Maymaysa nga Arban, Maymaysa a Pastor

“Dakayo a simmurot kaniak agtugawkayto met iti sangapulo ket dua a trono, a manguk-ukom iti sangapulo ket dua a tribu ti Israel.”​—MAT. 19:28.

 1. Ania ti nangibilangan ni Jehova kadagiti kaputotan ni Abraham, ken apay a dina kayat a sawen dayta a naan-anay nga inlaksidna dagiti tattao iti sabali a nasion?

NI Jehova inayatna ni Abraham. Gapuna, sisusungdo nga inayatna met dagiti kaputotan ni Abraham. Iti nasurok a 15 a siglo, ti nasion ti Israel a kaputotan ni Abraham ti pinilina nga ili ken imbilangna kas ‘naisangsangayan a sanikuana.’ (Basaen ti Deuteronomio 7:6.) Kayat kadi a sawen dayta a naan-anay nga inlaksid ni Jehova dagiti tattao iti sabali a nasion? Saan. Idi a tiempo, dagiti saan nga Israelita nga agtarigagay nga agserbi ken Jehova napalubosanda a makitimpuyog iti dayta a naisangsangayan a nasion. Dagita a nakomberte, wenno proselita, ket maibilang a paset dayta a nasion. Masapul a tratuen ida dagiti Israelita a kas kakabsatda. (Lev. 19:33, 34) Ken maikalikagum kadakuada a tungpalenda ti amin a linteg ni Jehova.​—Lev. 24:22.

 2. Ania a makapasiddaaw a sasao ti imbaga ni Jesus, ken ania dagiti tumaud a saludsod?

² Ngem nasdaaw dagiti Judio idi kinuna kadakuada ni Jesus: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mat. 21:43) Siasino ti mangbukel iti dayta a baro a nasion, ken ania ti epekto kadatayo daytoy a panagbalbaliw?

Ti Baro a Nasion

3, 4. (a) Kasano a tinukoy ni apostol Pedro ti baro a nasion? (b) Siasino ti mangbukel iti dayta a baro a nasion?

³ Nalawag a tinukoy ni apostol Pedro daytoy a baro a nasion. Insuratna kadagiti padana a Kristiano: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna.” (1 Ped. 2:9) Kas naipadto, dagiti natural a Judio a nangakseptar ken Jesus kas Mesias ti immuna a nagbalin a kameng dayta a baro a nasion. (Dan. 9:27a; Mat. 10:6) Idi agangay, adu a saan nga Israelita ti nagbalin a kameng dayta a nasion, yantangay kinuna ni Pedro: “Idi naminsan saankayo a maysa nga ili, ngem itan ket ili ti Dios.”​—1 Ped. 2:10.

⁴ Siasino ti tuktukoyen ditoy ni Pedro? Iti rugi ti suratna, kinunana: “[Ti Dios] impaayannatayo iti baro a pannakayanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo.” (1 Ped. 1:3, 4) Gapuna, daytoy a baro a nasion ket buklen dagiti napulotan a Kristiano nga addaan iti nailangitan a namnama. Isuda ti “Israel ti Dios.” (Gal. 6:16) Iti sirmata ni apostol Juan, nakitana a dagitoy a naespirituan nga Israelita ket agdagup iti 144,000. “Nagatang dagitoy manipud iti sangatauan kas umuna a bungbunga iti Dios ken iti Kordero” tapno agserbida kas “papadi” ken “makipagturaydanto [ken Jesus] iti sangaribu a tawen.”​—Apoc. 5:10; 7:4; 14:1, 4; 20:6; Sant. 1:18.

Adda Pay Kadi Dadduma a Karaman iti Dayta?

 5. (a) Siasino ti tuktukoyen ti ebkas nga “Israel ti Dios”? (b) Apay a saan a limitado ti pagaplikaran ti termino nga “Israel”?

