ANATOT

1. Maysa a Benjamita, anak ni Bequer.​—1Cr 7:8.

2. Maysa kadagiti pannakaulo dagiti umili a ti kaputotanna, no saan nga isu a mismo, pinasingkedanna ken sinelioanna ti mapagtalkan nga urnos idi kaaldawan ni Nehemias, a magnada iti dana ti pudno a panagdaydayaw ken Jehova.​—Ne 9:38; 10:1, 19.

3. Maysa a siudad dagiti Levita iti teritoria ni Benjamin. (Jos 21:17, 18; 1Cr 6:60) Nataginayon dayta a nagan ta inaramat ti maysa a bassit a purok ti ʽAnata a nakurang a 5 km (3 mi) iti amianan nga amianan-a-daya ti Jerusalem, nupay ti orihinal a disso ket naikuna nga isu ti Ras el-Kharrubeh agarup 800 m (0.5 mi) iti abagatan a laud ti purok. Manipud iti turod a nagsaadanna, matannawagan ti Ginget Jordan ken ti makin-amianan a paset ti Asin a Baybay. Anatot ti pagnanaedan ti dua kadagiti nabileg a lallaki ni David. (2Sm 23:27; 1Cr 12:3) Idiay Anatot ti nangidestieruan ni Solomon ken Abiatar, iti kasta pinagpatinggana ti linia ti nangato a papadi manipud balay ni Eli. (1Ar 2:26) Maysa ti Anatot kadagiti naparigatan a siudad kadagiti panangraut dagiti buyot ti Asiria.​—Isa 10:30.

Naggapu ni Jeremias idiay Anatot ngem nagbalin a ‘mammadto nga awan dayawna’ iti tengnga dagiti bukodna a kailian, ta impangtada ti biagna gapu iti panangisaona iti mensahe ni Jehova a kinapudno. (Jer 1:1; 11:21-23; 29:27) Kas nagbanaganna, nangipadto ni Jehova iti didigra maipaay iti siudad, ket napasamak daytoy iti naikeddeng a tiempo idi a ti Babilonia pinarmekna ti daga. (Jer 11:21-23) Sakbay ti pannakarba ti Jerusalem, babaen ti legal a kalinteganna ginatang ni Jeremias ti benneg ti daga ti kasinsinna idiay Anatot nga agserbi a pagilasinan nga agsublidanto manipud pannakaidestiero. (Jer 32:7-9) Karaman ti 128 a lallaki ti Anatot iti immuna a bunggoy dagidiay nagsubli a kadua ni Zorobabel manipud pannakaidestiero; ket maysa ti Anatot kadagiti il-ili a napagnaedan manen, iti kasta natungpal ti padto ni Jeremias.​—Esd 2:23; Ne 7:27; 11:32.