Dakayo nga Agtutubo, Idaydayawyo ni Jehova!

“Idaydayawyo ni Jehova manipud iti daga, . . . dakayo nga agtutubo a lallaki ken kasta met dakayo a birhen.”​—SALMO 148:7, 12.

1, 2. (a) Aniada a restriksion ti pagaammo ti adu nga agtutubo? (b) Apay a di koma tagidaksen dagiti agtutubo dagiti restriksion nga ipaannurot dagiti dadakkelda?

MASANSAN nga ammo dagiti agtutubo no ania dagiti di pay maipalubos kadakuada. Ammo ti adu kadakuada no kaano a mapalubosanda nga agballasiw a bukbukod iti kalsada wenno no ania nga oras a masapul a maturogdan wenno no kaano a mapalubosanda nga agmaneho. No dadduma, marikna dagiti agtutubo nga adu kadagiti kalikagumda ti masansan a masungbatan iti , “Urayem agingga a dumakkelka.”

² Dakayo nga agtutubo ammoyo nga iti panagrikna dagiti dadakkelyo, nainsiriban ti panangikeddengda kadagiti kasta a restriksion, nalabit kas proteksionyo. Sigurado nga ammoyo met a maay-ayo ni Jehova no pagtulnoganyo dagiti dadakkelyo. (Colosas 3:20) Ngem adda kadi panawen a nariknayo a kasla saan pay a nangrugi ti biagyo? Maiparit pay la kadi ti amin a napateg a bambanag bayat nga ubingkayo pay? Adayo a kasta! Adda maysa a trabaho ita nga adayo a napatpateg ngem iti aniaman a pribilehio a segseggaanyo. Mapalubosankayo kadi a makiraman iti daytoy a trabaho? Ti Kangatuan a Dios ti mismo a mangaw-awis kadakayo a makiraman iti dayta!

 3. Ania a pribilehio ti iyaw-awis ni Jehova kadagiti agtutubo, ket ania a salsaludsod ti usigentayo ita?

³ Ania a trabaho ti tuktukoyentayo? Imutektekanyo dagiti sasao ti pannakatema a tekstotayo iti daytoy nga artikulo: “Idaydayawyo ni Jehova manipud iti daga, . . . dakayo nga agtutubo a lallaki ken kasta met dakayo a birhen, dakayo a lallakay agraman ubbing.” (Salmo 148:7, 12) Dayta ti naindaklan a pribilehioyo: Mabalinyo nga idaydayaw ni Jehova. Kas maysa nga agtutubo, magagaranka kadi a makiraman iti daytoy a trabaho? Kasta ti marikna ti adu. Tapno makitatayo no apay a makagunggona ti pannakarikna iti kasta, usigentayo ti tallo a saludsod. Umuna, apay a rumbeng nga idaydayawmo ni Jehova? Maikadua, kasano a sieepektibo a maidaydayawmo ti Dios? Maikatlo, kaano ti kasayaatan a panawen a rugiam nga idaydayaw ni Jehova?

Apay nga Idaydayawyo ni Jehova?

4, 5. (a) Sigun iti Salmo 148, addatayo iti ania a nagsayaat a kasasaad? (b) Kasano a dagiti parsua a saan a makapagsao wenno makapagrason maidaydayawda latta ni Jehova?

⁴ Ti maysa a kangrunaan a rason nga idaydayawtayo ni Jehova ket gapu ta isu ti Namarsua. Ti Salmo 148 tulongannatayo a mangipamaysa iti daytoy a kinapudno. Panunotem laengen: No mangngegmo ti maysa a dakkel a grupo a sangsangkamaysa nga agkankanta iti maysa a napintas, makatukay a samiweng, ania ti mariknam? Kasano no dagiti liriko dayta a kanta ket sasao nga ammom a pudno, a mangyebkas kadagiti kapanunotan nga ammom a napateg, naragsak, ken makapabileg? Tarigagayam kadi a sursuruen dagiti lirikona ken makipaset iti panangkanta iti dayta? Kasta ti aramiden ti kaaduan kadatayo. Bueno, ti maika-148 a Salmo ipakitana nga addaka iti kasta nga umasping a kasasaad ngem iti nasaysayaat nga amang. Dayta a salmo deskribirenna ti maysa a dakkel a bunggoy, a sangsangkamaysada amin a mangidaydayaw ken ni Jehova. Ngem bayat a basbasaenyo ti salmo, nalabit nga adda madlawyo a karkarna? Ania dayta?

