LEKSION 51
Kasano nga Agbalin a Makaparagsak ken Jehova ti Panagsasaom?
Idi pinarsuanatayo ni Jehova, adda nakasaysayaat nga inregalona kadatayo—ti abilidad nga agsao. Napateg ngata kenkuana no kasanotayo nga us-usaren dayta a regalona? Wen! (Basaen ti Santiago 1:26.) Isu a kasanotayo a mausar ti abilidadtayo nga agsao iti pamay-an a mangparagsak ken Jehova?
1. Kasanotayo nga usaren ti regalo ni Jehova nga abilidad nga agsao?
Ibagbaga ti Biblia nga ‘itultuloytayo ti agpipinnaregta ken agpipinnabileg.’ (1 Tesalonica 5:11) Adda kadi am-ammom nga agkasapulan iti pammaregta? Ania ti mabalinmo nga aramiden tapno sumayaat ti riknana? Ipasiguradom a napateg isuna kenka. Mabalin nga ibagam no ania ti maap-apresiarmo kenkuana. Adda kadi mapanunotmo a teksto a mabalin a mangparegta iti maysa nga am-ammom? Adu a teksto ti mabalinmo nga usaren. Laglagipem met nga agpada a napateg ti ibagam ken ti pamay-an ti panangibagam. Isu a kanayon koma a nasingpet ken naalumamay ti panagsaom.—Proverbio 15:1.
2. Ania a klase ti panagsasao ti masapul a liklikantayo?
Kuna ti Biblia: “Awan koma ti naalas a sao a rummuar iti ngiwatyo.” (Basaen ti Efeso 4:29.) Kayatna a sawen a saantayo koma nga agsao iti dakes wenno makapainsulto a sasao a mangpasakit iti rikna ti dadduma. Liklikantayo met koma ti agitsismis ken mangpadakes.—Basaen ti Proverbio 16:28.
3. Ania ti makatulong kadatayo tapno agbalin a makaparegta ti panagsasaotayo?
Kaaduanna nga ipakita ti panagsasaotayo no ania ti adda iti puso ken panunottayo. (Lucas 6:45) Isu a masapul a sanayentayo ti bagitayo nga agpokus kadagiti positibo a bambanag—bambanag a nalinteg, nadalus, maay-ayat, ken naimbag. (Filipos 4:8) Tapno makapagpokustayo kadagitoy a banag, masapul a pilientayo a naimbag dagiti gagayyemtayo ken no ania dagiti aramidentayo no agrelrelakstayo. (Proverbio 13:20) Makatulong met no panunotentayo nga umuna ti ibagatayo. Panunotentayo no ania ti epekto iti dadduma ti ibagatayo. Kuna ti Biblia: “Ti di pinampanunot a sasao ket kas kadagiti duyok ti espada, ngem makapaimbag ti dila dagiti masirib.”—Proverbio 12:18.
AMMUEM TI AD-ADU PAY
Ammuem no kasanoka nga agsao iti pamay-an a mangparagsak ken Jehova ken mangparegta iti dadduma.
4. Annadam ti panagsasaom
No dadduma, makaibagatayo kadagiti banag a pagbabawyantayto. (Santiago 3:2) Basaen ti Galacia 5:22, 23, sa pagsaritaan dagitoy a saludsod:
Ania kadagitoy a kualidad ti mabalinmo nga ikararag tapno makontrolmo ti panagsasaom? Kasano a makatulong kenka dagitoy a kualidad?
Basaen ti 1 Corinto 15:33, sa pagsaritaan daytoy a saludsod:
Ania ti mabalin nga epekto dagiti gagayyemmo ken ti paglinglingayam iti panagsasaom?
Ania ti mabalin a mangimpluensia iti panagsasaom?
Basaen ti Eclesiastes 3:1, 7, sa pagsaritaan daytoy a saludsod:
Kaano a maymayat nga agulimekka wenno agurayka iti umiso a tiempo sakbayka nga agsao?
5. Positibo koma ti ibagam maipapan iti dadduma
Ania ti aramidentayo tapno saantayo a mainsulto wenno masaktan ti dadduma? I-play ti VIDEO, sa pagsaritaan dagiti sumaruno a saludsod.
Iti video, apay a kayat ti kabsat a balbaliwan ti pamay-an ti panagsasaona iti dadduma?
Ania ti inaramidna tapno makapagbalbaliw?
Basaen ti Eclesiastes 7:16, sa pagsaritaan daytoy a saludsod:
Ania ti masapul a laglagipentayo no kasla kayattayo ti agsao iti negatibo maipapan iti maysa a tao?
Basaen ti Eclesiastes 7:21, 22, sa pagsaritaan daytoy a saludsod:
Kasano a makatulong dagitoy a bersikulo tapno saanka a masuron no adda makaibaga iti negatibo maipapan kenka?
6. Nasayaat koma ti panagsasaom kadagiti kapamiliam
Kayat ni Jehova a nasingpet ken naayat koma ti pannakisaritatayo kadagiti kapamiliatayo. I-play ti VIDEO, sa pagsaritaan ti sumaruno a saludsod.
Ania ti makatulong kenka tapno agbalin a naasi ti panagsasaom kadagiti kapamiliam?
Basaen ti Efeso 4:31, 32, sa pagsaritaan daytoy a saludsod:
Kasano koma ti pannakisaritatayo kadagiti kapamiliatayo tapno mariknada a maipatpategda?
Inyebkas ni Jehova ti marikriknana maipapan iti Anakna a ni Jesus. Basaen ti Mateo 17:5, sa pagsaritaan daytoy a saludsod:
Kasanom a matulad ni Jehova no makisarsaritaka kadagiti kapamiliam?
Mangbirokka iti oportunidad a mangapresiar iti dadduma
KUNA TI DADDUMA: “Ibagbagak lang met ti pampanunotek. Adda kaniadan a, no masaktanda.”
Para kenka, husto kadi dayta? Apay?
SUMARIO
Dakkel ti epekto iti dadduma ti ibagbagatayo. Masapul a panunotentayo a naimbag no ania ti ibagatayo, no kaanotayo nga ibaga, ken no kasanotayo nga ibaga.
Rebiu
Kasanoka a makapagsao iti mangpabileg iti dadduma?
Ania a panagsasao ti kayatmo a liklikan?
Ania ti makatulong kadatayo tapno kanayon a nasayaat ken makapabileg ti panagsasaotayo?
AGDISKOBREKA PAY
Ania ti makatulong kadatayo tapno positibo ti panagsasaotayo?
Ammuem no ania ti makatulong kenka tapno maliklikam ti agsao iti dakes.
“Talaga Kadi a Dakes ti Agsao iti Dakes?” (Artikulo iti website)
Kitaem no kasanom a maliklikan ti agitsismis.
Kitaem no kasano a tinulongan ni Jehova ti maysa a lalaki tapno maisardengna ti agsao iti dakes.
“Inut-utobko No Ania ti Pagtungpalan ti Biagko” (Ti Pagwanawanan, Agosto 1, 2013)