Panangipakpakauna Maipapan iti Mesias

NABAYAGEN a sinegseggaan dagiti Judio ti iyaay ti Mesias gapu ta ammoda ti insurat ni Isaias ken ti dadduma pay a propeta maipapan kenkuana. Kinapudnona, idi kaaldawan ni Jesus, adu a Judio ti “siiinanama” iti asideg idin a panagparang ti Mesias. (Lucas 3:15) Makapainteres ta nairaman kadagiti padto ti Biblia dagiti napateg a detalye maipapan iti biag ti Mesias. Awan a pulos ti tao a nakaipakpakauna kadagita a pasamak wenno awan a pulos ti nakayurnos iti pannakapasamak dagita bayat ti panagbiag ni Jesus ditoy daga.

Dagiti Detalye Maipapan iti Pannakaipasngay ti Mesias. Impakpakauna ni Isaias a maysa a birhen ti mangipasngay iti Mesias, wenno Kristo. Kalpasan ti panangdeskribirna kadagiti namilagruan a kasasaad idi naipasngay ni Jesus, kastoy ti insurat ni apostol Mateo: “Amin daytoy iti kinaagpaysuanna napasamak tapno matungpal daydiay sinao ni Jehova babaen iti mammadtona, a kunkunana: ‘Adtoy! Ti birhen agsikogto ket mangipasngayto iti anak a lalaki.’” (Mateo 1:22, 23; Isaias 7:14) Impakpakauna pay ni Isaias a ti Kristo ket kaputotan ni David ket espesipiko a dinakamatna ni Jesse nga ama ni David. Isu a ni Jesus ket direkta a kaputotan ni David. (Mateo 1:6, 16; Lucas 3:23, 31, 32) Gapuna, sakbay ti pannakaipasngay ni Jesus, imbaga ni anghel Gabriel ken Maria nga ina ni Jesus: Ti “Dios itednanto kenkuana ti trono ni David nga amana.”​—Lucas 1:32, 33; Isaias 11:1-5, 10; Roma 15:12.

Dagiti Detalye Maipapan iti Biag ti Mesias. Bayat ti kaadda ti agkabannuag a ni Jesus iti sinagoga idiay Nazaret, sipipigsa a binasana ti padto ni Isaias agraman dagitoy a sasao: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw.” Iti panangyaplikar ni Jesus iti dayta a padto iti bagina, kinunana: “Ita nga aldaw daytoy a kasuratan a kangkangngegyo natungpalen.” (Lucas 4:17-21; Isaias 61:1, 2) Impakpakauna met ni Isaias ti naasi, naalumamay, ken naemma a pannakilangen ni Jesus kadagidiay agkasapulan iti panangagas. Kastoy ti insurat ni Mateo: “Adu met ti simmurot kenkuana, ket inagasanna ida amin, ngem siiinget a binilinna ida nga isu saanda nga ipadlaw; tapno matungpal ti naisao babaen ken Isaias a mammadto . . . ‘Saanto a makisusik, wenno uray agikkis iti napigsa . . . Awanto ti rumekenna a naparpar a runo.’”​—Mateo 8:16, 17; 12:10-21; Isaias 42:1-4; 53:4, 5.

Dagiti Detalye Maipapan iti Panagsagaba ti Mesias. Impadto ni Isaias a ti Mesias ket saan nga awaten ti kaaduan iti Israel no di ket agbalin ketdi a “bato a pakaitibkolan” kadakuada. (1 Pedro 2:6-8; Isaias 8:14, 15) Kinaagpaysuanna, nupay adu a milagro ti inaramid ni Jesus, dagiti tattao “saanda a naaddaan iti pammati kenkuana, iti kasta natungpal ti sao ni Isaias a mammadto a kinunana: ‘Jehova, siasino ti naaddaan iti pammati iti banag a nangngegan babaen kadakami?’” (Juan 12:37, 38; Isaias 53:1) Ti maysa a rason no apay a dagiti Judio saanda a pinati ni Jesus kas ti Mesias ket ti palso a pagarup ti kaaduan a ti Mesias ket dagus a pagpatinggaenna ti panagturay ti Roma iti nasionda ken isublina ditoy daga ti independiente a pagarian dagiti kaputotan ni David. Saan a namati ti kaaduan a Judio a ni Jesus ti Mesias gapu ta isu ket nagsagaba ken natay. Ngem kinaagpaysuanna, impakpakauna ni Isaias a ti Mesias ket agsagaba sakbay nga agbalin nga Ari.