⁵ Nalawag ngarud a dagiti laeng napulotan a Kristiano ti tuktukoyen ti ebkas nga “Israel ti Dios” iti Galacia 6:16. Ngem adda kadi dagiti gundaway nga inusar ni Jehova ti nasion ti Israel a mangiladawan kadagiti dadduma pay a Kristiano malaksid kadagiti napulotan? Masarakan ti sungbat kadagiti sasao ni Jesus kadagiti matalek nga apostolna: “Mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian, tapno mabalinyo ti mangan ken uminum iti lamisaanko idiay pagariak, ket agtugawkayo kadagiti trono tapno ukomenyo ti sangapulo ket dua a tribu ti Israel.” (Luc. 22:28-30) Mapasamak dayta bayat ti “pannakaparsua manen,” wenno iti tiempo ti pannakapabaro bayat ti Milenio a Panagturay ni Kristo.​—Basaen ti Mateo 19:28.

6, 7. Siasino ti tuktukoyen dagiti sasao a “sangapulo ket dua a tribu ti Israel” iti konteksto ti Mateo 19:28 ken Lucas 22:30?

⁶ Dagiti 144,000 agserbidanto kas nailangitan nga ar-ari, papadi, ken uk-ukom bayat ti Sangaribu a Tawen a Turay. (Apoc. 20:4) Siasino dagiti ukomen ken iturayanda? Sigun iti Mateo 19:28 ken Lucas 22:30, ukomenda ti “sangapulo ket dua a tribu ti Israel.” Siasino ti iladawan ti “sangapulo ket dua a tribu ti Israel” iti daytoy a konteksto? Iladawanda ti amin nga addaan iti naindagaan a namnama​—dagidiay nangipakita iti pammati iti daton ni Jesus ngem saanda a karaman iti klase naarian a papadi. (Ti tribu ni Levi ket saan a karaman iti listaan ti 12 a tribu ti natural nga Israel.) Dagidiay iladawan ti 12 a tribu ti Israel iti daytoy a konteksto ket dagidiay mangsagrap kadagiti naespirituan a gunggona nga itden ti panagserbi ti 144,000 kas papadi. Pasetda met ti nasion ti Dios, ken ipatpateg ken awatenna ida. Maitutop a mayarigda iti nagkauna nga ili ti Dios.

⁷ Saan ngarud a pakasdaawan a kalpasan a nakita ni apostol Juan dagiti 144,000 a naespirituan nga Israel a permanente a naselioan sakbay ti dakkel a rigat, nakitana met ti di mabilang a “dakkel a bunggoy,” a naggapu “manipud kadagiti amin a nasion.” (Apoc. 7:9) Makalasatdanto iti dakkel a rigat nga agturong iti Milenio a Panagturay ni Kristo. Kaduadanto ti binilion a mapagungar. (Juan 5:28, 29; Apoc. 20:13) Isuda amin ti mangbukel iti simboliko a “sangapulo ket dua a tribu ti Israel” nga ukomen ni Jesus agraman ti 144,000 a kakaduana nga agturay.​—Ara. 17:31; 24:15; Apoc. 20:12.

 8. Kasano a dagiti pasamak iti tinawen nga Aldaw ti Panangabbong iyanninawda ti pagnaigan dagiti 144,000 ken ti dadduma pay iti sangatauan?

⁸ Dayta a pagnaigan ti 144,000 ken ti dadduma pay iti sangatauan ket nayanninaw kadagiti pasamak iti tinawen nga Aldaw ti Panangabbong. (Lev. 16:6-10) Umuna iti amin, maikalikagum iti nangato a padi a mangisakripisio iti maysa a toro kas daton gapu iti basol agpaay iti “bagina ken iti balayna.” Iti kasta, agaplikar nga umuna ti daton ni Jesus iti sangakabbalayan dagiti katulonganna a papadi, dagidiay makipagserbi kenkuana idiay langit. Kasta met, iti nagkauna nga Aldaw ti Panangabbong, dua a kalding ti maidaton agpaay kadagiti basol ti dadduma nga Israelita. Iti daytoy a kaso, ti napadian a tribu iladawanda ti 144,000, ket ti dadduma pay nga Israelita iladawanda ti amin nga addaan iti naindagaan a namnama. Dayta ti mangpaneknek a ti termino a “sangapulo ket dua a tribu ti Israel” iti Mateo 19:28 ket agaplikar, saan a kadagiti napulotan iti espiritu a katulongan a papadi ni Jesus no di ket kadagiti dadduma pay a mangipakpakita iti pammati iti daton ni Jesus.a

 9. Siasino ti iladawan dagiti papadi iti sirmata ni Ezequiel maipapan iti templo, ken siasino ti iladawan dagiti Israelita a saan a kameng ti napadian a tribu?

