SERAFIN

Dagiti espiritu a parsua a naisaad iti aglikmut ti trono ni Jehova idiay langit. (Isa 6:2, 6) Ti Hebreo a sao a sera·phimʹ ket pangadu ti pormana a nombre a naadaw iti berbo a sa·raphʹ, kaipapananna ti “puoran.” (Le 4:12) Gapuna, ti literal a kaipapanan ti Hebreo a termino a sera·phimʹ ket “dagidiay umap-apuy.” Kadagiti sabali pay a paset, ti nombre agparang iti pangmaymaysa a porma (Heb., sa·raphʹ) wenno iti pangadu a porma ken tumukoy iti naindagaan a parparsua. Iti daytoy a pannakaaramat, nadumaduma ti kaipapananna kas “nagita,” “umap-apuy (mamagebbal),” ken “umap-apuy nga uleg.”​—Nu 21:6, 8, Rbi8 ftn.

Deskribiren kadatayo ni mammadto Isaias ti sirmatana, a kunkunana: “Idi tawen a natay ni Ari Ozias, siak, nupay kasta, nakitak ni Jehova, a situtugaw iti trono a nangato ken naitan-ok, ket dagiti gayadan ti kawesna pinunnoda ti templo. Dagiti serafin agtaktakderda idi iti ngatuenna. Tunggal maysa addaan innem a payak. Babaen iti dua tinaginayonna a siaabbong ti rupana, ket babaen iti dua tinaginayonna a siaabbong dagiti sakana, ket babaen iti dua isu tumayab. Ket daytoy immawag iti daydiay ket kinunana: ‘Santo, santo, santo ni Jehova ti buybuyot. Ti pakabuklan ti intero a daga isu ti dayagna.’ . . . Ket kinunak: ‘Asiak pay! Ta arigko ti napagulimek, agsipud ta maysaak a lalaki a narugit dagiti bibigna, ken agnanaedak iti tengnga ti maysa nga ili a narugit dagiti bibigna; ta dagiti matak nakitada ti mismo nga Ari, ni Jehova ti buybuyot!’ Iti kasta, maysa kadagiti serafin timmayab nga immay kaniak, ket iti imana adda narangrang a beggang nga innalana iti altar babaen kadagiti sipit. Ket sinagidna ti ngiwatko ket kinunana: ‘Adtoy! Nasagid daytoy dagiti bibigmo, ket ti biddutmo pimmanaw ket ti mismo a basolmo naabbongan.’”​—Isa 6:1-7.

Awan naipaay a pannakailadawan ti Nadibinuan a Persona. Nupay kasta, dagiti gayadan ti nadaeg a kawesna naikuna a pinunnoda ti templo, nga awan nabati a disso a pagtakderan ti asinoman. Ti tronona saan a naisaad iti daga no di ket, malaksid pay iti kasasaadna kas “nangato,” “naitan-ok” dayta. Ti ‘panagtakder’ dagiti serafin mabalin a kaipapananna ti ‘panagalimpayag,’ babaen iti maysa kadagiti paris ti paypayakda, no kasano a ti ulep ‘agtaktakder’ wenno agal-alimpayag iti pagserkan ti tolda ni Jehova idiay let-ang. (De 31:15) Maipapan iti saad dagiti serafin, kunaen ni Propesor Franz Delitzsch: “Iti kinapudnona, saan a nangatngato dagiti serafin ngem ti ulo Daydiay situtugaw iti trono, no di ket nagal-alimpayagda iti ngatuen ti nagayad a pagan-anayna a dayta ti nangpunno iti siled.” (Commentary on the Old Testament, 1973, Tomo VII, Paset 1, p. 191) Ti Latin a Vulgate, imbes a kunaenna a “dagiti serafin agtaktakderda idi iti ngatuenna,” kunaenna nga agtaktakderda iti ngatuen ‘ti trono.’​—Isa 6:1, 2.

Nangato ti Ranggoda. Anghel dagitoy a mannakabalin a nailangitan a parparsua, a nabatad a nakangatngato ti saadda iti urnos ti Dios, yantangay naipakita nga agserserbida iti trono ti Dios. Dagiti kerubin a nakita iti sirmata ni Ezequiel katupagda dagiti tumataray a nangkuyog iti nailangitan a karuahe ti Dios. (Eze 10:9-13) Daytoy a kapanunotan maipapan iti ranggo wenno saad ti autoridad idiay langit ket maitunos iti Colosas 1:16, a mangtuktukoy iti bambanag “iti langlangit ken iti rabaw ti daga, ti bambanag a makita ken ti bambanag a di makita, uray pay no dagita ket trono wenno kinaapo wenno gobierno wenno autoridad.”

Ti Akem ken Annongenda. Saan a nadakamat ti bilang dagiti serafin, ngem awaganda ti maysa ken maysa, nabatad a kayatna a sawen a ti sumagmamano addada iti agsumbangir a sikigan ti trono ken idekdeklarada ti kinasanto ken dayag ni Jehova buyogen ti antiponia a kanta (agsinsinnungbat a panagkanta ti dua a benneg dagiti kumakanta), a ti maysa (wenno maysa a bunggoy) pasarunuanna ti sabali wenno sungbatanna ti sabali buyogen ti maysa a paset ti deklarasion a: “Santo, santo, santo ni Jehova ti buybuyot. Ti pakabuklan ti intero a daga isu ti dayagna.” (Idiligyo ti pannakaibasa ti Linteg ken ti isusungbat dagiti umili, iti De 27:11-26.) Buyogen ti kinapakumbaba ken kinaemma iti saklang Daydiay Katan-okan, inabbonganda dagiti rupada iti maysa kadagiti tallo a paris ti payakda, ket yantangay addada iti nasantuan a disso, inabbonganda ti saksakada iti sabali pay a paris, kas maiparbeng a panagraem iti nailangitan nga Ari.​—Isa 6:2, 3.

Ti natbag a pukkaw dagiti serafin maipapan iti kinasanto ti Dios ipakitana nga adda pakainaiganda iti panangsigurado a ti kinasantona maideklara ket ti dayagna mabigbig iti amin a paset ti uniberso, pakairamanan ti daga. Ti maysa kadagiti serafin sinagidna dagiti bibig ni Isaias tapno dalusanna ti basolna ken ti biddutna babaen iti narangrang a beggang a naala iti altar. Mabalin nga ipasimudaag daytoy nga iti maysa a pamay-an, ti trabahoda ket nainaig iti panangdalus iti basol ti ili ti Dios, a ti kasta a panangdalus ket naibatay iti sakripisio ni Jesu-Kristo iti altar ti Dios.​—Isa 6:3, 6, 7.

Ti Langada iti Sirmata. Ti pannakailadawan dagiti serafin kas addaan iti saksaka, paypayak, ken dadduma pay, tarusan koma a simboliko, a ti langada a kas iti langa ti naindagaan a parparsua irepresentarna laeng dagiti pannakabael nga adda kadakuada wenno dagiti akem nga ar-aramidenda, no kasano a ti Dios masansan a simboliko nga agsao maipapan iti bagina kas addaan kadagiti mata, lapayag, ken dadduma pay a paspaset ti bagi ti tao. Ipakitana nga awan ti tao a makaammo iti langa ti Dios, kuna ni apostol Juan: “Dungdungnguen, ita annaknatayo ti Dios, ngem kaskasdi a saan pay a naiparangarang no anianto ti pagbalinantayo. Ammotayo a kaanoman nga isu maiparangarang agbalintayto a kas kenkuana, agsipud ta isu makitatayto kas iti kinaisuna.”​—1Jn 3:2.