Ti kangrunaan a mensahe ti Biblia ket maipapan iti Pagarian ti Dios. Usarento ni Jehova dayta a Pagarian a mangitungpal iti pagayatanna para iti daga. Ania dayta a Pagarian? Kasanotayo nga ammo nga agturturay dayta itan? Ania dagiti naaramidannan? Ken anianto dagiti aramidenna iti masanguanan? Masungbatan dagitoy a saludsod iti daytoy a leksion ken iti sumaruno a dua a leksion.

1. Ania ti Pagarian ti Dios, ken asino ti Ari dayta a Pagarian?

Ti Pagarian ket maysa a gobierno a ni Jehova a Dios ti nangipasdek, wenno nangbukel. Ti Ari dayta a Pagarian a ni Jesu-Kristo ket agturay manipud langit. (Mateo 4:17; Juan 18:36) Kuna ti Biblia maipapan ken Jesus: “Agnanayonto nga agturay kas Ari.” (Lucas 1:32, 33) Kas Ari ti Pagarian ti Dios, iturayanto ni Jesus ti amin ditoy daga.

2. Siasino dagiti kadua ni Jesus nga agturay?

Saan nga agmaymaysa ni Jesus nga agturay. Dagiti tattao manipud iti ‘tunggal tribu, lengguahe, ili, ken nasion [ket] agturayto kas ar-ari iti daga.’ (Apocalipsis 5:9, 10) Mano ti kakaduanto ni Kristo nga agturay? Manipud idi immay ni Jesus ditoy daga, minilionen a Kristiano ti nagbalin a pasurotna. Ngem 144,000 laeng ti kadua ni Jesus nga agturay idiay langit. (Basaen ti Apocalipsis 14:1-4.) Amin a dadduma pay a Kristiano ditoy daga ket iturayanto ti Pagarian.​—Salmo 37:29.

3. Kasano a ti Pagarian ti Dios ket adayo a nasaysayaat ngem iti gobierno ti tao?

Padpadasen dagiti agtuturay nga agaramid iti naimbag, ngem saanda a kaya nga aramiden ti amin a kayatda. Inton agangay, suktan ida dagiti agtuturay a mabalin a saan nga interesado iti pagimbagan dagiti iturturayanda. Ngem ti Ari ti Pagarian ti Dios, ni Jesus, ket saanto a pulos masuktan. “Mangipasdekto ti Dios ti langit iti maysa a pagarian a saanto pulos a madadael.” (Daniel 2:44) Iturayanto ni Jesus ti intero a daga, ken saanto a mangipakita iti paboritismo. Isu ket naayat, naasi, ken patas, ken isurona dagiti tattao a tuladenda ti kinaayat, kinaasi, ken patas a panangtratona iti sabsabali.​—Basaen ti Isaias 11:9.

4. Ti maysa a nabileg a gobierno iturayannanto ti intero a daga

Dakdakkel ti autoridad ni Jesu-Kristo a mangituray ngem iti asinoman iti pakasaritaan ti tao. Basaen ti Mateo 28:18, sa pagsaritaan daytoy a saludsod:

• Kasano a dakdakkel ti autoridad ni Jesus ngem iti asinoman nga agturay?

Kanayon a masuktan dagiti agtuturay iti gobierno ti tao ken adda laeng espesipiko a lugar nga iturturayanda. Ti ngay Pagarian ti Dios? Basaen ti Daniel 7:14, sa pagsaritaan dagitoy a saludsod:

• Apay a nagsayaat a “saanto a madadael” ti Pagarian ti Dios?

• Apay a nagsayaat nga iturayanto dayta ti intero a daga?

5. Masapul a masuktan ti gobierno ti tao

Apay a masapul a suktan ti Pagarian ti Dios dagiti gobierno ti tao? I-play ti VIDEO, sa pagsaritaan ti sumaruno a saludsod.

VIDEO: Ania ti Pagarian ti Dios?​—Ababa a Paset (1:41)

• Ania ti nagbalin a resulta ti panagturay ti tao?

Basaen ti Eclesiastes 8:9, sa pagsaritaan dagitoy a saludsod:

• Panagkunam, masapul kadi a suktan ti Pagarian ti Dios dagiti gobierno ti tao? Apay?