⁹ Usigenyo ti sabali pay a pagarigan. Naipaayan ni propeta Ezequiel iti nalawa ti saklawenna a sirmata maipapan iti templo ni Jehova. (Ezeq., kap. 40-48) Iti dayta a sirmata, agserserbi dagiti papadi iti templo, a mangipapaayda iti instruksion ken umaw-awatda iti balakad ken disiplina ni Jehova agpaay iti ilina. (Ezeq. 44:23-31) Iti dayta met la a sirmata, mapan agdayaw ken agidaton dagiti miembro ti nagduduma a tribu. (Ezeq. 45:16, 17) Iti daytoy ngarud a konteksto, dagiti papadi iladawanda dagiti napulotan, idinto a dagiti Israelita a saan a kameng ti napadian a tribu iladawanda dagidiay addaan iti naindagaan a namnama. Ipaganetget ti sirmata a dagiti dua a grupo sangsangkatunos nga agtrabahoda, a ti klase papadi ti mangidaulo iti nasin-aw a panagdayaw.

10, 11. (a) Ania a makapabileg iti pammati a kaitungpalan ti sasao ni Jesus ti naammuantayon? (b) Ania a saludsod ti tumaud maipapan iti sabsabali a karnero?

¹⁰ Dinakamat ni Jesus ti “sabsabali a karnero” a saan a karaman iti “pagyaponan” nga ayan ti “bassit nga ipastoran” dagiti napulotan a pasurotna. (Juan 10:16; Luc. 12:32) Kinunana: “Masapul met nga iyegko dagidiay, ket imdengandanto ti timekko, ket agbalindanto a maymaysa nga arban, maymaysa a pastor.” Anian a makapabileg iti pammati a makita ti kaitungpalan dagita a sasao! Napagtipon ti dua a grupo​—ti bassit a grupo dagiti napulotan ken ti dakkel a bunggoy ti sabsabali a karnero. (Basaen ti Zacarias 8:23.) Nupay ti sabsabali a karnero saanda nga agserserbi iti makin-uneg a paraangan ti naespirituan a templo, agserserbida iti makinruar a paraangan dayta a templo.

¹¹ Ngem yantangay adda dagiti gundaway nga usaren ni Jehova dagiti nagkauna nga Israelita a saan a kameng ti napadian a tribu tapno iladawanna ti sabsabali a karnero, kayatna kadi a sawen a makiraman met kadagiti emblema ti Memorial dagiti addaan iti naindagaan a namnama? Usigentayo ita ti sungbat dayta a saludsod.

Ti Baro a Tulag

12. Ania a baro nga urnos ti impakpakauna ni Jehova?

¹² Impakpakauna ni Jehova ti baro nga urnos agpaay iti ilina idi kinunana: “Daytoy ti tulag a patalgedakto iti balay ti Israel kalpasan dagidiay nga aldaw. . . . Ikabilkonto ti lintegko iti unegda, ket iti pusoda isuratkonto dayta. Ket agbalinakto a Diosda, ket isuda agbalindanto nga ilik.” (Jer. 31:31-33) Babaen daytoy a baro a tulag, ti kari ni Jehova ken ni Abraham ket maaddaan iti nadayag ken agpaut a kaitungpalan.​—Basaen ti Genesis 22:18.

13, 14. (a) Siasino dagiti karaman iti baro a tulag? (b) Siasino dagiti magunggonaan iti dayta, ken kasano a ‘kumpetda’ iti dayta a baro a tulag?

