Ti Panagturpos ti Maika-130 a Klase ti Gilead

Makapagagar nga Aldaw

AWAN duadua a makapagagar ti panagturpos ti maika-130 a klase ti Watchtower Bible School of Gilead. Idi Sabado, Marso 12, 2011, nasurok a 8,500 ti timmabuno iti daytoy a panagturpos, a pakairamanan dagiti estudiante kasta met dagiti pamilia ken gagayyemda. Saan la a dayta nga aldaw ti makapagagar no di pay ket ti pakaidestinuan dagiti nasanay a misionero a maibaon iti nagduduma a paset ti lubong tapno isuroda kadagiti tattao ti kinapudno a linaon ti Biblia.

“Naragsak Amin Dagidiay Mangin-inanama” ken Jehova

Dayta a makaliwliwa a sasao a naadaw iti Isaias 30:18 ti tema ti palawag ni Geoffrey Jackson, maysa a kameng ti Bagi a Manarawidwid dagiti Saksi ni Jehova ken tserman ti programa. Sibabara nga inabrasana dagiti estudiante ken inyangawna a kinuna a nalasatanda dagiti tuok ken rigat ti panageskuela iti Gilead, ngem impasiguradona a malasatanda met dayta a makapagagar nga aldaw. Ania ngata ti rumbeng a namnamaen dagiti estudiante? Imbinsabinsana ti tallo a praktikal a punto manipud iti Isaias 30:18-21.

Umuna, kinuna ni Kabsat Jackson, “Inanamaenyo a denggen ni Jehova dagiti kararagyo.” Dinakamatna ti pammatalged a mabasa iti bersikulo 19: “[Ti Dios] di bumurong nga ipaayannakanto iti parabur gapu iti uni ti ikkismo.” Kinuna ni Kabsat Jackson a denggen ni Jehova ti kararag ti tunggal indibidual, kas ipamatmat ti sao a naaramat iti orihinal a Hebreo. “Kas Ama, saan nga ibaga ni Jehova, ‘Dimo la tultuladen ti natibker a pammati ni . . . ’ Imbes ketdi, dumngeg a naimbag ken sungbatanna ti tunggal maysa.”

Maikadua, dinakamat ti ispiker nga inanamaentayo a tumaud dagiti problema. “Saan nga inkari ni Jehova ti nanam-ay a biag, ngem sigurado a tulongannatayo.” Kas ipakita ti padto ti Dios iti bersikulo 20 maipapan iti pannakalakub ti Israel, ti riribuk ken panangirurumen ket nayarig iti tinapay ken danum. Kaskasdi, kanayon a nakasagana ni Jehova a mangispal iti ilina. Iti umasping a pamay-an, addanto dagiti tumaud a problema ken karit a saan nga impagarup dagitoy nga estudiante ti Gilead! Innayon pay ni Kabsat Jackson, “Ngem ekspektarenyo a sidadaan ni Jehova a tumulong kadakayo a mangsango iti tunggal karit.”

Maikatlo, impalagip ni Kabsat Jackson kadagiti estudiante ti anag ti bersikulo 20 ken 21, “ekspektarenyo ti panangiwanwan​—isu a birokenyo dayta!” Kinunana a masapul a dumngeg a naimbag ti tunggal Kristiano no agsao ni Jehova babaen iti pinanid ti Biblia ken kadagiti naibatay-Biblia a publikasion. Imparegtana pay kadagiti estudiante a pagreggetanda a basaen nga inaldaw ti Biblia, ta kaipapanan dayta ti biag.

“Maadda Koma Kadakayo ti Panagalinggaget ken Jehova”

Ni Anthony Morris a kameng ti Bagi a Manarawidwid inlawlawagna ti kaipapanan ti sasao a “panagalinggaget ken Jehova” iti 2 Cronicas 19:7. Saan a tumukoy daytoy iti makapasidduker a buteng, no di ket iti nasged a tarigagay nga agaramid iti naimbag, nga uray la mamagpigerger gapu iti nasged a panagraem ken kinapasnek. “Itugotyo dayta a kita ti panagalinggaget iti pakaidestinuanyo kas misionero,” indagadag ni Kabsat Morris kadagiti estudiante. Kasano a maipakitada ti kasta a panagraem ken Jehova? Adda dua a praktikal a pamay-an nga impaganetget ti ispiker.

Umuna, ginutugot ni Kabsat Morris nga iyaplikar dagiti estudiante ti balakad ti Santiago 1:19: “Masapul a nasiglat[kayo] no iti panagdengngeg, nainayad no iti panagsao.” Imbagana nga adu ti nasursuro dagiti estudiante bayat ti lima a bulan a panagadalda, ngem saanda koma a pagpannakkel dagita iti teritoria a pakaibaonanda. “Masapul a dumngegkayo nga umuna,” kinunana. “Dumngegkayo kadagiti kakongregasionyo ken kadagidiay mangidadaulo iti lugar a pagserbianyo; imdenganyo ti ibagada maipapan iti pagilian ken iti kulturada. Dikay mabain a mangibaga, ‘Diak ammo.’ No immukuok iti pusoyo ti pannakaisuroyo, ad-adda a mabigbigyo a bassit pay gayam ti ammoyo.”

