Panangisaknap iti Kinapudno ti Biblia Idiay Portugal

MANIPUD Caminha iti amianan agingga iti Vila Real de Santo Antônio iti abagatan, rinibribu a de kolor a bangka a pagkalap ti adda iti 800 a kilometro a Kosta Atlantico ti Portugal. Adun a siglo a ‘timmapug [dagiti mangngalap] iti baybay kadagiti baporda,’ a pinagbalinda ti ikan kas kangrunaan a taraon dagiti Portuguese.​—Salmo 107:23.

Iti napalabas a 70 a tawen, mapaspasamak ti sabali pay a kita ti panagkalap idiay Portugal. Okupado dagiti Saksi ni Jehova a mangidandanon iti naimbag a damag kadagiti pinullo a ribu a simboliko nga ikan. (Mateo 4:19) Idi Mayo 1995, adda kangatuan a bilang a 44,650 nga agibumbunannag ti Pagarian​—1 iti agarup 210 nga agindeg. Iti dadduma a siudad, kagudua dayta ti ratio.

Gapu kadagiti adu a trabahador, dagiti teritoria a pangasabaan iti adu a lugar ti mawanwanas iti kada lawas wenno as-asideg pay. Gapuna, nakasigsigo dagiti Saksi a Portuguese nga agaramat iti nagduduma a pamay-an ti pannakisarita tapno iburayda iti sabsabali ti naibatay-Biblia a namnamada. Wen, naawatanda ti kinapateg ti panangipakaammo iti kinapudno ti Biblia iti tunggal pamay-an a posible.​—1 Corinto 9:20-23.

Panangtulong Kadagidiay Relihioso

Sigun iti maysa a sensus idi 1991, 70 porsiento kadagidiay 18 ti tawenda wenno natataengan pay idiay Portugal ti agkuna a Romano Katolikoda. Iti laksid daytoy, bassit ti ammo dagiti tattao maipapan iti Biblia. Kinuna ti warnakan a Jornal de Notícias: “Maysa daytoy kadagiti kadaklan a trahedia iti lubong ti Katoliko: Ti kinaawan ammoda iti Biblia!” Apay a kastoy ti kasasaad? Ti Portuguese a warnakan nga Expresso itudona ti sungbat. Iti panangireportna maipapan iti maysa a taripnong ti 500 a papadi idiay Fátima, kuna ti warnakan: “Sigun iti obispo, nasken nga iwayaan ti padi ti bagina manipud kadagiti nakaad-adu nga aramid tapno maipangpangrunana nga ipasdek manen ti saadna kas ‘manangiwaragawag.’ . . . No aramiden ti padi ti amin-kararua a panangikasaba iti Ebanghelio, awanton panawenna iti aniaman a sabsabali pay nga aramid.”

Iti kasunganina, okupado dagiti Saksi ni Jehova idiay Portugal a mangipakpakaammo iti kinapudno ti Biblia iti tunggal pamay-an a posible. Kas banagna, adu a napasnek a Katoliko ti makagunggun-od iti pannakaammo iti Biblia.

Napasnek a Katoliko ni Carlota ken kameng ti bunggoy dagiti agtutubo iti maysa a narelihiosuan a komunidad. Isut’ maysa met a maestra iti kindergarten a pagtartrabahuan ni Antônio, maysa a Saksi. Kas maysa a regular pioneer, wenno amin-tiempo a ministro, kanayon nga ikagumaan ni Antônio a kasarita dagiti katrabahuanna maipapan iti Biblia kabayatan ti pangngaldaw. Maysa nga aldaw, isut’ pinagsaludsodan ni Carlota maipapan iti pammati iti umap-apuy nga impierno ken ti panagdayaw ken ni Maria. Impakita ni Antônio no ania ti isursuro ti Biblia kadagitoy a tema, ket dayta ti nangrugian ti adu a saritaan a naibatay iti Biblia. Idi tinabunuan ni Carlota ti immuna a pannakigimongna iti lokal a Kingdom Hall, nasdaaw unay. Ngem naggiddan dagiti oras ti gimong iti daydiay relihion a nakaikamenganna. Nautobna a kasapulan a mangngeddeng. Aniat’ aramidenna?

