagibales ti Dios ket addaan iti ania nga epekto kadagiti Kristiano?

Pagtalinaedenna dagiti Kristiano a naridam ken ipaayanna ida iti inaldaw a gundaway a mangipaneknek nga agserserbida ken Jehova nga awanan managimbubukodan a motibo.​—3/1, panid 13.

◻ Aniat’ rumbeng nga usigentayo sakbay nga idarumtayo ti maysa a kabsat a mabalin a nangsaur kadatayo?

Rumbeng nga usigentayo ti posible nga epekto kadatayo, iti sabsabali a nairaman, iti kongregasion, ken kadagiti taga-ruar. (1 Corinto 6:7)​—3/15, panid 22.

◻ Kasano a magun-od ti pudno a kinaragsak?

Ti pudno a kinaragsak ket maysa a kasasaad ti puso, a naibatay iti pudno a pammati ken nasayaat a relasion ken Jehova. (Mateo 5:3)​—3/15, panid 23.

◻ Aniat’ rumbeng nga aramiden ti maysa a Kristiano no maawagan nga agannong iti hurado?

Masapul nga ikeddeng ti tunggal Kristiano a maipasango iti annongen iti hurado no ania a dana ti masurot, a naibatay iti pannakaawatna iti Biblia ken iti konsiensiana. (Galacia 6:5)​—4/1, panid 29.