Maikadua, binasa ni Kabsat Morris ti Proverbio 27:21: “Ti paggugoran a banga agpaay iti pirak, ket ti urno agpaay iti balitok; ket ti maysa a tao masubok sigun iti pakaidaydayawanna.” Inlawlawagna a no kasano a kasapulan a magugoran ti balitok ken pirak, mabalin met a magugorantayo babaen ti pannakaidaydayaw. Kasano? Mabalin a masubok ti kababalin ti maysa no maidaydayaw. Posible a mangituggod dayta iti panagpannakkel ken pannakapukaw iti nasayaat a relasion ken Jehova, wenno mabalin a matignaytayo a mangbigbig a nakautangtayo ken Jehova ken agbalintayo nga ad-adda a determinado a mangsurot iti pagalagadanna. Indagadag ngarud ni Kabsat Morris a no maipaayan dagiti estudiante iti pammadayaw, umiso koma ti panangmatmatda iti dayta ket paneknekanda nga umiso ti “panagalinggaget[da] ken Jehova.”

“Ipategyo ti Misionyo”

Ni Guy Pierce a kameng ti Bagi a Manarawidwid ti nangiparang iti kangrunaan a palawag. Insalaysayna ti tema a nadakamat iti ngato, nga inlawlawagna a ti kaipapanan ti sao a “misionero” ket “naibaon para iti maysa a mision.” Di pakasdaawan nga adda nagduduma a mision ti tunggal misionero. Adu ti nangipamaysa iti pisikal a panangagas ken nagbirok iti napolitikaan a solusion dagiti parikut ti lubong. “Ngem naidumakayo,” kinunana. Iti ania a pamay-an?

Iti panangusigda iti Biblia, adu ti naammuan dagiti estudiante maipapan iti pisikal a panangagas. Napalaus ti ragsak dagiti nagannak ti maysa a balasitang a pinagungar ni Jesus. (Marcos 5:42) Kasta met, napalaus ti ragsak dagiti bulsek a simimilagro a naagasan. Naaramid dagita a milagro tapno maammuantayo ti aramiden ti Kristo iti um-umay a baro a lubong, inton mapaimbag ti aniaman a pisikal nga an-annayen ti “dakkel a bunggoy” dagiti nalinteg a tattao a makalasat iti panungpalan ti agdama a dakes a sistema ti bambanag. (Apocalipsis 7:9, 14) Naan-anayton ti salun-at dagiti mapagungar nga ay-ayatentayo. Nakaragragsakto la ketdi dayta nga aldaw!

Ngem inlawlawag ni Kabsat Pierce a saan a ti pisikal a pannakapaimbag ti kapatgan. Nagsakit met laeng dagiti masakit nga inagasan ni Jesus ken natay met laeng dagiti pinagungarna. Uray dagiti bulsek nga inagasanna, nagbalinda manen a bulsek idi natayda. Ti kapatgan isu ti naespirituan a panangpaimbag ni Jesus. Naibaon met dagiti misionero iti Gilead tapno mangaramidda iti naespirituan a panangpaimbag. Tulonganda dagiti tattao a maikappia iti nailangitan nga Amatayo tapno agbiagda iti naespirituan. Dagiti laeng mapaimbag iti naespirituan ti makagun-od iti biag nga agnanayon. “Dayta a naespirituan a panangpaimbag,” kinuna ni Kabsat Pierce, “ti pakaidayawan ti Dios. Dayta ti maibilang a balligi iti ministerioyo.”

Tallo Pay a Tampok iti Dayta nga Aldaw

“Naimbagto Ngata Daytoy nga Aldaw?” Sinungbatan daytoy ni Robert Rains a kameng ti United States Branch Committee. Pinaregtana dagiti estudiante a pagbalinenda a nasayaat ti tunggal aldawda iti nakaibaonanda a teritoria. Maaramidanda dayta no nainsiriban nga usarenda ti tiempoda, agkonsultada iti Sao ti Dios no adda pakarigatanda, ken agpannurayda ken Jehova babaen iti kararag.

“Pabaruenyonto Kadi ti Daan?” Dayta ti insaludsod ti instruktor ti Gilead a ni Mark Noumair iti palawagna. Inlawlawagna ti 1 Juan 2:7, 8, a sadiay dinakamat ni apostol Juan ti “daan a bilin” a maysa a met a “baro a bilin.” Maymaysa a bilin ti tuktukoyen ni Juan​—nga agiinnayat dagiti pasurot ni Kristo, kayatna a sawen, agbalinda koma a managsakripisio. (Juan 13:34, 35) Daan dayta a bilin ta imbilin ni Jesus-Kristo kadagiti pasurotna pinulpullo a tawen ti napalabasen. Ngem baro dayta ta maipaspasango dagiti Kristiano kadagiti baro a karit ket masapul nga ipakitada ti ayat iti baro ken naan-anay a pamay-an. Maipaspasango met dagiti misionero kadagiti baro a kasasaad ket masapul nga ipakitada ti ayat iti baro a pamay-an. Kasano a maaramidanda dayta?