¹³ Dinakamat ni Jesus daytoy a baro a tulag iti rabii sakbay ti ipapatayna: “Daytoy a kopa kaipapananna ti baro a tulag babaen ti bileg ti darak, a maiparukpok maigapu kadakayo.” (Luc. 22:20; 1 Cor. 11:25) Karaman kadi ti amin a Kristiano iti daytoy a baro a tulag? Saan. Adda laeng sumagmamano a karaman iti dayta, kas kadagiti apostol nga imminum iti kopa iti dayta a rabii.b Nangaramid met ni Jesus iti sabali pay a tulag kadakuada, ti pannakipagturayda kenkuana iti Pagarianna. (Luc. 22:28-30) Kaduadanto ni Jesus iti Pagarianna.​—Luc. 22:15, 16.

¹⁴ Dagidiay met ngay agbiag ditoy daga nga iturayan ti pagarianna? Magunggonaanda met iti baro a tulag. (Gal. 3:8, 9) Nupay saanda a makiraman, ‘kumpetda’ iti dayta a tulag babaen ti panangtungpalda kadagiti kalikagumna, kas impadto ni propeta Isaias: “Dagiti ganggannaet a nangitipon ti bagbagida ken Jehova tapno agserbida kenkuana ken tapno ayatenda ti nagan ni Jehova, tapno agbalinda nga ad-adipen kenkuana, amin dagidiay mangsalsalimetmet iti sabbath tapno saan a tabbaawan dayta ken kumkumpet iti tulagko, iyegkonto met ida iti nasantuan a bantayko ket pagrag-oek ida iti uneg ti balayko a pagkararagan.” Kalpasanna, kinuna ni Jehova: “Ta ti bukodko a balay maawaganto a mismo iti balay a pagkararagan maipaay kadagiti amin nga ili.”​—Isa. 56:6, 7.

Siasino Dagiti Rumbeng a Makiraman?

15, 16. (a) Sigun ken apostol Pablo, aniada a pribilehio ti tagiragsaken dagidiay karaman iti baro a tulag? (b) Apay a saan a makiraman kadagiti emblema ti Memorial dagidiay addaan iti naindagaan a namnama?

¹⁵ Dagiti karaman iti baro a tulag ‘addaanda iti kinatured iti dalan a sumrek iti nasantuan a disso.’ (Basaen ti Hebreo 10:15-20.) Isuda dagiti ‘umawat iti maysa a pagarian a di mabalin a gunggonen.’ (Heb. 12:28) Gapuna, dagidiay laeng agbalin nga ar-ari ken papadi idiay langit a kadua ni Jesu-Kristo ti rumbeng nga uminum iti “kopa” a mangiladawan iti baro a tulag. Dagitoy a karaman iti baro a tulag isuda ti naikari nga ikasar ti Kordero. (2 Cor. 11:2; Apoc. 21:2, 9) No maipapan iti amin a dadduma pay a tumabuno iti tinawen a Memorial, sidadayaw nga agpaliiwda ken saanda a makiraman kadagiti emblema.

¹⁶ Tulongannatayo met ni Pablo a mangtarus a dagidiay addaan iti naindagaan a namnama saanda a makiraman kadagiti emblema ti Memorial. Kinunana kadagiti napulotan a Kristiano: “Ta no masansan a kanenyo daytoy a tinapay ken uminumkayo itoy a kopa, iwarwaragawagyo ti ipapatay ti Apo, agingga iti idadatengna.” (1 Cor. 11:26) Kaano ti ‘idadateng’ ti Apo? Inton alaenna ti maudi a kameng dagiti napulotan a klase nobia ken ipanna iti nailangitan a pagtaenganda. (Juan 14:2, 3) Nalawag nga agpatingganto ti tinawen a panangrambak iti Pangrabii ti Apo. “Dagiti natda” iti bin-i ti babai nga adda pay la ditoy daga ti agtultuloy a makiraman iti dayta a pangrabii agingga a maawatda amin ti nailangitan a gunggonada. (Apoc. 12:17) No dagidiay agbiag nga agnanayon ditoy daga ket maikari a makiraman kadagiti emblema, agnanayon koma ti panangrambak iti Memorial.