Iti libro nga Isaias, naipadto a kunaento ti Mesias: “Ti bukotko impaayko kadagiti manangkabil . . . Ti rupak saanko nga inlinged manipud mangipababa a bambanag ken iti tupra.” Kastoy ti impadamag ni Mateo maipapan iti napasamak idi nabista ni Jesus: “Tinupraanda ti rupana ken dinanogda. Tinungpa ti dadduma ti rupana.” (Isaias 50:6; Mateo 26:67) Insurat ni Isaias: “Palpalubosanna idi ti bagina nga agtuok; kaskasdi a saanna a ngangaen ti ngiwatna.” Gapuna, idi a ni Jesus ket sinaludsodan ni Pilato maipapan kadagiti akusasion dagiti Judio, “saan a simmungbat kenkuana, saan, saan uray maysa a sao, iti kasta nagsiddaaw unay ti gobernador.”​—Isaias 53:7; Mateo 27:12-14; Aramid 8:28, 32-35.

Dagiti Detalye Maipapan iti Ipapatay ti Mesias. Adda met dagiti impadto ni Isaias a natungpal idi natay ni Jesus ken uray idi kalpasan dayta. Impakpakauna ni Isaias: “Aramidennanto ti lugar a pagitabonanna a kaduana a mismo dagidiay nadangkes, ken kadua ti klase nabaknang iti ipapatayna.” (Isaias 53:9) Kasano a natungpal dayta a padto a kasla agkontra dagiti detalyena? Idi natay ni Jesus, isu ket nailansa iti nagbaetan ti dua a mannanakaw. (Mateo 27:38) Ngem idi agangay, ti nabaknang a ni Jose a taga-Arimatea intanemna ti bangkay ni Jesus iti kukuana a kaar-aramid a tanem iti nakungkongan a dakkel a bato. (Mateo 27:57-60) Kamaudiananna, idi natay ni Jesus, natungpal ti maysa kadagiti kapatgan a paset iti padto ni Isaias. Iti panangdakamatna iti Mesias, insurat ni Isaias: “Daydiay nalinteg, ti adipenko, iyegnanto ti nalinteg a takder iti adu a tattao; ket dagiti biddutda awitennanto.” Kinapudnona, ti ipapatay ni Jesus ti nangipaay iti subbot tapno maikkat ti panangpadagsen ti basol kadagiti amin a matalek a tattao.​—Isaias 53:8, 11; Roma 4:25.

Dagiti Padto a Sigurado ti Kaitungpalanda

Tapno pasingkedanda ti kinasiasino ti Mesias a dinakamat ti Biblia, dagiti apostol ken ni Jesus a mismo ket masansan a nagadawda nga ad-adda manipud iti padto ni Isaias ngem iti aniaman a sabali pay a libro iti Biblia. Nupay kasta, saan laeng a ti libro nga Isaias ti nangipakpakauna iti masanguanan. Adu pay ti padto iti Hebreo a Kasuratan a ti kaitungpalanda ket mainaig met ken Jesus, iti Pagarianna, ken kadagiti naimbag a banag nga itungpalto ti Pagarian.a (Aramid 28:23; Apocalipsis 19:10) Kasano kasigurado ti pannakatungpal amin dagitoy a padto? Kinuna ni Jesus kadagiti Judio a dumdumngeg kenkuana: “Dikay pagarupen nga immayak tapno dadaelek ti Linteg wenno dagiti Mammadto [kayatna a sawen, ti Hebreo a Kasuratan]. Immayak, saan a tapno mangdadael, no di ket tapno mangtungpal; ta pudno kunak kadakayo nga umun-una pay nga aglabas ti langit ken ti daga ngem ti maysa a kabassitan a letra wenno maysa a sangkabassit a paset ti letra nga aglabas manipud iti Linteg iti aniaman a pamay-an ket saan a maaramid amin a bambanag.”​—Mateo 5:17, 18.

Impatuldo met ni Jesus ti pannakatungpal dagiti padto ti Biblia kadagiti napasamak kenkuana ken kadagiti mapasamak kalpasanna. (Daniel 9:27; Mateo 15:7-9; 24:15) Kasta met, impakpakauna a mismo ni Jesus agraman ti ad-adalanna dagiti mapasamak kalpasan ti kaaldawanda, agraman ti adu a makitkitatayo a mapaspasamak ita. Dagitoy ken ti dadduma pay a masanguanan a kaitungpalan ti padto ti Biblia ti mailawlawag iti sumaganad nga artikulo.

[Footnote]

[Ladawan iti panid 4]

“Ti birhen . . . ket mangipasngayto iti anak a lalaki”

[Ladawan iti panid 5]

“Ti rupak saanko nga inlinged manipud mangipababa a bambanag”