“Adtoy! Daytoy ti Diostayo”

Dagiti impormasion a nausig iti daytoy dua a maadal nga artikulo ket naibatay iti libro nga Umadanika ken Jehova, a nairuar iti kombension distrito a naangay iti intero a lubong kabayatan ti 2002/03.​—Kitaenyo ti artikulo a “Pinennekna ti Sapsapulen ti Pusok,” iti panid 20.

“Adtoy! Daytoy ti Diostayo. Nanginanamatayo kenkuana, ket isalakannatayto. Daytoy ni Jehova.”​—ISAIAS 25:9.

1, 2. (a) Ania ti pinangawag ni Jehova ken ni patriarka nga Abraham, ket ania ti mabalin a panunotentayo? (b) Kasano nga ipanamnama kadatayo ti Biblia a posible ti maaddaan iti nasinged a relasion iti Dios?

“GAYYEMKO.” Kasta ti pinangawag ni Jehova, ti Namarsua iti langit ken daga, ken ni patriarka nga Abraham. (Isaias 41:8) Panunotenyo​—maysa laeng a tao ni Abraham ngem nagbalin a gayyem ti Soberano nga Apo iti uniberso! Mabalin a pampanunotenyo, ‘Mabalinko kadi ti maaddaan iti kasta a nasinged a relasion iti Dios?’

² Ipanamnama kadatayo ti Biblia a posible ti maaddaan iti nasinged a relasion iti Dios. Natagiragsak ni Abraham ti kasta a kinasinged gapu ta ‘namati ken Jehova.’ (Santiago 2:23) Uray met ita, “ti kinasinged [ni Jehova] adda kadagidiay napalungdo.” (Proverbio 3:32) Iti Santiago 4:8, indagadag ti Biblia: “Umadanikayo iti Dios, ket isu umadaninto kadakayo.” Nalawag a no mangaramidtay kadagiti addang nga umadani ken ni Jehova, kasta met ti aramidenna. Talaga nga umadani kadatayo. Ngem dagitoy a naipaltiing a sasao kaipapananda kadi a datayo​—dagiti managbasol, imperpekto a tattao​—ti umun-una nga agtignay? Saan. Mabalin ti makisinninged ken ni Jehova gapu iti dua a napateg nga addang nga inaramid ti naayat a Diostayo.​—Salmo 25:14.

 3. Ania ti dua nga addang nga inaramid ni Jehova tapno mabalintayo ti makigayyem kenkuana?

³ Umuna, inyurnos ni Jehova nga “ited [ni Jesus] ti kararuana kas subbot a kasukat dagiti adu.” (Mateo 20:28) Gapu iti dayta a pangsubbot a daton, mabalintayo ti makisinninged iti Dios. Kuna ti Biblia: “No maipapan kadatayo, agayattayo, agsipud ta isu ti immuna a nagayat kadatayo.” (1 Juan 4:19) Wen, gapu ta ti Dios ti “immuna a nagayat kadatayo,” impasdekna ti pundasion tapno mabalintayo ti makigayyem kenkuana. Maikadua, inyam-ammo kadatayo ni Jehova ti bagina. Siasinoman ti pakigayyemantayo, ti panagbalin a nasinged ket agpannuray iti panangam-ammo a naimbag iti dayta a tao, a padayawan ken ipateg dagiti naisangsangayan a galadna. Usigenyo ti kaipapanan dayta. No ni Jehova ket nakalemmeng, di maam-ammo a Dios, pulos a ditay mabalin ti makisinninged kenkuana. Ngem imbes nga ilimedna ti kinasiasinona, kayat ni Jehova a maam-ammotayo isuna. (Isaias 45:19) Iti Biblia a Saona, iyam-ammona ti bagina babaen dagiti sasao a maawatantayo​—pammaneknek dayta a saannatayo laeng nga ay-ayaten no di pay ket kayatna a maam-ammo ken ayatentayo isuna kas ti nailangitan nga Amatayo.