Inummong ni Carlota ti intero a bunggoy dagiti agtutubo ket inlawlawagna manipud iti Biblia no apay nga aglusulos. Binabalawda amin ti pangngeddengna, malaksid iti maysa a balasitang nga agnagan Stela, a nagimdeng a naimbag. Idi nakisarita kenkuana ni Carlota kalpasanna, adu ti insaludsod ni Stela maipapan iti punganay ken panggep ti biag. Inikkan ni Carlota iti libro a Life​—How Did It Get Here? By Evolution or by Creation?a ket rinugianna nga inyadalan iti Biblia.

Kabayatanna, napartak ti naespirituan nga irarang-ay ni Carlota, nabautisaran idi Hunio 1991, ket nangrugi nga agserbi kas regular pioneer innem a bulan kalpasanna. Idi Mayo 1992 nagasawada ken ni Antônio, a nagtultuloyda a nagpayunir iti kabangibang a kongregasion nga addaan iti dakdakkel a pakasapulan. Ket ni Stela? Nabautisaran idi Mayo 1993 ken agserserbi itan kas regular pioneer.

Relihioso unay ni agtutubo a Francisco. Dinomingo a tumabuno iti Misa iti bigat ken Panagrosario iti malem. Nagserbi kas sakristan, a tumultulong iti padi kabayatan ti Misa. Inkarkararagna pay iti Dios nga agbalinto koma a “santo”!

Talaga a kayat ni Francisco ti maaddaan iti Biblia, ket iti maysa nga aldaw, isut’ pinabulodan ti maysa a gayyem. Nasdaaw a makaammo nga adda nagan ti Dios, a Jehova. (Exodo 6:3; Salmo 83:18) Idi nabasana ti Exodo 20:4, 5 nga iparit ti Dios ti panagaramat kadagiti imahen iti panagdaydayaw, ad-adda manen a nasdaaw! Iti pannakakitana a napunno ti simbaan kadagiti imahen, nagkararag a sipapasnek iti Dios tapno matulongan a mangtarus amin iti daytoy a pannakariribuk. Sumagmamano nga aldaw kalpasanna, nakasaritana ti dati a kaeskuelaanna ket pinagsaludsodanna no apay a nagsardeng nga ageskuela iti rabii.

“Tumabtabunoak itan iti nasaysayaat nga eskuelaan a pangrabii,” insungbat ti gayyemna.

“Ania nga eskuelaan dayta, ken ania ti ad-adalem?” insaludsod ni Francisco. Nasdaaw unay iti insungbat ti gayyem.

“Makipagad-adalak iti Biblia iti Kingdom Hall dagiti Saksi ni Jehova,” kinuna kenkuana ti gayyemna. “Kayatmo ti umay?”

Nasdaaw unay ni Francisco iti nakitana iti immuna a pannakigimongna​—naragsak, naisem a ruprupa; agsasarita dagiti tattao iti nakasingsinged, nainggayyeman a wagas; makikatkatugaw dagiti ubbing kadagiti nagannak kadakuada ken agim-imdeng a naimbag iti maipalpalawag.

“Addaak ditoy, a naan-anay a ganggannaet, ket nariknak a kaslaak la paset ti pamilia!” kinuna ni Francisco. Sipud idin, kanayonen a tumabtabuno kadagiti gimong. Agserserbi itan ni Francisco kas maysa a panglakayen iti kongregasion, ken kaduana ni baketna ken ti dua nga annakna, pagragsakanna dagiti naindaklan a kari ti Pagarian iti Sao ti Dios.