⁵ Adu kadagiti dineskribir ti Salmo 148 ket saan a makapagsao wenno makapagrason. Kas pagarigan, mabasatayo ti init, bulan, bitbituen, niebe, angin, bambantay, ken turturod a mangidaydayaw ken ni Jehova. Kasano a maaramidan dayta dagitoy awan biagna a parparsua? (Bersikulo 3, 8, 9) Uray dagiti kaykayo, parparsua iti taaw, ken animal maaramidda met dayta. (Bersikulo 7, 9, 10) Adda kadi naminsan a minatmatam ti makaabbukay a buya ti lumlumnek nga init wenno miningmingam ti kabus a bulan kadagiti nabituen a langit wenno nagamangaka iti maysa a naranga a ladawan ti daga? No kasta, “nangngegmo” ti kanta ti panangidayaw manipud iti sangaparsuaan. Amin nga inaramid ni Jehova ipalagipda kadatayo nga isu ti mannakabalin-amin a Namarsua, nga awanen ti sabali pay iti uniberso ti addaan iti kasta a pannakabalin, sirib, wenno ayat.​—Roma 1:20; Apocalipsis 4:11.

6, 7. (a) Iti Salmo 148, ania dagiti addaan nakem a parparsua a nailadawan a mangidayaw ken ni Jehova? (b) Apay a matignaytayo a mangidaydayaw ken ni Jehova? Iyilustraryo.

⁶ Deskribiren met ti Salmo 148 dagiti addaan iti nakem a parsua a mangidaydayaw ken ni Jehova. Iti bersikulo 2, mabasatayo ti maipapan kadagiti anghel, ti nailangitan a “buyot” ni Jehova, a mangidaydayaw iti Dios. Iti bersikulo 11, dagiti nabileg ken naimpluensia a tattao, kas iti ar-ari ken uk-ukom, maaw-awisda a makidanggay iti dayta a panangidaydayaw. No dagiti mannakabalin nga anghel pagragsakanda nga idayaw ni Jehova, adda kadi asinoman a tao a napateg unay tapno dina idayaw ti Dios? Kalpasanna, iti bersikulo 12 ken 13, maaw-awiskayo met nga agtutubo tapno makidanggay iti panangidayaw ken ni Jehova. Magagarankay kadi a mangaramid iti dayta?

⁷ Usigenyo ti maysa nga ilustrasion. No adda nasinged a gayyemyo a nasagudayan​—nalabit iti isport, arte, wenno musika​—estoriaenyo kadi iti pamiliayo ken kadagiti gagayyemyo ti maipapan kenkuana? Awan duadua nga aramidenyo dayta. Bueno, ti pannakaammotayo kadagiti amin nga inaramid ni Jehova mabalinnatayo a tignayen iti umasping a wagas. Kas pagarigan, kuna ti Salmo 19:1, 2 a ti nabituen a langit “mangyesngaw iti panagsao.” Iti biangtayo, no panunotentayo ti amin a nakaskasdaaw a gapuanan ni Jehova, ditay malapdan nga isarita kadagiti sabsabali ti maipapan iti Diostayo.

8, 9. Ania dagiti rason no apay a tarigagayan ni Jehova ti panangidayawtayo kenkuana?

⁸ Ti sabali pay a naisangsangayan a rason nga idaydayawtayo ni Jehova ket gapu ta kayatna nga aramidentayo dayta. Apay? Gapu ngata ta kasapulanna ti panangidayawtayo? Saan. Datayo a tattao nalabit a kasapulantayo ti pammadayaw no dadduma, ngem nangatngato nga amang ni Jehova ngem kadatayo. (Isaias 55:8) Awan ti pagduaduaanna iti bagina wenno kadagiti galadna. (Isaias 45:5) Ngem kayatna nga idaydayawtayo ket maay-ayo no aramidentayo dayta. Apay? Usigenyo ti dua a rason. Umuna, ammona a kasapulantayo ti agdayaw kenkuana. Dinisenionatayo nga addaan iti naespirituan a kasapulan, ti panagkasapulan nga agdayaw. (Mateo 5:3) Maay-ayo no makitana a mapennektayo dayta a panagkasapulan, no kasano a maay-ayo dagiti dadakkelyo no makitada a mangmangankayo kadagiti taraon nga ammoda a makapasalun-at kadakayo.​—Juan 4:34.

