KAPITULO 27

No Ngay Perpeksionistaak?

Maupayka kadi no adda uray maysa la a kamalim iti eksamen?

□ Wen

□ Saan

No adda uray ania a pammabalaw kenka, panagriknam kadi ket napaayka nga interamente?

□ Wen

□ Saan

Marigatanka kadi a makigayyem agsipud ta kasla awan ti makaragpat kadagiti pagalagadam?

□ Wen

□ Saan

NO WEN ti sungbatmo iti maysa wenno dua kadagiti saludsod iti ngato, mabalin a perpeksionistaka. ‘Ngem ania koma ti pagdaksanna no ikagumaak ti saan nga agkamali iti aniaman a banag nga aramidek?’ nalabit isaludsodmo. Awan met ketdi ti dakesna. Ti Biblia padayawanna ti tao a “nasigo iti trabahona.” (Proverbio 22:29) Nupay kasta, ti perpeksionista ekspektarenna a perpekto ti pannakaaramid ti amin a banag uray no saan a posible dayta.

Kas pagarigan, aklonen ni Jason nga agtawen iti 19: “Idi addaak iti maudi a tawenko iti haiskul, panagriknak ket saanak a nalaing nga estudiante no adda uray maysa laeng a kamalik iti eksamen. Ammok met ti agtokar iti piano, ngem impapanko a masapul a kas kadagiti agkonkonsierto ti kalaingko nga agtokar.”

Ti kinaperpeksionista ket baka agbalin pay ketdi a tubeng iti panagdayaw ti maysa a tao. Usigem ti posible a mapasamak iti maysa nga agtutubo a naynay a madakdakamat kas pagwadan. Gapu ta kanayon nga isu ti sentro ti atension, nalabit a ti panagriknana ket kasla agtaltalaytay iti tali, nga isu ti buybuyaen ti amin a tao. Siempre, dagiti Kristiano, ubing man wenno nataengan, ket mabenepisiaran kadagiti naimbag a pagwadan iti kongregasion. Ngem no ikarigatan ti maysa nga agtutubo ti agbalin a perpekto iti amin a banag, mabalin a mapukaw ti rag-ona nga agserserbi iti Dios. No kasta ti mapasamak iti agtutubo, kasapulanna ti tulong. Ngem nalabit bumdeng nga agpatulong ta dina kayat a paayen dagidiay mangap-apresiar kenkuana. Mabalin pay ketdi a naan-anayen a sumuko, ta pampanunotenna, ‘No diak met la matakderan dagiti perpekto nga estandartek, ania koma pay ti gapu nga agreggetak?’

Panangparmek iti Kinaperpeksionista

Marigrigatan dagiti perpeksionista gapu ta immulada iti panunotda a saan a mabalin nga agbiddutda. Ngem saan nga umiso dayta. Nalawag a kuna ti Biblia: “Amin nagbasol ken agkurang iti dayag ti Dios.” (Roma 3:23) Imposible ngarud iti uray siasino kadatayo ti agbalin a naan-anay nga awan pagkamalianna. Kinapudnona, ti panangpanunot a mabalinmo nga aramiden ti aniaman a dika pulos agkamali ket awan dumana iti panangpanunot a kabaelam ti tumayab. Imposible dayta. Uray no ipatangkenmo a panunoten a makatayabka, talaga a saan a mapasamak dayta!

Kasano a maliklikam ti agbalin a perpeksionista? Padasem dagiti sumaganad:

Usigem manen no ania ti ibilangmo a “balligi.” Nabannogka kadin a mangikagkagumaan nga agbalin a kasasayaatan? Ipakita ti Biblia a ti kasta a panagregget ket kas iti “panangkamkamat iti angin.” (Eclesiastes 4:4) Kinapudnona, manmano ti agballigi nga agbalin a “kasasayaatan.” Ken uray no maragpat dayta ti maysa a tao, iti saan a mabayag addanto manen sabali a nasaysayaat. Ti panagballigi kaipapananna ti panangaramidmo iti kasasayaatan a maaramidam​—saan ket a panangartap iti maaramidan ti sabali.​—Galacia 6:4.

