GAN-AY

Iti panagabel, grupo daytoy dagiti sinulid a mangbukel iti paundoy a paset ti tela. Dagiti sinulid nga agsinsinnublat a mayabel iti ngato ken baba dagiti gan-ay ket maaw-awagan iti pakan. No ti papadi ti Israel subokenda idi dagiti naabel a material no adda kukutel kadagitoy, sukimatenda agpadpada ti gan-ay ken ti pakan.​—Le 13:47-59; kitaenyo ti KUKUTEL (Iti kawkawes ken balbalay); PANAGABEL.

Apaman a ti mangngabel malpasna ti lupot, ragasenna dagiti linabag ti gan-ay, nga ikkatenna ti naabel a material ket ibatina dagiti “ripas,” wenno murdong dagiti linabag ti gan-ay, a sikakapet iti pagabelan. Daytoy ti imparipirip ni Ari Ezekias iti pananglagipna iti nakaro a sagubanitna idi impagarupna a ti Dios pagpatinggaennan ti biagna, a gessatenna ni Ezekias “kadagiti mismo a linabag ti gan-ay” iti di naintiempuan nga ipapatay.​—Isa 38:9-12.