⁹ Maikadua, ammo ni Jehova a masapul a mangngeg dagiti tattao ti panangidaydayawtayo kenkuana. Kastoy ti insurat ni apostol Pablo iti ub-ubing a ni Timoteo: “Itultuloymo nga asikasuen ti bagim ken ti isursurom. Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Timoteo 4:16) Wen, no isuroyo kadagiti sabsabali ti maipapan ken ni Jehova, nga idaydayawyo ti Dios, mabalin a maam-ammoda met ni Jehova. Ti kasta a pannakaammo ket mangiturong iti agnanayon a pannakaisalakanda!​—Juan 17:3.

10. Apay a matignaytayo a mangidaydayaw iti Diostayo?

¹⁰ Adda sabali pay a rason no apay nga idaydayawtayo ni Jehova. Malagipyo pay ti ilustrasion maipapan iti nasagudayan a gayyemyo? No mangngegyo ti panangpadakes kenkuana dagiti dadduma, ti panangpardayada iti nasayaat a naganna, saankayo kadi nga agbalin nga ad-adda a determinado a mangpadayaw kenkuana? Bueno, nakaro ti panangpardayada ken ni Jehova iti daytoy a lubong. (Juan 8:44; Apocalipsis 12:9) Gapuna, matignay dagidiay mangay-ayat kenkuana a mangipakaammo iti kinapudno maipapan kenkuana, nga ilintegda ti ulbod nga impormasion. Kayatyo kadi nga iyebkas ti panagayat ken apresasionyo ken ni Jehova ket ipakitayo a kayatyo nga isu ti Mangituray kadakayo imbes a ti kangrunaan a kabusorna, ni Satanas? Maaramidyo amin dagita no idaydayawyo ni Jehova. Ti sumaruno ngarud a saludsod ket kasano a maidaydayawyo ni Jehova?

No Kasano a ti Dadduma nga Agtutubo Indaydayawda ni Jehova

11. Aniada a pagarigan iti Biblia ti mangipakita a dagiti agtutubo sieepektibo a maidaydayawda ni Jehova?

¹¹ Ipakita ti Biblia a masansan nga epektibo dagiti agtutubo iti panangidayawda ken ni Jehova. Kas pagarigan, maysa a balasitang nga Israelita ti kinautibo dagiti Siriano. Situtured nga impakaammona iti apona a babai ti maipapan ken ni Eliseo a propeta ni Jehova. Ti sinaona ket nagresulta iti maysa a milagro, a nakaipaay iti nabileg a pammaneknek. (2 Ar-ari 5:1-17) Situtured met a nangsaksi ni Jesus idi ubing pay. Kadagiti amin a napasamak bayat ti kinaagtutubona a mabalin koma a nailanad iti Kasuratan, pinili ni Jehova ti pasamak idi agtawen ni Jesus iti 12, idi situtured a nakidiskusion kadagiti lider ti relihion iti templo idiay Jerusalem, a namagsiddaaw kadakuada gapu iti pannakaawatna kadagiti dana ni Jehova.​—Lucas 2:46-49.

12, 13. (a) Ania ti inaramid ni Jesus idiay templo di nagbayag sakbay ti ipapatayna, ket ania ti epektona kadagiti tattao nga adda sadiay? (b) Ania ti panagrikna ni Jesus iti panangidayaw dagiti ubbing?