 4. Ania ti mariknatayo maipapan ken ni Jehova bayat nga umun-uneg ti pannakaammotayo kadagiti galadna?

⁴ Nakakitakayon kadi iti ubing a nangyam-ammo iti amana kadagiti gagayyemna sa siiinosente a kunana buyogen ti ragsak ken panagpannakkel, “Isu ti tatangko”? Adda rason dagiti agdaydayaw iti Dios tapno mariknada met ti kasta maipapan ken ni Jehova. Impakpakauna ti Biblia ti panawen inton ipukkaw dagiti matalek a tattao: “Adtoy! Daytoy ti Diostayo.” (Isaias 25:8, 9) Bayat nga umun-uneg ti pannakaammotayo maipapan kadagiti galad ni Jehova, ad-adda a mariknatayo nga isu ti kasayaatan nga Ama ken kasingedan a Gayyemtayo. Wen, ti panangtarus kadagiti galad ni Jehova ket mangted kadatayo iti adu a rason nga ad-adda nga umadani kenkuana. Gapuna, usigentayo no kasano nga ipalgak ti Biblia dagiti kangrunaan a galad ni Jehova​—pannakabalin, kinahustisia, sirib, ken ayat. Iti daytoy nga artikulo, sukimatentayo ti umuna a tallo a galad.

“Naitan-ok iti Pannakabalin”

 5. Apay a maitutop a ni Jehova laeng ti maawagan kas “ti Mannakabalin-amin,” ken kadagiti ania a wagas nga usarenna ti nakaskasdaaw a pannakabalinna?

⁵ Ni Jehova ket “naitan-ok iti pannakabalin.” (Job 37:23) Kuna ti Jeremias 10:6: “Awan a pulos ti asinoman a kas kenka, O Jehova. Naindaklanka, ket ti naganmo naindaklan iti kinamannakabalin.” Saan a kas iti aniaman a parsua, awan ti limitasion ti pannakabalin ni Jehova. Gapuna, isuna laeng iti maawagan kas “ti Mannakabalin-amin.” (Apocalipsis 15:3) Usaren ni Jehova ti nakaskasdaaw a pannakabalinna tapno mangparsua, mangdadael, mangsalaknib, ken mangisubli. Usigenyo laeng ti dua a pagarigan​—ti pannakabalinna a mangparsua ken ti pannakabalinna a mangsalaknib.

6, 7. Kasano kabileg ti init, ken ania a napateg a kinapudno ti paneknekanna?

⁶ No agkainarankayo, ania ti marikna ti kudilyo? Ti bara ti init. Ngem ti talaga a marikriknayo isu ti epekto ti pannakabalin ni Jehova a mangparsua. Kasano kabileg ti init? Agarup 15,000,000 degrees Celsius ti kapudot ti bugas ti init. No koma ta makaalakayo iti kas ti kabassit ti ulo ti alpiler iti bugas ti init ket ipanyo ditoy daga, madangrankayo iti dayta nagbassit a gubuayan ti pudot uray 150 a kilometro ti kaadayoyo manipud iti dayta! Kada segundo, mangparuar ti init iti enerhia a katupag ti panagbettak ti ginasgasut a milion a nuklear a bomba. Kaskasdi, rikrikusen ti daga dayta a nakaam-amak a thermonuclear nga urno iti kalkalainganna a kaadayo. No asideg unay, maatianan ti daga; no adayo unay, agyelo amin a danum. Awan ti agbiag iti planetatayo no mapasamak ti aniaman kadagita.

⁷ Nupay kasta, saan unay a pampanunoten ti kaaduan a tattao ti pateg ti init, nupay agpannuray iti dayta ti biagda. Gapuna, maikapisda iti maisuro kadatayo ti init. Kuna ti Salmo 74:16 maipapan ken Jehova: “Sika insaganam ti silaw, ti mismo nga init.” Wen, ti init itan-okna ni Jehova, “ti Nangaramid iti langit ken daga.” (Salmo 146:6) Kaskasdi, maysa laeng dayta kadagiti nakaad-adu a naparsua a mangisuro kadatayo maipapan iti naindaklan a pannakabalin ni Jehova. Bayat nga umad-adu ti pannakaammotayo maipapan iti pannakabalin ni Jehova a mangparsua, ad-adda nga umuneg ti panagamangatayo.

