Kasano Kapaut ti Mabalin a Panagbiagtayo?

ADU a tattao nga agbibiag itatta addanto gundawayda nga agbaig iti napaut unay. Uray pay ti saan nga ipapatay kasla posible itattan.”

“Minilion nga Agbibiag Itan Mabalin a Saandan a Matay.”

Aniat’ nagdumaan dagitoy dua a sasao? Ti immuna isu dagiti sasao ni Dr. Lawrence E. Lamb, mannurat iti benneg ti medisina ken propesor, iti librona a Get Ready for Immortality, a naipablaak idi 1975. Ti maikadua isu ti paulo ti maysa a palawag publiko ken ti simmaruno iti dayta a libro nga insurat ni J. F. Rutherford, ti maikadua a presidente iti Watch Tower Society. Ti palawag publiko ket immuna a naipalawag idiay Los Angeles, California, idi 1918.

Dagiti dua a nalawag nga agarngi a sasao, nupay kasta, ket dakkel ti nagdumaanda iti panagrason ken panagsukimat a nangiturong iti pannakaisaoda. Dagiti sasao ni Dr. Lamb ket gagangay kadagiti adu a maaw-awagan imortalista. Marikna dagitoy a tattao a dagiti rinang-ayan iti medikal a siensia, agraman dagiti panagsirarak maipapan iti panaglakay, risotennanton iti mabiit ti misterio no apay a lumakaytayo ket kamaudiananna parmekennanton ti ipapatay a mismo. Kaskasdi, nupay no adda naaramidan ti moderno a siensia iti panangpaatiddog ti promedio a panagbiag ken iti panangtulong kadagiti adu a mangtagiragsak iti nasaysayaat a panagbiag, dagiti padpadto iti imortalidad agtalinaedda a kasta laeng—manginanama unay a panagpadpadto.

Ni J. F. Rutherford, iti kasumbangirna, saan nga agipadpadto a maibatay iti siensia wenno medisina. Ti panangisalaysayna ket naibatay iti Biblia. Indemostrana babaen kadagiti natungpalen a padpadto iti Biblia a simreken ti lubong ti sangatauan iti “tiempo ti panungpalanna.” (Daniel 12:4) Kalpasanna intudona ti naibatay-Biblia a namnama a no kasano a ni Noe ken ti pamiliana nakalasatda iti panungpalan ti lubong idi kaaldawanda, minilion ti makalasatto met iti pannakadadael daytoy lubong ket agbiagdanto iti maysa a baro a lubong ket tagiragsakenda ti biag nga agnanayon iti maysa a paraiso a daga.—Mateo 24:37-39; Apocalipsis 21:3, 4.

Para iti adu kadagidiay managdengngegna, ti palawag ni Rutherford ket makapakellaat. Uray itatta, adu a tattao ti makasarak iti kasta a palawag maipapan iti panagbiag nga agnanayon ditoy daga iti sidong ti panagturay ti Pagarian ti Dios a saan a pudno ken narigat a patien. (Salmo 37:10, 11, 29) Ngem ti kadi ibagbaga ti Biblia maipapan iti no apay a lumakaytayo ken mataytayo ket pudno a di nakapapati? Ania, kinapudnona, ti kunaenna maipapan iti tema?

Naaramid nga Agbiag, Saan a Matay

Nainkalintegan, manglukat ti Biblia iti salaysay iti nangrugian iti biag ti tao. Iti umuna a kapitulo iti Genesis, mabasatayo a kalpasan ti panangparsuana iti umuna a natauan a parsua, “ti Dios binendisionanna ida ket ti Dios kinunana kadakuada: ‘Agbungakayo ket agadukayo ket punuenyo ti daga, agbalinkayo nga appo kenkuana ket iturayanyo dagiti ikan ti taaw ken dagiti tumatayab kadagiti langit ken amin a parsua a sibibiag nga aggaraw iti rabaw ti daga.’”—Genesis 1:28.

Para iti immuna a natauan a paris, da Adan ken Eva, tapno maibanag dayta a naituding a trabaho, dayta nasken a kaipapananna a masapul nga agbiagda iti napaut a tiempo, ken kasta met dagiti annakda. Ngem kasano kapaut? No itultuloytay a basaen ti libro ti Biblia a Genesis, awan ti masarakantayo a nadakamat nga espisipiko a kawatiwat ti panagbiag da Adan ken ni Eva. Nupay kasta, adda maysa a kondision a masapul a masabetda tapno isudat’ agtultuloy nga agbiag. Kinuna ti Dios ken Adan: “Ngem ti aggapu iti kayo ti pannakaammo ti imbag ken dakes saanmonto a kanen, ta iti aldaw a pannanganmo iti daydiay mataykanto a di bumurong.”—Genesis 2:17.