Panangiburay iti Kinapudno Kadagiti Kabagian

Nakakalap ni Manuela, maysa a regular pioneer idiay Lisbon, iti adu a naespirituan nga ikan gapu iti kinareggetna a mangasaba a siaasi kadagiti amin, a pakairamanan dagiti kabagian. Mairaman kadakuada ti kabsatna a lalaki, ni José Eduardo, a nasanay iti karate ken panagaramat kadagiti armas. Namin-adu a nagsalungasing iti linteg agingga a naidarum iti 22 a kaso ken nasentensiaan iti 20 a tawen a pannakaibalud. Nakarangranggas unay ta kabuteng pay dagiti padana a balud, ken naibalud nga agmaymaysa iti naiputputong a selda.

Pito a tawen a nagan-anus ni Manuela a nangsarsarungkar ken ni José Eduardo, ngem kanayon a pagkedkedanna ti mensahena manipud iti Biblia. Kamaudiananna, idi naipablaak ti libro a Life​—How Did It Get Here? By Evolution or by Creation?, inawatna dayta, ket nairugi ti panangyadal iti Biblia. Dagus a dakkel ti namalbaliwan ti kababalinna. Makalawas kalpasanna, nangasaba a mismo kadagiti 200 a balud, ken iti simmaganad a lawas kadagiti 600 pay. Pinalubosanda pay a sumarungkar kadagiti padana a balud iti dadduma pay a patakder ti pagbaludan. Gapu iti naisangsangayan a panagbalbaliw iti panagtigtignayna, napaababa ti sentensia iti 15 a tawen. Kalpasan ti 10 a tawen a pannakaibalud, nawayawayaan iti sidong ti probation. Lima a tawen ti napalabas sipud idin, nabautisaran itan a Saksi ni Jehova ni José Eduardo, nga agserserbi kas ministerial nga adipen iti lokal a kongregasion. Pudno a maysa a ‘lobo a makipagnanaed iti kordero’!​—Isaias 11:6.

Gapu iti agtultuloy a panangikagumaanna a mangasaba iti pamiliana, naaddaan ni Manuela iti rag-o a nakatulong ken ni lakayna ken uppat a sabsabali pay a kameng ti pamiliana nga agbalin nga aktibo iti serbisio ni Jehova. Maysa itan ni lakayna a ministerial nga adipen.

“Papanawek Ida iti Kugtar ken Saplit”

Agnanaed ni Maria do Carmo iti kabangibang ti Lisbon idi sinarungkaran dagiti Saksi. Nagustuanna ti nangngeganna ket kiniddawna ken lakayna, ni Antônio, no mabalinna ti makipagadal iti Biblia iti pagtaengan. “Pulos a dimo aramiden dayta!” insungbatna. “No adda madatngak a Saksi ni Jehova ditoy balay, papanawek ida iti kugtar ken saplit.” Nairana pay met a maysa ni Antônio nga instruktor iti karate ken black belter iti maikatlo a tukad. Isu nga inkeddeng ni Maria do Carmo a makipagadal iti Biblia iti sabali a lugar.

Kalpasanna, kasapulan a mapan ni Antônio idiay England para iti walo nga aldaw a panagadal iti karate, ket siaannad nga impan ni Maria do Carmo ti publikasion a Ti Librok dagiti Estoria ti Biblia iti maletana.b Yantangay nawaya ni Antônio iti panagbiahena, binasana ti libro. Idi agawiden, nakaro unay ti panangdayyeg ti bagyo iti eroplano, ket narigatan a nagdisso. Iti kaunaan a gundaway iti panagbiagna, nagkararag ni Antônio ken ni Jehova.

Idi nakaawiden ni Antônio, inawis dagiti Saksi a mangyad-adal ken ni baketna a tumabuno iti gimong. Immanamong ket natakuatanna a mannakigayyemda amin. Nayurnos ti panangyadal iti Biblia, ket iti di nagbayag, nabigbig ni Antônio a kasapulan a mangngeddeng. Nagbanag dayta iti panangidianna a mangisuro iti karate ket rinugianna nga isuro kadagiti estudiantena no kasanot’ agbiag a natalna itan ken iti agnanayon. Maysa kadakuada, a black belter met, ti nabautisaranen a Kristiano.

