KASURATAN, II

Naisurat a katulagan a siuumiso a napirmaan ken no dadduma naselioan, a naglaon kadagiti legal a kondision maipaay iti pannakaibanag ti maysa a nairanta a panggep; ti dokumento a maaramat iti panangyallatiw kadagiti sanikua. Iti Biblia, ti kakaisuna a pannakausar ti Hebreo a sao a seʹpher iti daytoy a partikular nga anag ket mainaig iti pananggatang ni Jeremias iti maysa a talon manipud iti kasinsinna a ni Hanamel.​—Jer 32:6-15.

Makapainteres dagiti detalye iti pannakaaramid daytoy a kasuratan. Ti kuarta a panggatang, “pito a siklo ken sangapulo a kapisi a pirak,” ket natimbang iti sanguanan dagiti saksi. (Jer 32:9) No daytoy a nagtulagan a gatad a ‘pito ken sangapulo’ ket maibilang a legal a sasao a kaipapananna ti 17 a siklo a pirak (a. $37), nainkalintegan idi a gatad dayta, no ikabilangan ti tiempo ken dagiti kasasaad idi mailako ti sanikua. Tiempo idi ti gubat ken nakaro a bisin (sumagmamano laengen a bulan sakbay ti panangkautibo ni Nabucodonosor iti Jerusalem).

Idi naibayad ti kuarta, dua a kasuratan (maipagarup nga agpada) ti naaramid ‘maitunos iti hudisial a bilin ken kadagiti legal nga alagaden.’ Ti maysa kadagitoy ket pagaammo kas “kasuratan ti pananggatang, daydiay naselioan,” ket ti sabali pay naawagan “daydiay nabaybay-an a silulukat.” (Jer 32:11) Ti laeng immuna a kasuratan ti naikuna a pinirmaan dagiti saksi, a ti intero a transaksion naaramid iti “imatang dagiti amin a Judio a situtugaw iti Paraangan ti Guardia.” (Jer 32:12) Kalpasanna, naikabil dagitoy dua a kasuratan iti maysa a basehas a damili tapno maitalimeng.​—Jer 32:14.

Praktikal unay ti kaugalian a panangaramid iti dua nga agpadpada a kasuratan ngem maysa laeng ti maselioan. Yantangay nabay-an a silulukat ti maysa a kopia, mabalin a kitaen dayta dagiti interesado a dasig. No bilang madadael, wenno mapagduaduaan ti kinaumisona, wenno no maatap a nabaliwan dayta, ti naselioan a kopia mabalin nga idatag kadagiti ukom ti siudad; kalpasan a masukimatda ti selio, luktanda dayta ket pagdiligenda dagiti dua a kopia.