“Pudno nga Agbalindanto nga Ilik”

17, 18. Kasano a natungpal ti padto iti Ezequiel 37:26, 27?

¹⁷ Impakauna ni Jehova ti panagkaykaysa ti ilina babaen kadagitoy a sasao: “Mamatalgedakto kadakuada iti tulag iti kappia; di nakedngan ti kapautna a tulag ti maaddanto kadakuada. Ket isaadkonto ida ken paaduek ida ket ikabilko ti santuariok iti tengngada agingga iti tiempo a di nakedngan. Ket ti tabernakulok pudno nga addanto kadakuada, ket pudno unay nga agbalinakto a Diosda, ket isuda agbalindanto nga ilik.”​—Ezeq. 37:26, 27.

¹⁸ Amin nga adipen ti Dios ket addaan iti pribilehio a magunggonaan iti pannakatungpal daytoy a nakaskasdaaw a kari, ti tulag agpaay iti Nakristianuan a talna. Wen, impanamnama ni Jehova ti talna kadagiti amin a natulnog nga adipenna. Nabatad kadakuada ti bunga ti espirituna. Adda kadakuada ti santuariona, nga iladawan ti Nakristianuan a panagdayaw. Pudno a nagbalinda nga ilina gapu ta tinallikudanda ti amin a kita ti idolatria ket ni laeng Jehova ti pagdaydayawanda a Dios.

19, 20. Siasino ti karaman iti aw-awagan ni Jehova nga “ilik,” ken ania ti pinagbalin a posible ti baro a tulag?

¹⁹ Anian a makaparagsak a maimatangan daytoy a panagkaykaysa ti dua a grupo iti kaaldawantayo! Uray saan a nailangitan ti namnama dagiti umad-adu a dakkel a bunggoy, maragsakanda a makitimpuyog kadagiti addaan iti kasta a namnama. Nakikaduada iti Israel ti Dios. Iti panangaramidda iti kasta, karamanda kadagidiay aw-awagan ni Jehova nga “ilik.” Kadakuada a natungpal daytoy a padto: “Adu a nasion ti sigurado a maikapponto ken Jehova iti dayta nga aldaw, ket pudno nga agbalindanto nga ilik; ket agtaengakto iti tengngam.”​—Zac. 2:11; 8:21; basaen ti Isaias 65:22; Apocalipsis 21:3, 4.

²⁰ Babaen ti baro a tulag, pinagbalin ni Jehova a posible amin dagita. Minilion a tattao manipud iti nagduduma a nasion ti nagbalin a paset ti naanamongan nga ili ni Jehova. (Mik. 4:1-5) Determinadoda a mangsalimetmet iti dayta a tulag babaen ti panangbigbigda kadagiti urnosna ken panagtulnogda kadagiti kalikagumanna. (Isa. 56:6, 7) Iti panangaramidda iti dayta a kadua ti Israel ti Dios, matagiragsakda dagiti nabaknang a bendision nga itden ti agtultuloy a talna. Sapay koma ta matagiragsakyo dayta, ita ken iti agnanayon!

[Footnotes]

Malagipyo Kadi?

• Siasino dagiti “sangapulo ket dua a tribu ti Israel” nga ukomento ti 144,000?

• Ania ti pakainaigan dagiti napulotan ken ti sabsabali a karnero no iti baro a tulag?

• Maikari kadi a makiraman kadagiti emblema iti Memorial ti amin a Kristiano?

• Ania a panagkaykaysa ti naipadto a mapasamak iti kaaldawantayo?

[Graph/Dagiti Ladawan iti panid 25]

(Para iti aktual a pannakaurnosna, kitaem ti publikasion)

Adu ita ti agserserbi a kadua ti Israel ti Dios

7,313,173

4,017,213

1,483,430

373,430

1950 1970 1990 2009