SESAC

Nalabit simboliko a nagan ti Babilonia. (Jer 25:26; 51:41) Sigun iti maysa a singasing, ti Sesac kaipapananna ti “Gambang ti Ruanganna,” ket mayanatup daytoy iti Babilonia. Adda dagiti mangibaga a ti “Sesac” intakderanna ti SiskuKI iti maysa a daan a naarian a pagipasalistaan ti Babilonia. Ti Sisku wenno Siska ket mabalin a maysa a distrito ti nagkauna a Babilonia. Nupay kasta, sigun iti nabayagen a patpatien dagiti Judio, ti Sesac ket maysa a nailemmeng a kaipapanan ti Hebreo a nagan a Babel (wenno, Babilonia), babaen iti pamay-an a pagaammo kas athbash. Sigun iti daytoy a kriptograpiko a sistema, nailimed ti pudpudno a nagan babaen ti pannakasukat ti maudi a letra ti Hebreo nga alpabeto (taw) iti umuna a letra (ʼaʹleph), ket ti maikadua iti maudi a letra (shin) masuktan iti maikadua a letra (behth), ken agpatpatuloy. Iti kasta, iti “Babel,” ti tunggal behth (b) masuktan iti shin (sh), ket ti laʹmedh (l) masuktan iti kaph (kh), iti kasta agbalin a She·shakhʹ. Ti nagan a Sesac mabalin nga ipasimudaagna met ti pannakaibabain, a dayta ti naikeddeng a mapasamak iti Babilonia.​—Jer 25:26, Rbi8 ftn; Soncino Books of the Bible, inurnos ni A. Cohen, London, 1949.