“Saanmo a tultuladen ti dimo magustuan,” inggunamgunam ni Kabsat Noumair. Impakdaarna a no tutopantayo ti kababalin a ditay magustuan, kasla tultuladentayo ti ditay kayat​—a dayta ti makadangran kadatayo. Iti sabali a bangir, no agbiroktayo iti baro a pamay-an a panangipakita iti ayat, maisilnagtayo ti “pudno a lawag” ken maiwaksitayo ti naespirituan a kinasipnget.

“Susuonenyo ti Awit.” Daytoy a tema ti inlawlawag ti sabali pay nga instruktor a ni Michael Burnett. Inyestoriana a susuonen dagiti taga-Africa ti nadagsen nga awitda. Agus-usarda iti kata (diken), tapno saanda a marigatan ken natimbeng ti pannagnada. Maaddaanto dagitoy a misionero iti nadagsen a rebbengen iti pagilian a pakaidestinuanda, ngem kasla naikkanda iti kata: ti nagsayaat a naibatay-Biblia a pannakasanayda. Saandanto a marigatan no iyaplikarda ti naadalda, ket naannayasto ti panangitungpalda iti annongenda.

Kapkapadasan ken Interbiu

Ti panagsanay iti Gilead ramanenna ti panangasaba a kadua dagiti kakabsat kadagiti lokal a kongregasion dagiti Saksi ni Jehova. Ni William Samuelson, a manangaywan iti Theocratic Schools Department, rinepasona ti kapadasan ti sumagmamano nga estudiante babaen iti temana a “Saanmo a Paginanaen Ta Imam.” (Eclesiastes 11:6) Babaen iti naganaygay a panangyakto dagiti estudiante, impakitada ti kinagagetda iti ministerio, nga inkagumaanda nga inkasaba ti naimbag a damag kadagiti eroplano, restawran, ken paggasolinaan. Nangasabada iti binalaybalay, nakisaritada iti di pormal a pamay-an, ken babaen iti surat. Talaga a saanda a pinaginana ti imada, ket nagsayaat ti resultana.

Kalpasanna, ni Kenneth Stovall a kameng ti staff ti Gilead ininterbiuna ti tallo a lallaki a nabayagen a misionero​—ni Barry Hill a nagserbi iti Ecuador ken Dominican Republic, ni Eddie Mobley iti Côte d’Ivoire, ken ni Tab Honsberger iti Senegal, Benin, ken Haiti. Dagita ti nagbalin a paset ti tema a “Subokenyo ni Jehova ket Agapitkayo iti Bendision.” (Malakias 3:10) Kas pagarigan, insalaysay ni Kabsat Hill ti rigatda ken baketna a makibagay iti klima ti Ecuador, a nadagaang ken natapok sa nadagaang ken napitak. Inestoriana a dua ket kagudua a tawen a timba ken tabo ti inaramatda nga agdigus. Ngem saanda a pulos pinanunot ti agawid ta imbilangda a bendision ni Jehova ti misionda. “Daytoyen ti biagmi,” kinunana.

Idi agngudon ti programa, maysa kadagiti estudiante ti nangibasa iti makatukay a surat manipud iti nagturpos a klase, a nangyebkas iti naimpusuan a panagyamanda iti eskuelaan. “Napabileg ti pammatimi,” kinuna ti surat, “ngem ammomi a mangrugrugi pay laeng ti trabahomi.” Adda diploma a naawat ti amin nga estudiante, ket naibaonda iti nagduduma a pagilian. Sinerraan ni Kabsat Jackson ti programa babaen ti panangipanamnamana kadagiti estudiante a tulongan ida ni Jehova iti agbalinto a biagda kas misionero, nangruna no maipasangoda kadagiti karit. Nagagaran ken napabileg ti amin a timmabuno idi nagawidda. Sigurado nga adunto ti nasayaat a pangaramatan ni Jehova kadagitoy kabbaro a misionero.

[Tsart/Mapa iti panid 31]

ESTADISTIKA TI KLASE

9 pagilian a nairepresentar

34.0 promedio nga edad

18.6 promedio a tawen sipud bautismo

13.1 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Naipakita iti baba dagiti pagilian a pakaibaonan dagiti naggraduar

PAKAIDESTINUAN DAGITI MISIONERO

ARGENTINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

INDONESIA

KENYA

LITHUANIA

MALAYSIA

MOZAMBIQUE

NEPAL

PAPUA NEW GUINEA

ROMANIA

SENEGAL

TANZANIA

UGANDA

ZIMBABWE

[Ladawan iti panid 31]

Ti Maika-130 a Klase a Nagturpos iti Watchtower Bible School of Gilead

Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.