NGIPEN

Natangken a banag a buklen ti tulang a naikapet iti ngiwat; maar-aramat a pagngalngal iti taraon ken us-usaren pay dagiti animal kas igamda.

Gapu ta agngangabit ken patay ti matalek nga adipen ti Dios a ni Job idi agsagsagaba, naikunana: “Makatalawak a kas iti kudil ti ngipenko.” (Job 19:20) Agparang nga ibagbaga laeng ni Job a gistay saanen a nakatalaw wenno nakalasat. Ti gundawayna a nakatalaw ket kas kaingpis ti kudil dagiti ngipenna, kayatna a sawen, kas iti “kudil” ti banag a kasla awanan kudil.

Ti panagngaretnget wenno panagngariet dagiti ngipen masansan a maar-aramat a mangipasimudaag iti pungtot (Job 16:9; Ara 7:54) wenno tuok ken pannakaupay. (Mt 8:12; 13:42, 50; 22:13; 24:51; 25:30) Ti kasta a panagngaretnget ket nalabit nabuyogan iti napait a sasao ken panangranggas iti daydiay pagpungpungtotan.

Iti Amos 4:6, ti sasao a “kinadalus dagiti ngipen” ket kaas-asping ti “kinakirang iti tinapay,” a mangipaspasimudaag kadagiti panagbisin.

Dagiti ngipen isimboloda met ti pannakabalin ti maysa a nasion wenno maysa nga ili a mangdadael. (Da 7:5, 7, 19; Joe 1:6; Apo 9:8) Narungsot a leon ti nangyaspingan ni David kadagiti nadangkes a kabusor ti tao a nalinteg, ket indawatna iti Dios a kabilenna ida iti pangal ken burakenna dagiti ngipenda. Iti kasta, saandan a kabaelan ti mangdangran. (Sal 3:7; 58:6) Nailadawan dagiti ulbod a mammadto ti Israel kas naagum ken narawet, ‘a mangikagkagat kadagiti ngipenda,’ ken mangsansantipikar iti gubat a pangdadael iti asinoman a di mangpakan kadakuada.​—Mik 3:5; idiligyo ti Eze 34:2, 3; Mt 7:15; Ara 20:29.

Kadagidi tiempo sakbay ti pannakadadael ti Jerusalem, ti kadawyan a pagkukuna dagiti tattao ket: “Dagiti amma isuda ti mangan kadagiti naata nga ubas, ngem dagiti ngipen ti annak isuda ti maalino.” (Jer 31:29; Eze 18:2-4) Us-usarenda idi daytoy tapno ipakita a saan nga isuda ti makimbasol iti panagsagaba ti nasion gapu iti kinadakes dayta, nga ibagbagada a ti mapaspasaranda ket bunga ti inaramid dagiti ammada.