Salsaludsod Dagiti Agbasbasa

Ti kadi bilin ti Dios a nairekord iti Jeremias 7:16 ipamatmatna a di rumbeng nga ikararagan dagiti Kristiano ti maysa a nailaksid iti kongregasion Kristiano gapu ta di nagbabawi dayta a nakabasol?

Kalpasan nga impaulogna ti panangukomna iti rebelioso a Juda, kinuna ni Jehova ken ni Jeremias: “No maipapan kenka, dika ikararagan daytoy nga ili, saanka met a mangipigsa maigapu kadakuada iti maysa nga agpakpakaasi nga ikkis wenno maysa a kararag wenno uray agdawat kaniak, ta saanakto nga umimdeng kenka.”​—Jeremias 7:16.

Apay nga imparit ni Jehova nga ikararagan ni Jeremias dagiti Israelita? Nalawag a maigapu dayta iti agdadata a panangsalungasingda iti Lintegna. Sipapanayag ken awanan bain a ‘nagtakaw, nangpapatay ken nakikamalala ken nagsapatada a siuulbod ken nangpataudda iti asuk a naisakripisio ken Baal ken sinurotda dagiti sabali a didios.’ Gapuna, kinuna ni Jehova kadagiti awanan iti pammati a Judio: “Ipalladawkayto manipud iti sanguanan ti rupak, kas iti panangipalladawko iti amin a kakabsatyo, ti intero a kaputotan ni Efraim.” Sigurado a di umiso nga ikararag ni Jeremias, wenno ti asinoman, a babawien ni Jehova ti panangukomna.​—Jeremias 7:9, 15.

Mainaig iti dayta, insurat ni apostol Juan no ania ti maiparbeng nga ikararag iti Dios. Umuna, impanamnamana kadagiti Kristiano: “Uray ania ti dawatentayo maitunos iti pagayatanna, denggennatayo.” (1 Juan 5:14) Ket no maipapan iti panangikararag iti sabsabali, intuloy ni Juan: “No ti asinoman makitana ni kabsatna nga agbasbasol iti basol a saan nga agbanag iti ipapatay, isu agdawatto, ket itednanto kenkuana ti biag, wen, kadagidiay saan nga agbasbasol iti agbanag iti ipapatay. Adda basol nga agbanag iti ipapatay. Maipapan iti dayta a basol diak ibaga kenkuana nga idawatanna.” (1 Juan 5:16) Dinakamat met ni Jesus ti basol a “saanto a mapakawan,” ti panangtabbaaw iti nasantuan nga espiritu.​—Mateo 12:31, 32.

Kayat kadi a sawen daytoy a nakaaramid iti basol nga “agbanag iti ipapatay” ti amin a nailaksid iti kongregasion Kristiano gapu ta dida nagbabawi idi, iti kasta saanda a maiparbeng a maikararagan? Mabalin a saan a kasta agsipud ta adda dagiti kasta a panagbasol a saan nga agbanag iti ipapatay. Kinapudnona, narigat nga ilasin no kasta a talaga. Maysa a gagangay a pagarigan isu ni Ari Manases iti Juda. Nangbangon kadagiti altar dagiti didiosen, indatonna dagiti annakna, nakiraman iti espiritismo, ken nangikabil kadagiti kinitikitan a ladawan iti templo ni Jehova. Kinapudnona, kunaen ti Biblia nga inaramid ni Manases ken dagiti tattao “ti dakes nga ad-adda pay ngem kadagiti nasion a tinalipupos ni Jehova manipud sanguanan ti annak ti Israel.” Gapu kadagitoy, dinusa ni Jehova ni Manases babaen ti panangipalubosna a makawaran ken makautibo idiay Babilonia.​—2 Ar-ari 21:1-9; 2 Cronicas 33:1-11.

Ngem agbanag kadi iti ipapatay dagiti basol ni Manases gapu ta nadagsen dagita? Agparang a saan, agsipud ta intuloy a kinuna ti salaysay maipapan kenkuana: “Apaman a marigrigatan iti dayta, pinaluknengna ti rupa ni Jehova a Diosna ket impakpakumbabana ti bagina iti kasta unay gapu iti Dios dagidi ammana. Ket nagkarkararag Kenkuana, iti kasta impalubosna nga isu mapagpakaasianna ket dinengngegna ti panagkiddawna iti parabur ket isu insublina idiay Jerusalem iti kinaarina; ket naammuan ni Manases a ni Jehova ti pudno a Dios.”​—2 Cronicas 33:12, 13.

No kasta, ditay koma panunoten a nakaaramid ti maysa a tao iti basol nga agbanag iti ipapatay gapu ta nailaksid iti kongregasion. Mabalin nga agkasapulan iti panawen sakbay a maiparangarang ti pudno a kasasaad ti pusona. Kinapudnona, masansan a naikuna a ti maysa a panggep ti panangilaksid ket tapno pagpanunotenna ti nakabasol, iti kasta agbabawi koma ken agbalbaliw.

Gapu ta awanen dayta a tao iti kongregasion, nalabit a ti umuna a makakita iti panagbalbaliw ti puso ken kababalinna isu dagiti asideg kenkuana, kas iti asawa wenno dagiti kameng ti pamiliana. Mabalin a panunoten dagiti makakita iti kasta a panagbalbaliw a saan a nakaaramid dayta a tao iti basol nga agbanag iti ipapatay. Mabalin a matignayda a mangikararag a mapabileg koma dayta a tao babaen ti naipaltiing a Sao ti Dios ken tulongan koma ni Jehova ti nakabasol maitunos iti pagayatanna.​—Salmo 44:21; Eclesiastes 12:14.

Nupay talaga a makitkita ti dadduma nga adda umdas a pammaneknek nga agbabbabawi ti nakabasol, mabalin a saan pay a makita dayta ti kaaduan iti kongregasion. Mabalin a masdaaw, maburibor, wenno maitibkolda pay ketdi no mangngegda a publiko nga ikararagan ti kabsat ti maysa a nakabasol. Gapu iti dayta, ti nakabasol ket pribado koma nga ikararagan dagidiay matignay a mangaramid iti dayta. Aniaman a panagrang-ay iti kasasaad ti nagbasol, maipabiang dayta kadagiti responsable a panglakayen iti kongregasion.

[Ladawan iti panid 31]

Napakawan dagiti nadagsen a basol ni Manases idi nagpakumbaba iti imatang ni Jehova

[Picture Credit Line iti panid 30]

Nakopia manipud iti Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s