Agbalinka a realistiko. Saanmo nga ekspektaren ti nalablabes ngem iti abilidad ken limitasionmo. No nangato unay ti ekspektasionmo iti bagim, mabalin a pagilasinan dayta a saanmo a mabigbig dagiti limitasionmo​—wenno nalabes ti panangmatmatmo iti bagim. Nagsayaat ti imbalakad ni apostol Pablo: “Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot.” (Roma 12:3) Gapuna, agbalinka a realistiko. Baliwam dagiti ekspektasionmo. Aramidem ti amin a kabaelam ngem saanka nga agbalin a perpeksionista.

Sursuruem ti agrelaks! Padasem ti agaramid kadagiti banag a saanmo a kabesado kas koma iti panagtokar iti instrumento. Pudno, adu la ketdi ti maaramidmo a kamali, ngem padasem a baliwan ti panangmatmatmo kadagita. Kuna ti Biblia nga adda “tiempo ti panagkatawa.” (Eclesiastes 3:4) Isu nga apay a dimo sursuruen ti agrelaks? No kasta ti aramidem, makitamto a ti panagkamali ket paset ti panagsursuro. Nalabit marigatanka a mangakseptar nga agkamalika, ngem ikagumaam nga iwaksi iti isipmo dagiti negatibo ken makapaupay a pampanunot.

Laglagipem a saan a kalkalikaguman ni Jehova ti kinaperpekto; kayatna laeng nga agmatalektayo kenkuana. (1 Corinto 4:2) No ikagkagumaam ti agtalinaed a matalek, makapagragsakka iti kinasiasinom​—uray no saanka a perpekto.

KANGRUNAAN A TEKSTO

“Awan ti tao a nalinteg iti daga nga agtultuloy nga agaramid iti naimbag ket saan nga agbasol.”​—Eclesiastes 7:20.

BALAKAD

Mangpanunotka iti trabaho nga intungtungkuam gapu laeng ta maamakka a saan a naan-anay nga umiso ti panangaramidmo iti dayta. Kalpasanna, ikeddengmo no kaanom nga ileppas dayta.

AMMOM KADI . . . ?

Perpekto ni Jehova ngem saan a perpeksionista no iti pannakilangenna kadagiti imperpekto a tattao. Rasonable ken realistiko kadagiti ekspektarenna kadatayo.

DAGITI ARAMIDEK!

No saanen a nainkalintegan ti panangbabalawko iti bagik, kastoy ti aramidek ․․․․․

No saanen a nainkalintegan ti panangbabalawko iti sabsabali, kastoy ti aramidek ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Kadagiti ania a benneg ti biag, no adda man, nga agannayaska nga agipasdek kadagiti nangato a kalat para iti bagim?

● Ania dagiti teksto iti Biblia a nalawag a mangipakita a saan a kalkalikaguman ni Jehova ti kinaperpekto kadagiti adipenna?

● Apay a mabalin nga umikay kenka dagiti sabsabali no perpeksionistaka?

● Iti masanguanan, ania ti aramidem no agkamalika?

[Blurb iti panid 226]

“Agduma ti kinaperpeksionista ken ti panangipaaymo iti kasasayaatan a maaramidam. Ti kinaperpeksionista ket nalabes, idinto ta ti panangipaay iti kasasayaatan a maaramidan ket mangipakita iti kinabalanse.”​—Megan

[Kahon iti panid 228]

Kinaperpeksionista ken Pannakigayyem

Likliklikam kadi ti dadduma a tattao gapu ta saanda a maragpat dagiti pagalagadam? Wenno ad-adaywandaka kadi dagiti nasayaat a tattao gapu ta nangato unay dagiti estandartem kadagiti gagayyemmo? Balakadannatayo ti Biblia: “Dika agbalin a nalabes ti kinalintegna, saanmo met nga ipakita a nalabes unay ti kinasiribmo. Apay koma a paglangalangem ta bagim?” (Eclesiastes 7:16) Ti maysa a makagapu nga aglangalang ti maysa a tao ket no ikkanna iti panggapuan nga umikay dagiti mayat koma a makigayyem kenkuana. “Awan ti mayat nga umasideg iti tao a mangipababa kadagiti kakaduana,” kuna ti balasang nga agnagan iti Amber, “ken adu ti ammok a perpeksionista a napukawan kadagiti nasasayaat a gagayyem gapu laeng iti babassit a bambanag.”

[Ladawan iti panid 229]

No kasano a saanka a makatayab uray agan-anoka, awan mamaayna ti panangikagumaam nga agbalin a perpekto