8, 9. (a) Ania a nadungngo a sasao ti mangipakita a sidadaan ni Jehova a mangsalaknib ken mangaywan kadagiti agdaydayaw kenkuana? (b) Kasano nga aywanan ti pastor ti karnerona idi panawen ti Biblia, ket ania ti isuro daytoy kadatayo maipapan iti Naindaklan a Pastortayo?

⁸ Usaren met ni Jehova ti naindaklan a pannakabalinna a mangsalaknib ken mangaywan kadagiti adipenna. Inusar ti Biblia ti sumagmamano a nalawag ngem makatukay iti rikna a panangiladawan iti inkari ni Jehova a panangsalaknib. Kas pagarigan, imutektekanyo ti Isaias 40:11. Sadiay, inyarig ni Jehova ti bagina iti maysa a pastor ken ti ilina kadagiti karnero. Kastoy ti mabasatayo: “Kas iti maysa a pastor ipastorannanto ti bukodna a pangen. Babaen ti takiagna ummongennanto a sangsangkamaysa dagiti kordero; ket iti barukongna awitennanto ida. Dagidiay agpaspasuso siaannad nga idalannanto ida.” Mailadawanyo kadi iti panunotyo ti nadeskribir iti dayta a bersikulo?

⁹ Adda ti sumagmamano nga animal nga awan gawayda kas kadagiti naamo a karnero. Ti pastor idi panawen ti Biblia masapul a simamaingel a salaknibanna dagiti karnerona manipud kadagiti lobo, oso, ken leon. (1 Samuel 17:34-36; Juan 10:10-13) Ngem adda dagiti gundaway a masapul a nadungngo no maipapan iti panangsalaknib ken panangaywan kadagiti karnero. Kas pagarigan, no adayo iti arban ti nagpasngayan ti karnero, kasano nga igaga ti pastor ti awan gawayna a kappasngay a kordero? Sakruyenna dayta, nalabit iti sumagmamano nga aldaw, “iti barukongna”​—iti makinngato a pagan-anayna. Ngem kasano a nakagteng ti ubing a karnero iti barukong ti pastor? Mabalin nga umasideg ti karnero ket isagidna ti bagina iti saka ti pastor. Ngem ti pastor ti agrukob, alaenna ti karnero, ket ikabilna iti salinong ti barukongna. Anian a nagdungngo a ladawan ti sidadaan a panangsalaknib ken panangaywan ti Naindaklan a Pastortayo kadagiti adipenna!

10. Ania a pannalaknib ti ipapaay ni Jehova ita, ken apay a napateg unay dayta a pannalaknib?

¹⁰ Saan laeng nga inkari ni Jehova ti pannalaknibna. Idi panawen ti Biblia, impakitana babaen dagiti milagro a kabaelanna nga ‘ispalen dagiti tattao nga addaan nadiosan a debosion manipud iti pannakasuot.’ (2 Pedro 2:9) Komusta met ita? Ammotayo a saan nga iti amin a didigra ita ket usarenna ti pannakabalinna a mangsalaknib. Kaskasdi, adda napatpateg a banag nga ipaayna​—ti naespirituan a pannalaknib. Ti naayat a Diostayo salaknibannatayo manipud iti naespirituan a peggad babaen ti panangipaayna kadagiti kasapulantayo a mangibtur kadagiti pakasuotan ken mangsaluad iti relasiontayo kenkuana. Kas pagarigan, kuna ti Lucas 11:13: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” Dayta a nabileg a puersa makabalannatayo a mangtaming kadagiti aniaman a pakasuotan wenno parikut a pakaipasanguantayo. (2 Corinto 4:7) Adda ngarud dagiti aramiden ni Jehova a mangtaginayon ti biagtayo, saan laeng nga iti ababa a panawen no di ket iti agnanayon. Bayat a pampanunotentayo dayta a namnama, matmatantayo koma ti aniaman a panagsagaba iti daytoy a sistema kas “apagkanito ken nalag-an.” (2 Corinto 4:17) Saantayo kadi nga ad-adda a mapasinged iti Dios a siaayat a mangaramat iti pannakabalinna agpaay kadatayo?

