• Ginutugot “ti Natan-ok a Bambanag ti Dios”
    Ti Pagwanawanan—2002 | Agosto 1

    • Nagutugot nga Agtignay!

       4. Ania a padto ni Joel ti natungpal iti aldaw ti Pentecostes idi 33 K.P.?

      4 Idi naiparukpok ti nasantuan nga espiritu kadagiti adalan idiay Jerusalem, inrugida a dagus nga inranud kadagiti sabsabali ti naimbag a damag maipapan iti pannakaisalakan. Immuna a kinasabaanda dagiti tattao a naguurnong iti daydi nga agsapa. Dayta a panangasabada ti kaitungpalan ti naisangsangayan a padto, nga insurat ni Joel nga anak ni Petuel, walo a siglo sakbayna: “Iparukpokko ti espirituk iti tunggal kita ti lasag, ket ti annakyo a lallaki ken ti annakyo a babbai sigurado nga agipadtodanto. No maipapan kadagiti lallakay kadakayo, agtagtagainepdanto kadagiti tagtagainep. No maipapan kadagiti agtutuboyo a lallaki, makakitadanto kadagiti sirmata. Ket uray kadagiti adipen a lallaki ken kadagiti adipen a babbai kadagidiay nga aldaw iparukpokkonto ti espirituk . . . sakbay ti iyaay ti naindaklan ken nakaam-amak nga aldaw ni Jehova.”​—Joel 1:1; 2:28, 29, 31; Aramid 2:17, 18, 20.

       5. Iti ania nga anag a nagipadto dagiti Kristiano idi umuna a siglo? (Kitaenyo ti footnote.)

      5 Kayat kadi a sawen daytoy a mangibaon ti Dios iti maysa a kaputotan dagiti propeta, lallaki ken babbai, nga umasping kada David, Joel, ken Debora, ket usarenna ida a mangipadto kadagiti mapasamak iti masanguanan? Saan. Dagiti Kristiano nga ‘annak a lallaki ken babbai, adipen a lallaki ken adipen a babbai’ ket agipadtoda iti anag a tignayen ida ti espiritu ni Jehova a mangiwaragawag iti “natan-ok a bambanag” nga inaramid ken aramidento pay ni Jehova. No kasta, agserbida a pannakangiwat ti Kangatuan.a Ngem ania ti inaramid dagiti tattao?​—Hebreo 1:1, 2.