6. Mannakaawat dagiti agturay iti Pagarian ti Dios

Gapu ta nagbiag kas tao ti Aritayo a ni Jesus, ‘maawatanna dagiti pagkapuyantayo.’ (Hebreo 4:15) Ti 144,000 a matalek a lallaki ken babbai a kaduanto ni Jesus nga agturay ket pinili ni Jehova manipud iti “tunggal tribu, lengguahe, ili, ken nasion.”​—Apocalipsis 5:9.

• Maragsakanka kadi a makaammo a maawatan ni Jesus ken dagiti kaduana nga agturay ti rikna ken situasion dagiti tattao? Apay?

7. Adayo a nasaysayaat dagiti linteg ti Pagarian ti Dios

Mangar-aramid dagiti gobierno kadagiti linteg a pampanunotenda a pagimbagan ken mangprotektar kadagiti residenteda. Ti Pagarian ti Dios ket addaan met kadagiti linteg a masapul a suroten dagiti iturayanna. Basaen ti 1 Corinto 6:9-11, sa pagsaritaan dagitoy a saludsod:

• Panagkunam, anianto ngata ti kasasaad ti lubong no suroten ti amin dagiti linteg ti Dios?a

• Panagkunam, husto laeng kadi nga ekspektaren ni Jehova a suroten dagiti iturayan ti Pagarian dagita a linteg? Apay?

• Ania ti mangipakita a makapagbalbaliw dagiti saan a mangsursurot kadagita a linteg?​—Kitaen ti bersikulo 11.

SUMARIO

Ti Pagarian ti Dios ket agpaypayso a gobierno idiay langit a mangiturayto iti intero a daga.

Rebiu

• Siasino dagiti agturay iti Pagarian ti Dios?

• Kasano a ti Pagarian ti Dios ket adayo a nasaysayaat ngem iti gobierno ti tao?

• Ania dagiti ekspektaren ni Jehova kadagiti iturayan ti Pagarian?

AGDISKOBREKA PAY

Ammuem ti imbaga ni Jesus nga ayan ti Pagarian.

“Adda Kadi iti Pusom ti Pagarian ti Dios?” (Artikulo iti website)

Apay a mas pilien dagiti Saksi ni Jehova ti agtulnog iti Pagarian ti Dios ngem iti gobierno ti tao?

Matalek iti Pagarian ti Dios (1:43)

Adalem no ania ti ibaga ti Biblia maipapan iti 144,000 a pinili ni Jehova a makipagturayto ken Jesus.

“Siasino Dagiti Mapan Idiay Langit?” (Artikulo iti website)

Ania ti nakakombinsir iti maysa a balud a babai a ti Dios laeng ti makaipaay iti pudpudno a kinahustisia?

“Nasarakak ti Solusion ti Kinaawan Hustisia” (Agriingkayo!, Nobiembre 2011)

Agturturayen ti Pagarian ti Dios. Asidegen dayta a mangaramid iti dadakkel a panagbalbaliw ditoy daga. Kitaenta ti dadduma a nagsasayaat a bambanag a mabalinmo a padaanan inton agturay ti Pagarian.

1. Kasanonto nga ipaay ti Pagarian ti Dios ti talna ken hustisia ditoy daga?

Inton gubat ti Armagedon, dadaelento ti Ari ti Pagarian ti Dios a ni Jesus dagiti dakes a tattao ken gobierno. (Apocalipsis 16:14, 16) Iti dayta a tiempo, naan-anayton a matungpal ti kari ti Biblia: “Iti saanen a mabayag, awanton dagiti managdakdakes.” (Salmo 37:10) Usarento ni Jesus ti Pagarian tapno sigurado nga addanto talna ken hustisia iti intero a daga.​—Basaen ti Isaias 11:4.

2. Kasanonto ti biag inton maaramiden ti pagayatan ti Dios ditoy daga?

Inton agturayen ti Pagarian ti Dios, “dagiti nalinteg kukuadanto ti daga, ket agyandanto iti dayta iti agnanayon.” (Salmo 37:29) Imadyinem nga agbiagkanto iti lubong nga amin ket nalinteg ken mangay-ayat ken Jehova ken iti maysa ken maysa! Awanton ti agsakit, ken agbiagton iti agnanayon ti amin a tattao.