“Ni Jehova Ket Managayat iti Kinahustisia”

11, 12. (a) Apay a ti kinahustisia ni Jehova tignayennatayo nga umadani kenkuana? (b) Ania ti nabigbig ni David no maipapan iti kinahustisia ni Jehova, ken kasano a maliwliwatayo kadagitoy a naipaltiing a sasao?

¹¹ Kanayon a nalinteg ken awan idumduma dagiti aramid ni Jehova. Ti kinahustisia ti Dios ket maysa a makaay-ayo a galad a mangtignay kadatayo nga umadani ken ni Jehova, saan ket a galad nga awanan iti pannakipagrikna ken naulpit. Nalawag ti panangdeskribir ti Biblia iti makaliwliwa nga aspeto daytoy a galad. Usigentayo ngarud ti tallo a pamay-an nga us-usaren ni Jehova ti kinahustisiana.

¹² Umuna, ti kinahustisia ni Jehova ti mangtignay kenkuana a mangipakita iti kinamatalek ken kinasungdo kadagiti adipenna. Personal a napaneknekan ni salmista David daytoy nga aspeto ti kinahustisia ni Jehova. Manipud iti kapadasanna ken iti panangadalna kadagiti dana ti Dios, ania ti nabigbig ni David? Kinunana: “Ni Jehova ket managayat iti kinahustisia, ket saannanto a panawan dagidiay nasungdona. Agingga iti tiempo a di nakedngan sigurado a masaluadandanto.” (Salmo 37:28) Anian a makaliwliwa a pammatalged! Pulos a di baybay-an ti Dios dagidiay nasungdo kenkuana. Makapagtalektayo ngarud iti nasinged ken naayat a panangaywanna. Dayta ti impanamnama ti kinahustisiana!​—Proverbio 2:7, 8.

13. Kasano a ti pannakaseknan ni Jehova kadagidiay daksanggasat ket nagminar iti Linteg nga intedna iti Israel?

¹³ Maikadua, ti nadibinuan a kinahustisia ket maseknan kadagiti kasapulan dagiti marigrigatan. Ti pannakaseknan ni Jehova kadagiti daksanggasat ket agminar iti Linteg nga intedna iti Israel. Kas pagarigan, nangipaay ti Linteg kadagiti probision a mangipasigurado a maaywanan dagiti ulila ken balo. (Deuteronomio 24:17-21) Gapu ta ammona a narigat ti biag dagiti kasta a pamilia, ni Jehova a mismo ti nagbalin nga Ukom ken Mangsalaknib nga amada. (Deuteronomio 10:17, 18) Pinakdaaranna dagiti Israelita a no dangranda dagiti awanan gaway a babbai ken ubbing, mangngegna dagiti ikkisda. “Pudno a gumil-ayabto ti ungetko,” kinunana, kas nairekord iti Exodo 22:22-24. Nupay ti unget ket saan a karaman kadagiti kangrunaan a galadna, ipakatna ti nalinteg a pungtotna no adda dagiti inggagara a panagaramid iti di kinahustisia, nangnangruna no dagiti awan gawayna ti biktima.​—Salmo 103:6.

14. Ania ti pudno a nagsayaat a pammaneknek a di mangidumduma ni Jehova?

¹⁴ Maikatlo, iti Deuteronomio 10:17, impanamnama kadatayo ti Biblia a ni Jehova “awan tratuenna buyogen ti panangidumduma ket saan met nga umawat iti pasuksok.” Saan a kas iti adu a tattao nga addaan iti pannakabalin wenno impluensia, ni Jehova ket di maimpluensiaan kadagiti material a kinabaknang wenno makinruar a langa. Awan ti idumdumana wenno pakitaanna iti paboritismo. Daytoy ti pudno a pakakitaan iti dina panangidumduma: Ti gundaway nga agbalin kas maysa kadagiti pudno nga agdaydayaw kenkuana, buyogen ti namnama a biag nga agnanayon, ket saan a nalimitaran iti sumagmamano a tattao. Imbes ketdi, kuna ti Aramid 10:34, 35: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” Silulukat daytoy a namnama iti isuamin aniaman ti kasasaadda iti komunidad, puli, wenno pagilian a pagnanaedanda. Saan kadi a dayta ti kasayaatan a pammaneknek ti pudno a kinahustisia? Ti naun-uneg a pannakaawat iti kinahustisia ni Jehova pudno nga iyadaninatayo kenkuana!