Gapuna, dumteng laeng ti ipapatay kadakuada no salungasingenda ti bilin ti Dios. Malaksid iti dayta, addaanda iti namnama nga agbiag nga agnanayon iti dayta naindagaan a Paraiso a maawagan Eden. Nalawag, dagiti tattao naaramidda nga agbiag, saan a matay.

Ituloy nga isalaysay ti Genesis, nupay kasta, a ti umuna a paris pinilida ti panangsalungasing iti nalawag a bilin ti Dios ket iti kasta nagbasolda. Ti kinasukirda ti nangiyeg kadakuada, ken kalpasanna kadagiti kaputotanda, ti pannakakondenar iti ipapatay. Adu a siglo kalpasanna, inlawlawag ni apostol Pablo: “Gapuna no kasano ti iseserrek ti basol ditoy lubong gapu iti maymaysa a tao ken ti ipapatay gapu iti basol, iti kasta ti ipapatay immay kadagiti isuamin a tattao agsipud ta nagbasolda amin.”—Roma 5:12.

Ti linteg ti panagtawid ket da Adan ken ni Eva mabalinda laeng nga iyallatiw kadagiti annakda ti adda kadakuada. Iti pannakaparsuada kabaelanda nga iyallatiw ti kinaperpekto, awan inggana a biag kadagiti masanguanan a kaputotan. Ngem itan ta ti biagda namulitanen iti basol ken ipapatay, saandan a maipatawid dayta a naindaklan a tawid. Ti basol, kinaimperpekto, ken ipapatay nagbalinen a kasasaad ti amin a sangatauan nanipud idi, kasano man ti panangikagumaan ti tao a mangpaatiddog iti kapaut ti biag.

Kaiyariganna, daytoy ket maipadis iti maysa a programa iti kompiuter nga addaan kadagiti biddut, wenno perdi. Malaksid no mailasin ti perdi ken makorihir, ti programa saan nga agandar a siepektibo, ket mabalin a makadidigra ti pagbanaganna. Saan a nailasin ti tao, ken dina nakorihir, ti nakaisigudan a biddut a banag iti di nasayaat a panagandar ti natauan a bagitayo, a nagbanag iti panaglakay ken ipapatay. Nupay kasta, ti Namarsua ti tao, ni Jehova a Dios, nangiyurnos iti panangkorihir iti dayta. Ania ti solusionna?

Impaay ti Dios ti perpekto a natauan a biag ti Anakna, ni Jesu-Kristo, “ti maudi nga Adan,” isu a nangsukat, kaiyariganna, ti orihinal nga Adan kas amatayo ken mannangted-biagtayo. Ngarud, imbes a nakondenartayo a matay kas annak iti managbasol nga Adan, dagiti natulnog a tattao mabalin a maibilangda a maikari nga umawat iti biag nga agnanayon kas annak iti “Agnanayon nga Ama[da],” ni Jesu-kristo. Inlawlawag a mismo ni Jesus: “Ta daytoy ti pagayatan ni Amak, a tunggal maysa a makakita iti Anak ket mamati kenkuana, adda koma biagna nga agnanayon.”—1 Corinto 15:45; Isaias 9:6; Juan 3:16; 6:40.

Iti pagnguduan ti naindagaan a ministeriona, iti kararagna iti nailangitan nga Amana, inwaragawag ni Jesus ti kangrunaan a kasapulan iti pananggun-od itoy a naindaklan a gunggona a biag babaen ti panagkunana: “Daytoy kaipapananna ti biag nga agnanayon, ti pananggun-odda ti pannakaammo kenka, ti maymaysa a pudno a Dios, ken ti imbaonmo, ni Jesu-Kristo.”—Juan 17:3.

“Kas ti Al-aldaw ti Maysa a Kayo”

Panunotenyo ti panangimula iti bukel ti maysa a sequoia ket buyaenyo ti idadakkel dayta iti ginasgasut a pie iti tangatang, ket tagiragsakenyo ti panagdakkelna iti intero a panagbiagna. Kalpasanna panunotenyo ti panagbiag ken ti panangimula iti sabali kalpasan ti rinibribo a tawen ket tagiragsakenyo manen ti panagdakkelna ken ti kinapintasna.