3. Anianto ti aramiden ti Pagarian ti Dios kalpasan a madadael dagiti dakes a tattao?

Kalpasan a madadael dagiti dakes a tattao, agturayto ni Jesus kas Ari iti 1,000 a tawen. Iti dayta a tiempo, ni Jesus ken ti 144,000 a kakaduana nga agturay tulonganda dagiti tattao nga agbalin a perpekto. Inton agpatingga ti sangaribu a tawen, ti intero a daga ket napintaston a paraiso, ken naragsakton ti amin a tattao gapu ta agtultulnogda kadagiti linteg ni Jehova. Isublinton ni Jesus ti panagturay iti Amana a ni Jehova. ‘Masantipikarto [met laengen] ti nagan’ ni Jehova. (Mateo 6:9, 10) Mapaneknekanto a ni Jehova ket nasayaat nga Agturay a mangipatpateg kadagiti iturayanna. Dadaelento ni Jehova ni Satanas, dagiti demonio, ken dagiti agrebelde iti turayna. (Apocalipsis 20:7-10) Agnanayonto ti perpekto a kasasaad nga ipaay ti Pagarian ti Dios.

AMMUEM TI AD-ADU PAY

4. Pagpatinggaento ti Pagarian ti Dios dagiti gobierno ti tao

“Iturturayan ti tao ti padana a tao iti pakadangranna.” (Eclesiastes 8:9) Usarento ni Jehova ti Pagarianna a mangikkat kadagiti dakes nga epekto dayta a kinaawan hustisia.

Basaen ti Daniel 2:44 ken 2 Tesalonica 1:6-8, sa pagsaritaan dagitoy a saludsod:

• Anianto ti aramiden ni Jehova ken ti Anakna a ni Jesus kadagiti gobierno ti tao ken kadagiti mangsupsuporta kadagita?

• Base kadagiti nasursurom maipapan ken Jehova ken ni Jesus, apay a makasiguradoka nga umiso ken patas dagiti aramidenda?

5. Ni Jesus ti kasayaatan nga Ari

Kas Ari ti Pagarian ti Dios, adunto ti aramiden ni Jesus a pagsayaatan dagiti iturayanna ditoy daga. I-play ti VIDEO tapno makitam no kasano a naipakitan ni Jesus nga agpadpada a kayatna a tulongan dagiti tattao ken adda pannakabalinna nga inted ti Dios a mangaramid iti dayta.

VIDEO: Impakita ni Jesus no Anianto ti Aramiden ti Pagarian (1:13)

Idi adda ditoy daga, impakita ni Jesus dagiti aramidento ti Pagarian. Ania kadagiti bendision a nailista ditoy ti padpadaanam iti kasta unay? Basaen dagiti sumaruno a teksto maipapan kadagita a bendision.

6. Ipaayto ti Pagarian ti Dios ti nakasaysayaat a masakbayan

VIDEO: Kitaem ti Nagsayaat a Masakbayan! (4:38)

Basaen ti Salmo 145:16, sa pagsaritaan daytoy a saludsod:

• Ania ti mariknam a nakaammo a ‘penkento [ni Jehova] ti tarigagay ti tunggal sibibiag a banag’?

SUMARIO

Usarento ti Dios ti Pagarianna a mangitungpal iti pagayatanna. Pagbalinennanto ti intero a daga a paraiso a pagyanan dagiti nasayaat a tattao nga agdaydayawto ken Jehova iti agnanayon.

Rebiu

• Kasano a santipikaren ti Pagarian ti Dios ti nagan ni Jehova?

• Apay a patientayo a tungpalento ti Pagarian ti Dios dagiti kari iti Biblia?

• Ania kadagiti aramiden ti Pagarian ti padpadaanam unay?

AGDISKOBREKA PAY

Ammuem no ania ti Armagedon.

“Ania ti Gubat ti Armagedon?” (Artikulo iti website)

Ammuem dagiti mapasamak bayat ti inawagan ni Jesus a “dakkel a rigat.”​—Mateo 24:21.

“Ania ti Dakkel a Rigat?” (Artikulo iti website)

Kitaem no kasano a maimadyin dagiti pamilia nga agkakaduadanto idiay paraiso.

Panunotem nga Addaka Idiay Paraiso (1:50)

Iti artikulo a “Maburiboranak iti Adu a Saludsodko Maipapan iti Biag,” ammuem no kasano a nasarakan ti dati a rebelde iti autoridad ti sungbat dagiti saludsodna.

“Ti Biblia Balbaliwanna ti Biag” (Ti Pagwanawanan, Enero 1, 2012)