No maipapan ken Antônio, nabautisaran idi Abril 1991. Maysa nga aldaw kalpasan ti bautismona, nangrugi nga agserbi kas auxiliary pioneer. Innem a bulan kalpasanna, nangrugi nga agserbi kas regular pioneer, ket di nagbayag mangidadaulon iti 12 a panangyadal iti Biblia iti pagtaengan. Idi Hulio 1993, nadutokan kas ministerial nga adipen iti kongregasion.

Iti Teritoria a Masansan a Matartrabaho

Iti adu a paset ti pagilian, linawas wenno as-asideg pay ti pannakatrabaho ti teritoria. Kasano a ‘makakalap’ dagiti Saksi iti adu?

Inkagumaan ni João a kasarita amin a tao iti kada pagtaengan. Idi sarsarungkaranna ti maysa a babai, dinamagna no adda pay dadduma nga agnanaed iti pagtaengan. Simmungbat ti babai nga agnanaed sadiay ni lakayna ken ti dua a babbarona, ngem narigat a makasarita ida gapu ta agtartrabahoda ken iti laeng rabii ti kaaddada iti pagtaengan. Gapuna, intuloy ni João ti panangasabana ken sinarungkaranna ti sabsabali pay iti dayta a lugar. Agarup maysa ket kagudua nga oras kalpasanna, immasideg kenkuana ti maysa a lalaki.

“Kinunam a kayatnak a kasarita,” kinuna ti lalaki ken ni João. “Pangngaasim ta ibagam kaniak no ania ti kayatmo.”

“Dispensarennak, ngem saanka nga am-ammo,” insungbat ni João, a masmasdaaw unay. “Siasinoka?”

“Siak ni Antônio, ket asideg laeng ditoy ti pagnanaedak. Kinunam ken ni nanangko a kayatmo a kasarita ti dadduma pay iti pamilia, isu nga immayak tapno ammuek no aniat’ ibagam.”

Naan-anay a kinasabaan ni João ni Antônio ken rinugianna nga inyadalan iti Biblia. Kalpasan ti maikadua a panagadal, dinamag ni Antônio no mabalin a maangay ti panagadal iti mamindua iti makalawas. Iti uppat a bulan laeng, kimmuyogen ken ni João ket nangrugi a mangikasaba iti naimbag a damag iti lugar a pagnanaedanna. Tallo a bulan kalpasanna, isut’ nabautisaran. Itay laeng nabiit a nangrugi metten ni nanangna a makipagadal iti Biblia. Anian a nagpateg nga ikagumaan a makasarita iti ministerio ti amin a kameng ti sangakabbalayan!

Dagiti kasta a makaparagsak a kapadasan ipakitana a nawadwad pay ti naespirituan a panagkalap a maaramidan kadagiti danum ti Portugal. Binendisionan ni Jehova dagiti nagaget a Saksi sadiay kadagiti rinibu a nabunga a panangyadal iti Biblia. Bayat nga itultuloyda ti agsapul iti ad-adu pay a pamay-an tapno maipakaammo ti kinapudno ti Biblia iti amin, pudno a matungtungpal ita idiay Portugal dagiti sasao ni apostol Pablo kadagiti Kristiano idiay Filipos: “Iti tunggal pamay-an . . . ni Kristo maipabpablaak.”​—Filipos 1:18.

[Dagiti Footnote]

[Mapa iti panid 23]

(Para iti aktual a pannakaurnosna, kitaem ti publikasion)

SPAIN

PORTUGAL

[Dagiti ladawan iti panid 24, 25]

Usaren dagiti Saksi idiay Portugal ti tunggal gundaway tapno maipakaammo ti kinapudno ti Biblia