Addaanka Kadi iti Imortal nga Espiritu?

“AMIN a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg,” insurat ni apostol Pablo. (2 Timoteo 3:16) Wen, ti Biblia ket libro ti kinapudno a naggapu iti pudno a Dios, ni Jehova.​—Salmo 83:18.

Yantangay ni Jehova ti Namarsua iti amin a banag, agraman dagiti tattao, pagaammona unay no ania ti mapasamak kadatayo no mataytayo. (Hebreo 3:4; Apocalipsis 4:11) Ket babaen ti naipaltiing a Saona, ti Biblia, nangipaay kadagiti napudno ken makapnek a sungbat kadagiti saludsod maipapan iti sumuno a biag.

Ania ti Espiritu?

Iti Biblia, ti sasao a naipatarus nga “espiritu” ket nangnangruna a tuktukoyenna ti “anges.” Ngem ad-adu pay ti iparipirip daytoy ngem ti basta panaganges. Kas pagarigan, kinuna ni Santiago a mannurat ti Biblia: “Ti bagi nga awanan espiritu ket natay.” (Santiago 2:26) No kasta, ti espiritu isu daydiay mangbibiag iti bagi.

Daytoy a mangbibiag a puersa ket saan a basta anges, wenno angin, a lumaslasat kadagiti bara. Apay? Agsipud ta no sumardengen ti panaganges, agtalinaed ti biag kadagiti selula ti bagi iti ababa a tiempo​—“iti sumagmamano a minuto,” sigun iti The World Book Encyclopedia. Daytoy ti makagapu a mabalin nga agballigi ti panangikagumaan a mangpasubli iti biag. Ngem apaman a maiddep ti mangted-biag a puersa manipud kadagiti selula ti bagi, awanen mamaay ti aniaman a panangikagumaan a mangpasubli iti biag. Ti amin nga anges, wenno angin, nga adda iti lubong dinan kabaelan a biagen ti uray maysa a selula. No kasta, ti espiritu isu ti di makita a puersa ti biag​—ti mangted-biag a puersa a mangbibiag kadagiti selula ken iti tao a mismo. Mataginayon daytoy a puersa ti biag babaen ti panaganges.​—Job 34:14, 15.

Kadagiti tattao laeng kadi nga aktibo dayta nga espiritu? Tulongannatay ti Biblia a maaddaan iti umiso a konklusion iti daytoy a banag. Binigbig ni masirib nga Ari Solomon a dagiti tattao ken an-animal “addaanda amin ti maymaysa nga espiritu,” ket insaludsodna: “Siasino ti makaammo iti espiritu ti annak ti sangatauan, no dayta ket umuli nga agpangato; ken ti espiritu ti animal, no dayta ket umulog nga agpababa iti daga?” (Eclesiastes 3:19-21) Gapuna, dagiti animal ken dagiti tattao ket naikuna nga addaan espiritu. Kasano a kasta?

Ti espiritu, wenno puersa ti biag, ket maipadis iti koriente nga agtartaray iti maysa a makina wenno alikamen. Adu ti mabalin nga aramiden ti di makita a koriente, depende iti paandarenna a kita ti alikamen. Kas pagarigan, mapagandarna ti de koriente a paglutuan a mangpataud iti pudot, ti kompiuter a mangproseso iti impormasion, ken telebision a mangpataud kadagiti ladawan ken uni. Ngem ti koriente ket pulos a di mabukel a kapadpada ti porma ti alikamen a papaandarenna. Puersa latta dayta. Kasta met, ti puersa ti biag ket saan a mabukel a kapada ti aniaman kadagiti porma dagiti parsua a bibiagenna. Awanan iti personalidad ken awanan iti abilidad nga agpanunot. Dagiti tattao ken an-animal “addaanda amin ti maymaysa nga espiritu.” (Eclesiastes 3:19) Gapuna, no matay ti maysa a tao, ti espirituna saan nga agtultuloy iti sabali a lubong kas maysa nga espiritu a parsua.