¹² Idi nagmataengan ni Jesus, pinaregtana met dagiti ubbing nga idaydayawda ni Jehova. Kas pagarigan, sumagmamano laeng nga aldaw sakbay ti ipapatayna, napan ni Jesus idiay templo ti Jerusalem. Nangaramid sadiay “kadagiti nakaskasdaaw a banag,” kuna ti Biblia. Pinagtalawna dagidiay namagbalin iti dayta a sagrado a lugar kas rukib dagiti mannanakaw. Pinaimbagna met dagiti bulsek ken pilay. Amin nga adda sadiay, nangnangruna dagiti lider ti relihion, natignayda koma a mangidaydayaw ken ni Jehova ken iti Anakna, ti Mesias. Ngem makapaladingit ta adu kadagidi nga aldaw ti saan a nangaramid iti dayta. Ammoda a ti Dios imbaonna ni Jesus, ngem kabutengda dagiti lider ti relihion. Nupay kasta, adda maysa a grupo dagiti tattao a situtured a nagsao. Ammoyo kadi no siasinoda? Kuna ti Biblia: “Idi a ti panguluen a papadi ken dagiti eskriba nakitada ti nakaskasdaaw a bambanag nga inaramid [ni Jesus] ken ti ubbing a lallaki nga agpukpukkaw idiay templo ken kunkunada: ‘Mangisalakanka, ikararagmi, iti Anak ni David!’ nagrurodda ket kinunada kenkuana: ‘Mangngegmo kadi ti sasawen dagitoy?’”​—Mateo 21:15, 16; Juan 12:42.

¹³ Impagarup dagidi a papadi a pagulimeken ni Jesus dagiti ubbing a mangidaydayaw kenkuana. Inaramidna kadi dayta? Saan a pulos! Kinuna ketdi ni Jesus kadagiti papadi: “Wen. Saanyo aya a pulos nabasa daytoy, ‘Manipud iti ngiwat dagiti ubbing ken agsussuso nangipaayka iti dayaw’?” Nalawag, naay-ayo ni Jesus ken ti Amana iti panangidaydayaw dagidi nga ubbing. Naaramidanda ti rumbeng koma nga inaramid dagiti adulto nga adda sadiay. Uray ubbingda, nalawag iti isipda a maiparbeng dayta. Nakitada daytoy a lalaki a nangaramid kadagiti nakaskasdaaw a banag, a nagsao buyogen ti tured ken pammati, ken nangipakita iti nasged a panagayat iti Dios ken kadagiti adipenna. Pinaneknekanna ti insurona a kinasiasinona​—ti naikari nga “Anak ni David,” ti Mesias. Nagunggonaan ti pammati dagiti ubbing ta naaddaanda pay iti pribilehio a nangtungpal iti padto.​—Salmo 8:2.

14. Kasano a dagiti saguday dagiti agtutubo kabalanna ida a mangidaydayaw iti Dios?

¹⁴ Ania ti maadaltayo kadagita a pagarigan? Maadaltayo a dagiti agtutubo sieepektibo a maidaydayawda ni Jehova. Masansan a nasagudayanda iti abilidad a mangkita iti kinapudno iti nalawag ken simple a pamay-an, nga iyebkasda ti pammatida buyogen ti kinapinget ken kinaregta. Addaanda met iti saguday a nadakamat iti Proverbio 20:29: “Ti pintas dagiti agtutubo a lallaki isu ti bilegda.” Wen, dakayo nga agtutubo naparaburankayo iti bileg ken pigsa​—dagiti pudno a saguday no maipapan iti panangidayaw ken ni Jehova. Ania dagiti espesipiko a pamay-an a mausaryo dagita a saguday?

Kasanoyo a Maidaydayaw ni Jehova?

15. Tapno sieepektibo a maidaydayaw ni Jehova, ania ti nasken a motiboyo?

¹⁵ Iti puso a mangrugi ti kinaepektibo. Saanyo a sieepektibo a maidaydayaw ni Jehova no ar-aramidenyo dayta gapu laeng ta kayat ti dadduma nga aramidenyo dayta. Laglagipenyo, daytoy ti kadakkelan kadagiti amin a bilin: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Personal kadi a naam-ammoyo ni Jehova babaen ti mismo a panangadalyo iti Saona? Ti kasta a pannakaammo ket siuumiso nga agresulta iti pannakarikna iti ayat ken ni Jehova. Ti kadawyan a pamay-an a mayebkas dayta nga ayat ket babaen ti panangidaydayaw kenkuana. Apaman a nalawag ken nabileg ti motiboyo, nakasaganakayon a mangidaydayaw a sireregta ken ni Jehova.

16, 17. Ania ti maaramidan ti kondukta no maipapan iti panangidayaw ken ni Jehova? Iyilustraryo.