‘O Nagunegen ti Sirib ti Dios!’

15. Ania ti sirib, ken kasano nga iparangarang dayta ni Jehova?

¹⁵ Natignay ni apostol Pablo a mangideklara, kas nairekord iti Roma 11:33: “O nagunegen ti . . . sirib ken pannakaammo ti Dios!” Wen, bayat nga utobentayo ti nadumaduma nga aspeto ti di matukod a kinasirib ni Jehova, ditay maliklikan a malapunos iti panagamanga. Ngem kasanotayo a depinaren daytoy a galad? Ti sirib usarenna ti pannakaammo, panangilasin, ken pannakaawat tapno ibanagna ti kayatna a magapuanan. Babaen ti kalawa ti pannakaammona ken ti kauneg ti pannakaawatna, kanayon a kasayaatan ti desision ni Jehova, nga ibanagna dagita babaen ti kasayaatan a posible a pamay-an.

16, 17. Kasano a paneknekan dagiti pinarsua ni Jehova ti di matukod a siribna? Mangted iti pagarigan.

¹⁶ Ania ti dadduma nga espesipiko a pammaneknek ti di matukod a sirib ni Jehova? Kuna ti Salmo 104:24: “Anian a nagadu ti aramidmo, O Jehova! Isuda amin inaramidmo buyogen ti kinasirib. Ti daga napno kadagiti pinataudmo.” Kinapudnona, bayat nga umad-adu ti pannakaammotayo maipapan kadagiti pinarsua ni Jehova, ad-adda nga agamangatayo iti siribna. Panunotenyo laengen. Adu ti nasursuro dagiti sientista babaen ti panagadalda kadagiti pinarsua ni Jehova! Adda pay ketdi ti maysa a tay-ak ti inhenieria, a naawagan iti biomimetics, a nairanta a mangtulad kadagiti disenio a masarakan iti nakaparsuaan.

¹⁷ Kas pagarigan, nalabit pagsidsiddaawanyo ti kinapintas ti saput ti lawwalawwa. Pudno a nagsayaat ti pannakadiseniona. Dadduma kadagiti kasla nakapuy ti pannakalagana a saput ket nalaglagda ngem iti landok, natibtibker ngem kadagiti linabag iti vest a di masalput ti bala. Ania ti talaga a kaipapanan dayta? Panunotenyo ti saput a mapadakkel a kas iti kadakkel ti maysa nga iket a mausar iti pagkalap a barangay. Nagtibker ti kasta a saput ta kabaelanna a tenglen ti pangpasahero nga eroplano uray bayat a tumaytayab daytoy! Wen, inaramid amin dagita ni Jehova “buyogen ti kinasirib.”

18. Kasano nga agminar ti sirib ni Jehova idi inusarna dagiti tattao a mangirekord iti Saona, ti Biblia?

¹⁸ Ti kadakkelan a pammaneknek ti sirib ni Jehova ket masarakan iti Saona, ti Biblia. Ti masirib a balakad a masarakan kadagiti pinanidna pudno nga ipakitada kadatayo ti kasayaatan a wagas ti panagbiag. (Isaias 48:17) Ngem agminar met ti awan kaasping a sirib ni Jehova iti wagas ti pannakaisurat ti Biblia. Kasano? Babaen ti siribna, pinili ni Jehova nga usaren dagiti tattao a mangirekord iti Saona. No dagiti anghel ti inusarna a mangisurat iti naipaltiing a Saona, kastanto met laeng ngata ti kapintas ti Biblia? Pudno, mabalin a dagiti anghel mailadawanda ni Jehova manipud iti nangayed a panangmatmatda ken mayebkasda ti debosionda kenkuana. Ngem matarusantayo ngata a naimbag ti panangmatmat dagiti perpekto nga espiritu a parsua, a dakdakkel nga amang ti pannakaammo, kapadasan, ken bilegda?​—Hebreo 2:6, 7.