Ania ngarud ti kasasaad dagiti natay? Ket ania ti mapasamak iti espiritu no matay ti maysa a tao?

“Iti Tapok Agsublikanto”

Idi a ti immuna a tao a ni Adan inggagarana a sinukir ti bilin ti Dios, kinuna kenkuana ti Dios: “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.” (Genesis 3:19) Sadino ti ayan ni Adan sakbay a pinarsua ni Jehova manipud iti tapok? Ay ket, awan! Awan pakasarakan kenkuana. Isu nga idi kinuna ni Jehova a Dios a ni Adan ket ‘agsubli iti daga,’ kayatna a sawen a matay ni Adan ket agsubli kadagiti elemento iti daga. Saan nga umakar ni Adan iti lubong dagiti espiritu. Iti ipapatay, maawan manen ni Adan. Ti dusana ket ipapatay​—kaawan ti biag​—saan nga iyaallatiw iti sabali a lubong.​—Roma 6:23.

Komusta met dagiti dadduma a natay? Napagminar ti kasasaad dagiti natay iti Eclesiastes 9:5, 10, a pakabasaantayo: “Awan aniaman nga ammo dagiti natay . . . Awan ti aramid, awan ti gakat, awan ti pannakaammo wenno sirib, iti uneg ti tanem.” (Moffatt) No kasta, ti ipapatay ket kasasaad ti kinaawan. Insurat ti salmista a no matay ti maysa a tao, “ti espirituna pumanaw, isu agsubli iti dagana; Iti dayta nga aldaw mapukaw dagiti panunotna.”​—Salmo 146:4.

Nalawag, dagiti natay ket awanen. Saandan a mabalin nga ammuen ti aniaman. Saandakayo a makita, mangngeg, wenno makasarita. Saandakayo met a matulongan wenno uray madangran. Saan a rumbeng a pagbutnganyo dagiti natay. Ngem kasano a ti espiritu “pumanaw” manipud iti maysa a tao iti kanito a matay?

Ti Espiritu “Agsubli iti Pudno a Dios”

Kunaen ti Biblia a no matay ti maysa a tao, “ti met laeng espiritu agsubli iti pudno a Dios a nangted iti dayta.” (Eclesiastes 12:7) Kayat kadi a sawen daytoy a ti maysa nga espiritu literal nga agdaliasat iti law-ang nga agturong iti sanguanan ti Dios? Saan a pulos! Ti wagas a panangusar ti Biblia iti sao nga “agsubli” saanna a kalikaguman ti aktual nga iyaalis manipud iti maysa a disso nga agturong iti sabali. Kas pagarigan, naibaga kadagiti di matalek nga Israelita: “‘Agsublikayo kaniak, ket agsubliakto kadakayo,’ kinuna ni Jehova ti buybuyot.” (Malakias 3:7) Ti ‘isusubli’ ti Israel ken Jehova kaipapananna ti panagbaw-ing manipud iti dakes a dalan ken panangsurot manen iti nalinteg a dana ti Dios. Ket ti ‘isusubli’ ni Jehova iti Israel kaipapananna ti panangiturongna manen ti paborable nga atensionna iti ilina. Kadagita a dua a kaso, ti ‘panagsubli’ ramanenna ti kababalin, saan a literal nga iyaakar manipud maysa a lugar nga agturong iti sabali.

Kasta met iti ipapatay, awan ti aktual nga iyaakar manipud iti daga nga agturong iti nailangitan a disso no ti espiritu ket “agsubli” iti Dios. Apaman a pimmanawen ti puersa ti biag manipud iti maysa a tao, ti Dios laeng ti makaisubli iti dayta kenkuana. Gapuna, ti espiritu “agsubli iti pudno a Dios” iti anag a ti aniaman a namnama a biag iti masanguanan para iti dayta a tao ket agpannurayen a naan-anay iti Dios.