¹⁶ Ita, sakbay pay a panunotenyo no ania ti sawenyo, panunotenyo no kasanokayo nga agtignay. No daydi nga Israelita a balasitang idi kaaldawan ni Eliseo ket natangsit, saan a nadayaw, wenno di mapagpiaran, panagkunayo dagiti ngata Siriano a nangkautibo kenkuana ipangagda ti imbagana maipapan iti propeta ni Jehova? Mabalin a saan. Umasping iti dayta, mabalin nga ipangagdakayo dagiti tattao no makitada a nadayaw, mapagpiaran, ken nasingpetkayo. (Roma 2:21) Usigenyo ti maysa a pagarigan.

¹⁷ Maysa a 11 ti tawenna a balasitang idiay Portugal ti naipasango iti panangpilit a mangrambak kadagiti piesta a maisalungasing iti sinanay ti Biblia a konsiensiana. Sidadayaw nga inlawlawagna iti maestrana no apay a nasken nga agkedked, ngem inumsi ti maestrana. Bayat ti panaglabas ti panawen, maulit-ulit a pinabainan ti maestra, nga inumsina ti relihion ti balasitang. Ngem nagtalinaed a nadayaw ti balasitang. Sumagmamano a tawen kalpasanna, nagserbi ti balasitang kas regular pioneer, maysa nga amin-tiempo a ministro. Iti maysa a kombension, buybuyaenna ti tattao a mababautisaran ket nabigbigna ti maysa kadakuada. Ti dati a maestrana! Kalpasan nga aglulua a naginnarakupda, kinuna ti maestra iti balasitang a pulos a dina nalipatan ti nadayaw a konduktana. Adda nakasaritana a Saksi, ket insalaysayna ti maipapan iti kondukta ti dati nga estudiantena. Kas resultana, nairugi ti maysa a panagadal iti Biblia, agingga nga inawat ti maestra ti kinapudno iti Biblia. Wen, ti konduktayo ket mabalin a nabileg a pamay-an a maidaydayawyo ni Jehova!

18. Ania ti mabalin nga aramiden ti maysa nga agtutubo no mabain a mangirugi iti saritaan maipapan ken ni Jehova a Dios ken iti Biblia?

¹⁸ Marigatankayo kadi no dadduma a mangisarita idiay eskuelaan maipapan iti pammatiyo? Saan laeng a dakayo ti makarikna iti kasta. Kaskasdi, makaaramidkayo iti situasion a mangtignay kadagiti dadduma nga agsaludsod maipapan iti pammatiyo. Kas pagarigan, no la ket ta legal ken maipalubos, apay a dikay mangawit kadagiti naibatay iti Biblia a publikasion ket basaenyo ida kabayatan ti pangaldaw wenno iti dadduma a gundaway a mabalinyo nga aramiden dayta? Mabalin nga agimtuod dagiti padayo nga estudiante maipapan iti basbasaenyo. No ibagayo kadakuada ti nasarakanyo a makapainteres maipapan iti artikulo wenno libro a basbasaenyo, mabalin a dagus a mairugi ti maysa a narayray a saritaan. Diyo liplipatan ti agsaludsod, nga ammuenyo no ania ti patpatien ti kaeskuelaanyo. Sidadayaw nga umimdengkayo, nga iranudyo ti naadalyo iti Biblia. Kas ipakita dagiti kapadasan iti panid 29, adu nga agtutubo ti mangidaydayaw iti Dios idiay eskuelaan. Dayta ti mangyeg kadakuada iti dakkel a rag-o ken tumulong kadagiti adu a mangam-ammo ken ni Jehova.

19. Kasano nga agbalin nga ad-adda nga epektibo ti panangasaba dagiti agtutubo iti binalaybalay?

¹⁹ Ti panangasaba iti binalaybalay ti kaepektibuan a pamay-an a maidaydayawyo ni Jehova. No dikay pay makipaspaset iti dayta, apay a diyo aramiden dayta kas kalatyo? No makiramramankayon, adda kadi dagiti kanayonan a kalat a mabalinyo a ragpaten? Kas pagarigan, imbes nga isu nga isu ti ibagbagayo iti tunggal bumalay, mangbirokkayo iti pamay-an a rumang-ay, a dumawatkayo iti singasing manipud kadagiti dadakkelyo ken iti dadduma nga aduan iti kapadasan a kakabsat. Sursuruenyo no kasano nga ad-adda a mausaryo ti Biblia, a mangaramid iti epektibo a panagsarungkar, ken mangirugi iti panagadal iti Biblia. (1 Timoteo 4:15) Bayat nga ad-adda nga idaydayawyo ni Jehova kadagiti kasta a pamay-an, ad-adda nga agbalinkayo nga epektibo, banag a mangted kadakayo iti naragragsak a ministerio.