Pudno kadi ti kasta a kapanunotan? Wen pudno, ta daytat’ naibatay iti kari ti Namarsua iti tao, ni Jehova a Dios, isu a nagkuna: “Ta kas kadagiti al-aldaw ti maysa a kayo kastadanto dagiti al-aldaw ti ilik.” (Isaias 65:22) Daytoy a kari makatulong iti panangsungbat iti saludsod a, Kasanot’ kapaut ti panagbiag ti tao? Ti sungbat ket: agtultuloy agingga iti awan inggana a masanguanan, wen, iti kinapudnona agnanayon.—Salmo 133:3.

Maipapaay itan ti imbitasion, kayatna a sawen: “‘Umayka!’ Ket ti mawaw umay koma; ket ti mayat awatenna ti danum ti biag nga awan baybayadna.” (Apocalipsis 22:17) Daytoy ti maysa nga imbitasion nga iyaw-awis ni Jehova a Dios kadagiti amin a nasingpet-panagpuspusona. Ti imbitasion isut’ pananggundaway kadagiti naespirituan a probision ti Dios a maipaay iti biag nga agnanayon iti maysa a paraiso a daga.

Pilienyo kadi nga awaten daytoy nga imbitasion? Ti namnamayo maipaay iti napapaut a biag, ti biag nga agnanayon, agpannuray iti panagpiliyo itan!

[Kahon iti panid 7]

KAPAUT TI PANAGBIAG

Ti maysa a naipasngay idi pagnguduan iti maika-18 a siglo idiay Norte America wenno Makinlaud nga Europa mabalin nga inanamaenna ti agbiag iti 35 wenno 40 a tawen. Itatta, dagiti lallaki idiay Estados Unidos mabalin nga inanamaenda ti agbiag iti agarup 71 ket dagiti babbai iti agarup 78, ket dagiti umasping a rinang-ayan naaramiden kadagiti dadduma a pagilian. Matungtungpalen dagiti kabaelantayo no maipapan iti kapaut ti panagbiag. Ngem adda kadi pagpatinggaan ti panangiyat-atiddog iti kapaut iti panagbiag?

Awan iti nabiit pay a historia ti nagbiag wenno nanginanama nga agbiag agingga iti 500, 300, wenno uray 200 a tawen. Nupay adda dagiti rinang-ayan iti medikal a siensia, ti kapaut iti biag itatta ket nakurang pay a 80. Kaskasdi addada naipadamag nga indibidual a nagbiag agingga iti 140 wenno uray pay 150 a tawen. Ket idi panawen ti Biblia, nagbiag dagiti tattao iti ginasgasut a tawen. Dayta kadit’ maysa a sarsarita wenno leyenda?

Makapainteres, ti The New Encyclopædia Britannica kunaenna a “ti eksakto a kapaut iti biag ti tao ket di pay naammuan.” Kas ilawlawag ti artikulo, a mangibagbaga a dadduma nga indibidual ti nagbiag iti 150, “awan ti natibker a rason iti di panangawat iti posibilidad a dadduma nga indibidual ti mabalin a nagbiag iti 150 a tawen ken maysa a minuto. Ket no maawat ti 150 a tawen ken maysa a minuto, apay a saan a maawat ti 150 a tawen ken dua a minutos, ket agtultuloy pay?” Intuloy a kinuna ti artikulo: “Maibatay iti adda a pannakaammo iti kapaut ti biag, ti eksakto a bilang iti kapaut ti biag ti tao ket saan a naited.”

Aniat’ makunatayo manipud itoy? Basta ti naadal ti medikal a siensia maipapan iti panaglakay ken ipapatay ket naibatay iti kasasaad ti tao kas makitkitatayo itatta. Ti naganat unay a saludsod ket no ti kasasaad ti tao ket kankanayon a kasta wenno daytanto ti agtalinaed a kasta. Ti kari ti Dios ket: “Adtoy! pagbalinek a babbaro dagiti isuamin a bambanag.” Iti napartak-iyaadanina a baro a lubong, “punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Dagidi immuna a bambanag napalabasdan.”—Apocalipsis 21:4, 5.

[Ladawan iti panid 8, 9]

‘Ti maysa a karayan ti danum ti biag, a sumilsilap a kas iti sarming a rumrummuar iti trono ti Dios.’—Apocalipsis 22:1