Kas pagarigan, usigenyo no ania ti kunaen ti Kasuratan maipapan iti ipapatay ni Jesu-Kristo. Insalaysay ni Lucas a mannurat iti Ebanghelio: “Ni Jesus immawag a buyogen ti natbag a timek ket kinunana: ‘Ama, kadagita imam italekko ti espirituk.’ Idi naisaonan daytoy, nauyos ti biagna.” (Lucas 23:46) Idi a ti espiritu ni Jesus pimmanaw kenkuana, isu ket saan a literal nga agturturong idiay langit. Sa la napagungar ni Jesus manipud kadagiti natay iti maikatlo nga aldaw, ket sa la immuli idiay langit kalpasan ti 40 nga aldaw. (Aramid 1:3, 9) Gapuna iti daydi tiempo ti ipapatayna, intalek ni Jesus ti espirituna kadagiti ima ni Amana, a naan-anay a nagtalek iti pannakabalin ni Jehova a mangbiag kenkuana.

Wen, kabaelan ti Dios a biagen manen ti maysa a tao. (Salmo 104:30) Anian a naindaklan a namnama ti iyeg daytoy!

Sigurado a Namnama

Kuna ti Biblia: “Umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.” (Juan 5:28, 29) Wen, inkari ni Jesu-Kristo nga amin dagidiay adda iti lagip ni Jehova ket mapagungarto, wenno maisubli ti biagda. Pudno a mairamanto kadakuada dagidiay nangsurot iti nalinteg a dalan kas ad-adipen ni Jehova. Ngem addada pay minilion a natay a saanda a naipakita no agtungpalda kadagiti nalinteg a pagalagadan ti Dios. Mabalin a saanda a naammuan dagiti pagalagadan ni Jehova wenno awan idi ti umdas a tiempoda nga agbalbaliw. Adda met dagitoy nga indibidual iti lagip ti Dios ket mapagungardanto, ta kunaen ti Biblia: “Addanto panagungar agpadpada dagiti nalinteg ken dagiti nakillo.”​—Aramid 24:15.

Napno ita ti daga iti gura ken ringgor, kinaranggas ken panagibukbok iti dara, polusion ken sakit. No agbiag manen dagiti natay iti kasta a daga, sigurado nga apagbiit laeng ti ipaayna a kinaragsak. Ngem inkari ti Namarsua a din agbayag, pagpatinggaennanton ti agdama a kagimongan ti lubong nga iturturayan ni Satanas a Diablo. (Proverbio 2:21, 22; Daniel 2:44; 1 Juan 5:19) Agbalinton a napaypayso ti maysa a nalinteg a kagimongan ti tao​—ti “baro a daga.”​—2 Pedro 3:13.

Iti dayta a tiempo, “awanto ti agtataeng nga agkuna: ‘Masakitak.’” (Isaias 33:24) Uray ti mental a tuok gapu iti ipapatay ket mapukawton, ta ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:4) Anian a namnama daytoy para kadagidiay “adda kadagiti pakalaglagipan a tanem”!

Inton punasen ni Jehova ti kinadakes ditoy daga, saannanto a dadaelen dagiti nalinteg a mairaman kadagiti nadangkes. (Salmo 37:10, 11; 145:20) Iti kinapudnona, “maysa a dakkel a bunggoy” dagiti tattao “manipud kadagiti amin a nasion ken kadagiti tribu ken kadagiti ili ken kadagiti pagsasao” ti makalasatto “iti dakkel a rigat,” a mangdadael iti agdama a nadangkes a lubong. (Apocalipsis 7:9-14) Gapuna, addanto dakkel nga umariwekwek a mangabrasa kadagiti natay.

Il-iliwenyo kadi a makita manen dagiti inay-ayatyo? Kayatyo kadi ti agbiag nga agnanayon iti Paraiso a daga? Masapul ngarud a gun-odenyo ti umiso a pannakaammo iti pagayatan ken pangpanggep ti Dios. (Juan 17:3) Pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.”​—1 Timoteo 2:3, 4.

[Ladawan iti panid 4]

“Tapokka ket iti tapok agsublikanto”

[Ladawan iti panid 5]

Ti espiritu ket mayarig iti koriente

[Ladawan iti panid 7]

Ti panagungar mangyegto iti manayon a rag-o