Kaano a Rumbeng a Rugianyo nga Idaydayaw ni Jehova?

20. Apay nga awan ti rason dagiti agtutubo a makarikna nga ubingda pay tapno maidaydayawda ni Jehova?

²⁰ Kadagiti tallo a saludsod iti daytoy a diskusion, ti sungbat daytoy maudi ti kasimplean. Imutektekanyo ti direkta a sungbat ti Biblia: “Lagipem, itan, ti Naindaklan a Namarsuam kadagiti aldaw ti kinaagtutubom.” (Eclesiastes 12:1) Wen, ti tiempo a rumbeng a rugianyo nga idaydayaw ni Jehova ket itan. Naglaka laeng nga ibaga: “Ubingak pay tapno maidaydayawko ni Jehova. Awan pay ti kapadasak. Urayek pay a dumakkelak.” Saan laeng a dakayo ti nakarikna iti kasta. Kas pagarigan, ti agtutubo a ni Jeremias kinunana ken ni Jehova: “Ay, O Soberano nga Apo Jehova! Adtoy pudno a saanko nga ammo ti agsao, ta maysaak laeng nga ubing.” Impatalged ni Jehova nga awan ti rumbeng a pagbutnganna. (Jeremias 1:6, 7) Umasping iti dayta, awan met ti rumbeng a pagbutngantayo no idaydayawtayo ni Jehova. Awan ti aniaman a pakadangrantayo a di naan-anay nga ikkaten ni Jehova.​—Salmo 118:6.

21, 22. Apay a dagiti agtutubo a mangidaydayaw ken ni Jehova mayarigda kadagiti amor, ken apay a makaparegta dayta a panamagdilig?

²¹ Gapuna, idagadagmi kadakayo nga agtutubo: Dikay agpangadua a mangidaydayaw ken ni Jehova! Bayat nga ubingkayo pay, itan ti kasayaatan a tiempo tapno makiramankayo iti kapatgan a trabaho a maar-aramid ita ditoy daga. No aramidenyo dayta, agbalinkayo a paset ti maysa a nagsayaat a banag​—ti sapasap a pamilia dagidiay mangidaydayaw ken ni Jehova. Maragsakan ni Jehova ta karamankayo iti dayta a pamilia. Imutektekanyo daytoy naipaltiing a sasao nga inturong ti salmista ken ni Jehova: “Dagiti tattaom situtulok nga idatondanto ti bagbagida iti aldaw ti puersa militarmo. Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.”​—Salmo 110:3.

²² Saan kadi a nagpintas a buyaen ti panaggilap-gilap dagiti amor iti agsapa? Makapagin-awa, naraniag, ken di mabilang ti kaaduda. Kasta ti panangmatmat ni Jehova kadakayo nga agtutubo a simamatalek a mangidaydayaw kenkuana kadagitoy napeggad a tiempo. Nalawag, makaparagsak iti puso ni Jehova ti panangikeddengyo a mangidaydayaw kenkuana. (Proverbio 27:11) No kasta, dakayo nga agtutubo, aramidenyo ti amin a kabaelanyo a mangidaydayaw ken ni Jehova!

Ania ti Sungbatyo?

• Ania ti sumagmamano a napateg a rason nga idaydayawtayo ni Jehova?

• Ania dagiti pagarigan iti Biblia a mangipakita a dagiti agtutubo sieepektibo a maidaydayawda ni Jehova?

• Kasano a dagiti agtutubo maidaydayawda ni Jehova ita?

• Kaano a rumbeng a rugian dagiti agtutubo nga idaydayaw ni Jehova, ken apay?

[Dagiti Ladawan iti panid 25]

No nasagudayan ti gayyemyo, diyo kadi saritaen dayta kadagiti sabsabali?

[Ladawan iti panid 27]

Dagiti padayo nga estudiante mabalin nga aginteresda kadagiti patpatienyo

[Ladawan iti panid 28]

No kayatyo a parang-ayen ti ministerioyo, dumawatkayo kadagiti singasing manipud kadagiti aduan iti kapadasan a Saksi