19. Ania a pagarigan ti mangipakita nga ad-adda a nabara ken makaay-ayo ti Biblia gapu ta tattao ti nangisurat iti dayta?

¹⁹ Gapu ta tattao ti nausar a mangisurat iti Biblia, ad-adda a nabara ken makaay-ayo dayta. Dagiti nagsurat ket tattao nga addaan iti rikna a kas kadatayo. Gapu ta imperpektoda, naipasangoda kadagiti suot ken rigat nga umasping kadatayo. Iti dadduma a kaso, dinakamatda ti mismo a rikna ken rigatda. (2 Corinto 12:7-10) Gapuna, insuratda dagiti sasao a di mayebkas dagiti anghel. Alaentayo a pagarigan ti sasao ni David a nairekord iti Salmo 51. Sigun iti superskripsion, pinutar ni David dayta a salmo kalpasan a nakaaramid iti nadagsen a basol. Imbukbokna ti pusona, nga inyebkasna ti napalalo a ladingitna ken impakaasina ti pammakawan ti Dios. Kuna ti Sal 51 bersikulo 2 ken 3: “Naan-anay a bugguannak iti biddutko, ket dalusannak uray pay iti basolko. Ta siak ammok dagiti salungasingko, ket ti basolko adda a patinayon iti sanguanak.” Imutektekanyo ti Sal 51 bersikulo 5: “Adtoy! Buyogen ti biddut naipasngayak a nabuyogan kadagiti panagpasikal, ket iti basol inyinawnak ni inak.” Intuloy ti Sal 51 bersikulo 17: “Dagiti sakripisio iti Dios ket maysa a naupay nga espiritu; ti puso a nadunor ken naidagel, O Dios, saanmonto nga umsien.” Saanyo kadi a marikna ti agpanaas a barukong ti nagsurat? Ti laeng imperpekto a tao ti makayebkas iti kasta a rikna.

20, 21. (a) Apay a maikuna a ti sirib ni Jehova ti nailanad iti Biblia, nupay imperpekto a tattao ti nausar a mangisurat iti dayta? (b) Ania ti mausig iti sumaganad nga artikulo?

²⁰ Gapu ta imperpekto a tattao ti inusarna, naipaay ni Jehova ti kasapulantayo​—maysa a rekord nga “impaltiing ti Dios” ngem nalaka a matarusan dagiti tattao. (2 Timoteo 3:16) Wen, inturong ti nasantuan nga espiritu dagidi a mannurat. Ti ngarud sirib ni Jehova ti inrekordda, saan a ti bukodda a kapanunotan. Naan-anay a mapagtalkan dayta a sirib. Kasta unay ti katan-ok dayta a sirib isu a siaayat nga indagadag kadatayo ti Dios: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) Babaen ti panangipangag iti dayta a nainsiriban a balakad, ad-adda a sumingedtayo iti kasisiriban a Diostayo.

²¹ Ti kangrunaan a makaay-ayo ken katan-okan kadagiti amin a galad ni Jehova isu ti ayat. Mausig iti sumaganad nga artikulo no kasano nga impakita ni Jehova ti ayat.

Malagipyo Pay?

• Ania dagiti addang nga inaramid ni Jehova tapno mabalinantayo ti makisinninged kenkuana?

• Ania ti sumagmamano a pagarigan ti pannakabalin ni Jehova a mangparsua ken mangsalaknib?

• Kadagiti ania a pamay-an nga us-usaren ni Jehova ti kinahustisiana?

• Kasano a nagminar ti sirib ni Jehova kadagiti pinarsuana ken iti Biblia?

[Ladawan iti panid 10]

Kas iti maysa a pastor a mangsakruy iti kordero iti barukongna, sidudungngo nga aywanan ni Jehova dagiti karnerona

[Ladawan iti panid 13]

Agminar ti sirib ni Jehova iti wagas ti pannakaisurat ti Biblia